MATHIU 17
17
Jisu Ramil
(Mrk. 9:2-13; Luk. 9:28-36)
1Ni ka ruk suale Jisun Pitar, Jems le ama a naipang Johon ha a man tangbung sangna khat hin a tuang jui. 2Hale anmani ma don a man a mel a kan thul la, ama maisuo anga a var jui, hale ama puan le diar ha var anga a hong varjui. 3Hale enru, Mousi le Elia in an madonna an hong kando ama le an kanbiakjui. 4Hava han Pitar in Jisu jiang a hong ti, “Puma nang in na najot pe inko kein in hiva mun hin kan om hi asat, kein in hivahin tham inn an thum sinrei, nang rang khat, Mousi rang khat, Elia rang khat.”
5A man arilai pha han, enru acheklok sumphai ning anmani ha a khu de jui, jet lui thai lui a sum phai chung han rasa an khat in a hong ti, “Hivahi ka lungsiat tak ka pasalnai ke ani, kein amna chunga ka lungdo a tung, ama chong ri ha ngairu!”
6Hale a thiamruoingain an jet pha han, anmanin an khup a an bok, an khat om a tam an lui chit. 7Tak-ha Jisun a honga anmani ha a sit a ti, “Thuiru,” chit maru. 8Hale anmanin an mit an menga an hong en pha han Jisu ni lui a adang tu khat om lui mu lai ma u.
9Anmanin a tun tangbung tenna an hong chum han, Jisun chong abea a ti, “Nan lung mit nan mu hi Mi Pasalnai in a thi tenna a thui khir mak kar je, tu khat jiang om ri maru.”
10Hale a thiamruoingain ama jiang an dingkel la anti, “Ha aninko dantheingain Elija ning man a hong rang ke tia i ruia mo anti?”
11Hava han Jisun anmani jiang a shanga a ti, “Adik tak Elija ning man a honga phur rakip man om khir nati,” 12tak-ha kein nang ni jiang kati, hava ha ko Elija ha alui hong jui hale anmanin omchan lui jet ma u tak-ha anmanin an dei an lungdo ha ama jiang an lui tho jui, ha ang han Mi Pasalnai ham anmani kut chunga pong nati.
13Hava han a thiamruoingain jet na ranga, a man Johon Baptis ruia a ri ke ani.
Jisun Pasalnai Khonam Choi ha A mandam
(Mrk. 9:14-29; Luk. 9:37-43)
14Hale anmanin mitamngai jiang an hong han, mi an khat in ama jiang a honga, a khup a bilinga ama jiang a ti, 15Puma, ka pasalnai hi na lungsiat pero, ajarko ama hi a keia a tam a pong jui, ama hi mei le tui karra a chul chachak. 16Hiva jarra kein ama hi na thiamruoingai jiang ka lui hong tuang, tak-ha anmanin ama ha lui mandam tor ma u.
17Hale Jisun a shanga a ti, “O, takngai lui le misatlui miruolngai kein nang ni le i duk mo a sot kan om suam rang? Kein nang ni ha i duk mo a sot kinala duirang? A ma ha kei jiang hong tuongru. 18Hale Jisun seitan ha aranna, seitan ha ama tenna ha a suak jui, hale hava phalai tak han nai ha a dam jui.
19Hava suale thiamruoingain an thei jak Jisu jiang an honga anti, “Keini ning ama hi kan notchei torlui ijarra mo ani?”
20Han Jisun anmani jiang a ti, ajarko tak nanngai torlui jarra ani, hava jarra adik tak kein nang ni jiang kati, nang nin ancham ru khat tiatjak takngai na nan nei inko, nang nin hiva tangbung jiang tinanti, hiten nan phut sotenna kan thitro nantile kan thit nati, hale nang ni jiang anitor luirang ite om noning. 21Irakip hi nang nin nan tho torlui rang om mak.
Jisun A thina rang ha Ariret
(Mrk. 9:30-32; Luk. 9:43-45)
22Anmani ning Galili an om pha han Jisun anmani jiang a ti, Mi Pasalnai ha mingai kut chunga pek nanti u. 23Hale anmani ning ama ha that nanti u, hale ni thum chang na han ama thui khir nati, hava han anmanin a tam tak an lui pong,
Biakinn Sechom Pek Ruia
24Hale anmanin Kapernam ma an hong pha, biakinn khasana chomngain Pitar jiang an honga anti, nan oja hi biakinn khasana pek mak mo?
25A man a ti, a pek, hale a man inn sunga a hong lut han, Jisun ama jiang a hong ti, “Simon imo na ngaidon? Simleia rengngai ning tu jiang mo rampar animakle khasana an pek?” Anmani an naingai jiang mo animakle khuol mi jiang mo?
26Pitar in ama jiang a ti, “Khuolmingai jiang,” Jisun ama jiang a ti, “Ha aninko an naingai ko pe rang suakma.” 27Ha animakle, kein in anmani hi kei chi kei ok man om mak na rang, tuionglian na che nang koi va keiro, hale mantak a hong nga ha vachoiro hale nang in a bai na phong han, ruphai khat na mu rang ke; hava han lui nang kei rang le nang rang anmani jiang pero.
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.