MATHIU 13
13
Chimu Vorpa Tenna Tetan na
(Mrk. 4:1-9; Luk. 8:4-8)
1Hava nikhuo lenhan Jisu inn tenna a suak a tuionglian khamma a ong jui. 2Hale, mitamtak in ama jiang an hong kan chun jui, han a man rokuang khat sunga a lut a a ong jui; hale mitamngain tuionglian khamma an lui ngirra alui ti. 3Hava suale Jisun anmani jiang kungdin le kan ruaia chong tam tak alui ri; “Enru chimuvor an khat in vor ranga a hong suak jui. 4Hale a man hingahin a hongvor, a ru aviar ko lam sirra achula; vatengain an honga an chak jui. 5Aviar ning lung karra simlei omrem mak na han a chul, hale aviar ha simlei ha a thuk a om mak jarra a rak a hongmong. 6Tak-ha, nisat a lum pha han, an renga a char; hale a rajung an nei lui jarra an vuoilik an charjui. 7Hale aviar ning lingbuk karra a chul, hale ling ha a hong seia anmani ha a khu de jui. 8Tak-ha adangaiko simlei sat na mun na a chul, hale a ra a nei; aviar ning riakhat, aviar ning som ka ruk, a viarning somthum.”
9“Ngainarang kuor a nei amaning ngai rase.”
Tetan na Lungdo
(Mrk. 4:10-12; Luk. 8:9-12)
10Hale a thiamruoingain ama jiang an honga anti, iruija mo anmani jiang tetanna na pek nang in chong nari?
11A man anmani jiang a hong shanga a ti, “Ajarko vanrengram ruia a thuk chong jet na rang nang niko an napejui; tak-ha anmani ko pepe ma u.” 12Ajarko tu aninom, a nei ama jiang khel la pe nanti; hale a ra a tam nei nati, tak-ha tu aninom a nei lui ama ha alui neisha tenna lui khir nanti, 13Hiva jarra kein anmani jiang tetan na ka pek ka ri ani ajarko an enchunga mu ma u; hale an ngai chunga jet ma u, hale an lunga jet ma u. 14Hale tashanthei Isaia in alui ri chong ha, anmani jiang a tung jui ani, nang nin ngai ko ngainanti; jet tor noni che u, hale enko ennanti nang nin, mu chil noni che u. 15Ajarko hiva mingai lung hi a om jui, an mit an mu mak na rang le an kuarra an ngai mak na rang; an lunga an jet mak na rang le an hong kanheimak na rang; ngai na rang an kuar a ngar jui; hale an mit om an singjui, hava jarra anmani ka mandam rang ani.
16Tak-ha nang niko ravansat nan ni ajarko nan mit khet in nan mu hale nan kuar khet in nan jet jui. 17Ajarko kein nang ni jiang a thianga ka ri ke, tashanthei le midikngain nang nin nan mu hi an lui mu jot, tak-ha lui mu ma u; hale nang nin nan jet hi an lui jet jot, tak-ha lui jet tor ma u, tihi jetru.
Chimu Vor Tetan na Jisun A ri
(Mrk. 4:13-20; Luk. 8:11-15)
18Hiva jarra chimu vorra tetan na hi ngairu: 19Tu ang khat mi ning, rengram chong ha a ngai a; hale jet theimak, hava suale asat mak khat in a honga a lung sunga an lui vor ha a luipe khir ama lam sirra an vor ha ani. 20Tak-ha lung karra an vor ama ha ning, chong ha a jet le a rak ningsat le kan ruaia alui, 21ani nom ama jiang a rajung a nei mak jarra, a pha bongkhat jak, a ring; ajarko chong jarra pong na, khodengthei na, a mu han; kutshui kesuina hi a mulen. 22Ling karra an vor ama ha ning, chong ha a jet hale ramuol la lungdo le leisei ri a nei na rang ha ning chong ha a man kan torra; ama ha a ra nei lui a hong chang. 23Tak-ha simlei sat na chunga an vor ama ha ko chong ha a ngai a jet, a man kheldet a ra anei a aviar ning riakhat, aviar ning in som ka ruk aviar ning somthum a hongni.
Gehuru Tetan na
24A man anmani jiang tetan na dang khat a pek a hong ti, vanrengram ha ko luipuk a ru sat vor mi khat anga ani. 25Tak-ha mingain an jalkar ama a enda in a honga gehu karra ramsul ra avorra a che jui. 26Tak-ha a ru ha a hong monga a hongliana a ra a hong nei pha han, ramsul ham a hong kandangjui. 27Han a neipupa suakngain an honga ama jiang anti, apu, nang in asat ru ha na luipuk na vor nimak mo? Ha aninko ramsul om ija mo a om? 28A man anmani jiang a ti, ana enda khat in hivahi alui tho ani, suakngain ama jiang anti, “keinin kan chea kan hong manchun rang hi mo na dei?” 29Tak-ha a man a ti, hong manchun maru, ramsul ha nang nin nan manchun karra gehungai om phoide a jot. 30Gehu rasik pha a tung mak kar je an ninia ramsuam rase, rasik pha a hong tung kar hin kein a atngai jiang “Ramsulngai ha mankanchun inang hal na ranga alo loa khitru, tak-ha gehu ha ko kei ka inntea bukru,” tikati.
Anchamru Tetan na
(Mrk. 4:30-32; Luk. 13:18,19)
31A man anmani jiang tetan na dang khat a pek a hong ti, “Vanrengram ha ko mi khat ning anchamru a luibak alui puk a vor anga ani. 32Hiva hi ning a ru a dangngai nek a sin, tak-ha a hong mong pha han, a dang an liana nek a hongliana thing kungkhat a hong chang, hiva jarra vanna vatengain an hong vuanga ama a changngai han an rabu an vasin.”
Cholla Tetan na
(Luk. 13:20,21)
33A man tetan na a dang khat anmani jiang a ti, “Vanrengram ha ko chol anga ke, numei khat in bu ha arup thumma alui a a renga chol avachang maje a bi anga ani.”
Jisun Tetan na Aneiman
(Mrk. 4:33,34)
34Hiva rakip hi Jisun mitamngai jiang tetan na ha a ri ke, hale a man tetan na kan chel lui i om lui ri ma. 35Hivahi tasantheingain an lui ri ha tungtheina rang ani, “Kein tetan na ka bai long kata ramuol an phut lai tenna ruk a an lui thup rakip ha kei ning ri rang ka ni.”
Gehuru Tetan na Jisun A ri
36Hava suale mitamngai ha a manchea, hale inn sunga a lut jui, hale ama a thiamruoingain ama jiang an honga anti, “Luipuk a ramsulru jarra tetanna ha keini jiang a thianga na ri pero.”
37A man anmini jiang a hong shanga a ti, “A sat ru vor ama ha Mi Pasalnai ha ani. 38Luipuk ha ning ramuol ha ani, asat rungai ha rengram pasalnaingai ke, tak-ha ramsulru ha ning asat mak ramuol chunga a om mingai ha anni. 39Mi enlalla avorpu ha ning seitan ha ani, rasik pha ha ning ramuol torna ha ani, hale a atngai ha ning thaneithiangngai ha anni. 40Hiva jarra ramsul ha manchun nan ta, hale meija an hal rang, ramuol torna pha ha hi ang hin ni rang ani. 41Mi pasalnai ha ama thaneithiangngai ha hong tir na ta, ama ram sunga kutsuikesui le nun chan salui lui tho rakip manchun nanti. 42Hale mei khur sunga deng juan nanti anmanin hava mun han chap le harialna ni nati. 43Hava pha han midikngain, an pa rengram han simni anga hong varnanti, ngai na rang a kuar neipun ngai rase.
Anthup Neinun Sampar Tetan na
44Veikhatret vanrengram ko luipuk khat an thup; nei nun anga ani, mi khat in a mu a athupjui; hale ningsat a chea a maning a nei rakip a juara hale hava luipuk ha a chok jui.
Rangkachak Tetan na
45Veikhatret, vanrengram ko lal uol mi khat in lung man tam a tok anga ani. 46An khat om lung man tam khat a mu a, hale a chea a nei rakip jiang a juara hava a hong chok jui.
Rabu Tetan na
47Veikhatret, vanrengram ha ko tuionglian sunga an vorra nga a om rakip hongman chun na len khat anga ani. 48Hava ha ning a sip pha han, anmanin tuionglian khamma an kei sua; an onga asat lim ha an man chun na, ngabella an thun, tak-ha a satlui rakip ko an deng juan. 49Ramuol tor ni han hingahin ni nati, thaneithiangain hong nan ta; midikngai karra misatluingai ha khuisen nanti. 50Hale anmani ha mei khur sunga deng juan, nanti, hava mun han chap le harialna ni nati.
A thar Dik le A luisa
51Jisun anmani jiang a ti, hiva rakip hi nan jet jui mo? Anmanin “Kan jet jui,” anti. 52Hava suale a man anmani jiang a ti, “Danthei rakip jiang an lui man chu anga vanrengram ha ko ama a nei rakip alui le a thar hong keisuana inn neipupa anga ke ani.”
Nazaret A Jisu An jot lui
(Mrk. 6:1-6; Luk. 4:16-30)
53Atun Jisun tetannangai hi a ri suale, hava mun tenna a kir jui. 54Hale a man a khuo tak han a honga, a man anmani Sainagok sunga alui man chu; hava han anmanin an ngak an hong ti, “Hiva mi ning luising le chuanlian tho tornangai hi hon mo a mu?” 55A ma hi mistry a nai mo nimak? A ma a nu om Meri a naipangai om Jems, Josep, Simon le Judas, nima u mo? 56Hale a char nu an renga keini le kan om mo nimak? Ha aninko, hiva rakipngai hi hon mo a mu? 57Hiva jarra anmanin ama ha lui jot lai ma u, tak-ha Jisun anmani jiang a ti; “Tashanthei mi ama ram sung le an inn sunga ni luia ram lakna mi ning ko chitlejak an lui nei ani. 58Hale a man hava han, chuanlian tam tak lui tho mak ajarko anmanin takngai ma u.”
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.