MATHIU 10
10
Tirlon Somleini
(Mrk. 3:13-19; Luk. 6:12-16)
1Hale ama han a thiamruoi somleiningai a kuia, a thavang satlui notchei na rang, hale a nat rakip le ri le rai mandam na rang ranak anmani jiang alui pek. 2Tirlon somleini mingngai ha hi ani: an khat chang na Pitar anti Simon, hale a naipangpa Andrew Zebedi a nai Jems hale a naipangpa Johon. 3Philip le Bartholomew, Thomas le Mathiu khasana chompa, Alphaeus a nai Jems hale Lebbaeus animakle Thaddaeus om anti. 4Kanan na Simon hale Judas Iskariot a en dangai kut chunga Jisu pekpa.
Somleiningai Chuan tho
(Mrk. 6:7-13; Luk. 9:1-6)
5Hiva somleiningai hi Jisun chong abea a tirra a ti. Jatdangai lam ma che maru, hale Samariangai khopui han nom lut maru. 6Tak-ha Israelngai inn sunga a mangsha belram ranga cheru. 7Hale nan che han chong sem unlang tiru, vanrengram ha a nai jui, 8a nat mandamru, pangphar ritongngai man thiangru, a thi ngai man ringkhirru, seitanngai ha not cheiru ariam ma nan mu ha nang nin ariam ma peru. 9Nan sekhui han rang ka chak, ruphai, pethrai om choi maru, 10nan khuol lon na rang tia, kuntai, diar le thiang re kekok kanthua kan song maru, ajarko chuan sin min chak le nek a mu rang hi a rahui ani.
11“Khopui han animakle khuo khat nan lut karra mi sat ennang jongru, hale nan chemak kar je ama jiang om ru. 12Inn sunga nan lut pha han chubeibukru. 13Inneipu ha rahui suak mi aninko, nan lunghip ha inn han hong rase, tak-ha rahui suak lui mi aninko nan lunghip ha nang ni jiang hong kir rase. 14Hale tu aninom nang ni ha an nadonlui, nan chong om an ngai lui aninko, hava inn animakle khopui tenna nan hong suak le nan ke dir ha thingthakru. 15A thianga kein nangni jiang kati ani, chongtan na nikhuo han hava khopui ha Sodom le Gomara nek a khel la a tat pe rang ke.
Pong Khodengthei Hongna
(Mrk. 13:9-13; Luk. 21:12-17)
16“Enru, melang karra nang ni ha belram anga ka na tirke ani, hava jarra rul anga chingru hale vatuktrun anga nan lung man satru. 17Tak-ha mingai karra kan ning thei ru, ajarko anmanin ulianrupngai jiang na pe nanti, hale Sainagok sunga nang ni ha esella nave nanti. 18Hale kei jarra nang ni ha ram vai hom ulian le rengngai mai kung a animakle jatdang jiang kei ka shakhi ranga na tuang nanti. 19Tak-ha anmanin an na pek pha han, ija mo kan ri rang tia nan ning man dong maru, ajarko imo kan ri rang ti ha hava pha tak han nang nin nan ri rang ha a maning na manjet nati. 20Ajarko nan ri rang chong ha nang ni tenna nimak, tak-ha nan lung sunga nan pa thavang in a hong ri rang ani.
21“U le naingai ning a u a nai ha, hale pa ning a nai ha thina ranga pek nati, hale an naingain an pa an nu jiang enda na nei nan ta that nanti, 22Hale nang ni ha kei ka ming ruia mirakip ning na ma tir nanti, tak-ha a torna khan a dui tor ama ha san ring nati, 23Tak-ha anmanin nang ni ha hiva khopuia khodengthei na an na pek inko, a dang khat thianga tanru, ajarko kein nang ni jiang a thianga ka na tia ni, mi pasalnai ha ahongma nang nin Israelngai khopui lim lui tung noni che u.
24“Thiamruoi khat ning a oja nek a lian nimak, animakle suak khat ning ama a neipu nek a lian nimak. 25Thiamruoi khat in oja anga, suak khat in a neipu anga anile a jot jui, anmanin inneipu ha Belzabul an tinko, ama a inn na omngai ha ko i duk a mel siat a an kui rang mo?
Tu mo Chit rang Om?
(Luk. 12:2-7)
26“Hiva jarra anmani ha chit maru, ajarko thuptor lui rang an khu de i te khat om ma, hale jet tor rang i te khat om ma. 27Ajing karra nang ni jiang ka ringai ha, a varna han riru, hale nan kuorra nan jet ha inn chunga kal in lang khekru. 28Tak sa thattor tak-ha thavang thattor lui ha chit maru, tak-ha thavang le tak sa anni a mei khur sunga a manmang tor ama ha chitru. 29Siarvachek anni a peisa khat an juar mo nimak? Hale nang ni karra an khat jak om nan pa lungdo ni lui a simleia chul noni che u. 30Tak-ha na lu chunga sam om rakip amasing a renga an teljui. 31Hiva jarra chit maru, nang niko siarvachek tam nek a nan man a tam
Khrista rang a jot le Jotlui
(Luk. 12:8-9)
32“Ajarko tu aninom mingai maikunga kei ana jot ha kein nom ama ha vanram ma om ka pa maikunga ka jot rang ke. 33Tak-ha tu aninom mingai maikunga kei ana jot lui ha kein nom ama ha vanram ma om ka pa maikunga jot noni king.
Lunghip nimak Chemsei
(Luk. 12:51-53; 14:26-27)
34“Kei ning ramuol la lunghip a hong choi tia ngaidon maru kei lunghip hong choi making tak-ha chem sei lam ka hong choi ani. 35Ajarko a pa le a pasalnai, a nu le a numeinai, hale a muinu le a tarpi kan jot mak na ranga kei ka hong ani. 36Hale mingai ning kan enda pui ha ko ama a inn sung tak-ha ni nati.
37“A pa animakle a nu ha kei nek a lungsiat mi ha kei ranga rahui suak mak, hale a pasalnai, animakle a numeinai ha kei nek a lungsiat det ama ha kei ranga rahui chang mak. 38Hale ama a khros choi lui a kei kanuk ana jui ha kei ranga rahui suak mak. 39A ringkhuo a kan san ring ama ha mang nati, hale kei ranga a ringkhuo a manmang ama ning mu khir nati.
Loman Tum
(Mrk. 9:41)
40“Nang ni ana lui mi ha ning kei ha ana lui ani, hale kei ana lui mi ha ning kei ana hong tir pu ha alui ani. 41Pathian tashanthei minga tashanthei khat a don mi ha tashanthei khat tum rang ha mu nati, hale mi dik an khat ha mi dik khat minga a don mi ha mi dik khat in a tum rang ha mu nati. 42Hale tu aninom ashinngai karra ashin khat hi thiamruoi minga tui hai khat a pek inko, kein nang ni jiang kati ama tum rang ha ariam ma mang noning.”
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.