Génesis 6
6
Énxet'ák élmasagcha'a apkeltémakxa
1Xama axta apxámeykekxo énxet keso náxop, apkelwet'ak axta apketchek kelwán'ák, 2apwet'ak axta Dios apketchek éltaqmela xa kelán'a nak. Yetlókok axta han apkelyéseykha chá'a xama neyseksa m'a ekyókxoho nak, apmeyk axta han chá'a m'a apkepmenyéxa enxoho chá'a. 3Keñe axta Wesse' egegkok aptáha s'e: “Magwohok sa' kaxwók kawegqohok apha énxet, hakte megkatnehek chá'a megyetsapma m'a. Ciento veinte apyeyam sa' aqsa chá'a néxa apha.”
4Apkelánteyepmeyk axta énxet apkelwenaqte keso náxop, cham'a apkelyepetcheya axta Dios apketchek ma'a apketchek nak énxet'ák, yaqwayam enxoho elwetaksek étchek ma'a, tén han natámen axta xa. Cháxa énxet'ák apkelyennaqte apkelxénamap axta chá'a ekyókxoho yókxexma m'a nano' axta.
5Apwet'ak axta Wesse' egegkok ekyawa agko' ekmaso apkeltémakxa énxet'ák keso náxop, élxéneykencha'a aqsa apkelwáxok wánxa elanagkok ma'a aqsok ekmaso nak. 6Chaqhak axta apwáxok apkeláneya énxet, yetlo élapwayam apwáxok axta 7aptáhak se'e: “Amasseksek sa' ko'o énxet keso náxop, ektáha axta sélane, tén han ma'a ekyókxoho aqsok nawha'ák megkalmeymentakcha'a nak, tén han ma'a élpexyaweykegkoho nak náxop, tén han ma'a náta. ¡Chaqhak ewáxok ko'o séláneya!”
8Taqmeleykha axta eyke apwáxok Wesse' egegkok apkelányo m'a Noé.
Noé yántakpayhe ekyawe apagkok
9Keso ektémakxa axta ekxénamaxche apha Noé s'e: énxet ekpéwomo aptémakxa axta Noé, elyahakxohok axta chá'a m'a Dios, wánxa axta aqsa han apxakko' chá'a apkeláneya ektémakxa apmopmenyého Dios, nepyeseksa m'a énxet'ák aphamakxa axta. 10Apqántánxo axta apketchek ma'a Noé, cham'a Sem, Cam, tén han Jafet.
11Apwet'ak axta Dios ekyágwokmoho agko' ekmaso nentémakxa keso náxop, tén han magésso agyennaqtésha egyempehek. 12Apyókxoho énxet'ák axta apnaqtawásamákpok. Xama axta apwet'a Dios ekyágwokmoho ekmaso nentémakxa keso náxop, 13aptáhak axta apcháneya Noé s'e: “Peyk ko'o amasséssók apyókxoho énxet, cha'a keñamak ekxámokma nak negyennaqteyáseykha egyempehek keso náxop, amasséssók sa' ko'o xa, tén han ma'a ekyókxoho yókxexma nak keso náxop.” 14Elána sa' xama yántakpayhe ekyawe, yántéseksek ekha nak agye', elanák sa' han awáxok ma'a kañe' nak, eláhapmakha sa' han meteymog égmenek ma'a ekyókxoho élyagqáxeykha nak yántakpayhe, kañe' awáxok tén han yókxexma, yaqwayam megkatxehek yegmen. 15Elána sa' yántakpayhe s'e ekwánxa nak ekwenaqte: ciento treinta y cinco metros sa' etnehek ekwegqakxa, keñe sa' veinte y dos metros náxet mók ma'a ekpayhakxa nak, keñe sa' trece metros náxet mók ma'a ekmahéyak nak néten. 16Ántánxo awáxok sa' elána', xama átog étkok náxet metros yaqwayam kammok ma'a eyapma nak átog, yetlo xama átog ma'a nekha nak. 17Wáphaksek sa' ko'o ekmámeye ekyawe agko' keso náxop, yaqwayam sa' kápok yegmen xapop, kamasséssók sa' ekyókxoho aqsok ekha nak élennama ekyókxoho yókxexma keso náxop, kaletsapok sa' ekyókxoho aqsok ekhéyak nak néten xapop. 18Alának sa' eyke ko'o ekhémo mók sélpaqhetchásamáxkoho exchep, elántexek sa' apketchek ma'a yántakpayhe, tén han aptáwa', tén han aptánegken'ák nak, tén han xép. 19Exatmok sa' han kañe' yántakpayhe m'a ekyókxoho aqsok nawha'ák élleykha nak keso náxop, xama kennawók sa' chá'a, tén han xama kelwána, yaqwayam sa' kalwomok teyp, ekhawo nak xép. 20Kalántexek sa' chá'a exchep xamók yántakpayhe ánet aqsok nawha'ák, cham'a ekyókxoho ektémakxa nak chá'a, cham'a náta, tén han ma'a aqsok nawha'ák megkalmeymentakcha'a nak, tén han ma'a élpexyaweykegkoho nak xapop, yaqwayam sa' kalweynchamha chá'a makham. 21Yánchásekxa sa' nahan mók ektémakxa nento, eltaqmelches sa' nahan, yaqwayam sa' xép kaxek apto, tén han ma'a aqsok nawha'ák nak.
22Apkelanak axta Noé m'a ekyókxoho apkeltamhókxa axta etnehek Dios.
Enxet Lengua Sur Bible © Paraguayan Bible Society, 2015.