SAN LUCAS 24
24
Aplhaticjangvoycamlha Jesús
(Mt 28.1-10; Mr 16.1-8; Jn 20.1-10)
1Alhtooc anco alhnancoc semana allhinga alhta quilvanaa. Inquilmiyaclhec alhta tacjalhop. Inquilsovquic alhta asoc masis, yoyam catsisquisic apquitsepma. Allhalhmaa alhta moc quilvanaa. 2Inquilvitangvoclhec alhta avalhoc mataymong acmayja atong. 3Yejemoc alhta alantalhna tacjalhop. Am alhta colvitac apquitsepma. 4Inquiltamjam alhta avalhoc quilvanaa. Pilapcasquic alhta alvita apcanit enlhit apcanvaa. Alyinmomo alhta apquilantalhnama. 5Inquilacac alhta quilvanaa. Inquilvayvesentac alhta apcatcoc. Yejemoc alhta aptomja apquilanya enlhit:
—Apjalhnanco nac Jesús. ¿Inquiltamjo ya quellhiya colvitac etyisam avalhoc mataymong? 6Aplhaticjangvocmec lhac Jesús, am enlhit ma asi. Collhen avalhoc quellhiya actemaclha alhta appayvam apmaclha alhta yoclhilhma Galilea: 7“Omalhcac sat coo sicvisay Sictiyam Sictomja Enlhit. Colhic sat seyantama apnaclha enlhit meyascalhma. Colhic sat seyipitsa asoc timyescama. Natqui acnim sat cotnejic olhaticjangvomoc mocjam” —alhta intomjac appayvam.#Mt 16.21; 17.22-23; 20.18-19; Mr 8.31; 9.31; 10.33-34; Lc 9.22; 18.31-33.
8Yejemoc alhta alyasingvoclho actemaclha appayvam. 9Inquilyamyeclho alhta tacjalhop altajaclho mocjam. Inquiltimnasquic alhta amyaa once apóstoles apquilapajasomap najan aplhamoclhojo enlhit. 10María Magdalena, najan Juana, najan María Jacobo inquin, najan moc quilvanaa altomja altimnascayclha amyaa. 11Apquilyascacmec alhta allhanma quilvanaa. Apquilanayquic alhta acmovan amyaa.
12Yejemoc alhta appecjamcaa Pedro. Apquinincaclho alhta tacjalhop aptiyonamcojo congne. Apvitac alhta apvamlha apava appilhtetomap alhta. Yejemoc alhta aptajavo mocjam tingma pac. Inquilquitamquic alhta apvalhoc Pedro asoc actomjaclha apvitay.
Jesús apyascama tingma Emaús
(Mr 16.12-13)
13Apquillhinquic alhta acvamlha acnim nac jay apcanit apquiltamsoycaoc. Apquilmiyaclhec alhta tingma apvisay Emaús. Invocmec alhta malha once kilómetros tingma Jerusalén. 14Naysicsa apquillhingam alhta apquilpamejitsacpo. Apquillhenquic alhta asoc apquilvitaycamco alhta. 15Naysicsa apquilpamejitsomap alhta apyipitcangveclho Jesús. Apquillhingavoc alhta lhama. 16Am alhta elyicpilcac aptomja apquillhalhma. Malha melvitay alhta intomjac. 17Aptomjac alhta apquilanya Jesús:
—¿Soc asoc apquillhena apquilpamejitsacpo nac naysicsa apquillhingam? ¿Soctomja alyitnocjavo nac apquilvalhoc? —alhta aptomjac.
18Apcatingmavoc alhta lhama apvisay Cleofas:
—Apquilyasamcoc aplhamoclhojo enlhit actomjaclha alhta tingma Jerusalén. ¿Aplhapco ya lhquip meyasamco? —alhta aptomjac.
19Aptomjac alhta apquilanya Jesús:
—¿Soc lha asoc qui? —alhta aptomjac.
Apquilatingmavoc alhta:
—Jesús co Nazaret alhta. Profeta apyimtalhnamo alhta Dios aplingascama. Apmopvan aptamjaycam alhta najan apquiltimnaycam napato Dios najan napatavo enlhitaoc. 20Apyipitsomap alhta asoc timyescama ayinyema alhta apquilimja apmamyi sacerdotes najan apquilviscaa apquilpamejitsomap. Aptimesomap alhta apmapsom. Apcanyacpec alhta ematong. 21Ningiljalhnec alhta elvomsic tap enlhitaoc Israel. Natqui acnim intomjac siclhena nac. 22Pilapcasquic lhac singiltimnasquiclho quilvanaa. Alhtooc anco lhac almiyeclho maa tacjalhop. 23Am nic lhac colvitac apquitsepma. Yejemoc lhac altajingveclho singiltimnascactamo alvita ángeles Dios apquilasinancama. Aptomjac nic lhac apquilanya: Aplhaticjangvocmec Jesús —nic lhac aptomjac. 24Yejemoc lhac apquillhinga ingnaymacoc. Apquiltiyoningvoclho tacjalhop. Apquilvitangvoclhec nic lhac actomjaclha allhanma quilvanaa. Am lhac elvitac Jesús —alhta apquiltomjac.
25Aptomjac alhta apquilanya Jesús:
—Melyascamco nac quellhip. Alyasquiyam apquilvalhoc pac quellhip amyaa apquillhanma ilhnic nat profetas Dios apquillingascama. 26¿Copvanqueje ya alhta metac acmasca Cristo yicpintama yoyam colhic ayaco? —alhta aptomjac.
27Yejemoc alhta apquilhicmosa actemaclha ilhnic nat appayvam Moisés najan aclhamoclhojo profetas appayvam Dios apquillingascama. Apcajasoc alhta Jesús aplhena actemaclha aclhanma vaycajac aplhenamap.
28Apquilamquitvoclhec alhta tingma apquilmiyaclhilha. Apquiltomjac alhta Jesús evoclhojoc tap. 29Apquilinlhanacmec alhta apquillhalhmaa, apquilanya elhic:
—Ilhnata lhip lha. Intalhnacme, quitlhincasquic cotnejic alhtaa —alhta apquiltomjac.
Aptalhningvocmec alhta Jesús tingma, yoyam elhojoc lhama. 30Lhama alhta apnacmo lhama nicja mesa. Apmec alhta quilpasmongam Jesús. Yejemoc alhta aptomja gracias Dios Ingyapam. Apyaptacpec alhta. Apquilmesquic alhta, yoyam eltovamcoc. 31Yejemoc alhta apquilyicpilcangvocmo. Pilapcasquic alhta apsapona Jesús. 32Yejemoc alhta apquilpamejitsacpo:
—Inquiltamilaclho lha inyicje ingilvalhoc naysicsa ninlhingam lhac. Singiltimnasamcaa lhac singilpeyvescasiclho lhac actemaclha aclhanma vaycajac —alhta apquiltomjac.
33Yejemoc alhta apquilpecjamcaa. Apquiltajavoc alhta mocjam Jerusalén. Apquilvitangvoclhec alhta once apóstoles apquilapajasomap apquilaneyquiclha najan maa apquillhalhmaa. 34Apquililtimnam alhta apóstoles apquilapajasomap:
—Nasoc aplhaticjangvocmo Visqui ingac. Simón lhac apvitay —alhta apquiltomjac.
35Yejemoc alhta apquiltimnasamcaa co Emaús actomjaclha alhta nalhit amay. Actemaclha apquilyicpilcangviyam naysicsa apyaptama quilpasmongam Jesús.
Jesús nipyesicsa apquiltamsoycaoc
(Mt 28.16-20; Mr 16.14-18; Jn 20.19-23)
36Naysicsa apquilpamejitsomap alhta apquiltamsoycaoc apquiningvactamo Jesús nipyesicsa. Appayvesa alhta:
—Eltamilsojo apquilvalhoc quellhip —alhta aptomjac.
37Pilapcasquic alhta, avanjec alhta apquilay. Apquilanayquic alhta elvitac somquic quilyicjamo. 38Aptomjac alhta apquilanya Jesús:
—¿Soctomja selaca nac quellhip? ¿Soctomja alyascacmo nac apquilvalhoc quellhip? 39Quip elanojo emeoc najan emancoc. Coo nac. Quip jelmongvojo, jelanojo coo. Sicyovoclhojo innac coo. Am coyitnac ayimpejic somquic quilyicjamo najan alhquipcoc —alhta aptomjac.
40Natamin apquiltimnascama alhta aplhicmosa apmeoc najan apmancoc. 41Apquilyascacmec alhta mocjam ayinyema alpayjayclha apquilvalhoc najan acpilapquiscama apquilvalhoc. Aptomjac alhta apquilanya Jesús:
—¿Yitne ya nintom? —alhta aptomjac.
42Yejemoc alhta aplhoca nicja quilasma macyalhalhama najan yamyovjene. 43Apmec alhta Jesús. Aptovquic alhta napatavo. 44Aptomjac alhta apquilanya Jesús:
—Eycaso sicpayvam siltimnascama alhta quellhip, sicmaclha alhta lhama quellhip. Yoyam alhta cotmongvomoc nelha aclhanmaclha vaycajac. Actemaclha selhanma Moisés apnatalhescama najan apnatalhescama profetas Dios apquillingascama najan vaycajac Salmos —alhta aptomjac.
45Apyascasingvocmec alhta Jesús actemaclha aclhanma vaycajac actalhesomalhca nano. 46Aptomjac alhta Jesús apquillhicmosa:
—Eycaso intomjac nic nat actalhesomalhca: Ematong sat Cristo. Natqui acnim sat cotnejic elhaticjangvomoc mocjam nipyesicsa apquilmasquingvaycmo. 47Colngalhcac sat amyaa lhalhma anco. Tingma Jerusalén sat cotyapoc amyaa. Elanyacpoc sat enlhitaoc elyanmongsic apquilvalhoc, yoyam colmascosalhcac melyascalhma. 48Eltime sat quellhip apquillingascama sicvisay. 49Quip elanojo. Pac ongvapajacsic sat aplhanma coo Tata ellhovac sat quellhip.#Hch 1.4. Elhnam sat quellhip tingma Jerusalén acvocmo apquillhoy apquilmopvan ayinyema netin —alhta aptomjac.
Jesús apmiyayclha netin
(Mr 16.19-20)
50Apnalaclhec alhta Jesús apquiltamsoycaoc. Apquilvoclhec alhta tingma Betania. Yejemoc alhta apmiyaseclho netin apmeoc. Apquilmalhnesquisa alhta Jesús asoc altamila apquiltamsoycaoc. 51Naysicsa apquilmalhnesquiscama alhta apmiyaclho netin.#Hch 1.9-11. 52Apquilpayasoc alhta apquiltamsoycaoc. Yiplovcoc alhta apquilitsovascama apquiltajaclho tingma Jerusalén. 53Apquilacoc alhta mataa Dios congne tingma apponquinomap. (Amén.)
