SAN JUAN 9
9
Jesús aptamilquisquiyam enlhit mepqui apataoc
1Naysicsa aplhingam alhta Jesús aptajanyavo enlhit mepqui apataoc. Ayenmo congne mepqui apataoc. 2Apquiltomjac alhta apquiltamsoycaoc apquilanya Jesús:
—Visqui, ¿so actema ayenmo nac congne mepqui apataoc as enlhit? ¿Naso ya ayinyema meyascalhma apanco? ¿Inlhoyqui laa ayinyema meyascalhma apyap najan inquin? —alhta apquiltomjac.
3Apcatingmavoc alhta Jesús:
—Am conyemac meyascalhma apanco. Am conyemac najan meyascalhma apyap najan inquin. Eyca ayinyema, yoyam cotalhca actemaclha aptamjaycam Dios Ingyapam apmopvan etamilquiscomoc. 4Acnim anco mocjam. Incaymalhquic ollanac aptamjaycam aptomja seyapajascama. Cotnejic sat alhtaa, mongvanquejec yoyam ongiltamjam. 5Coo sicvisay ayitsayolhma lhalhma anco naysicsa sictamjaycam as nalhpop —alhta aptomjac.#Mt 5.14; Jn 8.12.
6Natamin appamejitquiscama alhta Jesús apquilpotsam apyamanong nalhpop. Apquillanac alhta yelpa apyamanong. Apquiltilhnasamquic alhta apataoc as enlhit.
7Aptomjac alhta Jesús apcanya:
—Ingva, iyapasquim yingmin poncalhva acvisay Siloé, ningiltimem nincoo “Apcapajasomacpilha” —alhta aptomjac.
Apyasquic alhta as enlhit. Apyapascacmec alhta yingmin. Yejemoc alhta apvitaclho olhma aptajingveclho. 8Yejemoc alhta apquilpamejitsacpo apnaymacoc apquiltomja apquilvitaycamco apquilanjingvoyam:
—¿Jave ya enlhit apquilanjingvoyam alhta mataa? —alhta apquiltomjac.
9Poc alhta apquiltomjac mataa:
—Calha —alhta apquiltomjac.
Poc alhta apquiltomjac:
—Jave lhaja, apmo lhaja —alhta apquiltomjac.
Yejemoc alhta aplhenacpo apanco:
—Coo nac, apquillhena nac lha —alhta aptomjac.
10Apquiltomjac alhta apquilanya enlhitaoc:
—¿Jalhco actomja altamilaclho nac apataoc? —alhta apquiltomjac.
11Apcatingmavoc alhta enlhit:
—Jesús lhac apvisay enlhit aptomja setamilquisquiyam. Yelpa lhac aptomja seltilhnascasamco ajataoc. Aptomjac lhac seyanya: Ingva, iyapasquim yingmin poncalhva Siloé —lhac aptomjac. Acyasquic lhac coo. Acyapascacmec lhac yingmin. Yejemoc lhac sicvitaclho olhma —alhta aptomjac.
12Apquiltomjac alhta apquilanya:
—¿Jalhcojo apyasa as enlhit? —alhta apquiltomjac.
Apcatingmavoc alhta enlhit:
—Lhaja, moyasamcoc coo —alhta aptomjac.
Apquilmalhnayclho fariseos enlhit aptamalviyam
13Yejemoc alhta apquilyantamaclho apnamcaclha fariseos enlhit aptamalviyam, mepqui apataoc alhta. 14Acnim ningnayclha alhta intomjac apquillanay yelpa Jesús, yoyam elyapitsiclha apataoc. 15Yejemoc alhta apquililmalhnamcaa fariseos:
—¿Jalhco actomja apvitaclho olhma lhip? —alhta apquiltomjac.
Apcatingmavoc alhta enlhit:
—Yelpa lhac eltilhnascasamcoc ajataoc. Acyapasquic lhac yingmin. Yejemoc lhac sicvitaclho olhma —alhta aptomjac.
16Apquilatingmavoc alhta fariseos:
—Jave Dios Ingyapam apcapajascama as enlhit. Am etamilcasac acnim ningnayclha —alhta apquiltomjac.
Apquiltomjac alhta poc:
—Meyascalhma nac as enlhit. ¿Jalhco actomja apcopvanco nac ellanac aptamjaycam sinpilapquiscama? —alhta apquiltomjac. Am alhta colhnoc moc apquilvalhoc. 17Apquiltomjac alhta mocjam apquilanya enlhit aptamalviyam:
—¿Co lhcac aptomja apcanya lhip enlhit aptomja aptamilquisquiyam apataoc? —alhta apquiltomjac.
Apcatingmavoc alhta aptamalviyam:
—Ayanayc coo profeta, Dios aplingascama —alhta aptomjac.
18Apquilyascacmec alhta judíos aptimem mepqui apataoc siclho najan apvitayclho olhma quilhvo. Yejemoc alhta apquilevamcaa apyap najan aptomja aptamalviyam. 19Apquiltomjac alhta judíos apquilanya apyap:
—¿Lhip ya apquitca aso? ¿Naso ya ayenmo congne mepqui apataoc? ¿Co lha actomja apvitaclho olhma mocjam? —alhta apquiltomjac.
20Apcatingmavoc alhta apyap najan inquin:
—Ningyasamcoc nincoo aptomja nintamongvoyam. Ayenmo congne alhta aptimem mepqui apataoc. 21Am ongilyasamcoc nincoo actomjaclha apvitaclho olhma. Am ongilyasamcoc najan enlhit aptomja aptamilquisquiyam. Elilmalhna sat quellhip. Apyimnanic aptomja, apvanquic ingyatingmojo apanco —alhta aptomjac apyap.
22Am alhta coyacmoc elhenic apyap najan inquin. Apcacac alhta apquiltemaclha judíos. Am alhta coyeycajalhcac moc apquilvalhoc judíos. Apquililtamjoc alhta mataa elantipsic apcaneyquiclhilha moclhama enlhit aptomja aplhanma apvisay Jesús aptomja Cristo. 23Eycaso ayinyema apyap appayvam: “Elilmalhna quellhip, apyimnanic aptomja.”
24Yejemoc alhta apquilevamcaa mocjam enlhit aptamalviyam, mepqui apataoc alhta. Apquiltomjac alhta apquilanya:
—Ipeyvacsojo sat aplhanma napato Dios Ingyapam. Ningyasamcoc nincoo, enlhit meyascalhma nac maa —alhta apquiltomjac.
25Apcatingmavoc alhta aptamalviyam:
—Nasoc lhaja meyascalhma as enlhit, paj lhaja. Moyasamcoc coo. Lhama asoc coo acyasamco. Motay olhma alhta coo, quilhvo eyca sicvitaclho olhma mocjam —alhta aptomjac.
26Apquiltomjac alhta mocjam apquilanya:
—¿Co lha aptomjaclha apquilyapitseclho apataoc? —alhta apquiltomjac.
27Apcatingmavoc alhta aptamalviyam:
—Altimnasquic lha inyicje. Am eyca eljalhnoc quellhip. ¿Apquililtamjo ya ellinga mocjam lhama? ¿Apquililtamjo ya quellhip eltimjic apquilyiploycam Jesús? —alhta aptomjac.
28Apquilnatjavoc alhta judíos. Apquiltomjac alhta apquilanya:
—Lhip eyca aptomja apyiploycam as enlhit. Nincoo eyca ningyiploycam Moisés. 29Ningyasamcoc nincoo Dios Ingyapam aptomja appamejitquiscama ilhnic nat Moisés. Eyca mongilyasamcoc nincoo apquinyemayaclha as enlhit —alhta apquiltomjac.
30Apcatingmavoc alhta aptamalviyam:
—Pilapcasquic coo siclinga actemaclha melyascaoc quellhip apquinyemaclha as enlhit. Nasoc anco aptomja selyapitcasquiclha ajataoc —alhta aptomjac. 31Ningyasamcoc nincoo, am ingyajalhnoc Dios Ingyapam enlhit meyascalhma appayvam. Apvamlha enlhit aptomja apquilyajayquiclho najan apyiplovquiscama apmayjayoclha, ingyeylhojoc sat Dios Ingyapam.#Pr 15.29. 32Am nic nat colngamalhcac amyaa lhalhma anco apvisay enlhit apmopvan etamilquiscomoc ayenmo congne mepqui apataoc. 33Am alhta ancoc ingyinyemac Dios Ingyapam as enlhit, copvanquejec ellana lhama asoc —alhta aptomjac.
34Apquiltomjac alhta mocjam apquilanya:
—Ayenmo congne meyascalhma nac lhip. ¿Apquiltamjo ya lhquip jingillhicmocsic nincoo? —alhta apquiltomjac. Aptipsacpec alhta enlhit aptamalviyam.
Cotay olhma apquilvalhoc enlhit
35Aplingangvocmec alhta amyaa Jesús aptipsomap mepqui apataoc aptamalviyam alhta. Lhama alhta aptajanyaclho Jesús. Aptomjac alhta apcanya:
—¿Am ya lhquip eyascacmoc Dios Apquitca? —alhta aptomjac Jesús.
36Apcatingmavoc alhta enlhit:
—Visqui, ¿soc enlhit aplhena nac lha? Moyascamejec sat coo —alhta aptomjac.
37Aptomjac alhta Jesús:
—Apvitac alhta inyicje lhip. Coo nac sicvisay Dios Apquitca sicpamejitsa lhac lhip —alhta aptomjac.
38Apcatingmavoc alhta enlhit:
—Visqui, moyascacmoc coo —alhta aptomjac. Yejemoc alhta apquilticlha aptapnaoc apquinmamcaclha Jesús.
39Aptomjac alhta Jesús apquillhicmosa amyaa:
—Acvaac coo as nalhpop, yoyam olyicpilcojo apquiltemaclha enlhit. Yoyam elviticlha olhma enlhit mepqui apataoc. Yoyam etniclhac mepqui apataoc enlhit apvitay olhma —alhta aptomjac.
40Apquillingac alhta appayvam napocja fariseos apcanaycam maa. Apquiltomjac alhta apquilanya Jesús:
—¿Nincoo ya najan mepqui ingataoc? —alhta apquiltomjac.
41Apcatingmavoc alhta Jesús:
—Apquiltimec lhac ancoc ellhenic quellhip: Mepqui ingataoc nincoo, melsilhnanacpejec sat quellhip. Apquiltomjac lhac quellhip: Ingataoc innac nincoo. Naso, elsilhnanacpoc sat quellhip —alhta aptomjac.
