GÉNESIS 11
11
Tingma nitno apvisay Babel
1Lhama ilhnic nat apquilpayvam enlhitaoc lhalhma anco, mepqui moc apquilpayvam. 2Apquilyinyovquic nic nat apquilaoclha actiyapmaclha acnim. Apquilvitac nic nat amyip acvisay yoclhilhma Sinar. Apquillanac nic nat tingma.
3Apquilpamejitsacpec nic nat nalhit acnim: —Ingva, ongilanac sat yatipjaymacaoc. Ongilvitic sat yatipjaymacaoc— nic nat apquiltomjac. Am nic nat elmac mocjam mataymong yoyam elanac tingma. Apquilmec nic nat yatipjaymacaoc. Am nic nat elmac mocjam yelpa apquilyipitquiscama yatipjaymacaoc. Apquilmec nic nat asfalto ayingmenic ayinyema lhop.
4Apquilpamejitsacpec nic nat mocjam: —Ingva, ongilanac tingma apvanyam najan lhama tingma nitno. Onticlhiquiscomoc sat netin (acvaycmo apmaclha Dios). Colhic sat singilaco, yoyam colhejec sat singilhpansa lhalhma anco— nic nat apquiltomjac.
5Apvayventac nic nat Dios Apyimtalhnamo yoyam elanojo tingma apvanyam najan tingma nitno enlhit apquillanay.
6Intomjac nic nat apvalhoc Dios Apyimtalhnamo: — Acvitac coo actemaclha apquilpasmeyquiclha as enlhitaoc. Acvamlha lhama apquilpayvam. Apquilyiplovcasquic actemaclha aclhanma apquilvalhoc yoyam elanac tingma. Melvatsamquejec sat mataa apquiltomjaclha as enlhitaoc. 7Incaymalhquic ongilvayventac sat nipyesicsa enlhitaoc. Ongillhinganimsic sat apquilpayvam. Melyasamquejec sat mataa poc aplhanma— nic nat intomjac apvalhoc.
8Apquilhpancasquic nic nat enlhitaoc lhalhma anco Dios Apyimtalhnamo. Apquilvatsamquic nic nat apquillanay tingma apvanyam. 9Apquillhinganimcasquic nic nat apquilpayvam enlhitaoc Dios Apyimtalhnamo. Eycaso ayinyemayaclha ilhnic nat apquilhpanma enlhitaoc lhalhma anco. Apquiltimec nic nat tingma apvisay Babel.
Sem aptovana niptamin
(1 Cr 1.24-27)
10Eycaso ilhnic nat Sem aptovana niptamin. Invocmec nic nat anit años natamin yingmin acvanyam. Invocmec nic nat 100 años aptiyascam Sem. Aptiyacmec nic nat apquitca apvisay Arfaxad. 11Mocjam 500 años tap nic nat aptiyascam Sem. Aptiyacmec nic nat apquitquic apquilinava najan inquilvanaa.
12Invocmec nic nat 35 años aptiyascam Arfaxad. Aptiyacmec nic nat apquitca apvisay Sala. 13Mocjam 403 años nic nat aptiyascam Arfaxad. Aptiyacmec nic nat apquitquic apquilinava najan quilvanaa.
14Invocmec nic nat 30 años aptiyascam Sala. Aptiyacmec nic nat apquitca apvisay Heber. 15Mocjam 403 años nic nat aptiyascam Sala. Aptiyacmec nic nat apquitquic apquilinava najan quilvanaa.
16Invocmec nic nat 34 años aptiyascam Heber. Aptiyacmec nic nat apquitca apvisay Peleg. 17Mocjam 430 años nic nat aptiyascam Heber. Aptiyacmec nic nat apquitquic apquilinava najan inquilvanaa.
18Invocmec nic nat 30 años aptiyascam Peleg. Aptiyacmec nic nat apquitca apvisay Reu. 19Mocjam 209 años nic nat aptiyascam Peleg. Aptiyacmec nic nat apquitquic apquilinava najan inquilvanaa.
20Invocmec nic nat 32 años aptiyascam Reu. Aptiyacmec nic nat apquitca apvisay Serug. 21Mocjam 207 años nic nat aptiyascam Reu. Aptiyacmec nic nat apquitquic apquilinava najan inquilvanaa.
22Invocmec nic nat 30 años aptiyascam Serug. Aptiyacmec nic nat apquitca apvisay Nacor. 23Mocjam 200 años nic nat aptiyascam Serug. Aptiyacmec nic nat apquitquic apquilinava najan inquilvanaa.
24Invocmec nic nat 20 años aptiyascam Nacor. Aptiyacmec nic nat apquitca apvisay Taré. 25Mocjam 119 años nic nat aptiyascam Nacor. Aptiyacmec nic nat apquitquic apquilinava najan inquilvanaa.
26Invocmec nic nat 70 años aptiyascam Taré. Aptiyacmec nic nat apquitquic apvisay Abram najan Nacor najan Harán.
Taré aptovana
27Eycaso ilhnic nat Taré aptovana. Apquitquic nic nat apvisay Abram najan Nacor najan Harán. Lot apyap nic nat Harán. 28Apquitsepquic nic nat tingma Ur yoclhilhma Caldea. Am nic nat ingyitsepac mocjam apyap apvisay Taré. Apquitsepquic nic nat actomjaclha apcaoclha apanco.
29Inquilyimjapquic nic nat Abram. Aptava ilhnic nat Sarai. Inquilyimjapquic nic nat Nacor. Aptava ilhnic nat acvisay Milca. Inyap nic nat apvisay Harán. Inyalhing nic nat acvisay Isca. 30Mepqui ayitquic nic nat Sarai, ayinyemaclha cotay ayitca ilhnic nat Sarai.
31Aplhinquic nic nat Taré. Tingma Ur yoclhilhma Caldea ilhnic nat apquimpac. Apyasquic nic nat yoclhilhma Canaán. Apquillhalhmaa Taré ilhnic nat apquitca apvisay Abram najan apipjenim apvisay Lot najan aptava acvisay Sarai. Apquilvoclhec nic nat tingma Harán. Apquillanac nic nat tingma. 32Invocmec nic nat 205 años aptiyascam Taré. Apquitsepquic nic nat tingma Harán.
