Gen 7
7
Cikumba ca mesi
1AMBUJE* ni ŵamsalile Nowa kuti, “Jinjilani m'combo pamo ni liŵasa lyenu lyosope. Une simene kuti m'mwejope ni ŵamkutenda yindu yagoloka pa cilambo capasi. 2Mjigale makuga msano ni gaŵili ga yinyama, yiŵe yiŵiliyiŵili, ya mkolo ni ya mkambako yakuŵajilwa kuyitaga mbopesi, ni mjigale soni yinyama yiŵiliyiŵili, yamkolo ni yamkambako yangaŵajilwa kuyitaga mbopesi. 3Mjigale soni yijuni yiŵili yiŵili ya mtundu uliwose. Mtende yeleyi pakusosa kuti mtundu uliwose wa yinyama ni yijuni ya mitundu josope yisunjidwe ni umi, kuti tiyiŵelekane soni pa cilambo capasi. 4Patigapite masiku msano ni gaŵili tindumisye ula pa cilambo capasi jitijidwe musi ni cilo kwa masiku 40. Cindu cilicose ca umi cinapanganyisye tinjicityosya pa cilambo capasi.” 5Nowa ŵatesile yosope yiŵamlamwile AMBUJE.
6Nowa ŵakwete yaka 600 pacayikaga cikumba ca mesi pa cilambo capasi. 7Nowa ni ŵamkwakwe, ŵanace ŵakwe ŵacalume ni aciŵamkwawo ŵajinjile m'combo cila kuti akulupuce ku cikumba ca mesico.#Mat 24:38-39; Luk 17:27 8Nyama syakuŵajilwa kutajidwa mbopesi ni syangaŵajilwa kutajikwa mbopesi, yijuni pamo ni yakwaŵa yiŵili yiŵili, 9yajinjile m'combomo pamo ni Nowa mpela muŵalamulile Mlungu. 10Gali gapite masiku msano ni gaŵili, cikumba ca mesi cayice pa cilambo capasi.
11Pa lisiku lya 17 lya mwesi waŵili, Nowa ali ni yaka 600, mesi ga uliŵa gawulice kutyocela pasi pa cilambo, kwinani kwawugwice kuti mesi gakusuce.#2 Pet 3:6 12Myoyo ula jagwile cilo ni musi kwa masiku 40. 13Lisiku lilyolyo Nowa ni ŵamkwakwe, ŵanace ŵawo ŵacalume Shemu, Hamu ni Yafeti, ni aciŵamkwawo ŵajinjile m'combo mula. 14Jemanjajo ŵajinjile m'combo pamo ni mtundu uliwose wa yinyama yamwitinji, ya kulanga, yinyama ya kukwaŵa, ni yijuni yamtundu uliwose. 15Nowa ŵajinjile m'combomo pamo ni ya umi yosope, ya mkolo ni ya mkambako, 16mpela muŵalamulile Mlungu, nipo ali ajinjile AMBUJE ŵawugele mlango wa comboco.
17Cikumba ca mesi cakukwime pa cilambo kwa masiku 40. Mesi gatupile kwejinji pa cilambo capasi, mwakuti combo cayikene mwakujajaŵala pacanya pa mesi. 18Mesi gapundile kutupa pa cilambo capasi, comboco caliji mkujajaŵala pacanya pa mesigo. 19Mesi gatupile mpaka gatiŵisye songa sya matumbi gamalewu mnope. 20Myoyo mesigo galiji mkwelelakwelela, mpaka kusipeleta songa sya matumbigo ni mamita msano ni gaŵili. 21Yindu yosope ya umi pa cilambo capasi yawile, mpela yijuni yiliyose, yinyama yiliyose ni ŵandu wosope, 22cindu cilicose cakupumula ca pa cilambo cawile. 23Mlungu ŵayijonasile ya umi yosope ya pa cilambo capasi: ŵandu, yinyama ni yijuni. Nowa ni wosope ŵiŵaliji m'combo ni ŵiŵakulupwice. 24Mesi galiji ciŵela gamajinji pa cilambo capasi kwa masiku 150.
Chiyawo Bible: Buku Jeswela © Bible Society of Malawi, 2014