Gen 2
2
1Myoyo kwinani ni cilambo cosope capasi, ni yindu yosope yakutama mwelemo, ŵamasile kuyipanganya. 2Pa lisiku lya msano ni limo Mlungu ŵamalisisye kupanganya masengo gosope gaŵatendagago, ni ŵapumwile pa lisiku lya msano ni gaŵili.#Aheb 4:4, 10#Eks 20:11 3Mlungu ŵalipele upile lisiku lya msano ni gaŵili ni kulilekanganya ni gane, ligongo lyakuti Mlungu ŵapumwile pa lyele lisikuli ali amalisisye kupanganya yindu yosope. 4Amu ni mwele Mlungu muŵayipanganyicisye yindu ya kwinani ni ya cilambo capasi.
Mgunda wa Edeni
Pandaŵi jele AMBUJE* Mlungu ŵapaganyisye cilambo capasi, ni yindu yosope ya kwinani, 5paliji pangali yakumela pa cilambo capasi, atamose mbeju syaliji mkanisimele, ligongo AMBUJE Mlungu ŵaliji mkanagwisye ula pa cilambo capasi, soni paliji pangali mundu jwalijose jwakulima petaka. 6Nambo mesi gakopokaga pasi pa cilambo ni gajitililaga litaka.
7AMBUJE Mlungu ŵajigele litaka ni ŵamgumbile mundu ni litakalyo. Ŵampepelele lipuje lyakupeleka umi mu mbula syakwe, nipo mundujo ŵakwete umi.#1 Akoli 15:45
8AMBUJE Mlungu ŵaŵisile mgunda mu Edeni ca kungopoko lyuŵa, ni ŵamŵisile mundu juŵamgumbile jula mwelemo. 9Jwalakwe ni ŵayimelesye mu mgundamo yitela yakulekanganalekangana yakusalala, ya yisogosi yakunong'a. Pasikati pa mgundawo capali citela cakupeleka umi, ni soni capali citela cakumanyisya yindu yambone ni yakusakala.#Ciw 2:7; 22:2, 14
10Lusulo lwakukopoka mu Edeni m'momo, lwajilimaga mesi, ni lwaliji mkwitila mgundawo. Lusulolo lwagaŵikene kupanganya sulo mcece. 11Lusulo lwandanda lina lyakwe Pishoni, nipo lukusajenda mwakusyungulila cilambo ca Hafila, 12cilambo cele cikusimanikwa golidi* jwambone mnope, ni mawuta gakununjila mnope, ni maganga gakusalala, ga mtengo wapenani. 13Lusulo lwaŵili lina lyakwe Gihoni, nipo lukusajenda mwakusyungulila cilambo cosope ca Kushi. 14Lusulo lwatatu lina lyakwe Taigilisi, lwele lwalukupita kungopoko lyuŵa kwa cilambo ca Asiliya. Nipo lusulo lwa mcece lina lyakwe Yufuleti.
15AMBUJE Mlungu ŵamjigele mundu jula ni kumŵika mu mgunda wa Edeni kuti alimeje ni kuwulolela. 16AMBUJE Mlungu ŵamsalile mundu jula kuti, “Mlyeje yisogosi yacitela cilicose ca mu mgundamu, 17nambo mkasimlya yisogosi ya citela cakumanyisya yindu yambone ni yakusakala. Mkasimlya yisogosi ya cele citelaco. Naga timlye, pa lisiku litimcilyalyo, timciwa.”
18Kaneko AMBUJE Mlungu ŵatite, “Nganiciŵa cindu cambone kuti mundu aŵe jika. Tinampanganyicisye mjakwe jwakuti amkamucisyeje.” 19AMBUJE Mlungu ŵajigele litaka ni ŵapanganyisye yinyama yosope ni yijuni yosope. Ni ŵayice nayo kwa ŵandu ŵala kuti ayipe mena, mwelemo ni muyapatile yosope yene mena gawo. 20Myoyo mundu jula ŵapelece mena ku yinyama yosope ni yijuni yosope, nambo pa yosopeyi paliji pangali mjakwe jwakuti amkamucisyeje.
21Myoyo AMBUJE Mlungu ŵamgonece mundu jula lugono lwekulungwa mnope, ali mlugono m'momo, Mlungu ŵamtyosisye luŵalati lumo lwa mundujo, ni ŵawugele ni mnowu piŵalutyosisyepo. 22AMBUJE Mlungu ŵampanganyisye mundu jwamkongwe ni luŵalati luŵatyosisye mwa jwamlume jula, Adamu.* AMBUJE ŵayice najo jwamkongwejo kwa jwamlume jula. 23Adamu ŵatite,
“Aju ni jwa mtundu wangu liwupa lyakutyocela m'mawupa gangu,
mnowu wakutyocela mu mnowu wangu,
jwamkongwe ni lina lyakwe pakuŵa ŵatyocele mwa jwamlume.”
24Ali ni ligongo lyakwe mundu jwamlume akusatyokaga kwa babagwe ni mamagwe ni kuja kulumbikana ni ŵamkwakwe ni kuŵa cilu cimo.#Mat 19:5; Mak 10:7-8; 1 Akoli 6:16; Aef 5:31
25Nipo mundu jula ni ŵamkwakwe ŵala ŵaliji makonope nambo nginatenda soni.
Chiyawo Bible: Buku Jeswela © Bible Society of Malawi, 2014