Wambeela 30
30
1Rakeli vooniliiye wi kanambalela ahima Yakobo, oomukalela nrima ddibile, omwiirela Yakobo: <<Ogivahe ahima, waahifunaga wi miyo gikwe!>> 2Yakobo ahitakaleliwaga ni Rakeli, wiira: <<Onoobuwela wi miyo gili vamburoni va Mulugu? Oliyeene diirilena wi ohubalege>>.
3Vevale, Rakeli ahiiraga: <<Ginowuuvaha mwiimeleli aaga Bila, akale wona mwihiyanaawo. Ahimaya eneeriiye aabalege ni we, enaakalege ahima aaga>>.#30.3 Ginowuuvaha namalaba aaga…enaakalege ahima aaga. Omvaha namalaba mamune waali mukalelo wawale woororomeliha obaliwa wa namavolowa mba. Kadhaali muwari mwa efunelo ya Mulugu. Ovalaanya wula waatatamule dhoorusa. Moone Wambeela 16.1-4. 4Ndala Rakeli ahimvaha mamune namalaba aaye wona mwihiyanaaye, ahimugonana. 5Nuwindo Bila ahirubalela, ombala mwaana-mulobwana. 6Vevale, Rakeli ahiiraga: <<Mulugu ohuthonga, ohiiwa yooloba yaaga, ohugivaha mwaana>>. Mowindala ahimuthwa ndina na Dani.#30.6 Dani mu ewogelo ya eHeberi nneeweya wona: Othonga.
7Vano Bila ahirubalela, ombalela Yakobo mwaana-mulobwana mmohiwa teto. 8Rakeli ahiiraga: <<Gihitthabwa owana ni ddibilaaga, mbwenye gihimugonjiha>>. Mowindala ahimuthwa ndina na Nafitali.#30.8 Nafitali mu ewogelo ya eHeberi nneeweya wona: Owana waaga.
9Ndala Liya vooniliiye wi ohumala obala, ahimuthukula namalaba aaye Zilipa, omwinka Yakobo wona mwihiyanaaye. 10Ola ahimbalela Yakobo mwaana-mulobwana. 11Nuwindo Liya ahiira: <<Gihikalana gari!>> Mowindala ahimuthwa ndina nowi Gadi.#30.11 Gadi mu ewogelo ya eHeberi nneeweya wona: Muliba gari.
12Zilipa, ole namalaba a Liya, teto ahimbalela Yakobo mwaana-mulobwana mmohiwa. 13Vano Liya ahiiraga: <<Gihaakela ohagalala! Ahiyana amohiwa enoodha egiire oohagalala!>> Mowindala ahimuthwa ndina nowi Azeri.#30.13 Azeri mu ewogelo ya eHeberi nneeweya wona: Ohagalala. Yakobo, Rakeli, ni Liya kayeerile dhapama vamusayeleliiwa Yakobo ahiyana amohiwa. Nihaasayelege athu amohiwa voofuna okanna ahima. Mulugu dinanivaha ahima. Kavili muladdu mwihiyana, naari mulobwana yaahibalaga. Enafuneya omulobaga Mulugu wona ababe Yakobo yeeriliiwa muniivuru Wambeela 25.21. Nihikanganege naariwene, ni athu amohi mwaha wa ahima. Mulugu dinanivaha ahima. Mulugu ononidhivela hiyo aatene mooligana, ale yinna ahima naari ale ehinna.
14Nlabo nimohi, mudhidhi woomuredda tirigu, Rubeni ahidhowa omidda ofwanya mataakuru a kanddeliwa,#30.14 Mataakuru a kanddeliwa Mu ewogelo ya eHeberi ndina na muthanko ola nneeweya wona: Ofuniwa. odhowana wa amaaye Liya. Rakeli ahiwogaga ni Liya, wiira: <<Ginowuuloba wi ogivahe mataakuru ayo mwaanawo yaahapiliiye>>. 15Liya ahimwaakulaga, wiira: <<Kowaakwanile mamunaaga ole ogaakiliiwe? Teto onafuna ogaake mataakuru a kanddeliwa a mwaanaga?>> Rakeli ahimwaakulaga, wiira: <<Oginke mataakuru, mahiyu alena Yakobo onoodha agone ni we>>.
16Ociguwoni wiwa Yakobo afiyaga okumela omidda, Liya ahimuharelaga, wiira: <<Peeno oli aaga vowi guhuugula ni mataakuru a kanddeliwa a mwaanaga>>. Yakobo ahigonaga ni oliye mahiyu alene.
17Mulugu ahimwiiwaga Liya, orubalela, obala dila ya neetanu mwaana-mulobwana. 18Liya ahiiraga: <<Ola Mulugu digivahile mwa ogiliva, vowi gihimwihiyedha mamunaaga namalaba aaga>>. Mowindo ahimuthwa ndina nowi Esakari.#30.18 Esakari mu ewogelo ya eHeberi nneeweya wona: Yooliva.
19Liya ole ahiwelela orubalela, ombala mwaana a neetanu ni mmohi a mwaana-mulobwana. 20Oliye ahiiraga: <<Mulugu ohugivaha ya mahala yapama. Mamunaaga oneerege ogiriiha mwaha wi gihimbalela ahima alobwana atanu namohi>>. Mowindala ahimuthwa ndina nowi Zebuloni.#30.20 Zebuloni mu ewogelo ya eHeberi nneeweya wona: Oriihiwa.
21Voomariha ahimbala mwaana-mwihiyana, omuthwa ndina nowi Dina.
22Vevale Mulugu ahimuubuwelela Rakeli, wiiwa yooloba yaaye, ahimvaha obala. 23Ndala oliye ahirubalela, ombala mwaana-mulobwana, ahiiraga: <<Mulugu ohuvenyihavo manyazo aaga!>> 24Ahiwogaga teto, wiira: <<Nabwiya awelele, ogivaha mwaana-mulobwana mmohi!>> Mowindala ahimuthwa mwaana ole ndina nowi Zhuuze.#30.24 Zhuuze mu ewogelo ya eHeberi nneeweya wona: Owelela.
Oreela wa Yakobo
25Rakeli agambalile Zhuuze, Yakobo ahiiraga wa Labani: <<Mugihiye wi gidhowege owanuhu. 26Muginke ahiyanaaga ni anaaga gaadhowegena. Ala gihaalabela, nyoovo muhunona wi guhuulabelani pama>>.
27Labani ahimwaakulaga, wiira: <<Mwagirumeedhela, mukale wewuno ni miyo. Ginonile mmakangani wi Nabwiya onogireeliha mwaha wa nyo.#30.27 Labani ahilabiha makanga ehinarumeedhiwa ni Mulugu. Moone Deteronomiyo 18.10; Mamwene a Nabiili 17.16-17; Zheremiya 14.14; Ezekiyeli 12.24; 13.6-7. 28Mugaaddele yowaakeliinyu, ginowuulivani>>. 29Yakobo ahaakulaga, wiira: <<Nyo muhunona wi guhuulabelani pama. Muhunona wawaang'anela waaga aneenyama eenyu. 30Gihinadhe nda kadharelane, vano dhihithabwa orelana. Nabwiya ohuureelihani ni mabasa aaga. Gineere gilabele alini vaade vaaga?>>
31Labani ahimukohaga, wiira: <<Munafuna oliviwa avi?>> Yakobo ahimwaakulaga, wiira: <<Kamunagiliva yego. Miyo ginorumeedha waakameela aneenyama eenyu, mwarumeedhela yego ginafuniimi owoga: 32Peeno ginaya onikolani wi gaasakulele aneenyama aatene a maganga ni ooriba, mabila ni mbuzi dhedhi sinaakale yooliveliwa yaaga. 33Ndala munodha moone ororomeleya waaga musogolo mwaafunaga osugwa yoolivela yaaga. Mwafwanya mbuzi ehinna maganga naari nibila nihiribile, munonona wi guhuwiiyelani>>.
34Labani ahaakulaga, wiira: <<Dhihikala pama. Dhikale wona munawogeliinyu>>. 35Mbwenye nlabo nendde Labani ahigawanyaga mbuzi dhapogo ni dhamukolo dha maganga, dhaatedhene dhoweela, ni mabila mang'onong'ono ooriba, ahawinkaga anaaye wi ejihege. 36Ahaarumaga wi edhowena woolapela, weedda wa malabo maraaru. Yakobo ahihalaga aajihaga aneenyama amohiwa ni Labani.
37Yakobo ahithukulaga dhimiri dhikiiti dha matadu a mithanko miraaru dhoohiyana-hiyana, owaga magulaya, ahiyedhedhaga, dhikalagana magangaya oweela. 38Ahitibelaga dhimiri nde vaceelani vevale aneenyama vang'wiiwa, vowi mudhidhi woong'wa fagumaneliiwa. 39Vevale aneenyama apogo vagumaneliiwa ni a mukolo esugwaga dhimiri nde, dhowaabala ana-ahima amaganga.
40Yakobo ahaagawaga ana-ahima ale, ni aneenyama ooriba ni amaganga yaali a Labani. Mowindala faagawanyigiiye aneenyama aaye, kuhaataganyihedhaga ni a Labani. 41Vagumaneliiwa aneenyama akopolo, Yakobo ooreyaga osogolo wa aneenyama dhimiri dhaaye nde mmamburoni mwang'wiiwa. Ndale doogumanelaga dhisugwaga dhimiri nde. 42Wa aneenyama oolodhowa, kaareyela dhimiri osogolo wiwa. Vevale oolodhowa yakala a Labani, akopolo yakala a Yakobo. 43Mowindala, Yakobo ahitthabwa oreela, ahikalana aneenyama ajinji, anamalaba a alobwana ni a ahiyana, akamelo ni abuuru.
© 2015, Wycliffe Bible Translators, Inc. All rights reserved.