Luke 24
24
Ko e Toe Tu‘u ʻa Si̇̄suú
(Mātiu 28:1-10; Ma‘ake 16:1-8; Sione 20:1-10)
1Pea ʻi he ‘uluaki ʻaho ‘o e uiké, kei hengihengi ʻaupito, na‘e uhu atu ʻa e kau fefiné ki he fonualotó mo e ngaahi kakala kuo nau teú. 2Pea ʻi heʻenau aʻu atú, tā kuo ‘osi teka‘i ʻa e maka tāpuni ‘o e fonualotó.
3Pea ʻi heʻenau hū atu ki he fonualotó, tā kuo ‘ikai ke kei ʻi ai ʻa e sino ‘o e ʻEiki ko Sīsū. 4Pea lolotonga ʻa e hangē ʻoku molé ʻenau fakakaukaú, fakafokifā kuo tutu‘u mai kiate kinautolu ha ongo tangata ‘oku ngingila hona teungá. 5Pea manavahē ‘aupito ai ʻa e kau fefiné, ‘o nau fepūnou‘i ki lalo. Kae pehē ange ‘e he ongo tangatá, ‟Ko e hā ‘oku mou kumi ai ʻa ia ʻoku mo‘ui̇́ ki he feitu‘u ‘o e kau maté? 6‘Oku ‘ikai ke ne ʻi heni! Ka kuo toetuʻu ia! Manatu‘i ʻene folofola naʻe fai atu lolotonga hoʻomou kei ʻi Kāleli̇́; 7‛‘E tuku atu ʻa e Foha ‘o e Tangatá ki he nima ʻo e kau angahalá, pea te nau tutuki ia ki he kolosi̇́, ka te ne toetuʻu mei he maté ʻi he ʻaho hono tolú.’” 8Pea toki manatu‘i ai ‘e he kau fefiné ʻa ʻene folofola ko iā.
9Pea foki ʻa e kau fefiné mei he fonualotó ‘o nau tala ki he toko hongofulu mā tahá, mo hono toé, ʻa e ngaahi meʻa kotoa kuo hokó. 10Pea ko e kau fefine naʻá nau fakamatala ʻa e ngaahi meʻá ni ki he kau ʻApositoló, ko Mele Mākitala, mo Sōana, mo Mele ko e fa‘ē ʻa Sēmisi̇́, pea mo ha ni‘ihi kehe. 11Ka na‘e hangē ʻa e fakamatala ʻa e kau fefiné, ha launoa pē, ki he kau ʻApositoló, he na‘e ‘ikai te nau tui ki ai.
12Ka na‘e tuʻu hake ʻa Pita ʻo lele ki he fonualotó, pea ne aʻu atu ki ai, ʻo punou hifo ‘o sio ki loto, tā ko e meʻa pē na‘e tuku ai̇́, ko e ngaahi konga tupenu na‘e kofuʻaki ʻa e sino ‘o Sīsuú, pea talu ai pē ʻene foki ki ʻapi mo fifili ʻi hono lotó, pē ko e hā ʻa e meʻa kuo hokó.
Ko e Hā ʻa Si̇̄sū ki he Toko Ua he Kau Akó
(Ma‘ake 16:12-13)
13Pea ko eni, ʻi he ʻaho pē ko iā, na‘e fononga atu hanau toko ua ki he ki‘i kolo ko ʻEmeasi, ʻa ia na‘e kilomita ‘e hongofulu mā taha nai mei Selusalema.
14Pea naʻá na fononga pē mo talatalanoa ki he ngaahi meʻa kotoa kuo toki hokó; 15Pea lolotonga ʻena talatalanoa mo fifili ki he ngaahi meʻá ni mo e fakaofiofi atu ʻa Si̇̄sū ‘o fononga fakataha mo kinaua. 16Ka na‘e taʻofi kinaua, ke ʻoua te na ʻiloʻi ko Si̇̄sū ia.
17Pea pehē ange ‘e Si̇̄sū kiate kinaua, ‟Ko e hā ʻa e meʻa ʻoku mo talanoa ki ai ʻi ho‘omo fonongá?” Peá na tu‘u si‘i hifo, kuo na fakatou fofonga mamahi ‘aupito. 18Pea pehēange ‘e he toko taha naʻe hingoa ko Kaliopasi: ‟Ko e muli ʻapē koe kuó ke toki haʻu ki Selusalema ‘oku ‘ikai ai te ke ʻilo ʻa e ngaahi meʻa kuo toki hoko he ngaahi ʻaho ko ʻeni̇́?”
19Pea pehē ange ‘e Si̇̄sū, ‟He ko e hā ʻa e ngaahi meʻa kuo hokó?” Peá na pehē ange, ‟ʻA e ngaahi meʻa ʻoku kau kia Si̇̄sū ʻo Nāsaleti̇́! Ko e tangata ko iā ko e palōfita naʻe hā ha mālohi ʻi heʻene ngāué mo e leá, ʻo fakahōifua ki he ‘Otuá mo fakafiefia ki he kakai̇́. 20Ka na‘e hanga ‘e he‘etau kau taulaʻeiki lahi̇́ mo hotau kau taki̇́ ‘o hilifaki kiate ia ʻa e tautea maté, pea nau tutuki ia ki ha kolosi. 21Ka naʻa mau nofo ʻamanaki, ko ia ia te ne fakatau‘atāina ʻa ‘Isileli̇́! Pea ʻāsili ai̇́, ko e ʻaho ʻeni hono tolu talu ʻa e hoko ʻa e ngaahi meʻa ko iā. 22Pea kuo faka‘ohovale‘i kimautolu ‘e ha niʻihi ʻo ʻemau kau fefiné, ʻa ia naʻá nau uhu atu ʻane hengihengi ki he fonualotó. 23Ka ʻi heʻenau aʻu atú, tā ‘oku ‘ikai ke kei ʻi ai hono sinó. Pea nau foki mai ‘o tala, naʻá nau mata vi̇̄sone ki ha kau ʻāngelo, ʻa ia naʻá nau fakahā ange, kuo toe mo‘ui ia.
24Pea naʻe ō mo ha ni‘ihi ‘iate kimautolu ki he fonualotó, ʻo nau ʻilo ai, tā ‘oku moʻoni pē ʻa e lau ʻa e kau fefiné, he na‘e ‘ikai foki te nau sio mo kinautolu kiate ia.”
25Pea pehēange ‘e Si̇̄sū kiate kinaua, ‟He toki meʻa vale mo‘oni ko kimoutolu mo faingataʻa ke mou tui ki he ngaahi meʻa kotoa pē kuo leaʻaki ʻe he kau palōfitá! 26Na‘e ‘ikai koā ke mahino, ʻa e pau ke tomuʻa fakamamahia ʻa e Mi̇̄saiá pea ne toki hoko ki hono lāngilangi̇ʻiá?”
27Pea ne kamata mei he ngaahi tohi ʻa Mōsesé ‘o aʻu ki he ngaahi tohi kotoa ʻa e kau palōfitá, ʻa ʻene fakamatala kiate kinaua, mei he Tohitapu Kātoa, ʻa e ngaahi meʻa kotoa pē ʻoku kau kiate iá.
28Pea ʻi he fakaofiofi atu ʻenau fonongá ki ʻEmeasi̇́, naʻe hangē ka hoko atu pē ʻa e fononga ia ʻa Sīsuú. 29Ka naʻe ta‘ofituʻu ia ‘e he ongo tangatá, ‘o na pehē kiate ia: ‟Afe mai muʻa ke tau ki‘i nofo mo kimaua! He kuo efiafi, pea kuo mei ʻosi ʻa e ʻahó!” Pea afe ai ʻa Si̇̄sū ki he ‘api̇́ mo kinaua.
30Pea ʻi heʻenau nofo hifo ke maʻu ʻa e fakaefiafi̇́, naʻe to‘o ‘e Si̇̄sū ha mā ‘o naʻe tāpuaki‘i, pea naʻe toki pakipaki ia ‘o naʻe ‘oange kiate kinaua. 31Pea ʻā ai hona matá, ʻo na ʻilo tā ko Si̇̄sū ia. Ka naʻe puli leva ia meiate kinaua.
32Peá na fepehēʻaki: ‟Ne‘ine‘i ke vela hota lotó ʻi heʻene fakamatalamai mo fakaʻuhinga kiate kitaua ʻa e Tohitapú, ʻi he halá.” 33Peá na tutu‘u hake , ‘o na foki leva ki Selusalema. Pea ʻi heʻena aʻu atú, tā kuo kātoa mai ʻa e toko hongofulu mā tahá, pea mo hono toenga ‘o e kau akó. 34Pea nau talamai: ‟tā ʻoku mo‘oni pē! Kuo toe tu‘u ʻa e ʻEiki̇́, pea kuó ne hā kia Saimone.”
35Pea toki fakamatalaange ‘e he ongo tangatá ʻa e meʻa na‘e hoko ʻi he halá, pea mo ʻena toki ʻiloʻi tā ko e ʻEiki̇́ ia, ʻi heʻene pakipaki ʻa e foʻi maá.
Ko e Hā ʻa Si̇̄sū ki Heʻene Kau Akó
(Mātiu 28:16-20; Ma‘ake 16:14-18; Sione 20:19-23; Ngāue 1:6-8)
36Pea lolotonga ʻa e kei talanoa ʻa e kau akó ki he ngaahi meʻa kuo hokó, fakafokifā kuo tu‘u ʻa Si̇̄sū ʻi honau lotolotongá, ‘o naʻe pehēange kiate kinautolu: ‟Tauange ke nofoʻia kimoutolu ʻe he melinó!”
37Pea manavahē ‘aupito ʻa e kau akó mo tetetete, koe‘uhi̇̄ he naʻa nau pehē ko ha faʻahikehe ‘oku nau mamata ki ai̇́. 38Kae folofola ʻa Si̇̄sū kiate kinautolu: ‟Ko e hā ‘oku mou manavahē ai̇́, pea ko e hā ʻoku veiveiua ai homou lotó? 39Mou vakai mai, ko hoku ongo nimá ē mo hoku va‘é, he ko au moʻoni pē ia. Ala mai kiate au ka mou ʻilo, he ko e faʻahikehé, ‘oku ‘ikai kakano mo hui ‘o hangē ʻoku mou mamata ki ai ʻiate aú.”
40Pea ʻi heʻene lea pehē naʻá ne fakahā ange kiate kinautolu ʻa hono ongo nimá, pea mo hono ongo va‘é. 41Ka na‘e ‘ikai pē ke nau tui, koe‘uhi̇̄ ko e hulu tuʻa ʻenau fiefiá mo ʻenau ofoofó. Pea folofola ʻa Si̇̄sū kiate kinautolu: ‟‘Oku ʻi ai ha‘amou me‘akai heni?” 42Pea nau ‘oange kiate ia ha konga ika tunu. 43Pea toʻo ‘e Si̇̄sū ʻa e konga iká ʻo ne kai, ka nau mamata pē.
44Pea naʻe pehēange kiate kinautolu: ‟Ko e ngaahi meʻa ʻeni naʻá ku tala kiate kimoutolu, lolotonga ʻetau kei fononga holó, ʻa e pau ke fakahoko kotoa ʻa e ngaahi meʻa naʻe hikitohi ʻo kau kiate au, ʻi he Lao ʻa Mōsesé, mo e ngaahi Tohi ʻa e kau palōfitá, pea mo e Tohi Saamé.”
45Pea toki tatala ‘e ia ʻa honau ʻatamai̇́ ke mahino kiate kinautolu ʻa e Tohitapú; 46ʻO ne talaange kiate kinautolu: ‟Naʻe pehē ʻa e meʻa kuo hikitohi̇́: Kuo pau ke fou ʻa e Mi̇̄saiá ʻi ha mamahi lahi, pea ʻi hono ʻaho tolú, te ne toetu‘u mei he maté. 47Pea ʻe malanga ʻaki ʻi hono hingoá ʻa e fakatomalá ke maʻu ʻa e fakamolemole angahalá, ki he ngaahi pule‘anga kotoa pē, ‘o kamata mei Selusalema.
48Ko kimoutolu ʻa e kau fakamoʻoni ki he ngaahi meʻá ni. 49Pea ko eni, te u fekau atu ʻa e Toko Taha naʻe tala‘ofa ʻaki kiate kimoutolu ‘e he‘eku Tamai̇́, ko ia, mou tatali pē ʻi Selusalema kae‘oua leva kuo fakafonu kimoutolu ʻaki ʻa e mālohi mei he Langi̇́.”
Ko e Foki ʻa Si̇̄sū ki Langi
(Ma‘ake 16:19,20; Ngāue 1:9-11)
50Pea taki atu kinautolu ‘e Si̇̄sū ʻo aʻu atu ki Pētani. Pea naʻe toki hiki hake hono nimá ‘o naʻe tāpuaki‘i kinautolu. 51Pea fakafokifā, lolotonga ʻene kei tāpuakiʻi kinautolú, naʻe ʻohake ia meiate kinautolu ʻo fakahāʻele hake ia ʻe ha ʻao ki he Langi̇́.
52Pea naʻa nau lotu kiate ia, pea nau toki foki ki Selusalema kuo nau fiefia lahi ʻaupito. 53Pea naʻa nau ō ma‘u pē ki he Temipalé ‘o fai ai ʻenau fakafeta‘i ki he ‘Otuá.
Tongan Contemporary New Testament © Bible Society of the South Pacific, 2011.