SIEMCHILBU 15
15
Pasian in Abram gouluo ding leh Kanaan gam achiem
1Tam silte nuain “Abram zausin, Kei na phaw leh na kipahman thupitah ka hi, chiin Mangpa thu Abram kungah mangmu bangin ahing tung hi.
2Tuachi’n Abram in, Mangpa Pasian aw, bang e nahing pieh ding? ta neilou a umden dinglah ka hia, ka gou kem ding Damaska a Eliezer ata amah?” achi hi. 3Tualeh Abram mama in, “En vawi, hahlesuon mawngmawng na hing neisah sih a, en in, ka inn a pieng pen ka gouluo ding himai ven maw,” achi hi.
4Tualeh ngaivawi, Mangpa thu akung ah ahing tunga, “Tampa pen na gouluo ding ahisih dinga, na tahsa a kipat a hing pieng doh ngel khu na gouluopa ahi ding hi,” achi hi. 5#Rom. 4.18; Heb. 11.12Tualeh ama inn pulam ah azawpi a, “Vanlam entou inlen, aasite sim vawi, nasim zou eimah” achi hi. Tualeh Ama mama in a kungah, nahah nasuonte tuabang ahi ding hi, achi hi.
6 #
Rom. 4.3; Gal. 3.6; Jak. 2.23 Tualeh aman Mangpa khu atahsang a, tuami Aman ama dingin dihtatna in asim pieh ta hi.
Thuhun suhkipna
7Tuachi’n Aman akung ah, “Keima, tam gam luodinga hing peding a Kaldaite khuo, Ur akipat hing puidoh pa Mangpa ka hi,” achi hi. 8Tualeh aman, “Mangpa Pasian aw, ka luo ding chi bangchi’n ka thei diei?” achi hi.
9Tuachi’n Aman akung ah, “Kum thum a upa Bawngla khat, kum thum a upa Keelpi khat leh kum thum a upa Belamtal khat, tualeh vakhu nou khat leh Paalva nou khat hing la in” achi hi. 10Tualeh ama’n tamteng ahing tawi a, alaikim tah ah aphalhah chiet a, tualeh phal khat leh phal khat kimaingattuo in akoi a, hinanleh vate aphalhah sih hi. 11Tualeh va sasiel nete saluong tunga ahing tuh chiengin, Abram in aheu zel hi.
12 #
Job. 4.13,14 Tualeh nitum ding kuonin Abram nuomtah in a imuta a, tualeh ngaivawi, zauhuoina leh a miel a miel in ama ahing khu hi. 13#Pawt. 1.1-14; Nasep. 7.6Tualeh Pasian in Abram kungah, “Nahah nasuonte amauh gam hilou ah mikhuol in aum ding ua, ana uh aseppieh ding ua, tualeh amauh kum zali sung asugenthei ding uhi chi kichientah in thei in. 14#Pawt. 12.40,41; Nasep. 7.7Tualeh khum ana aseppieh nam zong keiman thu ka khenkhum dinga, tuazou chiengin nei leh lam tampi toh hing pawtdoh ding uhi. 15Tualeh nangpen napu leh pate kungah hamuongtah in napei dinga, tehkun in ahing kivui ding hi. 16Hinanleh akhang lina ah tammun ah ahing peikia ding uh, Amor mite tatsietna akim nai tadi lou ziehin,” achi hi.
17Tualeh hichi ahing hi a, ni ahing tum a, khuo ahing mieltah in, ngaivawi, hal tuina meikhu zinzen leh meisel kuong pimpem, khu tua sa kiphalhahte kikal a pei kawi kawi ahing um hi. 18#Nasep. 7.5Khum ni mama in Mangpa’n Abram toh thuhun abawl a, “Na hah nasuonte kungah tam gam Izipt lui akipat Euphrates lui lien dong ka peta hi. 19Kenmite, Kenizmite, Kadmonmite. 20Tualeh Hitmite, Perizmite, Rephaimmite. 21Tualeh Amormite, Kanaanmite, Girgashmite tualeh Jebusmite zong ka hing peta hi,” achi hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.