SIEMCHILBU 13
13
Abram leh Lot kikhenna
1Tuachi’n Abram khu Izipt gam a kipat in apeita a; ama leh azi leh anei alam zousie leh Lot toh simlam gam azuonta uhi. 2Tualeh Abram in gante, dangkate leh sana ahau mama hi. 3Tualeh simlam apat in Bethel dongin apei zel a, Bethel leh Ai khuo kikal a, masang a apuonbuh jahna mun ah. 4Amasa a maitam bawlna mun ma ah Abram in Mangpa min ahan hi.
5Tualeh Lot Abram toh zawhkhawm pa’n zong belamte, bawng honte leh puon innte anei hi. 6Tuachi’n a umkhawmna ding un gam akiching tasih a, aneitah uh atam seng tah ziehin a umkhawm thei tasih uhi. 7Tualeh Abram ganchingte leh Lot ganchingte kikaal ah kinielna ahing umta a, tuahun lai in khum gamah Kanaan mite leh Periz mite ateng uhi.
8Tualeh Abram in Lot kungah “Hepitah in kei leh nang kikaal leh ka ganchingte leh na ganchingte kikaal ah kinielna um sih heh, unau ihi bou hi. 9Gam pumpi na masanga um hilou ahiei mah? hepitahin keima apat in umtuom mai in, nang veilang a na pei leh kei zietlang ah, ahisihleh nang zietlanga napei leh kei veilang ah ka pei ding hi,” achi hi.
10 #
Siem. 2.10
Tuachi’n Lot ahing khodah a, Jordan phaijang tengteng Zoar khodonga, amun tenga tuiluonna, Mangpa’n Sodom leh Gomorrah asuhsiet masanga Mangpa huon bang, Izipt gam bangmai ahi chi amu a. 11Tuachi’n Lot in Jordan phaijang lam atel ta a, tualeh Lot suolam zuon in apei zel a, tuachi’n akikhenta uhi. 12Abram Kanaan gam ah ateng a, Lot pen phaijang khopite ah ateng a, a puoninn Sodom khuodong in asuon zel hi. 13Hinanleh Sodom mite pen Mangpa mitmu in nahpitah a gilou leh khiel ahi uhi.
Abram kunga Pasian thuchiem
14Tualeh akung a kipata Lot atuom um nua in, Mangpa’n Abram kung ah, “Tu’n dahdoh inlen na umna mun apat mallam, simlam, suolam leh tumlam en vawi. 15#Nasep. 7.5Na gam mu zousie nang leh nahah nasuonte kungah tangtawn ading in kahing peding hi. 16Nahah nasuonte lei a leivui bang maiin bawl vangin, tuachi’n min lei a leivui asim zou leh nahah nasuonte zong akisim zou ding hi. 17Thou inlen, gam khu adung avai tuonsuoh in, aziehpen na kung a hing pe ding ka hi,” achi hi. 18Tuachi’n Abram in a puoninn asuon a, ahing pei a, Hebron a um Mamre gangpising lah ah atengta hi. Tualeh khunah Mangpa dingin maitam abawl hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.