LUK 18
18
Khimoberü tüsho Mahkhaprü Shihdanglimyu
1Judüki arünü kamruhroro tamkhüntamnüpü tüsho mulong müninipü thsangyude api jingyanrübo ki Jisunü shihdanglimyu tha. 2Apinü tha: “Kiuto khülang ching mihtsürü khülang Thrünpuh mütrerü yungsho mihtsürü ki akinashu müjihrü lakheah. 3Kheakü ju kiuto ching khimoberü khülang lakheah; tüsho api ki arübah tha, ‘I riri azhihde I mahkhapjang!’ 4Apinü anükhüh kheak jude müthsü; tüshe anükhüh labah apinü aküdah thsüde tha, ‘Inü Thrünpuh mütre yungsho mihtsürü ki akinashu müjih-a lalashe, 5khimoberü hanü I thsurangcho le inü anihbe mahkhapjihbah, jude yungsho alibenü arülele thsükhinü I amükhiukbah.’” 6Judüki Atungpuhnü tha, “Thiyuro mülakhi mahkhaprünü tümü thakheanü aniake. 7Thrünpuhnü apinü amokhitkhi animung tüsho are api ki zhirü mahmükhapjihba de? Apinü arü ki aruhba de? 8Apinü arü ki niokheamde mahkhapjihbah de inü nüsa ki thachoh. Judüalalashe, küyimki Mihtsürü Tsührü arübanü apinü tsükjide alomi kheak akin lakhi ngüba de?”
Pharisirü le Ruk-threrü Shihdanglimyu
9Kheaküshe apinü nihbuh küdah thiyuro-lungki ah de akinrü tüsho püpürü mükhemükimrü ki shihdanglimyu ha tha: 10“Mihtsürü mahne tamkhüntamnüpü arüngyam ching wutu, khülang Pharisirü tüsho püpü ju ruk-threrü. 11Pharisibuhnü zhip tüsho tamkhüntamnü, ‘Thrünpuh, I a püpürü mihtsürübo–jangkhijangrarü, thiyuro mülarü, müzammüramrü, yungsho ha ruk-threbuh nangde mülakhi hode nü ki makshe jihchoh. 12Inü amu-khip khülang dükeak ching mahne ki khümkeak thsüchoh; I lakhi alala chingnü inü thürü shihcham jihchoh.’ 13Tüshe rukthrebuhnü limshude zhip. Apinü thüning lim she abinkih-a mükheah, tüshe akhüh yümde tha, ‘Thrünpuh, I aneakrü ki amüthsüm laang!’ 14#Mt 23.12; Lk 14.11Inü nüsa ki thachoh, ha buh mihtsürü ju püpürü kheaknü alimbe thsübah anihbuh yam ching yükido; tümüde shepünü küdah thsüde shuhkihchonü abobe kambah, tüsho shepünü küdah thsüde aninibe kamchonü ashuhkihbah.”
Jisunü Azürü Anini Müngühjihkhi
(Mt 19.13-15; Mk 10.13-16)
15Judüki apinü aqiushihpü arünü azürü anini api kilim bedarü; tüshe ajingyanrübonü ju ngübah arübo thürüh. 16Tüshe Jisunü arübo api kilim jibah tha, “Azürü aninibo I kilim arüshang, tüsho arübo düyanlo; tümüde Thrünpuh kiulongthsü harü yo ah. 17Atsütsü inü nüsa ki thachoh, azürü anini khülang nangde shepünü Thrünpuh kiulongthsü müleangkhinü, küyimkishe ju ching müyüzah.”
Alarü Mihtsürü
(Mt 19.16-30; Mk 10.17-31)
18Kheakü yakzanshuhrü khülangnü api ki keokhi, “Thsangyurü atsü, akheam müla rhangdung yamrüplurüp lupü inü tümü rhimobea?” 19Jisunü api ki tha, “Tümü thsükhi nünü I ki atsü de jicho? Sheshe atsü müla tüshe Khülang lah, ju Thrünpuh ah. 20Nünü thiyuzüngbo mükheahlah: ‘Müzammüram düyihbeak, dülaksah, dahüh, arükchih thiyumütsan düthsü, nü buh tüsho nü be wüntreang.’ ” 21Tüsho apinü tha, “Harü alala I athunuchokinü inü rhimodo.” 22Küyimki Jisunü harü sokhea, apinü anihbuh ki tha, “Nü kheaküshe khülangnü maban. Nü lakhi alala yinang tüsho zhochihrü kilim chama jihang, tüsho yinmi chingnü nü rahpung labah; tüsho arang, I dunglim yanang.” 23Tüshe küyimki apinü ha sokhea, api khide mulong rozhakabah, tümüde api khide alarü lakheah. 24Tüsho küyimki Jisunü api khide mulong rozhakkhi ngükhea, apinü tha, “Lakhit larünü Thrünpuh kiulongthsü ching yüzahpü küdükhüh she chakla! 25Tümüde alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku ching hokhi athülihbe ah.” 26Tüsho ju sorünü tha, “Dale tüsho shepü khümkhitba?” 27Tüshe apinü tha, “Mihtsürübo kilim küpü amukukbe lanü Thrünpuh kilim akukbe lah.” 28Judüki Peternü tha, “Kheahang, isanü alala bahjihdo tüsho nü dunglim yando.” 29Jumonü apinü arü ki tha, “Atsütsü inü nüsa ki thachoh, shepünü Thrünpuh kiulongthsü dünkheaknü thüyam yungsho berübuhrü yungsho keoniorü yungsho niuberü yungsho tsührübo bahjihdünü, 30ha lün ching alü thsüde aleangkhibah tüsho arübe lün ching akheam müla rhangdung ngübah.”
Jisunü Api Shepü Mahsam Kipü Thakhi
(Mt 20.17-19; Mk 10.32-34)
31Judüki apinü thürükheak mahne ju bemuwuh tüsho arü ki tha, “Kheahang, isa Jirusalem lim wutuchoh, tüsho Mihtsürü Tsührü dünkheak wukihrübonü athrütkhi alala adünjibah. 32Tümüde api ju khiungkerü kilim jihbah tüsho luhmünede mükhemükimbah, tüsho amukhiukkihbah. 33Arünü api rhapbah tüsho asheshihbah. Tüsho mahsam nipü api arhang kamlobah.” 34Tüshe arünü harü khülang she manikhit; ha thakhi ju arü kheaknü rama lakheah, tüsho athakhibo arünü mümükheah.
Müktukrü Kakheangrü Thsüngukhi
(Mt 20.29-34; Mk 10.46-52)
35Api Jirikho thüninde arüchoki müktukrü mihtsürü khülang limro ching kakheangde alakheah. 36Tüsho yimto khülang hokhi sobah tümü amütsananü apinü keokhi. 37Jumonü arünü Nazarethrü Jisu hochoh de api ki tha. 38Tüsho apinü zhide tha, “David tsührü Jisu, I muzhoang!” 39Judüki mikhuh yürübonü api ki dalan de tha; tüshe apinü alü thsüde zhi, “David tsührü, I muzhoang!” 40Jumonü Jisunü zhikde zhip tüsho api ki bedarüpü thiyukhüm jih. Küyimki api thüninde arükhea, apinü anihbuh ki keokhi, 41“Nü thsungkheak inü tümü rhimoshihnela?” Tüsho apinü alo, “Atungpuh, inü ngünelah.” 42Jisunü api ki tha, “Nü mük khimshuhang; nü yo akinnü nü ngudo.” 43Tüsho judüchokinü api mük khimshuh, tüsho Thrünpuh mung shide api dunglim yan. Tüsho mihtsürü alalanü ju ngüchoki Thrünpuh shijih.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.