THRÜNTAN 13
13
Abram tüsho Lot Müzütkhi
1Judüki Abramnü aniube tüsho api lakhi alala, tüsho api lung Lot bebah Ijip chingnü wukhiukbah Negeb lim wutu. 2Abram ju akam-shiwüh, shotoyinchi tüsho suna ching khide alarü lakheah. 3Tüsho apinü Negeb chingnü hantsahmusubah Bethel le Ai dükeak akhuhlim anihbuh khimyam lapung Bethel khiungde yü, 4tüsho akhuhlim apinü kingaün sadam thsüpung lakheah; tüsho ju ching Abramnü Atungpuh mung jikheah.
5Abram lung yükhi Lot she mihnubo le moshibo tüsho yamkhün le yamlarübo lakheah. 6Kheakü arü rukhüh lapü thsüde alopung musuhdah, tümütüsho arü lakhit-kukruk ato lakheah. 7Tüsho Abram shiwüh le Lot shiwüh kheahrü dükeak alanaji akhiuk. Ju kim ching Kananrü le Perizrü she lomi ching lakheah.
8Jumonü Abramnü Lot ki tha, “Muzhobah I tüsho I shiwüh kheahrü le nü shiwüh kheahrü dükeak alanaji mülashihnü; tümüde isa keoniorü ah. 9Nü mikhuh alo abümnü müla düpü? Muzhobah I kheaknü atrütang. Nü huzulim yüsho, I tsülim yübah; yungsho nü tsülim yüsho, I huzulim yübah.”
10Lotnü zünga kheah tüsho Zoar thrippeang Jordan dükhün ju ke tsüde aduhkhi Atungpuh shahwün nangde, Ijip lomi nangde alakheah. (Ha akhuhlim Sodom tüsho Gomorra thsümünimkhi lakheah). 11Judüki Lotnü api thsungkheak Jordan dükhün alala mokhit tüsho aniakhiuklim hantsahmusude yü. Tüsho arü khülangnü khülang kheaknü chamachih. 12Abramnü Kanan lo ching la, tüsho Lotnü adükhün kiutobo ching la, tüsho api khimyambo Sodom khiungde thsü. 13Tüshe Sodom mihtsürübo hodakde mihbukmuyuk tüsho Atungpuh azhihde neak yihbeaka lakheah.
Hebron lim Abram Yükhi
14Api kheaknü Lot akhin dunglim, Atungpuhnü Abram ki tha: “Nü mük züngang tüsho nü lakhi dangpungnü dukulim, düjinglim, aniakhiuklim, tüsho aniyüzahlim kheahang; 15tümüde nünü angükhi lomi inü nü tüsho nü tsühsoniusobo kilim lünnü ajihbah. 16Tüsho inü nü tsühsoniusobo asungthulung nangde akamshihbah; junangde khürünü asungthulung khekhuksho nü tsühsoniusobo she akhekhukbah. 17Asürang, lomi ashanglim tüsho atolim hode tsahang, tümüde inü ju nü kilim jihchoh.” 18Jumonü Abramnü api khimyam akhin, tüsho yübah Hebron ching Mamre arüngako sangbo thüninde la, tüsho Atungpuh kilim kingaün sadam khülang thsü.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.