LUK 14
14
Jisu-nü Füdhsarü Khüdu Kyangjücho
1Sabath nyümong khüdu, Jisu-nü Farisirü langnürü khüdu kuh la yangtsunung wücho: ko nyitsarütinü abi chah dhing licho. 2Hütsüla tüjütüunü dhsangnangrü nyüh khüdu Jisu yang rocho, 3ko Jisu-nü yuzeng dorü ko Farisirü te tsingdhingcho, “Sabath nyümong kyangjünung yuzeng chah mükeh-o?”
4Ta arühnü ciisü müthsacho. Achotsü Jisu-nü nyitsarüba tsü noro kyangjüpü müthehcho. 5Hütsüpü abinü arüh te yocho, “Nührü yola nyüh khüdu atsurü khüdu mahkhang misüpung khüdu licho Sabath nyümong yongroh la thungyohkhang, nührünü hütsü nyümongnü mütphahchehnung ang?”#Mat 12.11
6Ta arühnü abi te hi nengdang mülalingchehcho.
Alonglüm ko Amüi Nguchi
7Shirü khürünü pümji atsau du throchehcho ngunü, Jisu-nü arüh atümung te yukitaba hi yocho: 8“Khode khürünü kukangba thsütila nüh dsiyohnang, pümji atsaubala tsü tüpüm. Nü tenü ayingba khürüsü dsiyohpü linung kohle,#Cho 25.6-7 9ko nühjüding dsiyohba shikuh tsünü nüte ro yonung, ‘Pümji hi abi khyang khuchüng.’ Hütsüde nüh ashahkhyo apohkiba pümjila nüh pümnungthsa kangnung. 10Hütsü mülih, khode nüh dsiyohnang wünü apohkiba pümjila tsü püm. Ko nü shikuh tsünü ro nüte yonung, ‘I müyang, amungthrilang küro püm.’ Hinü shirü atümung bete nüh jengreng kehsohnung. 11Tunüo sünü palu jangjangthsa diro abi azikyah kangnung, ko sünü palu jangjangthsa azikyah kangro abi dinung.”#Mat 23.12; Luk 18.14
12Hütsüpü Jisu-nü abi shikuh te yocho, “Khode nühnü yangtsunung dsinang, nü shangrüti mahkhang jünirüti mahkhang tsutpurüti mahkhang kurümrü alirüti tüdsiyoh, tunüo arühnü nüh dsimülinung, ko hütsüta sahmülinung. 13Khode nühnü thsüti jünang, ailümrü, jahloh-hilohrü, jingjah-nahtohrü dsiyohng; 14ko nüh müwajünung, tunüo arühnü nüh müsahmülinung. Tsingrangba-nü amüsarü kangliro nyümong nü khyang sahmülinung.”
Thsüti Amülah Yukitacho
(Mat 22.1-10)
15Khode yangtsuchah pümrü khüdunü hi yuchicho, abinü Jisu te yocho, “Tsingrangba yanglih thsütila zehnungrüti khüta akünyangnung!”
16Jisu-nü abi te yocho, “Shikhe khüdu nyüh khüdunü thsüti amülah jücho ko hütsüla nyitsarü adrong dsiyohcho. 17Khode thsüti becho chihcho, abinü shirüte, ‘Rung, lüpcho küdang lilepü yonung akulirü müthehcho!’ 18Ta arüh atümung khüdu khüdunü amütangnung yangchi dikehcho. Akhudibanü kuliba te tsü yocho, ‘Ihnü luh khüdu lihko, ko hütsü dhingnung wünung kangko; I khyang mülang pehjüng.’ 19Aparü khüdunü yocho, ‘Ihnü misüpung dhrela münga lihko ko Ih hütsüri müchehdhingnung würe; I khyang mülang pehjüng.’ 20Aparü khüdunü yocho, ‘Ih kukangyenge, hütsünü Ih mürochehre.’
21“Kuliba tsünü thali wü hiri apüm abi abüdongba te yocho. Abüdongba tsü zichüronü akuliba te yocho, ‘Zahnü yangdi tungte ko ananglang tsü wüng ko ailümrü, jahloh-hilohrü, jingjah-nahtohrü norung.’ 22Tunyah mülipü kuliba tsünü yocho, ‘Adirü nühnü yocho roh-i nguchiko ko adesü pümji alaa lile.’ 23Achotsü abüdongba-nü kuliba te yocho, ‘Langtungte ko mürilang zahnü wüng ko I kuh jengnungthsa nyitsarüti rosohng. 24Ihnü dsiyohrüti sünüsü I tsuyongnung mümüjangdhingnungepü Ihnü nührü te yore.’ ”
Mono Kangcho
(Mat 10.37-38)
25Shikhe khüdu sühdi amülah Jisu yola wüyade, abinü ximüla arüh te yocho, 26“Sünü Ih iiroro, abinü au ko atpa, anitpü ko atsurü, ajünirü ko ajünilarü ko abürü tenü Ih alaa mümüikhang, I mono mükangcheh.#Mat 10.37 27Sünü abürü khala dhipü I khanglang mü-iiroro, I mono mükangcheh.#Mat 10.38; 16.24; Mrk 8.34; Luk 9.23
28“Nührü yola khürünü lungkuh thsanyükhang, abinü akhudi pümpü khütoi pehnung ko hütsü thsachehnungthsa thsi kükyo mülinangpü hümdhingre. 29Hütsüta müthsakhang, abinü kuh tsü dhrong yohpüpü müthümchehnung; ko hütsü ngurü atümungnü abi münyüjünung. 30‘Nyitsarü hinü thsanung dikehpü müthsacheh pü arühnü yonung.’
31“Yangthsarü khüdunü rothsarü hajar dhüre nüpü rothsarü hajar mükyü nüpü roba aparü yangthsarü khüdu nyüm khatanung shemüsukhang, hütsü kohnung mükohnung abinü akhu pümpü thridhrongre. 32Hütsü müthsakhang, lang ashu linü aparü yangthsaba te mongtsa tsingdhingnung abinü langthsarü müthehre. 33Hütsü roh-i, sünü abi licho lüpcho müpehjünang abi I mono mükangcheh.
Amii Mühliba Mih
(Mat 5.13; Mrk 9.50)
34“Mih tsü tsale, ta abi amüsüp changpehkhang, hütsü müsüplisohnung alang mühle. 35Hütsü alih mahkhang kuh wohpehla mii pehnung müdekheng; hütsü thohpehre. Sü nangkhi kehro abinü nyieng!”
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.