JOHAN 4
4
Jisu ko Samarialarü
1Johan tenü Jisu-nü adrongu mono kangsoh baptijülepü Farisirü-nü yuchicho. 2(Amonotinü baptijücho chah khu; Jisu apu nülü süsü mübaptijü.) 3Achotsü khode hütsü roh-i chochicho tsü Jisu-nü yuchicho, abinü Judea pehjüpü Galil lang thali wücho; 4ko hütsülang wünung tsü Samaria bong tsinung kangcho.
5 #
Lip 33.19; Jos 24.32 Achotsü Jakob-nü atsudhre Josef khyang jüba lih shündhün Samaria la yangdi khüdu anengnü Saikar la abi rocho. 6Hütsüla Jakob kihkong licho, ko Jisu lang tsehchonü kyahsehpü, kihkong te tsü pümcho. Hütsü nyüthung koh thsacho.
7Samaria-larü khüdu kih khanung rocho, ko Jisu-nü abükyü te yocho, “I khyang kih ayongnung khülo.” 8(Amonoti yangdi lang tsuyongnung lihnungba wüpü licho.)
9 #
Ezr 4.1-5; Neh 4.1-2 Khingkutpü tsünü lalingcho, “Nüh Jihudarü khüdu ko Ih Samaria-larü khüdu, nühnü khütapü Ite ayongnung chingro?” Tunüo Jihudarünü Samariarü#4.9: Samariarü: Samariarünü bichicho shingtbhürü chah Jihudarünü müthapüre; mahkhang Jihudarü ko Samariarü mülung anyüh shingtbhürü khüdu müthsachehre, ko lili yah lasü müxengyangpitare. te tsanghi mütsutare.
10Jisu-nü lalingcho, “Tsingrangba-nü tu jüro ko nüte ayongnung chingba tsü nühnü müdherelanglü, nühnü abi te chingbae, ko abinü nü khyang akangnung kih jübae.”
11Khingkutpü tsünü yocho, “Adirü, nüh yükohsü müli ko kihkong hi asoh-e. Khang nüh khüdenü akangnung kih tsü ngunung he? 12Hiba kihkong hi ihrü jümürü Jakob-nü ihrü khyang jücho; abi ko abi tsurüti ko abi thsitsurüti atümungnü yongcho. Nüh Jakob tenü adiu mah-o?”
13Jisu-nü lalingcho, “Sürünü hiba kih yongro thali xonung, 14ta sürünü Ihnü jüba kih yongro khodesü müxonung. Ihnü jünungba kih tsünü abi chah kihnatung kangnung, khüi khu abi khyang akangnung kih ko müchangkaba akang jünung.”
15Khingkutpünü yocho, “Adirü, Ih müxonung ko hila kih khanung müronungthsa I khyang hütsüba kih tsü khülo!”
16Jisu-nü abükyü te yocho, “Wüng ko nü nii dsipü thali rung.”
17Abükyünü lalingcho, “Ih Inii mühle.”
Jisu-nü lalingcho, “Inii mühlepü nühnü yuje yoko. 18Nüh nyüh münga kuh la xengko, ko ade nüte liba tsü nü nii mah.” Nühnü ade yuje tsatsa yoko.
19Khingkutpünü yocho, “Nüh azikehrü khüduepü Ihnü ngure.” 20“Ihrü jümürü Samariarünü hiba zong la Tsingrangba mübü rocho, ta nührü Jihudarünü Jerusalem la du Tsingrangba mübübaepü yore.”
21Jisu-nü abükyü te yocho, “Khingkurü, I yu yudsing, nührünü hiba zong lanye, Jerusalem lanye Au mümübünung shikhe ronung. 22Nührü Samariarünü sü mübüro hütsü mütsüp; ta ihrü Jihudarünü sü mübüro hütsü müdhele, tunüo akangcheh tsü Jihudarü khu rore. 23Ta yuje mübürütinü anbü la ko yuje la Au mübünungthsa bekhyah tsü tsehle, ko hütsü ade lile, tunüo Aunü abi mübürü hitari yangchire. 24Tsingrangba tsü Anbü, ko sürünü abi mübünang Anbü la ko yuje la mübünung athsalang.”
25Khingkutpünü abi te yocho, “Mesia ronungepü Ihnü müdhele, ko khode abi ronang, abinü ihrü te lüpcho yonung.”
26Jisu-nü lalingcho, “Nüte sünü chotaro hütsü abie.”
27Hütsüde Jisu monoti tsü thalicho, ko khingkurü khüdu te abinü chota yacho ngu arühnü nyemüyangcho. Ta sünüsü abükyü te, “Nüh tu khyünyüro? Mahkhang tuepü nüh abi te chotaropü müyochehcho.”
28Hütsüpü khingkutpü tsünü abükyü kih shinga pehjüpü yangdi lang wücho, ko nyitsarüti te yocho, 29“I nguchicho lüpcho yochehba nyitsarü hi ro dhing. Hi Mesia tsü mah-o?” 30Achotsü arüh atümung yangdi pehjüpü Jisu dhingnung wücho.
31Hütsüde tsü monotinü, “Adorü, yangtsung” pü kihchicho.
32Ta abinü lalingcho, “Nührünü mümüdheba I tsuyongnung lile.”
33Achotsü monotinü arühbürü chotacho, “Abi khyang khüroronü tsuyongnung hirojücho mah-o?”
34Jisu-nü arüh te yocho, “I tsuyongnung tsü,” “I riwüsohba yochonyinung ko I khyang jücho nguchi thüm nguchinung. 35‘Choo müyü lipü maxa kyang chinung’ pü nührü choyoh yu khüdu lile. Ta Ihnü nührü te yore, nührünü tsungmüsu dhing, luh tsü nyithohko ko maxakyang chihko! 36Sünü xaro abinü amii ngure, ko lede akang nengdang asih khyübülungre; hütsüta ashuba ko axaba anyüding künyangtare. 37‘Nyüh khüdunü shure ko aparü khüdunü xare’ pü choyoh yunü yoba tsü yuje. 38Nührünü müyuthsahcho xanung Ihnü nührü müthehcho; aparünü nguchicho ko arüh nguchicho lanü nührü jingchocho.”
39“Ihnü tuturü nguchicho lüpcho abinü Ite yoko, ko khingkutpünü yuzi jüde, hütsüba yangdila Samariarü adrongnü Jisu chah yudsicho.” 40Hütsünü khode Samariarü abi yang rocho, abi arüh yola lieng pü arühnü kihchicho, ko abi hütsüla nyümong anyüh mungcho.
41Abi yusi khunü aparü adrongnü yudsicho, 42ko arühnü khingkutpü te tsü yocho, “Nühnü yochonü mah, ta ihrübürünü yuchicho khu ade ihrünü yudsire, ko yuje abi tsü limih Kangchehjübaepü ihrünü müdhele.”
Jisu-nü Adirü Khüdu Tsurü Kyangjüre
43Hütsüla nyümong anyüh mungpü, Jisu Galil lang wücho. 44#Mat 13.57; Mrk 6.4; Luk 4.24Tunüo apunü yocho, “Azikehrü tsü palu lih lalü jengreng müjüre.” 45#Jhn 2.23Khode abi Galil lang rocho, hütsüla lirünü abi khyüchocho, tunüo Jerusalem la Phungkhu Thsütila tsü arühsü wü zehcho ko thsüti shikhela abinü nguchicho apüm arühnü ngucho.
46Hütsüpü Jisu-nü Galil la liba Kana yang khüde abinü kihnü cikih kangsohcho hütsülang abi thalicho. Hütsüla adirü khüdu licho sü tsurü Kapernaum la füdhsa licho. 47Khode abinü Jisu Judea lanü Galil lang rocho yuchicho, abinü abi yang wücho, ko abi te wü Kapernaum la sünungthsa liba atsudhre tsü kyangjüng pü kihchicho. 48Jisu-nü abi te yocho, “Thsayahiya ko anyemüyangnung münguchidelü nührü sünüsü müyudsinung.”
49Adiba tsünü yocho, “Abüdongba, I tsurü müsü denü I yola rung.”
50Jisu-nü abi te yocho, “Wüng, nü tsudhre kyangpehnung!”
Abinü Jisu yu tsü yudsicho ko wücho. 51Abi wüyade akulirünü yusi hiro abi mütohnü yocho, “Nü tsudhre kyangpehko!”
52Achotsü abinü arüh te khode tinü abi kyangcho pü tsingdhingcho ko arühnü lalingcho, “Atü anyüzehlang khüdu bekhyahla rihminü abi pehjücho.” 53Hütsüde au tsünü hütsüba bekhyahla tsü Jisu-nü abi te, “Nü tsudhre kyangpehnung” pü yocho lümchehcho. Hütsünü abi ko kukhi shünü yudsicho.
54Hiba hi Jisu Judea lanü Galil lang ropü nguchicho thsayahiya anyüuba lile.
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.