MATHIU 3
3
Jon Baptisma Joban Ngin Phoangthô
(Mak 1.1-8; Luk 3.1-18; Jhn 1.19-28)
1Ere sanpoatko Jon Baptisma Judia wah sehah nâng hûlahma Joban ngin bengphoangthô wah. 2Atema ngatwah, “Nepap hehwah hungngaklit en,” “chenrãngma ngako, rangkhethung Hahsông pa lânam hûtha!” 3Jon pa Isaia Mõng ma thôtah mihnyan pa dângwah
“Sehahkho nâng wathe mihnyan rakeka,
‘Teso rãngma lem hôankoh en;
Ate khôamrãng lemtin hôankoh en!’ ”
4Jon khetpa Ut banwah hôanwah; ate roam tumlitko ngemkhoan roamdit pa dit rewah, ngale ate phhekchhah pa kupchhang ngale wunnyahti heh dângwah. 5Jeroselem wah, Judia diak chentôwah, ngale Jordan jokêm nâng sôngte chentô mihnyan heh Jon tânâng hokwah. 6Mihnyan hehma thinma chentô pap motah heh loatthô rewah, ngale Jon ma thinnâng Jodan joko baptijem kohwah.
7Jon baptisma ate tânâng Farasi le Saduki heh jahmõang baptijem keprãng hok khelahma, thinnâng ngatwah, “Pû heh - Joban ma chêmchei hokthukrãng ngaeka kowah etape en ngama henma thôkoh ehèn a? 8Nea papwah hung lâlittet ngama khesokli moatlem mo en. 9Abraham pa nite niwa dângwah ngama ngatko Joban rinkhah thunwah tape e ngama nekthonghun en. Ngama nenâng thôkoh eka, Joban ma are long hehwahmin Abraham chhuchha rãng tahôan a! 10Wâka pa bãngrin khohko thien lahma tonga, penri leribãng chentôpa bãngrin thongma runjoat lahma wennâng thhekmin. 11Ngama joma hunglit rãng baptijem koheka, rohkomin ngadiko nganoma bâmbâm adong wathe ekara; nga a ate dapheng sêmkoh rãngjô punmek. Atema Asâthôanju ngale Wenma baptijem ekohhèn. 12Ate chhah chaaprãng ate dekko wenkhoang sem eka, chhahsek sekpa pumko ekhôanthien a, ngale chhahphathoak heh chenthujô lemut wenko erokthhek a.”
Jisu Baptijem kep Ngin
(Mak 1.9-11; Luk 3.21,22)
13Ere sanpoatko Jisu Jordan joko Jon wah baptijem keprãng hokwah. 14Rohkomin Jon ma aroh ngalahma lenyok dângwah, “Nganângjô nangma baptijem kohmin dângwah,” “phumma nanga ngawah baptijem keprãng kaeroa!”
15Phumma Jisu ma Atenâng dânthâng wah, “Athângheh rãngma arohjô chendanga, Joban ma huneka moatlem pa nãngma arohjôba moatmin.” Erediko Jon ma Jisu nâng baptijem kohwah.
16Jisu baptijem kepdiko jokowah loatkhôam wângwah. Erediko rangkhethung pa Atenâng laangkohwah, ngale atema Joban Jupa wochha rãngrãng kalahma ate khoko tôngkat khewah. 17Ngale rangkhethung wah jabkhab hongjab katwah, “Arepa ngachha, ngama Atenâng nyahrãng hun ekang, Ate demnâng nga nyahrãng rinme ekang.”
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.