LUK 21
21
Janthoinyu ma Ngun Sekkoh
(Mak 12.41-44)
1Techhu hehma Rangsoamhum wah ngunsek bâkoatko thin hînhô heh sekhok pa Jisu ma tumlit phoangsok wah, 2ngale nyahrãng tangchhih janthoinyu ma janngun phanii sekhok pemin atema khewah. 3Jisu ma ngatwah, “Ngama nenâng thôkoh eka, are tangchhih janthoinyu pumma chentô noma ajahthôan sek eka. 4Chenrãngma ngako, ahan hehma thinnâng lephangleng bâeka hehwah sekhûera; rohkomin atea aretô tangchhih danglahma atema chentô chêika erepa phangtang sek eka.”
Jisu ma Rangsoamhum Chhihjâ Ngin Jab
(Mt 24.1,2; Mak 13.1,2)
5Dijunte khuthe ere Rangsoamhum junma jabmînwah, chentô nyoaksokli sên a, long heh sênpa ngale Joban nâng hînhô kohhû eka heh sênpa ngama jabmînwah. Phumma Jisu ma ngatwah, 6“Nema are chentô khe eken long heh phangthemin ate theko letongtu sanpoat pa ehûra; phangtang runjâ erea.”
Chêmchei ngale Mihma Chêmsiet
(Mt 24.3-14; Mak 13.3-13)
7Thinma thôngphâ wah, “Hethôte, arepa chenthu dângmin a? ngale areheh dângrãng sanpoat pa lâthângtah ngama jetrãng chenni dângmin a?”
8Jisu ma ngatwah, “Jetletma dangen; mihnâng nekdiep chhahrii en. Ajahthem mihnyan hehma ngamîn keplahma ehûra, thinma ‘nga a ate!’ ngama engawak a, ngale ‘Sanpoat pa lâhûtha!’ ngamemin engawak a, rohkomin thindi nekjun en. 9Chenthu nema ranloatmîn ngale rantîn ngemtîn metat enkomin nekchei en; ererãngrãng heh khebeng bengdâng mêngmin, rohkomin ereheh junko athôan sanpoat pa lânamtha ngama dangmah.”
10Jisu ma thôkoh wah, “Diakthe pumma diakthe demko eloatmîn a; wanthe hahsông pa ahan wanthe hahsông demko elongmîn a. 11Hahtiidong pa tii erea, rêmdongpa hû erera, chentô thenâng khoanchet chhih hong erea; rangkho wah cheili ngale ajatjatmin ehong kara. 12Are chentôpa dângmako, khebângko ne loatkhhek ere hèn ngale chêmthukmin ere hèn; nea Sanagog nâng siethû lahma sekham lahma phâtek nâng esek hèn; nea ngadijunte dângdi lowang ngale diak pênte hehmako siethû lahma esekham hèn. 13Are sanpoatko nema Nginkongsen pa eta thôkoh en. 14Ere sanpoat pa hokmako nema chenroh pêthângmin a ngama lesekmah thangma dângrãng thonghun letma tongen, 15chenrãngma ngako neran hehma ne nginko lejien dakli ngale lejien dânthangtuli nema jiendânthâng rãng ngama nenâng jabkhab ngale buthi mongthem ekoh a. 16Ne nyong newa, nepho anaa, ngale netang amang, ngale ne lemruchha hehma elokhhek thuk hèn; ngale nekhuwah aritphemin erehèn. 17Nganâng putedâlem junko anga ngama chinnya ere hèn. 18Rohkomin nekhowah khochoo lathemin lemahmin. 19Putedâlem nâng rõngtângtâng dangen, erohkoba nedede eta pesietrii en.
Jisu ma Jeroselem Chhihjâ Rãngma Jab
(Mt 24.15-21; Mak 13.14-19)
20“Chenthu nema Jeroselem pa Sipâhi ma tûmchep lahma makhetetko, Jeroselem pa sitsiak chhihjârãng ngaeka ngama ejet en. 21Erediko Judia wah sôngte mihnyan heh hahhokho nâng ehuh chhoanwãnga; Hahdaang kowah hehmin loatchhoan rêmin, ngale erediak kowah rangsâ nâng dângwah hehmin hahdaang nâng lengak hûtumin. 22Chenrãngma ngako ere sanpoat pa, Joban nyapraangma ‘Chêmchoh sanpoat dângmin ngama,’ ngaeka chentôpa linlin edanga. 23Ere sanpoat kowah naawunte dihiaknyu ngale naajeng chha demnâng dângte dihiaknyu hehrãngma chentô chhih dângmin a! Are hahtokkhoh ko nyahrãng chêmchhih ehûra, ngale ere mihnyan heh khohko Joban wah chêmchei pa ekara. 24Khakapa dengnâng eriia, ngale khakapa chentô diak akan hehnâng ekhhek chhoan a; ngale Jews ledangte hehma Jeroselem pa thin sanpoat pa mathâng thângkako dama ewoatnek a.
Mihnyan Chha Hok
(Mt 24.29-31; Mak 13.24-27)
25“San, Dâ, ngale Merit hehmin ajatjat edangjâa. Hahtokkhoh wah chentô diak akan heh hungchhih rekmah edanga, ngale josi rahlîn rek akah heh tatlahma nyahrãng echeiwak a. 26Hahtokkhoh kowah patrit sekmah thin hokpa khelahma mihnyan heh cheima moklek lahma ritwâng erewak a, chenrãngma ngako rangkho wah san, dâ, ngale merit erediko chentôpa jârit erea. 27Erediko Mihnyan Chhapa phoamkhoh nâng chaan ahâng demnâng ehong kara. 28Chenthu ererãngrãng heh medang tahko, sekmah patrit lere thangma khuhah nâhah dangletma toansûwên en, chenrãngma ngako ne khope pa namhû era.”
Phukbãng wah He
(Mt 24.32-35; Mak 13.28-31)
29Erediko Jisu ma are nginthakthô pa thôkoh wah: “Phukbãng ngale ahan bãnghehnâng thatthonghun tan en. 30Chenthu nema bãngheh achhong mechhong tahko, nema rangchodâng lâthângtah ngama rângnga en. 31Ererãngrãngjô, chenthu nema areheh danglahma mekhetet ko, nema Joban Hahsông pa lânam hûtha ngama ejet en.
32“Thonghun en, areheh phangtang athângwah ahînte mihnyan heh phangtang târitmako edanga. 33Rangle hah eta chhihjâa, rohkomin nga jabkhab pa chenthumin leta chhihjâmin.
Jetlihma Dângmin
34“Jetletma dangen, ngale jokphhek chhah, erediko are hahtokkhoh roandông rãng sekmah patritjû nekdangen, eroh medang enko ere rangwo pumma lemlienma 35benâng mânwah rãngrãng môangleplo hûhèn. Chenrãngma ngako ererangwopa hahtokkhoh wah chentô mihnyan heh khohnâng hokmin. 36Eroh-wah jetletma dangen, ngale are chentô dângwângthin hehwah tapeletma Mihnyan Chha mathahko tâhokwâng rãng chaan chenchoh en ngama roantang rangsoam letma tongen.”
37Ere sanpoatko rangwo roakweih Jisu ma mihnyan hehnâng Rangsoamhum nâng hethô lahma dângwah, ngale sanhêmthah ko, chhoan lahma rangpen pa Oliv hahhokho ko tôngwângwah. 38Rangkhahkho roakweih mihnyan heh phangtang atewah ngin chohtatrãng Rangsoamhum nâng chîhokwah.
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.