LUK 11
11
Jisu ma Rangsoam Hethô
(Mt 6.9-13; 7.7-11)
1Jâthe Jisu the wanthe thenâng rangsoam lahma dângwah. Chenthu atema rangsoam diko, ate dijunte wathema atenâng ngatwah, “Teso, Jon ma ate dijunte hehnâng rangsoam hethôtah rãngrãng ninângmin rangsoam hethôhi.”
2Jisu ma thinnâng ngatwah, “Ne rangsoamko, aroh soam en:
‘Wa:
Nangmîn Asâthôan pa toaksân e;
Nang Hahsông karoo.
3Rangwo roakweih nima lem eki phhekchhah chohkohhi.#11.3: nima lem eki phhekchhah; ba nènep rãngma phhekchhah.
4Nipap heh map kohhi,
chenrãngma ngako nirãngma kaamchhih moatte chentô nâng nimemin mapkoh eki.
Ngale nihung nektoan thuk hi.’ ”
5Ngale Jisu ma ate dijunte hehnâng ngatwah, “Chenjô komin nekhuwah wathe lemruchha humnâng rangpen mongtang nâng chhoan letma, ‘Lemruchha, nganâng bankên wah chhupremtô nêmthuk mênghang, ngama lângatet. 6Chenrãngma ngako arohroh nga lemruchha hûera, phumma atenâng phhekchhah thukrãng ngahumnâng chenjô aho!’ 7Ngale chenjô komin nang lemruchha pumma humkhenma, ‘Nga nekphaang siethang! Kâsekmin lâsektih, ngale ngachha hehmin, erediko ngamin jupthinnâng lâjuptih. Nangnâng kohrãng tapeklek toansattumak’ ngama medânthang hènko, 8Nema chenre tumin a? Ngama nenâng thôkoh eka, nanga ate lemruchha dângdi nangnâng bankên kohrãng lenyok toansatjô medang komin, nangma letôan thangma methãm thaoko, atema toansat lahma nangma chennilem eko erepa ekohho. 9Ngale ngama nenâng thôkoh eka: Tha en eko nema echoh en; lem en, eko nema echohkhe en; kâsekko rahkongen, eko kâsekpa nerãng elaangkohhèn. 10Chenrãngma ngako henhenma thaeka erehehma echoh a, ngale henhenma lemeka erehehma echohkhe a, ngale henma komin kâsekko merahkong ako atenâng kâsekpa elaangkoh a. 11Nekhuwah henma komin wa dangletma mâmâ chhama ngah thâko pû ekoh en a? 12Rohkole atema woti thâko gusirong ekoh en a? 13Nea atô chhihjô medang enkomin, nema mâmâ chhanâng asenli kohpa jet eken. Eroh medang ako, rangkhethung wah tôngte Joban Wa mejã tanga atewah Asâthôanju thâte hehnâng kohpa chentô bâmjet eka!”
Jisu ngale Bilzibul
(Mt 12.22-30; Mak 3.20-27)
14Jisu ma jab lejien jabte mihnyan wah juchhih junloat kohwah; ngale chenthu juchhih pa loatchhoan phumma mihnyan pumma jienjab wah. Phumma loangchhang pa bârit rewah, 15Phumma khaka mihnyan hehma ngatwah, “Arepa belzibul, juchhih heh lowang ma atenâng juchhih heh junloat rãng chaankoh eka.”
16Mihhan hehma Jisu bukritthuk hunwah, ephumma thinma Jisu nâng Joban pa ate demnâng ngama jetrãng, ninâng patritli moatlem molohma khesok hi ngama chienwah. 17Rohkomin thinma chenni thonghun eka erepa Jisu ma jetlo lahma ngatwah, “Hendiak komin thindede tungko phanmîn lahma, thindede memênmîn ako, ere diakpa leta rõngmin. Ngale henhumkâ komin thintungko chhihmîn eka ere humkâpa phânjâ erea. 18Erohwah joak heh hahsông pa thintungko mephan mênmîn ako, chenroh jienrôngmin a? Nema ngaeken, bilzibul ma nganâng chaan kohlahma ngama juchhih junlo ekang. 19Ngama juchhih eroh junloat medang angko, ne dijunte hehma chenroh rângjunloa? Ne dijunte hehma nea athe ngama jet ehèn! 20Eroh dangmah, ngama Joban chaan junma juchhih junlo ekang, ngale erejunko netânâng Joban Hahsông pa lâkatha ngama khesok ehèn.
21“Chenthu lochaanwa ma, ate humpa wentho dãng apah keplahma mebem ako, ate chhahkhem heh lemahmin. 22Phum-ma chenthu ate nomemin lochaan wama khum lahma ate mejien ako, hum tângte pumma dâlemrãng thientah wentho deng apah heh phangtang etoanchhoan a ngale atema chenni huhtah a ereheh ephen kep a.
23“Hen komin nga demnâng ledangte pa linlin nga lelatnâng dângte; ngale hen komin nganâng akhôansietko lechohsûtea erepa aphânsiette.
Juchhih Ngakhok
(Mt 12.43-45)
24“Chenthu juchhih pa mihnyan wah meloatchhoan tahko, hahran khojêng jêngnâng phoangchhoan lahma ate boantôngthe rânglem chhoan a. Phumma the lechoh medang ako, atedede rângnga riia, ‘Ngahum kojô ngakwãng ang.’ 25Ephumma chenthu ere humko ngakhokko, humpa sek ho, sâpoangpoang ngale tiamtete ekhehûa. 26Erediko ate ngakchhoan lahma ate noma ajahthem juchhih ahan wanengit lesiet lahma ere humko ngaksong hûeka. Ere diphumma, mihnyan pa khebângwah noma ajahthem chhih dangeka.”
Toangtang Khuhah
27Chenthu Jisu ma aroh ngatthuko, mihchhang wah dihiaknyu wathema loatjab lahma ngatwah, “Nang chhatte ngale nang dôngkhêmte dihiaknyu pa chentô khengraangsên a!”
28Phumma Jisu ma dânthâng wah, “Ere nomemin khengraangsen pa, henhenma Joban ngin tatlahma senthemthem kep eka ereheh dângmin!”
Apatritli Moatlem Khesokrãng Chien
(Mt 12.38-42)
29Mihnyan heh Jisu tumlitko jêngjah jahhû rewah, ngale atema thinnâng thôkoh wah, “Areroan wah mihnyan heh chentô chhih a! Thinma patritli moatlem khesokrãng chien ehang, rohkomin chenjô lekhesokmin Jona patritli petah pelolo ba khesok eka. 30Mõng Jona pa Ninivi wah mihnyan hehrãngma khesoktah rãngrãng, arerôan wah mihnyan hehnângmin Mihnyan Chhapa eroh ekhesok a. 31Khope rênjâ rangwo ko, sannyup wah Siba wangcha memin toanchep lahma athângwah mihnyan hehnâng achhih enga a, chenrãngma ngako, ate diak hahtaang wah Solomon Lowang ma hethôeka ngin heh jetatrãng hokwah; phumma ngama nenâng thôkoh eka, Solomon nomemin ajahthem adongpa thejâ ako tonga. 32Khope rênjâ rangwo ko, Ninivi wah mihnyan hehma ne mathahko toanchep lahma nenâng achhih engahèn, chenrãngma ngako Jona ma Joban nginthô tatlahma thin papwah hung litwah; ngale ngama nenâng thôkoh eka, Jona noma ajahthem adong thejâ ako tonga!”
Phoang wah Wenphiak
(Mt 5.15; 6.22,23)
33“Henmemin wentit toaklahma huhriemmah, ba khokkhen nâng sekmah;#11.33: wanwanthe nâng arepa aho ba khokkhen nâng sekthienmah. erenoma, wentit toakthinko etoak a, erohkoba mihnyan heh humkhen nâng lupwângko thinma wenphiak pa ekhea. 34Nemitpa ne phoang rãngma wentit rãngrãng. Nemitpa asen medang ako, ne phoang phangtang wenphiak edanga; phumma nemitpa achhih medang ako, ne phoang pemin phangtang rangnyek edanga. 35Erohwah, jetletma dangen, ne wenphiak pa rangnyek nekchendang eka. 36Ne phoang phangtang wenphiak lolo danglahma, rangnyek chhupthemin aho medang ako, wentitma nenâng chhakphiak rãngrãng, ne phoang phangtang phiakjaja edanga.”
Jisu ma Farasi ngale Niemarang Hethôte hehnâng Achhih Ngat
(Mt 23.1-36; Mak 12.38-40)
37Chenthu Jisu ma nginthôkoh diko, Farasi ma phhekchhah chhahrãng roowah; ephumma Jisu wãng lahma phhekchhah chhahrãng tôngwah. 38Jisu ma phhekchhah chhahmako ate dek lesoan thangma chhah pa khelahma Farasi pa patrit rewah. 39Ephumma Teso ma atenâng ngatwah, “Ne Farasi hehma ne bâti le wankhoang tokkhohpa lolo sâpaeken, rohkomin akhenpa mihwah nyenkep ngale achhih lolo. 40Aba heh! Tokkhoh hôante Joban pumma jôba akhen hehmin hôaneka ledangne? 41Erohwah ne bâti le wankhoang khenko chenni tonga ereheh tangchhih hehnâng koh en, ngale erohkoba chentôpa nerãngma niemarang junko asâ tuta edang kohhèn.
42“Farasi heh nerãngma chentô cheili dângmin a! Nema chentô rangkuh sanha roakweih rongrup pôari, pheru wahra, hehwah Joban nâng thãkho kohhû eken, rohkomin nea toangtang dangmet ngale Joban nâng hunmet. Phumma ahan heh moatleko nema ereheh bengmoatmin dângwah.
43“Farasi heh nerãngma chentô cheili dângmin a! Nea Sanagog nângmin tôngthinsen pa châletma thien eken ngale bôjat nângmin mihnyan hehma ne ranchei nungma rânjab hun eken. 44Nerãngma chentô cheili dângmin a! Nea mangrûmãn lekhe mangruk rãngrãng, mihnyan hehma lejet thangma ererãngrãng mangruk khohko khoam eka.”
45Niemarang hethôte wathema atenâng ngatwah, “Hethôte, nangma are jab ekopa ninâng dûmmek thiak jabeko!”
46Jisu ma atenâng dânthâng wah, “Niemarang hethôte heh nerãngma chentô cheili dângmin a! Nema mihnyan heh temko ahênrãng alat ngale alih hènthuk eken, reletmamin ere hênpa tâtoan hênrãng nema deksu metômin chohtôanpê hunmet. 47Nerãngma chentô cheili dângmin a! Nema mõngheh mangruk pa sênmõang hôankoh eken - ere mõngheh nete newa hehma ritphewah. 48Ngale athângheh wah nemoatlem pumma nete newa hehma motahpa linlinjô dângwah ngama khesok eken; thinma mõngheh ritphewah, phumma nema ere mõngheh mangruk pa senhoankoh eken. 49Erohwah Joban buthi mongthem ma ngatwah, ‘Ngama thin tânâng mõng ngale nginmatte heh echienkat ang; phumma thinma wawathe pa aritphe erewak a, ngale wawatheko chêmthuk erea.’ 50Erohwah rangbeng hahbeng thuma mõngama heh ritphe tahthã, arerôan wah mihnyan hehma chêm echoh a, 51Abel bengrit phetah pumma danglahma, joapsoapthin chaam ngale Asâthôan the tungko Zakaria ritphetah thãpa. Ngama, nenâng thôkoh eka, arerôan wah mihnyan hehnâng chêmchoh thukmin!
52“Niemarang hethôte heh nerãngma chentô cheili dângmin a! Nema Joban buthi mongthem hethin humko wângthin sâbipa sem eken; phumma nededemin wãngmet, ngale hen wânghun eka erehehmin wãngthukmet!”
53Chenthu Jisu ma erethepa phethien lahma loatchhoan poatko, Niemarang hethôte ngale Farasi hehma Jisu nyahrãng chhihthô wah ngale atenâng ajahthem ngin heh thongpha rewah, 54erepa Jisu ma chen akomin methejab ako atenâng athe ngama jienloatrãng thinma bechenwah.
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.