MATHI 6
6
Plungnee mlei thu mdo Purchu
1“Mii rek maiṭhuwmmi mmaan do dee rang ngi plung klut dotlot ado tlot ma nraan chek asin chaan; anto mkurthut mabi parwaan ki Apah in hinki mnah thloi chni maan ti.
2“Ava leiji, naanni apiik chaak in mpha thu; adu suk inni peengkhul dum maan, ṭha tlot ktlo rekki synagog thu,ungu lamṭhuwm rek thu mii rek do panpaak rang ngi mdo tlot in lulu tlo maan. Kinditti Neiji ahin thaanni kthea; mmaanki mnah ava mdo arlaan chaak dok in. 3Pdainu naanni apiik chaak in mpha thu, achang inki khut dotlot ava alee inki khut pdee maan; 4anto mkurthut bi ado piik chaak rek in ava kurthuwk ra; ungta tuprutti aksut pṭoi chaan Apah inni mnah akpii chraan.
Kṭhil cha Mlei thu mdo Purchu
5“Ungta naanni aṭhil chaak in mpha thu,ṭha tlot ktlo rek lulu akurthut raan pme; mleija mmaanni synagog rek thu ungu lamṭhuwm rek arkil thu, mii rek dodee rang ngi rip da kṭhil cha ava mdo ngei in. Kinditti, Neiji ahin thaanni kthea,mmaan ki mnah ava mdo arlaan chaak dok in. 6Pdainu naanni aṭhil chaak in mpha thu, innka thu vangluwt inra ungu thurngot asul in thiinra tuprutti ka am naanki Apah ava hin aṭhil chaan; ungu tuprutti aksut pṭoi in naanki Apah ava ngi mnah akpii chraan.
7“Ungta kṭhil cha thungva ktlok chati rek dotlot lulu ngi do ksii kma ngi pau purnuwm maan; mleija mpauna rek in knempok leiji karyaak pik lamra kdingi bin lamda. 8Mmaan hep daat kurthuwk maan, mleija naanni aṭhil chaak du in liitti ado kriin chaak in ava Apah inni mdo dee dok.
9“Hanto lulu ngi aṭhil chaan:
Parwaan tha ka am neenki Kpah,
Nah amiing kchiir kurthuwk so.
10Nah Akruwngpaam kurjung kurthuwk so,
Parwaan tha aplung bin ado tlot heppi,
dultipaam thu kurthuwk so.
11Mnii ktaiki thenpen tnii mhai pii chaan;
12ungta neen rukku neen ki lei ktuwl rek
kdo ptlot pik in heppi, klei tuwl rek in
mhai ptlot pik chaan;
13ungta kepthleem thu mhai ptla chmaan,
pdainu kṭha kma thungki mhai arthuw chaan;
mleija Kruwngpaam, ungta rutan,
ungu laarnee ava kṭuw knai kma ki Nah ado:
Amen
14Mleija naanni mii rek do parma na aptlot pik inbi, parwaan ki Apah in ruk va ado parma naan thungki akuptlot pik chraan. 15Pdainu naanni mii rek do parma na thungki aptlot pik maanbi, Apah in rukva ado parma naan thungki aptlot pik in nime.
Kngowl mlei thu mdo Purchu
16“Ungta naanni then angowl in mpha thu, ṭha tlot ktlo rek lulu ngi; mik sut na thung ngi arda kdowng ngi am maan, mleija mmaanni then mngowl in mpha thu mii rek do dee nrang ngi mmai in tpurnung lamda. Kinditti, Neiji ahin thaanni kthea, mmaanki mnah ava mdo arlaan chaak dok in. 17Pdainu naanni then angowl in mpha thu, aluwn thao apbul inra ungu amai in aphiit in. 18Ungu mii ngi athen ngowl in ava dei nime pdainu tuprutti ka am naan ki Apah in, ungta tuprutti aksut pṭoi in naanki Apah inni mnah akpii chraan.
Parwaan ki Suwang sii
19“Ngeetti pṭum da tampei kakaak chra, ungu kupru rekki pkui donle mdo prut chaak ra; dultipaam thu adaksaa kiinra alrou purtuwl maan. 20Pdainu ngeet do pṭum mara tampei kakaak kmara ungu kupru ngi mdo prut chaak mara, adaksaa inki tumra parwaan tha alrou apurtuwl chaan. 21Mleija naanki alrou am na thung ngi aplung bin in rukka ka am ra.
Daksaa Ar awng
22“Daksaa meila ava mik. Ava leiji amik in mdam bi, adaksaa in mkheng nga mar awng ngi kdimra; 23pdainu amik in mdam mabi, adaksaa in mkheng nga kjiing ngi kdim chra. Naan thungki mar awng ngi mjiinbi; ava tija thung ngi klin kurthuwk chdaat rang!
Isowr ungu Alrou rek
24“Ku mii khat lee ngi chukpu knii sok lo nime; mleija mma ngi khat pder chthi donle khat wonsat klo ra, mdit mata khat hin plung plut bet thi donle khat hin pau kleek psuk ra. Naanni Isowr leh alrou sok adolown ro nime.
25“Ava leiji Neiji ahin thaanni kthea, naanni arinkhuwn mlei thu, talu chaa nikdi mdit mata talu nee nikdi mdit mata adaksaan mlei thu talu hiil naa nikdi kdingi plung pja maan. Then hinnu rinkhu ungta dona hinnu daksaa ava ngi kheel sii pme mo? 26Kjuwng puwa rekka asuwn; mmaanni pṭau lamme, arkun lamme, ktom thung ruk va purkuk lamme; anto daat joso parwaan ki naan Apah ngi mdo pmaal chaak lam. Naanna mmaan kheel dek kurthuwk maan ti mo? 27Ungta naan ku mii khatti plung mdo pjat leiji mrinkhu khutup khdaat pang pre mpursown pchaan mo? 28Ungu talu leiji naanni adona naak raan mlei thung ngi plung apjat inna? Bil thungki duwm rei rekka tak heppi kukmowng tdit abin phaak in, mmaanni nong lou lamme, plaa ruk arvai lamme; 29anto daat joso Neiji akthe pik inna, Solomon daat ruk va mlaarnee mkheng nga havale khat hep daatti hiil naame. 30Pdainu snii ngi kring daat ungu pduk nii ngi lung plu thung ngi tdii pthiira, bil thungki arna rek daat rap klua Isowr ri mpihiillu, O, kthlowm suwnni krin cha mii rek, Mma ngi naanna kheel sii ngi apihiil in nime mo? 31Ava leiji, naanni ‘Talu chaa nikdi?’ mdit mata ‘Talu nee nikdi?’ mdit mata ‘Talu hiil naa nikdi?’ kdingi plung pja da the maan. 32Mleija ktlok chati rekki hava le mkheng nga mdo thlaam in; ungta parwaan ki naan Apah ngi havale mkheng ado kriin inna mdo dee dok. 33Pdainu ru kri ngi Mma Kruwngpaam leh Mma rinkindit ava athlaam chaan; ungu havale mkheng ruk naan ado kurthuwk ra.
34“Ava leiji, pduk nii kira naanni plung pja maan; mleija pduk nii ki rang nga anto kunchul chdaat ra. Nii khat ki kja ngi mnit ava ki kpurdon chra.
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.