LUK 20
20
Jisumah pumtei kaang kito kakachyii
(Met 21.23-27; Mrk 11.27-33)
1Tingneikii Jisunii Saraa ka- maning kilungto meigo rali- pyiisii kabi rasam tei ralipyii leibangpii, Kanat kajum atingmei, ajaitingshang kati ojamei teinii katingmeigo kaswisii gong; 2mpou dakii tamle, nyii dakii tampyiilo, “Nangnii kadapei pum-tei leisii aihang ai tiileipo? mak-kii pum-tei ai tanii n-go pyiipo?”
3Teito mpounii ahnyii dakii khekalatle, “Inii gonyiigo samkang hangninii n-nhiile, n-gu tampyiilo, 4Jon dwi mpum kapyiipii tei sating gamto manii meinah datopo?”
5Sateichii ahnyii roinapii ahnyii kakto karashiisii tamle, “Nyiinii sating gamto lesii tam lepochiinii, dajangpii gonyiinii mpougo malum makpo? sii mpounii tam tangle. 6Nlenii nyiinii meinah dato lesii tam lepochiinii, meihangpii nyiigo kuitu rot tangle, kadapokii ahnyii hangnii Jon aigo Lungkakalingmei hang- niniile katupii malumle.” 7Teipiinii ahnyiinii kada kitopo timakle, sii khekalat takle.
8Sateichii Jisunii ahnyii dakii tamle, “Kadapei pum-tei leisii Inii aihang ai tiileipo katu Iniido gonyii dakii tampyii lakle.”
Darkha toipyiimah ndasam
(Met 21.33-46; Mrk 12.1-12)
9Sateichii mpounii meimoi dakii ndasam ai tam tutakle: “Mei hangninanii darkha toipyii hangninii tiiwosii, lu liipeimei dakii pyii aisii sazyii hangniniiki tinglang kathang- kii tat tutakle. 10Sateichii tinglang tei gong sek-kii, lu liipeimei teinii darkha toipyii lu mah riiti kiteito mpougo pyii matu tang karam jangpii mpounii kikaleimei hangni- niigo ahnyiidakii langkaile, Nlenii lu liipaimei teinii ahgo lak lakpyii siinii mpougo bah marongpii mpatpyii takle. 11Sateichii mpounii kikalei mei hangniniigo langkai loile; ahnyiinii mpougodo lak lakpyii siinii, tii nrou tii sangam pyii siinii bah marongpii mpatpyii takle. 12Satei- chii mpounii hangtum kashang tiisii langkai loile, ahnyiinii ah godo datriit riitpyii takle ninado rat toi aitakle. 13Teito darkha toipyiimah apumpii teinii tamle, ‘Inii kadapei tiitangpo? Inii lungkasyii gunah sapfii mpou gotei langkai tang takle; ahnyiinii mpougo sadzyii ngariit tiido malahle.’ 14Nlenii lu liipeimei teinii mpougo ngouwo sek-kii, ahnyii mei hangninanii hangninii dakii tamle, ‘Ai-ai Apumpii nah sapfii mpou teichiile, Nje mpougo gi aile, teito nyiinii mpou mah kabam hang- tei touwo buile.’ 15Teito ahnyiinii mpougo gi aisii, darkha toipyiilu kiteito rat toi aitakle. Teijangpiinii darkha toipyiilu mah apumpii teinii ahnyiigo kadapei tiitangpo? 16Mpounii gongsii lu liipeimei gotei tiimaga ai tangle, sateichii riitilu tei mei kaki- mei dakii pyiitoi aitangle.” Ahnyiinii teitei shiiwo sek-kii, ahnyiinii tamle, “Saraa nii mazhii makle!”
17Nlenii mpounii ahnyiigo jusii tamle, “Teitii lepochiinii, ai
‘Ki katiimei teinii mazhii kasu kuitu teinii,
hang kak kito arou katii tiisang aki-ka mah kuitu tei tiitakle.’
sii ryii kabam ai kadapeipo? 18Kuitu tei phyiiryiito kakou hangtei pakchet chet tangle, nlenii teiteinii mei kata hangninii gam takmang lepochiinii teitei karyiichet chet toi ai tangle.”
Aha shyiitang karam kaang kito n-nhii katu
(Met 22.15-22; Mrk 12.13-17)
19Teito ajaitingshang kati ojamei sateichii kanat kajum tingdimeinii teitinglang sek-kii, mpougo jumtang karam jangpii tiile, nlenii ahnyii teinii meimoi gotei hingtakle. Kada- pochiinii mpounii ahnyii phyiiryiikii ndasam ai tam leile katu tei ahnyiinii titakle. 20Sateichii ahnyiinii shoisii mpoumah samtam kito jum wosii, teimaham jum kaleimei hang satei- chii Governor dakii mpougo pyiitoi ai tang karam jangpii, kasang jai katii meijai tingshang kajumeigo langkai takle. 21Sateichii ahnyiinii mpougo n-nhiile, “Madhiikapyiipii, Nangnii kasang tei tampyii ralipyiile sateichii meiju jusii kagu kaphang tiileimakle, nlenii Saraa mah kasang pwidi tei tam ralipyiile katu tei nyiinii tile. 22Nyiinii Kaisor go aha-kapyii ai ajai manii ajaimakpo?”
23Nlenii ahnyii mah lungswi tei ngou wosii, ahnyii dakii tamle, 24“N-gu sanahgyii hangninii mangoulo, tamah param ninado zei tei leipo?” ahnyiinii tamle,
“Kaisor mah.”
25Teito mpounii ahnyii dakii tamle, “Teitii lepochiinii, Kaisor mah tei Kaisor go, sateichii Saraa mah tei Saraa go pyiilo”
26Sateichii ahnyiinii meidoi teito mpou mah samtam kiteito jumwo lak takle; nlenii ahnyiinii mpou mah khekalat kapyii samki teito sung gasanii malhii supii bam takle.
Taisii ringkhii tang karam kaang kito n-nhii katu
(Met 22.23-33; Mrk 12.18-27)
27Sateichii katai kito ringkakhii ai galesii tam kalei sadhumei kangkanii mpouda gongsii n-nhiile. 28“Madhiikapyiipii, Moses nii nyii jangpii ryiibamle, asanapii hangni- nanii nou tiiwosii nah gasii mpou nougo taidek lepochiinii, mpou taikarhiimei teinii mpou nou gotei manou wosii mpouki sanamei jangpii atat-areng tei mbamlo ziile. 29Tinglang hangniniiki ndou sana- mei sana bamle, katingpii tei nou tiiwosii nah gasii taitakle. 30Teito mpou taikarhiipii hangna kashangpii teinii sapwi mpei gotei manouwo takle, sateichii mpoudo nah gasii taitakle. 31Hangtum kashangpii teiniido tei takumpii pat takle, teitiisii sanamei sana tei atat lusupii taiga takle. 32Ka- lui kito sapwi mpei teido taitakle. 33Teijangpiinii ringkakhii piinei leimik sapwi mpei tei tapii noule tangpo? Kadapokii ahnyii sanamei sana teinii mpoupeigo manou takle.”
34Jisunii ahnyiigo khekalatle, “Sazyii pouryii meinii kalakna tiile, 35Nlenii katai kito ringkhiiloi tang karam jangpii kalai kalu sapwimei sapfiimei ninado gongtang karam aha kana kito lungtang karam mei teinii kalakna tiilakle. 36Ahnyii teinii sating gamluigo njoile, satei- chii tailakle, ahnyiinii Saraa nah meile, kadapochiinii ahnyiinii katai kito ringkhii takle. 37Sateichii Moses niido Bangpiigo, Abraham, Isak sateichii Jakob mah Saraa sii kalat tinglangki, kataimei ringloi ziilesii mpounii riingum kito mi kashong mah rasam kiteito mpou pum sekpiinii saa mpatpyii takle. 38Teipiinii Saraanii kataimah Saraa makle, nlenii karingmei mahle, Kadapochiinii mpou mik hoi kito matum madum ring ziile.”
39Teito ajaitingshang kati ojamei kangkanii khekalatle, “Madhiikapyiipii, nangnii tiigatpii khepyii takle,” 40Kada- pochiinii ahnyiinii mpougo nlailoisii kaki hangninii kado n-nhii hing takle.
Messaiya mah kaang kito kachyiinhii katu
(Met 22.41-46; Mrk 12.35-37)
41Nlenii mpounii ahnyii dakii tamle, “Kada takumpiinii Krista ai Devit nah sapfii mpou lesii ahnyiinii tamwo tangpo? 42Kadapochiinii Devit sekpiinii
tam kamatoi lhii kiteito tamle,
Abangpiinii gu Bangpii go tamle,
43Inii n-go ngou karoumeigo gupikangkii kai kasuta,
gubah ajiilamto bamlo!
44Devit nii mpougo Bangpii sii latle; teitii lepochiinii kada takumpiinii mpou ai Devit nah tangpo?”
Jisunii ajaitingshang kati ojameigo tiiloi sulosii katam
(Met 23.1-36; Mrk 12.38-40)
45Sateichii meihangnii mpougo khoiking leibangpii, mpounii mpou boumei dakii tamle, 46“Peijou ka- thang njousii tatpat tatliitsii kalei- mei, sateichii meimoi ndwi katuki, meinii kamata kamarei, Jehudimei mah ndwi kito ninado takbai nito bam kasagoi bam kamarei mei, 47Kamipwimei hangki kasou katu, sateikii Kabijai tiisii thaangsang kariita ajaitingshang kati ojamei dateito sakai wolo, ahnyii teinii kisii kem kama kadi tei doutangle.”
Maram Naga, KARANU KABI SAMTAM © Bible Society of India, 2007.