JON 7
7
Jisu ninado mpou sanamei
1Aitaito Jisunii Galiliki tatsii leile, mpounii Judiya sazyiiki tatnyii sutakle, dapochiinii Jehudimei hang- nii mpougo gitang karam jangpii fiisii leitakle. 2Aitoinii Jehudimei mah ka-nsung mah takbai tei nagong leitakle. 3Teijangpii mpou sanamei hangteinii mpougo tamle, “Go boumei hang teiniido nangnii tha tiikalei tha hangtei ngoumatu tang karam jangpii, nangnii bam ai toisii Judiya sazyiiki tat tulo. 4Kadapokii mpougo tiigatpii juti matunyii leponii, mpounii tiikalei tha tei mei kaniido poi kabai leimakle, nangnii tha hang ai tiisii kalei taiswisii, sazyii pouryii hangnii gomah kaang kito timatulo.” 5Kadapokii mpou sanamei katangdo mpougo malum makle.
6Teijangpii Jisunii ahnyii dakii tamle, “Gujangpiinii tinglang tei gongmakle rei, nlenii gonyii mah taksupii kamazhii leile. 7Sazyii pou- ryiinii gonyiigo ngouroupei wolakle, nlenii sazyii pouryiimei mah tha ai shyiile honglesii Inii sazyii pouryii mah kaang kito sakchyii kapyii jang- piinii n-gunii ngouroule. 8Gonyiinii takbai kitei tat tulo, Inii takbai kitei aitoi manglakle, kadaponii gumah tinglang tei gongmakle.” 9Mpounii ai tamsii Galiliki bamtu takle.
Jisunii ka-nsung takbai ki kagong
10Nlenii mpou sanamei hangtei- nii takbaiki mang katutai, mpouniido teitinglangki madupii supiinii makumpii tatpi takle. 11Jehudimei hangteinii mpougo takbai kiteito fiisii tamle, “Mpou ai kadaki leipo?”
12Sateichii mpou kaang kito meihang teinii hangkapii samtiit tutakle. Meikangkanii tamle, “Mpou ai mei kabimei hangniniile,” kakimei teinii, “Makle, mpounii meihang go chyiitatma leitakle” sii tamle. 13Nlenii Jehudimeigo kahing jangpiinii mpou- mah kaang kito meikaniido madupii tam makle.
14Takbai tei aphangkii tatpi sek- kii, Jisunii Saraa kamaning kilungtei liit tosii tam ralipyiitu takle. 15Jehudimei hangteinii sung gasii tamle, “Mah kado larek rali katu gasanii mei aipounii kada takumsii larek tiwopo?”
16Teijangpii Jisunii ahnyiigo khekalatle, “Inii ralipyiisii kalei ai gumah makle, nlenii n-gu lang kama- gong ahmahle. 17Mei kata hangni- nanii mpoumah kamaning kamazhii tei tiinyii leponii, ralikapyii ai Saraa dato manii, mak-kii gumah teima- ham kito tam leipo katu aimah kaang kito ahnii titangle. 18Mpoumah teimaham kito tam kalei ah teinii mpouroinapii mpougo tam kamatoi fiileile, nlenii mpougo lang kamagong ahgo tam kamatoi fiikalei ahteinii kasangle sateichii kasang kasu tei ah dato gale. 19Mosesnii gonyiigo ajaitingshang pyiitak makpo? Nlenii gonyii mei kaniido ajaitingshang gotei swi womakle. Gonyiinii n-gu dajangpii gilesii fiileipo?”
20Meimoi teinii khekalatle, “Godato sara kashyii hangninii leile! Tanii n-go gilesii fiileipo?”
21Jisunii khekalatle, “Inii sung- kaga hangninii tiile, sateichii gonyii hangnii khiipatle. 22Mosesnii go- nyiigo tiigyii kamalem tei pyiitakle (tei tei Moses dato makle, nlenii pei- paomei datole) sateichii gonyiinii nah sapfiimei hangniniigo bam ntak piinei leimik tiigyii malemle. 23Moses mah ajaitingshang tei tiipak kasu tiisii nah sapfiimei hangniniigo bam ntak piinei leimik tiigyii malem le- ponii, Inii sapfiimei hangniniigo bam ntak piinei leimik tii mbikapyii jang- pii gonyiinii n-gu dajangpii rarhii leipo? 24Meiju jusii samtak tiisulo, nlenii kasang teipii samtak tiilo.”
Mpou ai Krista teipo
25Teijangpii Jerosalem mei kangkanii tamle, “Ahnyiinii gilesii fiikalei tei aimakde? 26Julo, mpounii madurahapii sam tam leitakle sateichii ahnyiinii mpougo samah kado tam makle. Ai ai Krista teile katu teimaham kajum mei hangteinii tisang takpo? 27Nlenii mei aipou ai kada kitopo katu nyiinii tile, sateichii Kristanii kagong kak teinii mei kado mpou kada kito gongpo katu tilakle.”
28Jisunii Saraa kamaning kilungto tam ralikapyii kak, mpounii rok sagoisii tamle, “Gonyii n-gu ti kasangpo sateichii I kada kito gongpo katu gonyii n-gu ti kasangpo? Nlenii Inii gu maningpii gong makle; n-gu lang kamagong ahteinii kasangle sateichii gonyiinii mpou gotei timakle. 29Inii mpougo tile, dapokii Inii mpou datole, sateichii mpounii n-gu lang magongle.”
30Teijangpii ahnyiinii mpougo jumtang karam jangpii fiitutakle sa- teichii mei kaniido mpou phyiiryiikii bah kai makle, dapochiinii mpoumah tinglang tei gongmakle rei. 31Nlenii mei hangkanii mpougo malum wosanii tamle, “Kristanii kagong tinglang kak, mei aipounii tiikatu tiikamangou siiti hang doito kisii ahnii tiiwo tangpo?”
Jisugo jumtang karam jangpii saryiimei lang ka-mpat
32Mpoumah kaang kito meimoinii samtiit kalei tei Farasismei teinii shiitakle sateichii kanat kajum ting- dimei ninado Farasismei hangteinii mpougo jum matutang karam jangpii saryii kakoimei gotei lang matu takle. 33Teito Jisunii tamle, “Nlailoisii tinglang shangniikii Inii gonyiigo ka- swisii bamsanii, n-gu lang kamagong ahmah bam kitei Inii tat tutangle. 34Gonyiinii n-gu fiitangle ninado n-gu doulakle, sateichii Inii kalei bam kitei gonyiinii gongpei wolakle.”
35Jehudimei hangtei hangninanii hangninii dakii tamle, “Nyiinii mpougo ngou wokalak tiisii mei aipou ainii kadaki tat tuleziipo? Grikmeida marou maruk katu meida mangsii, Grikmeigo tam ralipyiine shiide? 36‘gonyiinii n-gu fiitangle sateichii doulakle,’ ninado ‘Inii kalei bam kitei gonyiinii gongpei wolakle’ sii mpounii katam sam ai kadapeipo?”
Karing dwipok
37Takbai kalui piinei leimik katunii, leimik kadipiinei, Jisunii gongtu sat takle sateichii rok sagoisii tamle, “Mei kata hangninanii saryiileponii, ahnii guda gongsii sak matulo. 38Kabi rasam kito katam takumpii, ‘N-gu kamalum mei teinii, ahmah malung kito karingdwi mah karyiihang tei long tangle.’ ”
39Mpougo malum kalumei hangnii doutang karam rangii mah kaang kiteito mpounii ai ai tamle, kadapokii tei tinglang kak Jisunii pumtei kava tei dou kasu taiswisii, rangii tei aitoi pyii womakle.
Meihang kak kiteito njairiit riit katu
40Teijangpii meimoi kak kiteito kangkanii sam hang ai shii wosek-kii, “Sapfii mpou ai kasangpii lungkakalingmeile” sii tamle.
41Kaki mei hangteinii “Mpou ai Kristale!” sii tamle. Nlenii kakimei kangkanii tamle, “Krista teinii Galili kito gong tangpo? 42Krista teinii Devit mah tat reng kito sateichii Devitnii kalung nam, Bethlehem kito gonglesii kabi rasam kito tambam makpo?” 43Teipiinii meihang kak kiteito mpou jangpii njairiit riit aitakle. 44Sateichii ahnyii mei kangkanii mpou go jumnyii takle, nlenii mei kaniido mpou gamkii bah kaimakle.
Jehudimei ki teimaham kajum meinii malum kasu
45Teito saryii kakoimei teinii kanat kajum tingdimei ninado Farasismei hangda nlaigong sek-kii, ahnyiinii saryii kakoimei dateikii tamle, “Gonyiinii mpougo kadajang- pii pang gongmakpo?”
46Ahnyiinii khekalatle, “Mei aipou takumpiinii mei kaniido malhii sang malhii makle!”
47Farasismei teinii ahnyiigo khe- kalatle, “Gonyiigodo masii chyiitat tude? 48Teimaham kajum mei mak-kii Farasismei hangninii kado mpougo malum womakpo? 49Nlenii ajaitingshang tikasu meimoi ai asheeng doutakle.”
50Asung kareiki Jisuda kagongpii Nikodimas do ahnyii kak kitei leile ninado mpounii tamle, 51“Mpou sam shiirei supii sateichii mpounii kadapei tiibam takpo katu tisupii, nyiimah ajaitingshang teinii meigo samtak tiileipo?”
52Ahnyiinii mpougo khekalatle, “Nangdo Galili kitode? Kabi rasam tei fiilo, sateichii Galili kito Lungkakalingmei mei kado patsang pat makle katu nangnii titangle.”
Maram Naga, KARANU KABI SAMTAM © Bible Society of India, 2007.