JON 4
4
Jisu ninado Samariyaki sapwi mpei
1Aitoinii Jisunii Jon sung kisii boumei tiilei takle ninado dwi mpumpyii leitakle katutei Farasis- meinii shiitakle katu tei Abangpiinii tiwo sek-kii, 2(Jisu pumsekpiinii meigo kado dwi mpumpyii makle, mpou boumei roinii niile.) 3Mpounii Judiya kito tatpat tosii, Galiliki tat tuloi takle. 4Sateichii mpounii Samariya tei tat majupat tang karam takle.
5Aitiisii Jakobnii mpounah sapfii mpou Joseph dakii pyiikalei lubamku, Saikarsii kalat Samariyamei mah namdi hangniniiki mpounii gongle. 6Jakob mah dwikong tei teiki leile, teipiinii Jisunii pwidi tiitat kito kamagesanii, teiki dwikong kiteito bam wotakle. Tei tei pung saruk kashang tinglang ki kakle.
7Teito Samariyamei pwi hang- ninii dwi lhiilesii gongle. Jisunii mpoupei dakii tamle, “N-gu saktang karam dwi seilo” 8kadapokii mpou boumei teinii namdi kito kachii kasak maa lyiitang karam jangpii tat tutakle.
9Sapwi mpei teinii khekalatle, “Nangnii Jehudimeile ninado Inii Samariyameile–-teipiinii dakumpii nangnii gudato saktang karam dwi khang leipo?” (Kadapokii Samariya meinii jum kalei peek ninado dwikhii hangtei Jehudimeinii jumlei makle.)
10Jisunii mpoupeigo khekalatle, “Saraanii pyiikalei ninado n-gu saktang karam dwi seilosii godakii katam tei tapo katu nangnii tileponii, nangnii mpou dato khang tang karamle.”
11Sapwi mpei teinii mpou dakii tamle, “Madhiikapyiipii, nangnii dwi lhiitang karam samah kado gale, sateichii dwikong ai tukle, karing dwi tei nangnii dakito doutangpo? 12Nyii Pfii Jakob sung nang dibuipo? Mpounii dwikong ai nyii dakii pyiile ninado mpou pum sekpiiniido, mpou nahmeiniido, mpou twom niido aikito dwi sak leile.”
13Jisunii mpoupei dakii tamle, “Dwi ai sak kalumei hangnii saryiiloi tangle. 14Nlenii Inii pyiitang karam dwitei sak kalumei hangteinii saryii- sang saryiiloi lakle; Inii pyiitang karam dwitei mpou lung kito kalui tiisupiinii ringtang karam jangpii pok kapat dwipok hangninii tiitangle.”
15Sapwi mpei teinii mpou dakii tamle, “Madhiikapyiipii, Inii saryiilak tang karam jangpii sateichii dwi lhiitang karam jangpii aiki katang gongkai lak tang karam jangpii, tei dwi tei n-gu seilo.”
16Jisunii mpoupei dakii tamle, “tat tulo, gonaa go lat tosii aiki gonglo.”
17Sapwi mpei teinii mpougo khekalatle, “Gunaa gale”
Jisunii mpou dakii tamle, “Gonaa gale katutei nangnii kasangpii tam takle; 18kadapokii nang naa mangii takle sateichii aitoi kalei mpou teinii gonaa makle; nangnii katam ai kasangle.”
19Sapwi mpei teinii mpou dakii tamle, “Madhiikapyiipii, nang lung- kakalingmei hangniniile katu tei Inii ngoule. 20Nyiipei nyiipaomeinii zang aiki aito Saraago matale, nlenii gonyiinanii tamle, mata tang karam bam teinii Jerosalem kitole.”
21Jisunii mpoupei dakii tamle, “Sapwi mpei n-gu malumlo, Pfii gotei zang ai gamto ninado Jerosalem kitodo gonyiinii matalak tang karam tinglang tei gongtangle. 22Gonyiinii tikasu gotei matale, nyiinanii nyiinii kati gotei matale, dapokii keikapyii karing teinii Jehudimei datole. 23Nlenii kasang kamatamei hangnii Pfii gotei rangii kito sateichii kasang kito mata tang karam tinglang tei gonglei takle ninado aitoi aile, kadapokii tei kakum tei mpougo mata tang karam jangpii Pfiinii fiisii leile. 24Saraanii Rangiile sateichii Mpougo kamatamei hangnii rangii kito ninado kasang kito mata tang karamle.”
25Sapwi mpei teinii mpou dakii tamle, “Krista sii kalat tei gongtangle katu Inii tile, mpounii kagong tinglang kak nyii dakii mpounii mahlyiihang mangoupyii tangle.”
26Jisunii mpoupei dakii tamle, “N-go rashii kalei I ai Mpou teile.”
27Teitinglang sek-kii Jisu boumei tei nlaigong takle, sateichii mpounii sapwi mpeigo sam rashii kalei tei ngousii ahnyiinii sung gatakle; nlenii meikaniido mpougo “Nang kadapei fiileipo” mak-kii “Mpounii kada- jangpii mpoupeigo sam rashii leipo?” sii tam makle.
28Teito sapwi mpei teinii mpoupei mah dwikhii tei matou aisii namdi kitei mangsii, teikito kalei mei dakii tamle, 29“Inii tiikabam hangtei gudakii tam kapyii sapfii mpou gotei gongsii julo, Mpou ai Krista tei lakpo?” 30Ahnyiinii namdi kiteito tatpat tosii mpou datei gonglei takle.
31Teitinglang aikak kitei boumei- nii mpou dakii tamle, “Rabbi, mah chii wolo!” 32Nlenii mpounii ahnyii dakii tamle, “Gonyiinii tikasu chii- tang karam gumah chiitak leile.”
33Teijangpii boumei teinii hang- ninanii hangninii dakii tamle, “Mei kangkanii mpougo chiitak poigong pyiide?”
34Jisunii ahnyii dakii tamle, “N-gu lang kamagong mpoumah kamaning kamazhii katii ninado mpoumah tha tiikamashang ai gumah chiitakle. 35Sakhii madai tainii rachet tang taklesii gonyiinii tam makpo? Nlenii Inii gonyiigo tam leile, lubam kiteikii jukailo, aitoinii rhiibui tei rachet tang karam jangpii mwitakle! 36Lingkakai ahnei karachet ahteinii kaswisii nta njoitang karam jangpii, karachet ahteinii pumjangmai doule, sateichii kalui gasii ringtang karam jangpii ti tei poi nkomle. 37Kadapokii aikito ‘hangninanii lwi rali kaile sateichii kaki hangninanii rachetle,’ katu ai kasangle. 38Gonyiinii tha tii- kasu lubam kiteito rachet matutang karam jangpii gonyiigo Inii lang mpatle, kakimeinii teiki tei tha tiibam takle sateichii ahnyii mah tha kiteito liipat tei gonyiinii doule.”
39Sateichii “Inii tiikalei hangtei mpounii gudakii tam takle” sii sakchyii pyiikalei sapwi mpei mah sam jangteipii teiki namdi kito kalei Samariyamei hangkanii mpougo malum wotakle. 40Aitiisii Samari- yamei teinii mpouda gongsii, ahnyiigo kaswisii bam matu tang karam jangpii mpou dakii tamle; teito mpounii teikito leimik hangna bam takle.
41Sateichii mpounii katam sam kiteito nlailoisii kisii mei hangkanii malum wotakle; 42teito ahnyiinii sapwi mpei dateikii tam takle, “Nangnii katam jangpii nyiinii aitoi malum makle, nlenii nyii sekpiinii mpougo shiitakle sateichii mpou ai kasangpiinii sazyii pouryii mah Keikapyiipiile katu nyiinii tile.”
Jisunii kadimei hangniniiki nah sapfii mpougo tii mbikapyii
43Leimik hangnatai mpounii teibam kiteito Galiliki tutakle; 44Kadapokii Lungkakalingmeigo mpoumah sazyii kito lungkaleimei sekteinii sadzyii ngariit tiipyii makle katu Jisu sekpiinii sakchyii pyiitakle. 45Aitiisii mpounii Galiliki kagong kak, takbai kiteito mpounii katiihang tei Galilimeinii Jerosalem kito ngou wosanii, mpougo lukai wotakle, kadapokii ahnyiido takbai kitei mangle.
46Teijangpii mpounii dwipii jou tiikadat kapyii Galili kito kalei Kena kitei nlaigong takle, sateichii Kaipar- nam kito sagong mah bam njoi katu kasagoi bam poisii kaleimei hang- ninii leile, ninado mpounah sapfii mpou tei ranisii leile. 47Jisunii Judiya kito Galiliki gongtakle katu tei mpounii shii wosek-kii, mpounii Jisuda mangsii, mpounah sapfii mpougo gong ra tiimaga seilosii mpounii khangle; kadapokii mpou rani mahungsii bamle. 48Teijangpii Jisunii mpougo tamle, “Gonyiinii tiikamangou siiti ninado sung kaga hangtei ngou kasuta, gonyiinii malumsang malum lakle.”
49Kadipii teinii mpou dakii tamle, “Oja, gunah tai kasunakii gongseilo.”
50Jisunii mpou dakii tamle, “Tat tulo, gonah sapfii mpou ringtangle!” Sapfii mpou teinii mpou dakii Jisunii katam samtei malumsii tat tutakle. 51Sateichii mpounii aitiisii tat hum kalei kak, mpouki kaleimeinii mpougo kadousii mpounah sapfii mpou tei ringziilesii mpougo tam takle.
52Mpou nah teinii ra bihum katu tinglang tei kada douposii mpounii ahnyii dato n-nhiitakle. Teito ahnyiinii mpou dakii tamle, “Ndazyii tingna pung hangniniiki kariirhii teinii mpougo toi aitakle.” 53Teito Jisunii mpou dakii: “Gonah sapfii mpou ringtangle” sii katam tinglang sek kiteile katu Pfii teinii titakle, Mpou pum sekpiinii ninado mpouki kalung mpung hangniido malum wotakle.
54Judiya kito Galiliki gong wosii Jisunii nlailoisii hangna kashang tiikamangou siiti ai tiitakle.
Maram Naga, KARANU KABI SAMTAM © Bible Society of India, 2007.