LUKA 6
6
Sabat chungchânga irdonna
(Mt 12.1-8; Mk 2.23-28)
1Sabat ni voikhat chu bubil hmunhai a hroa; a irchutirhaiin bu vûi an khiaka, an kuta inmuai infâiin an bâra.#Dhn 23.25 2Farisai senkhathaiin, “Itho mo ei Dânin Sabat nia tholoi hrang a iti te nin itho?” tiin an irdona. 3Jisua’n an kuang, “Davida le a mihaiin an phîngchâm laia an itho kha nin itep ngailoi ma ni?#1 Sam 21.1-6 4Pathian ina a lûta, Ochaihai bana chu tûte fâk hrang dân ni loi bai irthiang kha a lâka, a fâka. a rualhai khom a ipêk thu kha?” a tia.#Lev 24.9 5An kuang, “Mihriam Nâipa hi Sabat nikhua Rengpa a ni,” a ti pehaia.
Kut zenginthi indam thu
(Mt 12.9-14; Mk 3.1-6)
6Khan, Sabat nikhua danga chu Jisua Sinagoka a lûta, ar chuhaia. Khataka khan mi inkhat kut chang tianga zenginthi a oma. 7Dân irchutirtuhai le Farisaihai khan demna an hmu theina hrangin Sabat nia indam hrang le indam loi hrang an enirchika. 8Jisua’n an milung inchong an hriatin, damloi kuang, “Thoiin lân, a laia hin ngîr suak ta,” a tia. Khanchu a thoia, a ngîr suak tâka. 9Jisua’n an kuang, “Sabat nia insa mo a’rthiang, insiat mo, mi saninhring mo, a’rthiang thatpai mo? nangni ki’rdon,” a ti pehaia. 10Khanchu an rêng khan a enhaia, zenginthi kuang khan, “Ni kut phar ro,” a tia. A hong phara, a kut kha a hong dam tâka. 11Khanchu, a sân an ning an mur tâka, Jisua kha itina lo hrang mani tiin an irdon irhlôm tâka.
Irchutir sômhleihnihai a inthangna thu
(Mt 10.1-4; Mk 3.3-19)
12Kha zoroa khan Jisua chongchai hrangin tânga a fea, zân khovârin Pathian kuang a chongchaia. 13Khua a hong vârin chu a irchutirhai kha a koihaia, an lai ata sômhleihni an thanga, an irhminga Tirtôn a phuahaia. 14Simona Petera le a sang Andria, Jakoba le Johana, Filipa le Bartholomaia, 15Mathaia le Thoma, Alfaia nâipa Jakoba le Simon Zelota, 16Jakoba nâipa Juda le an cheltirtu Juda Iskariota hai an ni.
Jisua’n ar chutirna le an damna thu
(Mt 14.23-25)
17Khan, Jisua le a irchutirhai tâng ata an zuang chum hnungin, a irchutir tamtakhai leh hmun inchama an ngîra, kha hmuna khan mipui tamtak Judahai ram tina irthoka, Jerusalema irthoka, tuikhanglian vapanga khua Tura le Sidon mihai an oma. 18A thu’nsîr irngai hrang le natnahai indam hranga hong an ni. Ramilhli ichelhai khom an hong dam tâka. 19A kuang ata sinthotheina a suak sikin mipui murdi’n ama tôn hrang an tuma, an rêngin an dam pak tâka.
Raifânna le chardongna
(Mt 5.12)
20Jisua’n a thîr vêla, a irchutirhai kha a ena, thu an sîra,
“Nangni inrianghaio,
nin vân a sa e,
Pathian Ram nin ta a ni sikin!
21Nangni atûna phîngchâmhaio,
nin vân a sa,
Nin la khop hrang sikin!
Nangni atûna chaphaio,
nin vân a sa,
nin lan nui hrang sikin.
22“Mihriam Nâipa sika, mihaiin nangni an khôkmâka, nangni an hnôla, nangni an êroa, irhming siat raka nangni an hnôlin chu, nin vân la sa ti.#1 Pet 4.14 23Kha zoi tika chu raiinfân unglân, lômin irchôm roi, irngai u ta, irvâna nin lômman a om hrang sikin! Nin chunga an itho angin an irchibulhai khomin Deipuhai chunga an itho ngai a ni.#2 Tsn 36.16; Tîr 7.52
24“Nangni irchonghaio,
nin chung a rik e,
inhoina murdi nin hmang zoi tâk sikin!
25Nangni atûna khophaio,
nin chung a rik e,
nin phîng a la châm hrang sikin!
Nangni atûna innuihaio,
nin chung a rik e,
beidongin nin la ichap hrang sikin!
26“Mi tinin nangni an inpâk tika chu lungkham nin la iom hrang kêng; khaang dênin an irchibulhaiin deipu dolhai an inpâk ngai.
Râlhai lungthung hrang
(Mt 5.38-48; 7.12)
27“Ki thu irngaipuhaio, hiang hin nangni ki hril, nin râlhai kha lungthung unglân, nangni khôkmâktuhai chunga khan an satna hrang tho pehai roi. 28Khua nangni sâltuhai chu satvurhai roi, deng nangni intheitirtuhai chu chongchai pehai roi.
29“Mi’n ni hmâi kiangkhat inbêntu kuang kiangkhat tiang khom do pe roh. Khan ni puan lâktu kuang chu ni songkol lâk khom inlatir roh. 30Nang a zongtu murdi chu pe’n lân, ni sum nang lâk petu chu zong nôk ta no roh. 31Nin chunga mihaiin, nin nuamlam an itho ang dênin mi chunga khom tho roi.#Mt 7.12
32Nangni lungthungtuhai vai lung nin thungin itin mo satvur nin idong hrang? Imo mi sualhai nêka nin danglam bîkna? Mi sualhai khomin anni lungthungtuhai chu lung an thung ngai kêng. 33Nin chunga sin sa thohai chunga vai sin sa nin itho hin, imo mi sualhai leh nin danglam bîkna? itin mo satvur nin idong hrang? Mi sualhai khomin khaang khan an tho ngai kêng. 34Hmu nôk hranga, nin isabeihai kuang vai, nin inpûktirin te, imo satvur nin idong hrang? Mi sualhai khomin a bi hmu nôk hrangin chu mi sualhai an inpûktir ngai. 35Ni ma! Ni râlhai lungthungin lân, an satna hrang sin ro. Ite sabei loiin inpûktir roh. Khanchu, lômman tamtak hmu nin ta, Anchungtaka Pathian nâihai nin ini hrang a ni; Ama’n chu lômna châng inhre loihai le mi sualhai khom lung an kham zit ngai. 36Nin pa khomin mi lung a inkham angin nangni khomin mi lung inkham ngai roi.
Mi dang sêl chungchâng
(Mt 7.1-5)
37“Mi sêl no roi, Pathian khomin nangni sêl no ni, mi dem no unglân, Pathianin nangni dem no ni, mi ngaidam unglân, Pathianin nangni ngaidam a ti. 38Pe unglân, khanchu, Pathianin nangni pe a ti. Tikhoi pêkin namirdên ngitin, nok inhnîngin, lêt rakin nin dong thei dôr nin kuta nangni pe a ti. Mi nin irte pêna ngai dêna khan Pathianin nangni irte pe a ti,” a tia. 39Jisua’n hi chongirkhek hi an sîra, “Mitcho’n mitcho dên hruai thei mah, a hruaiin chu an ruaiin khurpadopa tâk an ti.#Mt 15.14 40A’rchutirtu nêkin a’rchupu lian ual ma, khan, a’rchutu khom a zoi tika chu a’rchutirtu pha ta ti.#Mt 10.24-25; Joh 13.16; 15.20 41Itin lama mo, mâni mita thingtum om chu inhre loiin ni urêng mita minim om chu ni ihmu? 42Mâni mita thingtum om chu ngaipoimo loiin, ‘Ni urêng kuang ni mita minim nang lei kêl pe rong ni iti thei hrang?’ Mi vârirlet! Ni mita thingtum kêl bakin lân, khanchu, ni urêng mita minimte kha hmu’nfel thei ni ti.
Thing sa le thing saloi ra
(Mt 7.16-20; 12.33-35)
43“Thing sa chu a ra siat ngai mah, thing sia lak a ra sa ngai mah. 44Thing tin an ra chita ei inhriat thei a ni; ilhling rânga theipui irhmal ngai mahai, hloiilhlingnei kunga khom grep irhmal ngai mak chêi.#Mt 12.33 45Mi sain chu a milung irchon kok sa ata thil sahai a phor suak ngai, mi sual chu a milung irchon kok saloi ata thil saloihai a phor suak ngai, milunga lêt raka sip hi kêng bâiin nin insîr suak ngai.#Mt 12.34
Mi inhni in sin thu
(Mt 7.24-27)
46“Itho mo ki thu zôm loia Rengpa, Rengpa, nin ni iti? 47Tukhom ki kuang honga ki thu zôm chu i ang mi mani nangni hril ki ti. 48Kha mi kha chu a in sin kha lungpui chunga inthûk vita lungphûm ang kha a ni. Tui lianin a suka, inhnîng maka, det ngita sin a ni sikin. 49Khan, tukhom ki hnuk irhai inhriata, ki thu zôm no chu, lungphûm loia pil chunga in sin, tui lianin a suk a suka, a chim zôi zela, a isiat irnôi chit ang kha a ni,” a tia.
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.