LUKA 23
23
Pilata makunga Jisua an hruai
(Mt 27.1-2,11-14; Mk 15.1-5; Joh 18.28-38)
1An rêngin an thoia, Pilata kuang Jisua chu an hruai tâka. 2“Hi mi hin ei mipuihai tehel zong hrangin an thorhaia, Kaisara kuang khâzana chôi a khapa, ama hi Rêng, Krista chu, ar ti, ti khom kin inhriat suak a ni,” tiin an hnôla. 3Pilata’n a kuang, “Judahai rêng mo ni ni?” a tia. Khan, Jisua’n, “Ni ni, ni ni ti khate,” tiin a sâma. 4Pilata’n Ochai inlalhai le mipuihai kuang khan, “Hi mi hi thiamno inchang hranga hin ite a bi hmu ma ung,” a tia. 5Khannisianlân, anni khan, “Tehel zong mi inthorin, Judai ram kho tina mi ar chutir ngai ti kin inhriat, Galili rama a phuta, hin khom a hong itung tâk a ni,” tiin an bei nôk uala.
Heroda makunga Jisua a ngîr
6Pilata’n, kha kha a hong inhriatin chu, Galili mi a ni le ni loi ar dona. 7Heroda biala mi a nih ti an hriatin chu, Heroda kuang a tîr tâka; ama khom Jerusalema a lei om lai tak a ni. 8Heroda’n Jisua thurchi a lei inhriata, Jisua hmu hrang a nuamna, a sân a lei sôt tâk sikin, Jisua a hmu’n chu a lôm oka; a sinirkhêl imo khat hmu khom a sabei sa. 9Thu tamtak ar dona, khannisianlân, i ang khomin sâm mah. 10Ochai inlalhai le Dân irchutirtuhai khom an ngîr saa, an sêla. 11Khan, Heroda khom khan, a sipaihai leh Jisua kha an hmusit tak taka, nuiza siamna’n an hmanga, puan roiinpui tak an siltira, Pilata kuang a tîr nôk tâka. 12Pilata le Heroda kha lei irngei ngai mahaia; kha nikhua taka khan chu an irngei ta.
Jisua thi hranga a roi an rêlna
(Mt 27.15-26; Mk 15.6-15; Joh 18.39; 19.16)
13Pilata khan Ochai inlalhai le Dân irchutirtuhai le vântâng mipuihai kha a koi buka, an kuang, 14“Hi mi hi mihai tehel zong hrangin an thorhai, nin hong tia, nin makung ngeia ki’rtipuia, nin ihnôlna thua thilpoi ite a itho hmu ma ung. 15Heroda khomin hmu ual mah, ki kuang a hong itîr nôk ta a ni. Irngai roi thina hrang ang dôr ite tho’nsual nei ual mah. 16Khanchu, vîk ki ta, insua nôk ki ti,” a tia. 17Ferkân kût hruaithe rikipin Pilata’n mi intâng inkhat an ta hrangin an sua pehai ngai a ni.
18Khannisianlân, an rêngin khêk irrualin, “Hi mi hi chu thatin lân, Barabba kha nin sua pe roh,” an tia. 19Kha mi kha khopuia tehelna sik le mi that sika intângna ina intâng a ni. 20Pilata khan Jisua kha insua a nuama, an kuang thu an sîr nôka; 21Khannisian, “Krosa hembe roh, krosa hembe roh,” tiin an khêk mur mur tâka. 22Khan, Pilata’n a voi thumnaa, an kuang, “Itho mo? Imo a tho’nsual? Thina hrang rak ten ite a itho’nsual hmu ma ung; vîk ki ta insua ki ti,” a tia. 23Anni khan inring takin an khêka, Krosa hembe hrangin an ngên ngota, an irhai khan an hnêpai tâka.
24Pilata’n an ingên angin an kung tâka. 25Tehelna le mi that sika intângna ina mi intâng an ingên kha an suaa, Jisua kha an nuam nuama lo hrangin a pêkhai tâka.
Jisua hembêna
(Mt 27.32-44; Mk 15.21-32; Joh 19.17-27)
26Khanchu, sipaihaiin Jisua an hruaia, an fe laiin, Simona Kurini kho mi, thingtâng rengata khopui hong pan an tonga, an chela; Kros an irputtira, Jisua hnunga an infetira.
27Khan, vântâng mipui tamtak le milung naa chap bop bop nupanghaiin an zui sup supa. 28Jisua kha anni tiang a’rheia, “Jerusalem nuhaio, ni châ no roi, nangni le nin nâihai ta hrangin chap ual roi. 29Nupang ching hai, nâivong ngai loihai, nâi don ngai loihai chu an vân a sa e! an ti zoro la hong tung a ti. 30Kha zoro tika chu mihaiin tâng kuang, ‘Ni del roh,’ ti an ta, mual kuang, ‘Ni’rkhu roh,’ la ti an ti.#Hos 10.8; Thup 6.16 31Thing hring lua hiang hin an lo’n te, thing châr len vâng te itin takin mo an ilo hrang?” a tia.
32Khan, that sa hrangin mi dang, mi sual inhni, a pâlin an hruai saa. 33Luru#23.33: “Luru” ti hi Grik chongin, “Golgotha” a ni. Latin chongin “Kalvari” a ni. an ti hmun chu an va tunga; khatak khan krosa an hembe tâka; mi sualhai khom kha a chang tiang inkhat, a vei tiang inkhat, an hembe saa. 34Jisua’n, “Ka Pa, annihai hi ngaidam roh, an sintho hi inhre mahai” a tia. A silkaihai kha tasânin an irsema.#Ipn 22.18 35Vântâng mipuihai khan ngîrin an thîra. Hruaituhai khom khan, “Mi dang lua an damhai ngaia, Pathian mi’nkung, Krista chu, a ni lele’n teh a bing khomin irdam ri se ba,” tiin an êroa.#Ipn 22.7 36Sipai hruaituhai khom khan an innuisana, a kuang an fea, zu thûr an pêka,#Ipn 69.21 37“Judahai rêng ni ni tak takin chu, ni bingin irdam ro ba,” an tia. 38A chunga khan, “Hi mi hi Judahai rêng a ni,” ti irziak an târa.
39An hembe sa mi sual inkhatpu khan a chiar khuma, “Krista kha ni ini loi ma ni? Irdamin lân, keini khom nin dam sa ro ba,” a tia. 40Khannisianlân, inkhatpu khan a lei khapa, a halirchua, “Pathian ten lua ni ichi loi mani, irang maia nang an ihrem hi? 41Eini ruai hi chu hrem inruk rêng ei ni, ei sinthôna man ei ihmu a ni hi; Ama hin chu ite tho’nsual nei mah,” a tia. 42Khanchu, “Jisua, ni Ram ni tung tika nin hre mai roh,” a tia. 43Jisua’n a kuang, “Thudik tak nang ki hril, ki kuang a vuan hin Paradisa om sa ni ti,” a tia.
Jisua thi thu
(Mt 27.45-56; Mk 15.33-41; Joh 19.28-30)
44Khan, sûn dâr sômhleihni vêl ata khohloi dâr thum dênin rammual an thim khaka; 45misa a hong inthim tâka, tempil sûnga puanzâr kha a laia a têr thai tâka.#Fes 26.31-33 46Jisua kha inring takin a khêka, “Ka Pa, ki’rtha ni kuta nang kin koltir,” a tia. Kha kha a ti zoiin chu a hrang a chat tâka.#Ipn 31.5
47Sipai irza hruaitu khan thil zuang tung kha a hmu’n chu, Pathian an pâka, “Hi mi hi mi dik ngêt a ni,” a tia. 48Kha thîr hranga mipui hong irbukhai khan thil omzia kha an hmu’n, beidongin an rôp irchu chûmin an kîr nôk tâka. 49A hmêl inhriathai chu hla vita an ngîr chiana, Galili ram ata ama zuipu nupanghai leh khan, kha thil kha an thîr suama.#Lk 8.2-3
Jisua an phûm
(Mt 27.57-61; Mk 15.42-47; Joh 19.38-42)
50-51Khan, Judai rama Arimathai khuaa mi, ar hming Josefa a oma. Ama chu mi fel tak, mi mahripom tak, le Pathian Ram zuang tung hrang lei nghâk mi a nia. Roirêlpuhai laia mi ni sa khomsian, an roirêlna le an sintho kha sa tipuihai maka. 52Kha mi kha Pilata kuang a fea, Jisua ruak a va nghia. 53Khan, Jisua ruak kha a kai thâka, puan irnêmin a tuama, tûte an la inzâl ngai loina lung inver thâna an zâltir tâka. 54Kha nikhua kha Judahai irtûng nî a nia, khannisian Judahai Sabat ni ar phut vâng vâng ta. 55Galili ram ata hong zuitu nupanghai khom khan an zui sa thiai thiaia, thân le a ruak an inzâl lam kha an hmua. 56Khan, an kîra, mirimhoihai le sahriak mirimhoihai an irfûka. Khan, Dân thupêk angin Sabat nî chu an irngama.#Fes 20.10; Dhn 5.14
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.