LUKA 14
14
Jisua’n mi invûng an dam
1Sabat ni voikhat chu Farisaihai laia hruaitu lian inkhat ina bu nêk hrangin a fea, an lei enirchik chiana.
2Mi inkhat a ke, a kut invûng Jisua kuang a honga. 3Jisua’n Dân irchutirtuhai le Farisaihai a chongpuihaia, an kuang, “Ei Dânin Sabat ni hin indam a phal mo, phal ma mo?” a tia. 4Khanchu, anni kha an dâihreka. Jisua’n damloi kha a chela, an damtira, an fetir ta. 5Khan Jisua’n an kuang, “Tu mo khatin a nâipa mani, a sehrât chal mani, Sabat ni’n tuikhura tâk sianlân, Sabat nî ni khomsian, nin ikêlsua zel loi hrang mo?” a tia.#Mt 12.11 6Khannisianlân, kha thu kha tûte’n sâm thei mahai.
Irngaiintômna le irphalna
7Bu nêk hranga a mi fialhai khan toina sa an irchu ngai ti Jisua’n a hmu’n chu an kuang chongirkhek thu an sîr tâka. 8“Tu’n mo khat moi lôm hruaithe fa hranga nangni an fialin chu toihmun sataka toi no roi; nangni nêka mi lian a hong fial itinin,#Thuv 25.6-7 9Nin kuang, ‘Hi pa toihmun hrang hi inkian roi,’ nangni a hong tiin chu, inzak takin toihmun saloi taka nin itoi chian hrang a ni. 10Nang an fialin chu toihmun saloi taka toiin lân, khanchu nang a fialpu kha hong a ta, ni kuang, ‘Mala, toihmun saa hin hong toi ro,’ tih a ta, khalâi ottuhai mit hmua chôiirsângin om ni ti. 11Irngaiinhlu ka kai irhniam an ta, irngaiintôm ka kai chôiirsâng ni an ti,” a tia.#Mt 23.12; Lk 18.14
12A fialtu kuang khom khan, “Sûna mo zâna mo hruai nin thein, ni rualhai, ni urênghai, ni parualhai le ni bôma irchonghai kha fial no roh; khano’nchu, nang fial nôkna an ta, nang thuan lele’n ti. 13Hruai nin thê tikin chu inrianghai, suakinsualhai, ke’nbâihai, mitchohai fial ual roh; 14Khanchu, satvurna dong ni ti, nang thuanna hrang nei no nihaia; mi fialhai thoinôkna tika Pathianin nang thuan a ti,” a tia.
Hruaithe roiinpui chongirkhek thu
(Mt 22.1-10)
15A khalâi otpui inkhat khan kha kha an hriatin a kuang, “Pathian Rama hruaithe hrang chu an vânnei bâka!” a tia.
16Jisua’n a kuang, “Mi tu’n mani hruaithe roiinpui tak a siama, mi tamtak a fiala. 17A fâk zoro tika chu a fialhai kuang, ‘Hong ta roi, atûn hin itinrêng ar zoi ta,’ ti hrangin a siahlo a tîra; 18An rêngin irphialna an nei chita. 19A maton takpu khan, ‘Loi ki lâka, va en a nang; ngaihoi takin ni lei hong irphat pe roh,’ a tia. 20Mi dangin, ‘Sehrât bop ringa ki lâka, eninfel hrangin fe ki tuma; ngaihoi takin ni hong irphat pe roh,’ a tia. Mi dangin, ‘Innei zoi phing lele ki nia, hong thei no ning,’ a tia. 21Siahlo kha a honga, kha thu kha a pu a hrila. A chongpupa kha a ning an mur tâka, siahlo kuang khan, ‘Fe latin lân, kholaidung haia, inkongkâr haia, fe’n lân, invâihai, kholra baicha hai, mitcho hai, ke’nbâi hai, hi hin hong hruai lût roh,’ a tia. 22Siahlo khan, ‘Ka pu, ni thupêk ang khan tho a ni tâka, khan khomin hmun kha a la ôl mai,’ a tia. 23Khan a siahlo kuang, ‘Fe’n lân, lamlian haia, lam kêmhaia, mihai ki in sipna hrangin mi hong hruai inlûthai roh. 24Nang ki hril, mi ki ifialhai khan inkhat luan ki hruaithe fa no nihai,’ ” a tia.
Jisua zui intak lam
(Mt 10.37-38)
25Khan, a rualin mipui tamtak Jisua leh an fe saa, a hong irheia, an kuang, 26“Tukhom a pa mani, a nu mani a dôngma mani, a nâihai mani, a urênghai mani, a farnuhai mani, ama hringna nêk khoma lung ni thung loi chu ki irchutir ni thei no ni.#Mt 10.37 27Tukhom mâni kros irputa ni zui no chu ki irchutir ni thei no ni,” a tia.#Mt 10.38; 16.24; Mk 8.34; Lk 9.23
28Nin laia tu mo in irsâng sin tumin, a toia, a sin zoina hrang sum a inei hrang le nei loi hrang insâp bak loi hrang? 29Lungphûm sia chian tâka, a sin zoi thei no’n chu a en murdi’n, innuisan an ti. 30‘Hi pa hi in sin a phuta, sin zoi thei mah,’ ti an tih.
31Khan, tu rêngin mo a mi sîngkhat leh rêng danga mi sînghni leh a doi hranga zuang, a ngam hrang le ngam no hrang toiin a ngaitua masa no hrang? 32A doi ngam no’n chu hla vita an la om laiin irngeina thu hril hrangin palai tîr a ti. 33Khaang dênin nangni laia mi khom a inei murdi a mâk zit no’n chu ki irchutir ni thei no ni.
Michi dong hmangna boi
(Mt 5.13; Mk 9.50)
34“Michi hi a sa, khannisianlân, michi alna kha boi ta sianlân, i leh mo an in-al nôk hrang? 35Irnêng insana hrang khomin sa ta maka, nimnoka pol inruk khom ni ta maka, pai chian hrang vaiin kêng a iruk tâk. Tukhom irngaina mikuar nei murdi’n chu irngai ri sehai,” a tia.
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.