LUKA 12
12
Mi vârirlethai ata irdîn hrang
(Mt 10.26-27)
1Mipui sâng tamtak irsirpol bet but ang dôr an pungkhôma, Jisua’n a maton taka, a irchutirhai kuang, “Farisaihai chol vârirletna ata irdîn roi.#Mt 16.6; Mk 8.15 2Ite thupsua thei ni mah, an lang nôk zel ngai, ite inhriat loi hranga ip om mah, inhriat suak a ni nôk ngai.#Mk 4.22; Lk 8.17 3Zân inthima nin itihai kha sûn khovâra lan puang an ta, chontan sûnga inrûka nin iti kha in chunga chuangin tâng lan sampui an ti, a ti pehaia.
Tu mo chi rua
(Mt 10.28-31)
4“Ki rualhaio, nangni ki hril, takpum thata, kha zoia ite tho thei ta loi chu chi no roi. 5Tu mo chi rua, nangni hril ki ti; takpum thata, thi zoi hnunga hremhmuna pai theina thuneitu, Pathian vai kha chi roi; a ni, nangni hril nôk ki ti, Ama vai kha chi roi. 6Chongzong ringa poisa hni’n an izuar ngai mo ni ma? Pathianin chu an laia inkhat te lua irhmâi ngai ma. Nin samzâihai ten khom a itep zit kêng. 7Chi no roi, chongzong tamtak nêkin nin hlu ual.
Mihai makunga Krista thop
(Mt 10.32-33; 12.32; 10.19-20)
8“Nangni ki hril, mihai makunga ni thop ka chu Pathian vântîrtônhai makunga Mihriam Nâipa hin thop a ti. 9Khannisianlân, mihai makunga ni hnôl ka chu Mihriam Nâipa khomin Pathian vântîrtônhai makunga hnôl a ti. 10Tukhom Mihriam Nâipa sêl chu ngaidam nih a ta; khannisianlân, Irtha Irthiang sêl ka chu ngaidam ni no ni.#Mt 12.32; Mk 3.29
11“Khan, nin roirêl hrangin, Sinagoka mani, Ramoptu makunga mani, roirêltuhai makunga mani, nangni an hruai tikin, itin mo ki isâm hrang, imo ki iti hrang, tiin milung inkâng no roi.#Mt 10.19-20; Mk 13.11; Lk 21.14-15 12Nin iti hrang chu a zoro taka Irtha Irthiangin nangni hril a ti,” a tia.
Irchong invêt chongirkhek
13Mipui laia mi inkhatin Jisua kuang, “Irchutirtu, ka upa kuang kin pa irchon mâk ni sem sa hrangin ti pe roh,” a tia. 14Jisua’n a sâma, “Mihriam, nangni ta hrangin tu mo roirêltua le irchon sempua ni siam?” a tia. 15Khan an kuang, “Irdîn unglân, irzukna tinrêng ata irdîn roi, mihriam hringna bi hi irchon lâmkhîl sika ni mah,” a ti pehaia.
16Khan, hi chongirkhek hi an sîra, “Mi irchong tak inkhat hi a loia a sân an lâpa. 17Khanchu, ar ngaituaa, ‘Itin mo ki itho hrang tâk? ki bu le bâl siana hrang nei zoi ta ma unga,’ a tia. 18‘Hiang hin tho ki ti; ki fasiar set ki ta, a nêka lian ual sin ki ta, kha khan ki bu le bâl, ki neinun murdi sia ki ti,’ a tia. 19Khanchu, ki’rtha kuang, “Irtha, kum tamtak hrangin sum tamtak ni buk ta; irngamin lân, fa’n lân, inin lân lungthi takin om ro, irti ki ti,” a tia. 20Khan, Pathianin a kuang, ‘Mi’nvêt, a vuan zân zel hin ni hringna a iboi hrang tâk kêng, hi thil ni isuahai hi tu ta hrang mo a ini tâk?’ a ti pea. 21Khan, Jisua’n, “Pathian tiang irchon buk loia, mâni ta hrang vaia irchon buk chu khaang khan nih an ti,” a tia.
Pathian iam roh
(Mt 6.25-34)
22Jisua’n a irchutirhai kuang, “Khasikin, nangni ki hril nin takpum fâk nêk hrang, nin sil le kai hrang lunginkâng no roi. 23Fâk nêk hrang nêkin hringna a hlu ual, silkai hrang nêkin takpum a hlu ual. 24Vaâkhai hi en u ta, bu khom tû mahai; khannisianlân, Pathianin an fahai ngai; nangni chu vahai nêkin chu nin ihlu ual kêng. 25Nangni laia lunginkâng sikin tu mo mâni hringna inseitir ual thei? 26Hi dôr lua nin itho thei loi khate, imo a da dang len vâng khate nin lunginkânga? 27Tûktin pârhai hi en u ta, sin khom zong mahai, puan khom không mahai, khan, nangni ki hril, kha dôra irchong Solomona khom khan hi pârhai hi pha mah.#1 Rng 10.4-7; 2 Tsn 9.3-6 28Khanchu, ram hloisûl, a vuana hring, nangtûka meia tuah nôk hrang lua Pathianin khaang dôra a’rvôtirin te, o nangni iamna tômhaio, khahai nêkin nangni irvôtir no ni mo! 29Khasikin, nin fâk nin nêk hrang thua lunginkâng no roi. 30Hi hi rammual mi murdi’n an ibuaipui tak ngai a ni; nangni khomin nin innang ngai ti, nin Pa’n an hriat; 31Ama Ram kha zong bak unglân, khanchu, hihai khom hi nangni a ipek belsa hrang a ni. 32Pôl tômtehaio, chi no roi, Ram nangni pêk hi nin pa nuamlam tak a ni.
Irvâna irchon
(Mt 6.19-21)
33“Nin inei murdi zuar unglân, inrianghai pe roi, irvâna inru fe loinaa, irthî ifâk thei loinaa khan, sum kok phâi thei loihai, sum hek theiloihai irsiam roi. 34Nin irchon omna kipa nin lungrîl khom a om ngai.
Siahlo irtûng chian
35“Irthok sai diamin, meiser bel sai leh irsiam mai roi.#Mt 25.1-13 36Siahlo, an pu irnei hruaithe ata zuang hrang lei nghâk chianhai angin. A zuanga mikot a hong intôk le, inhong zôi hrangin.#Mk 13.34-36 37Siahlo, an pu zuanga irtûng chiana om a ihmuhai chu, mi vânnei an ni. Nangni ki hril, ama kha irsiam a ta, khalâi dohai a ta, an bu nêk donhai a ti.
38“Zân chimripa, âr khuanchunga mo, a zuanga irtûng chiana om a ihmuhai chu mi vânnei an ni. 39Hi hi nin inhriat, inru hong hrang inneitu’n inhre sianlân chu hrung a ta, a in inset no ni.#Mt 24.43-44 40Khasikin, nangni khom irtûng chianin om roi, nin tûng no lai takin Mihriam Nâipa zuang a ti,” a tia.
Siahlo iamom le iamomloi
(Mt 24.45-51)
41Petera’n, “Rengpa, hi chongirkhek hi keini vai mo ni ni ihril mi murdi mo?” a tia. 42Rengpa’n, “An pu’n a siahlohai hruaitua le an bu sem tika sem ngaitu hrangin sum enkoltu iamom tak le vâr tak a inkung hrang kha tu mo a ini hrang? 43A pu a honga, khaanga lei tho siahlo a ihmu chu mi vânnei a ni. 44A dik takin nang ki hril, a inei chunga hruaitua hong siam a ti. 45Khannisian siahlo khan, ‘Ka pu hong kîr lat no ni,’ tiin nupang pasal zêm sianlân, lei fâk lei nêkin len rui sianlân, 46Kha siahlo pu kha ar tûng no kârin, a iam no nikhuaa a pu zuang a ta, tukkhoi a ta, mi iamloihai dongtum indong a ti. 47Siahlo, an pu nuamlam inhre chiana tho loi le irtûng loi chu a sate’n zêm ni an ti. 48Aniachu, inhre loi sika hremna dôr thil tho chu nêp uala zêm nih an ti. Tukhom tamtak indongtira omhai chu tamtak ingên ni an ti.
Jisua sika irsenna
(Mt 10.34-36)
49“Irnêng hâl hranga zuang ki ni, atûn khom kâng zôi ta sian ki ti! 50Baptisma ki ichang hrang a om, kha kha ki tho mâka chu ki ning ar hal vang na!#Mk 10.38 51Irnênga irngei inlêng hranga zuang ni ma ung, irsenna inlêng hranga zuang kêng ki ini. 52Atûna irthokin in sûng khata mi ringa irsen an ta, inthumin, inhni doi an ta, inhniin inthumhai doi an ti. 53Pa’n a nâipa doi a ta, nâipa’n a pa; nu’n a nâinu doi a ta, nâinu’n a nu; a tarpiin a moinu doi a ti, moinu’n a tarpi doi a ti,” a tia.#Mik 7.6
A zoro inhriat thiam
(Mt 16.2-3)
54Jisua’n mipuihai kuang khan, “Misa tâk tiang sûm a hong zîngin chu rua a itho hrang kêng nin tia, a tho khom a tho ngai. 55Khan sim tiang phâivua a hong tho nin inhriatin chu, a ilum hrang kêng nin tia, lum khom a lum ngai. 56Vârirlethaio! Irnêng irvân nin ena, kho om hrang lam nin inhriata, khannisianlân, atûnlai zoro om lam hi itho mo nin inhriat theiloi?” a tia.
Ni irdoipui leh irngei ro
(Mt 5.25-26)
57“A dik le dikloi kha ithoa mo nangni khomin nin itheithâk mai loi? 58Thuneitu makunga ni irdoipui leh nin inlang hrangin, fe pumin ama leh irngeina lam zong roh; khano’nchu, roirêltu makunga nang hruai inlût a ta, Roirêltu’n pulis kuang nang inhlan a ta, pulis khan intângna ina nang khum a ti. 59Nang ki hril, poisa khatte khom ni thâk irkip mâka chu, khatak ata kha suak viat no chi ni,” a tia.
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.