THILSIEMBUL 8
8
Tuilet Tawpna
1Chun, Pathien in Noah leh a kawma thilhing tincheng leh, gancha um haw chengcheng chuh a hezing a; chun, Pathien in lei chung achun huih a nun sak a, tichun tui chuh a hung kiem pan ta a; 2Tui thuk tak nak haw leh van tukvanhaw chu le a hung kikhak ta a, van apat a guoh hung zu chule sukhaih in a um ta a; 3Tichun tui chuh lei chung apat chun a kiem deuh deuh ta a: tichun ni za leh ni sawmnga a beih nung in tui chuh a hung tawm deuh deuh ta a. 4Tichun, tha sagihna ni sawm leh ni sagih ni chun lawng chuh Ararat tângah a hung kinga ta a. 5Chun, tui chuh tha sawmna tiengin atawm deuh deuh zel a: tha sawmna ni khat ni chun tângsip haw chuh a hung kilang pan ta a.
6Chun, ni sawmli nung chun hiti hi ahi a, Noah chun lawng tukvan a siem kha a vak hawng a: 7Chun, va-âk khat a lendawk sak a; lei apat a tui chuh a kan nai loh ziekin a leng viel a leng viela. 8Chun, lei chungah tui a kâng ta’m tih hetna dingin vakhu a lendawk sak kit a; 9Himahlele, vakhu chun chukna ding himhim a mu puoh a, tichun, a kawmah lawng ah a vaikit ta a, tui chun lei chung chengcheng achup naklai ziekin; Tichun, a khut a vak thadawk a, a man a, lawng sung ah a kawmah a la lut ta a. 10Chun, ni sagih dang a ngak kit tadih a; tichun, lawng apat chun vakhu chuh a thahdawk kit a; 11Chun, ngaitie, vakhu chuh olive nah kilotha tûng a mûk a hun tawk in nitâk lam chun a kawmah a hung lut kit a; khutichun, Noah chun leichung ah tui atawm tai tih a heta a. 12Chun, ni sagih dang a ngak kit a; vakhu chuh a lendawk sak kit a: himahleh, a kawmah a hung vaikit ta puoi.
13Chun, hiti hi ahi a, Noah chuh kum zagup leh kum khat ahih kum, a tha khatna, a ni khat ni chun, tui chuh lei apat a kâng zo ta a; tichun Noah chun lawng khuhna chuh a ladawk a, a en a; chun ngaitie, lei chung chuh a hung hul huoi ta a. 14Chun, a tha nihna ni sawmnih leh ni sagih ni chun lei chuh a hung hul zo ta a.
15Chun, Pathien in Noah kawm achun a gena, “Lawng apat pawt inla, 16nang leh, na zi leh, na chapate zite le nang kawmah pawt u hen. 17Phehlevo chengcheng laka thilhing tincheng na umpih hawu kha, vachate, ganchate, ganhing lei chunga bawkvaka chieh tin cheng haw kha tawh na kawmah puidawk in, lei ahin no nei in, chi tamtak suona a hung pun theihna dingun,” ti’n a gen a. 18Tichun, Noah chuh a chapate tawh a zi tawh a chapate zite tawh lawng apat chun a pawtdawk tau a: 19gamsa tin chengte, ganhing tin chengte, vacha tin chengte, lei chunga tawithei tincheng chuh amau haw chi dungzui chietin lawng apat chun a pawtdawk tau a.
Noa’n Maichâm a siem
20Noah chun Lalpa dingin maichâm a siem a; sa thieng lak apat leh vacha thieng lak apat chuh a la a, maichâm achun hâlmang thilpiek in a pie ta a. 21Chun, Lalpa’n zie gimlim chuh a he a; Lalpa chun a lunggil in, “Lei hi mihiem ziekin hansie lawh kit ta puo’ng ka, mihiem lunggil ngaihtuohna haw chuh a naupan lai apat in a gilo ngâl a; tu a ka gawt bang hin thilhing tincheng le gawt kit ta puo’ng ka, 22Lei umsung chengin thai chîn hun leh agah lawh hun, nipi leh phalbi te, sun leh zan bei ta puo’n a,” a ti a.
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.