THILSIEMBUL 13
13
Abram leh Lot Kikhenna
1Khutichun, Abram chuh Aigupta gam apat chun a pawt a, Kanaan simlam achun a zi tawh, a neih chengcheng tawh a chieh ta a. Lot inle a zuia 2Tichun, Abram chuh ganguolte, dangka leh sana te’n a hausa mah mah a. 3Simlam gam apat chun Bethel lam zuonin a chieh zela, Bethel leh Ai kikala puon-In a zakna mun kha a tunga, 4Tichun, maichâm a siemna mun ngêi akhan Abram chun Lalpa chuh a sam ta a.
5Chun, Abram tawh kitawn Lot ngêi khan le, belam guolhaw, bâwngguol haw, inkuon leh suokte leh puon-In haw a nei a. 6Ganguol tamtak a neih gel ziekun, a chenkhawmna dingun gam chuh a kiting ta puoh a. 7Tichun, Abram ganchingte leh Lot ganchingte kal achun kinielna a hung pawt ta a: zielai chun Kanaan te leh Periz mite chuh zie gam achun a um u a.
8Tichun, Abram chun Lot kawmah, “Nang leh kei kikal leh na ganchingte leh ka ganchingte kikal ahin kinakna um kihen ti’n ka hun ngên hi; unau-pachan I hi ngâl a. 9Gam chuh a pum in a um diei duoi hilo ahim? Kei apat a um chuom dingin ka hun ngên hi: veilam a na kihei leh kei changlam ah kihei ing ka ting; changlama na kihei leh kei veilam ah kihei ing ka,” a ti a:
10Tichun Lot chuh Zoar khuo lam nga’n a dâk dawk a, Jordan phaicham chengcheng chuh Lalpa huon tawbang, Aigupta gam bang khan gam hing diei duoi, tui tampi umna mun ahi tih a mu ta a Lalpa’n Sodom leh Gomorra khuo a suksiet masang khah ahi ngâla.#Tsb 2.10 11Khutichun Lot chun Jordan phaicham chengcheng chuh a têl a; suohlam achun a kichawn a, tichun a kikhen tau hi. 12Chun, Abram chuh Kanaan gam achun a um a, Lot chuh phaicham khuo haw achun a um a, a puon-In chuh Sodom khuo tiengin a chawn zel a. 13Sodom mite chuh Lalpa mitmuh in huoisie taka nunsie leh migilo ahiu hi.
Abram Hebron a a Kichawnna
14Chun, a kawm apat a Lot a chiehdawk nung chun, Lalpa’n Abram kawmah, “Khawdak inla, na umna apat khan mâllam te, simlam te, suohlam te, tumlam te en in: 15gam na muh chengcheng hih nang leh na suonte kawmah kumkhuo a dingin hun pie ding ka hi.#Nas 7.5 16Chun, na suonte chuh leia leivui bang mai in siem ing ka ting; min leia leivui hi a simsen u chun, na suonte le simsen hi’n au. 17Kipan inla, gam hi a dung avai tawh suok ah; hun pie ding ka hi,” a ti a. 18Tichun, Abram chun a puon-In chuh a chawn a, Hebron a um Mamre a gangpi kienghaw achun a va cheng a, zie tak achun Lalpa dingin maichâm a siem ta a.
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.