Zuwã 1
1
Imreme na isisi hã isihâibazé
1Romna'rata ãma te Imreme#1.1 Imreme 'Re ihâimana u'âsi mono mreme, te wasu'u. na isisi hã 're hâimana u'âsi. Ta hã 'Re ihâimana u'âsi mono siré te 're hâimana u'âsi. Ta hã tô, 'Re ihâimana u'âsi mono. 2Ta hã romna'rata ãma, te tô 'Re ihâimana u'âsi mono siré 're hâimana u'âsi, marĩ õ uptabi ré. 3'Re ihâimana u'âsi mono hã taha ma, te te i'ruzéb zarina ma tô uburé te te ro'apoto. Ta hã hâimana õ 'wa'âhã, marĩ hã hâimana õ uptabi di aré. 4Taha si te dahâimana u'âsi zém nhomri'wa hã 're hâimana. Ta hã duré dama rowa'a'wa, ti'ai ãma hã. 5Rowa'a hã te robra wi te te 're rowa'a. Robra hã te te ãma ai'uté waihu'u õ di, rowa'a ãma hã.
6Tawamhã aibâ hã te 're hâimana, Zuwã na isisi, 'Re ihâimana u'âsi mono we te te isatõrĩ hã, 7Rowa'a hã te te dama 're wasu'u mono da, taha u'âbâ, da te 're wapari za'ra mono wa, uburé da te 're saze za'ra mono da. 8Zuwã hã Rowa'a'wai õ di. Tane nherẽ, ma tô wei mo, te te dama 're wasu'u mono da, Rowa'a'wa hã. 9Rowa'a'wai uptabi hã ma tô we datẽme mo ti'ai u, uburé te te dama 're rowa'a mono da.
10Imreme na isisi hã ma tô aré ti'ai ãma dasiré 're hâimana. Ta hã, 'Re ihâimana u'âsi mono zadawa para te te ro'apoto mono nherẽ, ro'apoto mono 'wa na hã da te waihu'u za'ra õ di. 11Ta hã tisiré Zudeu norĩ u, ma tô we aré mo. Tane nherẽ, ta norĩ hã te te siwi âri wẽ õ di. 12Ni'wam norĩ si ma tô saze za'ra. Ma tô duré sô titob'uzu za'ra. Tahawa, ta norĩ ma, ma tô pisutu za'ra, 'Re ihâimana u'âsi mono 'ra na 're nomro mono da hã. 13Ta norĩ hã ti'ai ãma 're idapoto za'ra mono zém ne, poto téb za'ra õ di, 'Re ihâimana u'âsi mono 'ra na 're hâimana za'ra mono da hã, damama sipodo 're ipoto za'ra mono ne hã. Tô 'Re ihâimana u'âsi mono hawim na si, ma tô tipoto téb za'ra.
14Imreme na isisi hã ma tô sihâiba, a'uwẽ na. Ma tô duré wasiré 're hâimana. Ta hã simizawi pese uptabi di. Duré ta hã ma tô uburé wama hâi'ré za'ra, 'Re ihâimana u'âsi mono ãma tô sena rowaihu, 're ihâimana mono zé hã. 'Re ihâimana u'âsi mono 'ra wa, waihu'u pese uptabi na 're imorĩzé hã wa tô duré 'madâ'â za'ra ni, Õhõ si misi I'ra wa, Timama hawi te te i'âri hã, wẽ uptabi na 're hâimana mono da.
15Ta hã ma tô Zuwã Batista hã te te dama 're wasu'u. Ãne te dama 'mahâ:
— Ãhãta ã hã wa tô te 're wasu'u: “Ĩza'u za we imorĩ hã ĩnhipai u pire uptabi di. E marĩ wa. Ĩpoto õ ré, 're hâimana u'âsi mono wa.”
16Simizawi pese uptabi wa, ma tô iwẽ hã te te uburé wama 're i'apisutu mono na te te ãma 're anhisiwi u'âsi. 17'Re ihâimana u'âsi mono hã tinhimiroti zahi hã ma tô Mozésihi ma waihu'u, te te ãma rob'ui'éré da. Tazahã, isimizawi pese zé hã duré 're ihâimana mono zém na tô sena rowaihu hã, ma tô sina hâi'ré, Zezu Cristu hã. 18Ni'wa ti'ai ãma hã niwa titõmo na te te 'madâ'â waihu'u õ di, 'Re ihâimana u'âsi mono hã. Misi I'ra si, ma tô Timama hã te te 're 'madâ, ta hã tô 'Re ihâimana u'âsi mono wa, duré Timama zababa 're sãmra u'âsi mono wa. Ta hã ma tô wama hâi'ré za'ra, 'Re ihâimana u'âsi mono, 're ihâimana mono zé hã.
Zuwã Batista hã te te dama 're irob'mahârâ mono zé
Marcus 1.1; Lucas 3.2-3
19Tawamhã Zudeu norĩ ma roti'wa norĩ hã ma tô Zuwãhã u satõrĩ za'ra, nima norĩ sasedoti norĩ#1.19 sasedoti norĩ 'Re ihâimana u'âsi mono ma, da'ãma romhuri'wa norĩ, isõrõwa 'ri 'rãihâ ãma hã, Arãhã nhihudu norĩ. hã levita norĩ#1.19 levita norĩ Levihi nhihudu wamri, 'Re ihâimana u'âsi mono te te ipisutu za'ra, isõrõwa 'ri 'rãihâ te te 're 'madâ'â za'ra mono da. me, te te siwi sadanharĩ da, õ hã ni'wa hã zô.
20Tahawa Zuwã hã si'udâ ãna te sõ'awi tãma siwasu'u za'ra, ãne:
— Wa hã Cristu#1.20 Cristu hã, 'Re ihâimana u'âsi mono te te ipisudu, Danho'reptui'wa da, te wasu'u, gregu mreme na hã. õ di.
21Tahawa te duré siwi sadanharĩ zahu, ãne:
— Tawamhã bété, e 'wa hã a hã. E a hã, Elias.
— Mare di. Ta hãi õ di, wa hã. — Ãne te duré tãma siwasu'u za'ra.
Tawamhã te duré siwi sadanha, ãne:
— E a hã, 'Re ihâimana u'âsi mono zadawa 'mahârâ'wa, sô 're iwanhimipari za'ra mono.
— Mare di. Ta hãi õ di, wa hã. — Ãne ma duré sada'âbâ za'ra, Zuwã hã.
22Tawamhã irẽme ma, te oto siwi sadanha, ãne:
— E 'wa hã bété, a hã. Ma'ãpé wama asiwasu'u waré za'ra na, wei wazatõrĩ'wa norĩ ma, wa te aiwasu'u âri za'ra da. E niha te 're asiwasu'u mo, a hã.
23Tahawa, te Zuwã hã tãma siwasu'u za'ra, 'Re ihâimana u'âsi mono zadawa 'mahârâ'wa Izaias, ãne te te ãma irob'ui'érézéb zarina:
— “Wa hã ĩhârâ 'rãihâ na te dama 're irob'mahârâ mono, rop si 're irosa'wari mono ãma, ãne: Sa'ra pese aba mono bâdâdi hã, Uburé Danhib'apito ma.”
24Da te itẽme isatõrĩ za'ra norĩ hã farizeu norĩ siré 're ihâimana za'ra mono. 25Ta norĩ hã te Zuwã siwi sadanha, ãne:
— A hã, Cristu õ wamhã, duré Elias õ wamhã, duré 'Re ihâimana u'âsi mono zadawa 'mahârâ'wa, sô 're iwanhimipari za'ra mono õ wamhã, tawamhã bété e niha zarina, te â dawabzuri hã dama 're i'ab'manharĩ mo.
26Tawamhã Zuwã hã ma sada'âbâ za'ra, ãne:
— Wa hã wa â na si â dawabzuri hã te dama 're a'manharĩ. Tane nherẽ, aiwazari za'ra wa'aba te ni'wa hã tihâiba, aima isa'rese za'ra wa'aba õ hã. 27Ta hã ĩza'u si te za wei mo. Tane nherẽ, ĩma pire wa, e ĩwẽ bâ, ipara'uza wasisizé hã te tãma iwasihu da hã.
28Ãne hã ma tô uburé tiromhâiba, Betãnia na 'ri wa'õtõ nhisi ãma, Zodã pa bâtâ pusizém niwĩ, Zuwã hã â dawabzuri te te dama 're i'ab'manharĩ mono zéb ãma.
Zezusi hã Pone'ẽrebâ i'rare, 'Re ihâimana u'âsi mono te
Marcus 1.10; Lucas 3.22
29Tawamhã awẽm na hã Zuwã Batista hã, Zezusi itẽme imorĩ na te te sãmri wamhã, ma tô dama 'mahâ, ãne:
— Ma'ãpé 'madâ'â za'ra wa'aba! Õhõta Pone'ẽrebâ i'rare, 'Re ihâimana u'âsi mono te te ipisudu, ti'ai ãma dawasété zani'wa da hã. 30Õ hã wa tô te 're wasu'u, iwana ré te 're wasu'u mono wamhã, ãne: “Ĩza'u si te za wei mo, ĩnhipai u ĩma ipire uptabi hã, ĩpoto õ ré, 're hâimana u'âsi mono wa.” 31Ĩzama te waihu'u õ di aré, ni'wa na hã. Tahawa, wa tô wei mo, â dawabzuri hã te dama 're a'manharĩ mono da, Izaraéu nhihudu norĩ hã te te siwi waihu'u da.
32Tawamhã Zuwã hã ma tô iwasu'u na dama uzusi, ãne:
— Wa hã wa tô 'madâ, 'Re ihâimana u'âsi mono Pẽ'ẽzani, utu'u ne we itẽme si'rai ré hã, duré isisi simizazâri ré hã. 33Ta hã te waihu'u õ di aré. Tane nherẽ, 'Re ihâimana u'âsi mono, â dawabzuri hã â na si te dama 're a'manharĩ mono da, ĩpisutu'wa hã ma tô ĩma tinha, ãne: “Te za i'madâ, Ĩpẽ'ẽzani hã itẽme te te isi'ra na duré isisi simizazâri ré hã. Ta hã te za Ĩpẽ'ẽzani na te te 're da'ahâiba ubu.” 34Ã hã wa hã wa tô 'madâ. Tahawa, wa tô te 're wasu'u, Õ hã 'Re ihâimana u'âsi mono 'ra na.
Imorĩ'rata na aibâ norĩ hã, Zezusihi ãma te te isasõmri zahuré zé
35Tawamhã awẽm na hã te duré Zuwã Batista hã tame tihâiba. Isiré 're inomro norĩ siré hã te maparane ime tihâimana zahuré. 36Tawamhã Zezusi te te iro'razâri na te te 'madâ'â wamhã, te ãne 'mahâ:
— Õhõta Pone'ẽrebâ i'rare, 'Re ihâimana u'âsi mono hawi we imorĩ Danho'reptui'wa da hã.
37Ãne hã Zuwã Batistaha mreme, isiré 're ine hã te te wapari zahuré wamhã, ma tô oto tineb zahuré, Zezusihi zarina. 38Tawamhã Zezusi hã sibabarãi u apâ sipi'rai wamhã, ma tô 'madâ'â zahuré, isarina inem na. Ãne te sadanharĩ zahuré:
— E marĩ zô, te we 're ane wa'wa.
Ãne te asa tãma nharĩ zahuré:
— Rabi, e mame asãmrazé hã. (“Rabi” hã “rowahutu'wa” te wasu'u.)
39Tawamhã Zezusi hã te tãma nharĩ zahuré, ãne:
— We ane wa'aba pé, sabui wa'aba da.
Tahawa, te oto ime tineb zahuré, maparane si'uiwa na bâtâ pibuzéb ãma hâiwahâ. Isãmrazé hã ma tô sabu zahuré. Tame ma tô isiré aimasisi zahuré, irob'razéb u.
40Ãdré Simahã no, ta hã aibâ norĩ Zezusihi zarina inem hâiba amo, Zuwã te te wasu'u wa, te te iwapari zahuré. 41Tawamhã imorĩ'rata na te Ãdré hã tidub'rata zô rĩni, te te tãma rowasu'u da, ãne:
— Messias wa tô sõpẽtẽ ni. (Messias#1.41 Messias hã, hebraicu mreme. hã, ta hã Cristu te wasu'u, 'Re ihâimana u'âsi mono te te ipisudu, Danho'reptui'wa da.)
42Tawamhã Ãdré ma tô tidub'rada hã saprõ, Zezusihi u. Tame te Zezusi, Simau hã 'madâ. Ãne te tãma tinha:
— A hã Simau, Zuwãhã 'ra. Tane nherẽ, ã hawimhã asisi hã za oto, Cefasi na. (Ãma isaprĩ na hã Pedru na isisi hã, ta hã “ẽtẽ tõmo wawẽ” te wasu'u.)#1.42 Pedru hã “ẽtẽ tõmo wawẽ” te wasu'u.
Zezusi hã, Filipi norĩ Natãnaéu me te te ipisutu zahuré zé
43Tawamhã awẽm na Galiléia na danhipti'a nho'õmo nhisi u morĩ da, ma tô Zezusi hã sima rowairébé. Morĩ wana ré hã, te Filipihi zô rĩtĩ. Te te sõpẽtẽ wamhã, te ãne tãma tinha:
— We aimorĩ, ĩsiré oto 're aimorĩ da.
44Filipihi za'ru hã Betisaida na 'ri wa'õtõ nhisi hã. Tame te duré Ãdré norĩ hã Pedruhu me 're simasisi zahuré. 45Tawamhã Filipi hã te Natãnaéhé zô rĩtĩ. Te te oto sõpẽtẽ wamhã, te ãne tãma rowasu'u:
— Wa tô wasiwi sõpẽtẽ ni, 'Re ihâimana u'âsi mono nhimiroti zahi na Mozési te te ãma irob'ui'éré siromo hã duré 'Re ihâimana u'âsi mono zadawa 'mahârâ'wa norĩ zama te te ãma irob'ui'éré za'ra hã. Ta hã Zezusi, Nazaré ãma iprédu, Zuzéhé 'ra.
46Tawamhã Natãnaéu hã te asa sadanha, ãne:
— E Nazaré hawi marĩ iwẽ hã watobro da bâ.
Tawamhã Filipi hã te duré asa tãma tinha, ãne:
— We aimorĩ pé, sabu da.
47Tawamhã Zezusi hã Natãnaéu itẽme imorĩ na te te 'madâ'â wamhã, ma tô ãne ihâiba na tinha:
— Õhõta te wei mo, Izaraéu nhihudu uptabi. Ta hã aibâ, sena 're ihâimana mono.
48Tahawa, te Natãnaéu hã sihâiba na sadanha, ãne:
— E niha ma tô ĩwaihu.
Zezusi hã ma sada'â, ãne:
— Filipi hã asô hârâ wana ré, wa tô ai'madâ, rob'rã figu wede zahâpâ asãmra ré.
49Tawamhã Natãnaéu te mreme 'rãihâ na 'mahâ, ãne:
— Rowahutu'wa, a hã 'Re ihâimana u'âsi mono 'ra! A hã Izaraéu nhihudu norĩ nhib'apito!
50Tawamhã Zezusi hã ma sada'â, ãne:
— E figu wede zahâpâ asãmra ré, te i'ai'madâ'â na te aima nharĩ wap si, ma tô ĩzaze. Tazahã, niwap si te za marĩ hã i'a'madâ, ã hã i'madâ'â nhipai u hã. 51Tô sena wa za ãne hã aima waihu'u za'ra wa'wa: Te za i'madâ'â za'ra wa'wa, niwamhã hâiwa nasi si'ridawa ré hã duré hâiwa hawi 'Re ihâimana u'âsi mono ma romhuri'wa norĩ hã nasi te te sai'uri za'ra ré hã apâ, duré te te nasi si'ra za'ra ré, Ti'ai ãma Dasiré Ipoto ãma nasi sime za'ra da.
© 2011, Wycliffe Bible Translators, Inc.