Mateu 1
1
Haga Wẽtup 1
Saꞌawyꞌi Wuaria Iesui Aseꞌiꞌin Etiat
Iruka 3.23-28 Piat Ewy
1Uito ti Iesui potmuꞌe Mateu. Miꞌi uimiwan me atimoherep yne Aipotypot Iesui etiat uiꞌakasa hap koꞌi uimikuap koꞌi. Mesuwe saꞌawyꞌi wuaria aipotypot Iesui eꞌaseꞌiꞌin set koꞌi atipehik katupono Iesui ti morekuat Tawi saipepiat sese Iꞌewyte Aparãu saipepiat sese. 2Saꞌawyꞌi ti Aparãu imoherep tosaipepiat Isaki hawyi Isaki imoherep tosaipepiat Iako. Miꞌi hawyi Iako imoherep tosaipepiat Iuta iꞌywytꞌin wywo. 3Miꞌi hawyi Iuta imoherep tosaipepiat Pere iꞌywyt Seru wywo teharyꞌi Tamare kaipyi. Miꞌi hawyi Pere kaipyi tuwemoherep Esehũ hawyi Esehũ imoherep Arãu. 4Miꞌi hawyi Arãu imoherep Aminatapi hawyi Aminatapi kaipyi tuwemoherep Nasũ hawyi Nasũ imoherep Sarumau. 5Miꞌi hawyi Sarumau kaipyi tuwemoherep Puasi Iharyꞌi Hapi kaipyi. Miꞌi hawyi Puasi imoherep Opeti teharyꞌi Iruti kaipyi. Miꞌi hawyi Opeti kaipyi tuwemoherep Iese. 6Miꞌi hawyi Iese imoherep aiporekuat saꞌawyꞌi wuatnuat Tawi. Miꞌi hawyi morekuat koro Tawi kaipyi tuwemoherep morekuat Sarumau tomimaꞌat tomiꞌauka Uria eharyꞌi kaipyi. 7Miꞌi hawyi Sarumau kaipyi tuwemoherep morekuat Hupuãu hawyi Hupuãu imoherep morekuat Apia hawyi Apia kaipyi tuwemoherep morekuat Asa. 8Miꞌi hawyi Asa imoherep morekuat Iosawa hawyi Iosawa imoherep morekuat Iurãu. Miꞌi hawyi Iurãu imoherep morekuat Usia. 9Miꞌi hawyi Usia imoherep morekuat Iutãu hawyi Iutãu imoherep morekuat Akasi. Miꞌi hawyi Akasi kaipyi tuwemoherep morekuat Esekia. 10Miꞌi hawyi Esekia kaipyi tuwemoherep morekuat Manase hawyi Manase imoherep morekuat Amãu. Miꞌi hawyi Amãu kaipyi tuwemoherep morekuat Iusia. 11Miꞌi hawyi Iusia kaipyi tuwemoherep morekuat Iekunia iꞌywytꞌin wywo. Morekuat Iekunia toineꞌen turan suraraꞌin yi Papironia kaipyi tõꞌẽ tõꞌẽ kahato aiꞌywania saꞌawyꞌi wuaria moma hamo. Miꞌi hawyi iꞌatuesuraraꞌin teropoꞌok kahato iꞌatueꞌyi pyi yi Papironia kape taꞌatueropat hamo. Miꞌi hawyi tukupteꞌen motꞌi yi Papironia pe. Miꞌi tote teꞌerewepotpap aat kaꞌap yi Papironia ywania emiitꞌin no yt kat saꞌup i iꞌatuewanikaptia mikyꞌesat ewy. 12Miꞌi hawyi yi wato Papironia pe mekewat ahaꞌaseꞌi morekuat Iekunia kaipyi tuwemoherep Seatieu. Miꞌi hawyi Seatieu imoherep Surupapeu. 13Miꞌi hawyi Surupapeu kaipyi tuwemoherep Apiute hawyi Apiute imoherep Eriakĩ. Miꞌi hawyi Eriakĩ imoherep Asu. 14Miꞌi hawyi Asu imoherep Satoki hawyi Satoki kaipyi tuwemoherep Akĩ. Miꞌi hawyi Akĩ imoherep Eriuti. 15Miꞌi hawyi Eriuti kaipyi tuwemoherep Ereasa hawyi Ereasa imoherep Matã. Miꞌi hawyi Matã imoherep Iako. 16Miꞌi hawyi Iako imoherep Iuse. Miꞌi ti mana Maria eꞌaito wuatnuat toineꞌen. Miꞌi ti mana Maria kaipyi tuwemoherep Iesui mekewat Tupana Mipoꞌoro Wuatꞌi Ywania Porekuatnuat E Hap Het Rakat.
17Saꞌawyꞌi wuat ahaꞌaseꞌi pot Aparãu eꞌat kaipyi morekuat Tawi eꞌat kape 14 ok tuwemoherep. Aikaꞌiwat Iesui eꞌyian miaria. Miꞌi hawyi morekuat Tawi eꞌat kaipyi yi Papironia pe Isareu ywania tukupteꞌen hap eꞌat pe 14 ok tuwemoherep aikaꞌiwat Iesui eꞌyian miaria.
Iesui Iꞌywaĩꞌĩ Hap Etiat
Iruka 1.26-35 Piat Ewy
18Miꞌi hawyi mesuwe ahenoi teran aipotypot ywãꞌĩ hap etiat. Pyno tawa Nasare pe wẽtup ok Iuse e hap het rakat tat teran teharyꞌi wo yt karãpiat i ihainia wywo ieineꞌen hat mana Maria e hap het rakat. Maꞌato miꞌi yt toꞌopytyk i te turan imepytꞌa rakatno toineꞌen maꞌato yt ihainia kaipyi i maꞌato Tupana Paꞌãu kaipyi imepytꞌa. 19Miꞌi hawyi ikyꞌesat hat Iuse tikuap taꞌyn imepytꞌa Maria hap hawyi tuwanetup koꞌi koꞌi kahato -Uimaꞌat rasig Maria e. Wẽtup ok ihainia imepytꞌa nug hat pote yt naku i atat uheharyꞌi wo e. Katupono wuatꞌi wywuat ieineꞌen hat neꞌi Maria e tuwanetup hawe. Pyno waku atipoꞌoro mana Maria wẽtup hy kape migꞌi wo e Iuse tuwanetup hawe katupono waku rakat Iuse pote yt toikyꞌesat i miitꞌin tikuap imepytꞌa hap haype. 20Maꞌato aikotã waku Maria poꞌoro wẽtup hy kapiat hap kape tuwanetup turan Tupana emiit atipy kaipywiat tuwemoherep taꞌyn Iuse muꞌetu miꞌi hawyi toꞌe Iuse pe. Miꞌi hawyi toꞌe Iuse muꞌetu -Morekuat Tawi emiariru miariru e -Yt erekenꞌẽ teiꞌo etat Maria eharyꞌi wuat hamo. Katupono ti Tupana Paꞌãu Wakuat e. 21Pyno meiũran ti aru mana Maria mepyt tumoherep ihainia hit wakuat sese rakat e. Miꞌi waku ehetꞌok Iesui are. Katupono miꞌi ti temiitꞌin ehakyeraꞌat iꞌatuminug saꞌag pywiat hamo. 22Pywo tuwemoherep taꞌyn wyti aru aikotã saꞌawyꞌi wuaria tehay moherep haria po pyi Tupana mienoi ewy. 23Mio tã e ti Tupana saꞌawyꞌi miitꞌin me. -Meiũran ti aru wẽtup ok haryporia wakuat makuptia te yt heꞌaito i te rakat pykai imepytꞌa rakatno topyhuꞌat hawyi ti aru imepyt ihainia hit. Miꞌi kape ti aru eiwẽpo wat Emanueu katupono Emanueu e wyti Tupana toineꞌen aiwywo e. Topiat yianmiat Tupana ehay enoi hat Isaia tomiwan 7.14 pe e. 24Miꞌi hawyi Iuse tuwehymut raꞌyn hawyi tutunug naꞌyn Tupana potpoꞌoro piat tonapin hap ewy. Totat raꞌyn Maria teharyꞌi wo. 25Totat raꞌyn wen maꞌato yt topytyk i. Meiũran ti Maria Imepyt raꞌyn Iuse tum naꞌyn imepyt pe het Iesui e woꞌehakyeraꞌat e topusu puo.
© 2017, Wycliffe Bible Translators, Inc. All rights reserved.