Luke 17
17
Mbe la dune tankꞌus nénilhtꞌine, ꞌen oogha nduwhutꞌen-un, ꞌet dawhultsiꞌ-un ootsꞌu hóoltsꞌulh
1ꞋInkꞌez Jesus yugha hodulꞌehne ꞌet ndubulhni, “Whe tankꞌus uznintꞌi-un ꞌahoolhyiz ꞌet whuzdla wheꞌ hoontꞌoh. ꞋEt hoontsꞌi dune oogha tankꞌus ꞌúwhutꞌen-un, ꞌet dawhultsiꞌ-un ootsꞌu hóoltsꞌulh. 2Mbe dune ꞌen gha tsꞌoodunneyaz tankꞌus ꞌúhutꞌen ꞌubulhtsi de, ꞌen dune tse cho hitsꞌilchun edinguz ꞌinkꞌez takhulh-un tahúyano de, ꞌet ꞌon nus hózooꞌ ooleꞌ daꞌ. 3ꞋEt huwa khahdli. ꞋEt nohulhutsin nohdulhyoh ꞌuhuja de, hukwa dóniꞌ. ꞋEt dudeni náhundunizꞌai de, ooba whunaoodoolhnoh.
4ꞋEt ꞌilhoh dzin lhtakꞌantꞌit ndulhyoh ꞌuja de, ꞌoh totsuk nghu nadaih ꞌinkꞌez, ‘Seni náhandunisꞌai,’ nyúlhni de ooba whunaoodolnoh.”
Ntsꞌoh dahooja hoontsꞌi, be ꞌalha ꞌuhoontꞌoh-i be neMoodihti ookꞌuneꞌ tsꞌootꞌen
5ꞋInkꞌez whelꞌaꞌne neMoodihti ꞌuhuyulhni, “Be néba ꞌalha ꞌuhoontꞌoh-i, ꞌon nus ꞌultus neba ilhtsi.”
6ꞋEt neMoodihti ꞌubulhni, “ꞋUkꞌenus ha níyeh maiꞌ nintsool-i, mustard huyulhni, ꞌet nohba ꞌalha ꞌuhoontꞌoh-un, ꞌet ꞌuwhulcho de, duchun ha níyeh-i, mulberry huyulhni, ꞌet oodulhkut, ‘Ndi duchun ooghih tubulh ha ílhchꞌoolh ꞌinkꞌez bun cho kꞌut ꞌet ꞌana nꞌaih.’ ꞋEt nohkꞌoh tsꞌe ooneh.
7ꞋInkꞌez nohni nohtoh ꞌilhoghun noheꞌulhna unli, ha níyeh kꞌet nawhulhchꞌul kꞌus ꞌusbai ghunli, ha núlhyeh tsꞌe ha nája. ꞋEt ꞌudóniꞌ, ‘Soo ꞌa! Natlꞌa dindaih ꞌinkꞌez naꞌintꞌalh!’ 8ꞋAwundooh! Kꞌus njan dúdoniꞌ, ‘Hulhgha natistꞌulh-i sba lhadinle, soo nadintneh! ꞋInkꞌez sba hukwꞌeꞌ inle, bulh naꞌtistꞌulh-i cha sba hukwꞌe ínkaih. ꞋInkꞌez naꞌistꞌal hukwꞌelhꞌaz de la naꞌontꞌalh.’ 9ꞋEt be ꞌulhna-un ndet la yutlꞌa honla-un ꞌet tsꞌiyantsuk lhaoodinla. ꞋEt duja-un ꞌet huwa eh musi yudutanelh? ꞋAwundooh nuszun. 10ꞋEt whuz unꞌa za nohni cha, huwalhꞌaꞌ-un, ꞌet tsꞌiyawh lhaoodahla de, ꞌet njan dudútihnelh, ‘ꞋAw whulukhun za huba tsꞌinzoo-un hoonli. Daja nehutni, ꞌoh te neꞌtsꞌutꞌen.’”
Dune buka whulhjutne, buba ꞌalha ꞌuhoontꞌoh-i, ꞌi be soo náꞌhuja
11ꞋEt ꞌuhooja Jesus Jerusalem tizya whe yun kꞌut Samaria ꞌinkꞌez Galilee whulheguz lhuseya. 12ꞋEt whuz uyalh whe keyoh whuyaz nenínya. ꞋEt whunizyane ndulcho whe buka whulhjut-i, ꞌi leprosy huyúlhni, ꞌí be hundudane, hidudizdil. ꞋInkꞌez highu nilhdzaꞌ nódilhya. 13ꞋEt whutsꞌun hitsꞌu huyih, “Jesus neMoodih, negha teꞌninzeh!”
14ꞋEt Jesus ꞌubunilhꞌen ꞌinkꞌez ꞌubulhni, “Lubret tsꞌohdulh. ꞋEn nohnoolhꞌen hoonliyaz tilah nohghu nahóꞌalh.” ꞋEt ꞌawhuz whuz hidulh whe soo naꞌhuja.
15ꞋEt ꞌilhoghun soo naꞌuja tꞌewhunanzin whe ꞌet nahundunizya ꞌinkꞌez yutsꞌu naoosja. ꞋEt tube cho Yakꞌusda dálhtiꞌ. 16ꞋEt Jesus yubut yun ꞌet nachániti, ꞌinkꞌez lhkꞌuz te musi yulhni. ꞋEn dune Samaria whutꞌen-un ꞌuntꞌoh.
17ꞋEt Jesus uyúlhni, “Whunizyane lakw eh soo naꞌhuja? Ndunne ꞌilho hoolohne ntsꞌe whe hándil? 18ꞋEt ndun ꞌudun keyoh tsꞌe hainya-un, ꞌen za whusanaja ꞌinkꞌez Yakꞌusda musi yulhni.” 19ꞋInkꞌez Jesus ꞌuyulhni, “Dudinyaih ꞌinkꞌez naindalh. Mba ꞌalha ꞌuhoontꞌoh-i, ꞌi be soo naꞌinja.”
Nkede ꞌuwhutanelh Yakꞌusda whulerwe unli-un whusaootiltsꞌulh
20ꞋEt whulohne Phariseene Jesus huyoodulhkut, “Nkede ꞌuwhutanelh Yakꞌusda whulerwe unli-un whusaootiltsꞌulh?” ꞋEt ꞌubulhni, “Yakꞌusda whulerwe unli-un, ꞌaw ntsꞌenꞌa whusaootiltsꞌulh-un, ꞌet ꞌaw whunoolhꞌen ꞌaitꞌoh. 21ꞋAw ꞌilhoghun hoontsꞌi dooniꞌ ꞌaitꞌoh, ‘Njan whunulhꞌen ꞌet ꞌuhoontꞌoh,’ kꞌus, ‘Nghut ꞌuhoontꞌoh.’ ꞋEt Yakꞌusda whulerwe unli-un ꞌudaꞌ nohbulh ꞌoohoontꞌoh wheꞌ hoontꞌoh.”
22ꞋInkꞌez ꞌet yugha hodulꞌehne ꞌubulhni, “ꞋEt ꞌoh dzin whusaóotikulh ꞌinkꞌez Yinka Dune Yeꞌ, ꞌilhoh dzin whutihꞌelh hukwaꞌ ntihzilh, ꞌet hoontsꞌi ꞌaw hoohꞌen ꞌaitꞌoh. 23ꞋEt ꞌonghohne dune ndunóhodoniꞌ, ‘ꞋOn ꞌun whunulhꞌen!’ kꞌus ‘Njan whunulhꞌen!’ Khun butsꞌu toohdilh junih ꞌinkꞌez bubun toohdilh junih! 24Ntsꞌenꞌa la ditni kwun oolhges te lheꞌwhulya whe dunukw, ꞌet whuz unꞌa Yinka Dune Yeꞌ, oodzin de ndulcho whe tsꞌiyanne ba be hoodutaltsilh. 25ꞋEt hoontsꞌi ꞌudechoo lhat-un whe dzoh nutizut hubaꞌ hoontꞌoh. ꞋInkꞌez ꞌandit whudizulhne dune hikalheꞌuntiszil.
26ꞋEt Noah oodzin whudizulh daꞌ, dahoontꞌoh inleꞌ la, ꞌet whuz unꞌa za Yinka Dune Yeꞌ oodzin ꞌet nduwhútatꞌelh. 27ꞋEt tsꞌiyanne ꞌuhaꞌalh zaꞌ hutꞌen, ꞌinkꞌez tahunutnai. Dunene cha ꞌinkꞌez tsꞌekoo cha lhgho dilhtsꞌi. ꞋOh daꞌ Noah tsꞌi cho be ínya ꞌinkꞌez ꞌet too dudiltꞌo ꞌinkꞌez tsꞌiyanne too hubanghan.
28ꞋInkꞌez Lot ꞌen khuna daꞌ whuz unꞌa ꞌet dúhooja. ꞋEt tsꞌiyanne ꞌuhaꞌalh ꞌinkꞌez tahunutnai. ꞋOohooket ꞌinkꞌez ꞌeꞌ hooket. ꞋAꞌhunule ꞌinkꞌez yoh ꞌuhuwhulhꞌen chaꞌ hutꞌen. 29ꞋEt dzin Lot keyoh Sodom huwhutni-un huwu whe naja whe kwun ꞌinkꞌez tse dizkꞌun-i ndus de yakꞌuz tsꞌe náilhtan, ꞌinkꞌez tsꞌiyawh gak hubulhtsi.
30ꞋInkꞌez ndet dzin ꞌuwhutanelh whe Yinka Dune Yeꞌ be hóodutaltsilh, ꞌet whuz unꞌa ndó tanelh. 31ꞋEt ꞌoh de dzin, mbe dune dubun kꞌut usyin whe ꞌaw yo nanaoojaꞌ ꞌinkꞌez duyoh tsꞌe ye ꞌuntꞌoh-i ꞌaw nayólhchoot ꞌaitꞌoh. ꞋEt whuz unꞌa za dune ha níyeh kꞌet ꞌutꞌen-un duyoh tsꞌe ꞌaw ye ꞌuntꞌoh-i ha natóojaꞌ ꞌaitꞌoh. Khun ꞌuwhutánelh ꞌet huwa. 32Lot ooꞌat ꞌen oonalhnih! 33Mbe la dichꞌoh whe khuna-un, ꞌet ꞌududoolyih hukwa ꞌutꞌen-un, ꞌen ye khuna-i ninta itáꞌalh. ꞋInkꞌez mbe la whe khuna-un ninta ooninꞌai de, ꞌen ꞌudutilyih whe ꞌuntꞌoh. 34ꞋEt nohdusni, ꞌet ꞌulhdzis nane dune ꞌilho lili kꞌuhuztez. ꞋIlhoghun itálchulh, ꞌinkꞌez ꞌilhoghun ꞌawet ndutítꞌelh. 35Nane tsꞌekoo hitiꞌulh-i hundunulhdus. ꞋIlhoghun itálchulh, ꞌinkꞌez ꞌilhoghun ꞌawet ndutítꞌelh.
36Nane, dune ha níyeh kꞌet ꞌuhutꞌen. ꞋIlhoghun itálchulh, ꞌinkꞌez ꞌilhoghun ꞌawet ndutítꞌelh.” 37ꞋInkꞌez, “NeMoodihti ntsꞌe ꞌudini?” ꞌet hukwaꞌ huyoodulhkut. ꞋInkꞌez ꞌubulhni, “Ndet la nezi ꞌusdla-un, ꞌet tsibalyan huweꞌ ꞌilhootádulh.”
© 2019, Wycliffe Bible Translators, Inc. All rights reserved.