ᓘᑲᓯᐅᑉ ᐊᒡᓚᖏᑦ 22
22
ᔩᓱᓯᐅᑉ ᑐᖁᑕᐅᓇᓱᐊᕈᒪᓂᖓ
ᒫᑎᐅᓯ 26:1-5; ᒫᑯᓯ 14:1-2; ᔪᐊᓇᓯ 11:45-53
1 #
ᒨᓯᓯ ᐂᑉᐸᖏᑦ 12:1-27. ᓇᓪᓕᐅᓐᓂᕐᓯᐅᕐᕕᒃ ᐳᕙᓪᓚᖅᑯᑎᖃᖏᑦᑐᒥᒃ ᓂᐊᖂᔭᕐᑐᕐᕕᒃ ᖃᒡᓕᓕᕐᑎᓪᓗᒍ, ᖄᖏᕐᑕᐅᕕᖕᒥᒃ ᑍᔭᐅᔪᖅ. 2ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᐃᓱᒪᒃᓴᕐᓯᐅᓕᕐᐳᑦ ᖃᓄᖅ ᔩᓱᓯ ᑐᖁᑕᐅᔪᓐᓇᕐᓯᔪᓐᓇᕐᒪᖔᑦ; ᐃᓄᖕᓂᒃ ᓯᕘᕋᒐᒥᒃ.
ᔫᑕᓯᐅᑉ ᐊᖏᕈᑎᖃᕐᓂᖓ ᔩᓱᓯᒥ ᐱᔭᐅᑎᑦᓯᔪᒪᓪᓗᓂ
ᒫᑎᐅᓯ 26:14-16; ᒫᑯᓯ 14:10-11
3ᓵᑖᓇᓯ ᐃᑎᓚᐅᕐᐳᖅ ᔫᑕᓯᒧᑦ ᐃᔅᑲᕆᐊᑎᒥᒃ ᑍᔭᐅᔪᒧᑦ, ᑖᑦᓱᒧᖓ ᐃᓕᓐᓂᐊᕐᑎᓄᑦ 12ᓄᑦ ᐃᓚᒋᔭᐅᔪᒧᑦ; 4ᔫᑕᓯ ᐅᖃᖃᑎᖃᕆᐊᕐᑐᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓂᒃ, ᑐᒃᓯᐊᕐᕕᒡᔪᐊᕐᒥᓗ ᖃᐅᔨᓴᕐᑏᑦ ᐊᖓᔪᖅᑳᖏᓐᓂᒃ, ᖃᓄᖅ ᔩᓱᓯᒥᒃ ᐱᔭᐅᑎᑦᓯᔪᓐᓇᕐᒪᖔᕐᒥ ᑖᒃᑯᓄᖓ. 5ᑖᒃᑯᐊ ᐅᖃᖃᑎᒋᔭᖏᑦ ᖁᕕᐊᓱᓕᕐᐳᑦ, ᐊᑭᓕᕈᒪᓕᕐᐹᓪᓗ ᑮᓇᐅᔭᓂᒃ. 6ᔫᑕᓯ ᑕᒪᑐᒥᖓ ᐊᖏᕐᐳᖅ, ᕿᓂᓕᕐᓗᓂ ᖃᓄᖅ ᐱᕕᒃᓴᖃᕈᓐᓇᕐᒪᖔᕐᒥ ᔩᓱᓯ ᑎᒍᔭᐅᑎᑦᓱᒪᓪᓗᒍ ᑖᒃᑯᓄᖓ ᐃᓄᖕᓄᑦ ᖃᐅᔨᔭᐅᖏᓪᓗᑎᒃ.
ᔩᓱᓯᐅᑉ ᐅᐸᓗᖕᒊᔭᕐᓂᖓ ᖄᖏᕐᑕᐅᕕᒃᓯᐅᑎᒥᒃ ᓂᕆᖃᑎᒌᖕᓂᕐᒥᒃ
ᒫᑎᐅᓯ 26:17-25; ᒫᑯᓯ 14:12-21; ᔪᐊᓇᓯ 13:21-30
7ᐅᓪᓗᖅ ᓇᓪᓕᐅᑎᖕᒪᑦ ᐳᕙᓪᓚᖅᑯᑎᖃᖏᑦᑐᓂᒃ ᓂᐊᖂᔭᕐᑐᕐᕕᒃ, ᓰᐱᐅᓗ ᓄᕐᕋᖓᓂᒃ ᑐᖁᑦᓯᓗᓂ ᑐᓂᕐᕈᓯᕐᕕᐅᓲᖅ. 8ᔩᓱᓯᐅᑉ ᐲᑦᑐᕉᓯᒃᑯᒃ ᔪᐊᓇᓯᒃᑯᒃ ᑎᓕᕚᒃ, ᐅᖃᐅᑎᓪᓗᒋᒃ, “ᐂᓕᕆᑦᓯᒃ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᑎᒃᓴᕗᑦ ᐊᑐᐃᓐᓇᕈᕆᐊᕐᑐᕐᓗᒍ, ᓂᕆᖃᑎᒌᖁᓪᓗᑕ.”
9ᑖᒃᑯᐊᒃ ᐊᐱᕆᕘᒃ, “ᓇᓂ ᐋᖅᑭᒃᓱᐃᔭᕐᑐᖁᔨᕕᑦ?”
10ᔩᓱᓯᐅᑉ ᐅᖃᐅᑎᕚᒃ, “ᐃᒡᓗᒐᓴᒡᔪᐊᓄᑦ ᑎᑭᒃᑯᑦᓯᒃ, ᐊᖑᑦ ᐃᒪᖃᐅᑎᒥᒃ ᐊᒡᔭᕐᓯᔪᖅ ᐹᕐᓂᐊᕐᐸᓯᒃ; ᑖᓐᓇ ᒪᓕᒃᓯᒃᑯᒃ ᐃᒡᓗᒧᑦ ᐃᑎᕐᕕᒋᔭᖓᓄᑦ, 11ᐃᒡᓘᑉ ᐃᓄᐊᓄᑦ ᐅᖃᓂᐊᕐᐳᓯᒃ, ‘ᐊᔪᕆᕐᑐᐃᔨᐅᑉ ᐅᖃᐅᑦᔭᐅᖁᖕᒪᑎᑦ, ᓇᐅᒃᑍᒪ ᐃᓂᒃᓴᖅ ᐃᓕᓐᓂᐊᕐᑎᒃᑲᓗ ᓂᕆᕕᒋᓂᐊᕐᑕᕗᑦ ᖄᖏᕐᑕᐅᕕᒃᓯᐅᑎᒥᒃ?’ 12ᑖᑦᓱᒪ ᑕᑯᑎᓐᓂᐊᕐᐹᓯᒃ ᐃᒡᓗᕈᓯᕐᒥᒃ ᐊᖏᔪᒥᒃ ᐊᑐᐃᓐᓇᕐᒥᒃ ᐃᒡᓘᑉ ᖁᓛᓃᑦᑐᒥᒃ; ᑕᕝᕙᓂ ᐋᖅᑭᒃᓱᐃᓂᐊᕐᐳᓯᒃ ᓂᕆᕕᒋᓂᐊᕐᑕᑦᑎᓐᓂᒃ.”
13ᑖᒃᑯᐊᒃ ᑎᓕᔭᐅᔫᒃ ᑍᑯᓐᖓᕐᐴᒃ, ᑍᒫᓪᓗᐊᖅ ᑕᒤᓐᓂᒃ ᔩᓱᓯᐅᑉ ᐅᖃᐅᓯᕆᔭᖏᓐᓂᒃ ᐱᓇᓱᐊᕐᐳᒃ; ᑕᕝᕙᓂ ᓂᕆᓂᐊᕐᑕᑎᒃ ᖄᖏᕐᑕᐅᕕᒃᓯᐅᕈᑎᒃᓴᖅ ᐋᖅᑭᒃᓱᕐᐹᒃ.
ᐊᑕᓂᐅᑉ ᐅᓐᓄᒍᒻᒥᑕᕐᓂᖓ
ᒫᑎᐅᓯ 26:26-30; ᒫᑯᓯ 14:22-26; 1 ᑯᕆᓐᑎ 11:23-25
14ᐃᑲᕐᕋᖅ ᓇᓪᓕᐅᑎᖕᒪᑦ, ᔩᓱᓯᐅᑉ ᐃᓂᒋᓂᐊᕐᑕᓂ ᐅᐸᒃᐹ, ᐋᐴᓯᑕᓖᑦ ᐃᓚᒋᓪᓗᒋᑦ. 15ᐅᖃᐅᑎᓪᓗᒋᑦ, “ᐆᒥᖓ ᕿᓚᓈᒻᒪᕆᒃᓗᖓ ᖄᖏᕐᑕᐅᕕᒃᓯᐅᑎᒥᒃ ᓂᕆᖃᑎᒋᔪᒪᓚᐅᕐᐸᑦᓯ ᐋᓐᓂᐊᑎᑕᐅᖏᓐᓂᓐᓂ; 16ᐅᖃᐅᑎᕙᑦᓯ ᓂᕆᒃᑲᓐᓂᕐᓂᐊᕈᓐᓃᕋᒪ ᑍᒤᑦᑐᒥᒃ ᒎᑎᐅᑉ ᐊᑕᓂᐅᕕᖓᓂ ᓇᓪᓕᐅᑎᔭᕆᐊᓖᑦ ᐱᔭᕇᓚᐅᖏᓐᓂᖏᓐᓂ.”
17ᔩᓱᓯᐅᑉ ᐃᒥᐅᑎ ᑎᒍᕚ, ᖁᔭᓕᔭᕇᕋᒥ ᐅᖃᕐᐳᖅ, “ᑖᓐᓇ ᑎᒍᓗᒍ ᐊᑐᓂᑦ ᓂᐅᕐᓯᕕᒋᓯᐅᒃ; 18ᐅᖃᐅᑎᕙᑦᓯ ᒫᓐᓇᒥᑦ ᐱᒋᐊᕐᓗᒍ ᐅᐂᓂᒥᒃ ᐃᒥᕐᓂᐊᕈᓐᓃᕋᒪ ᒎᑎᐅᑉ ᐊᑕᓂᐅᕕᖓ ᑎᑭᖅᑳᕐᑎᓐᓇᒍ.”
19ᓂᐊᖂᔭᖅ ᑎᒍᒐᒥᐅᒃ, ᖁᔭᓕᔭᕇᕋᒥ ᐊᕕᒃᐹ ᑖᒃᑯᓄᖓ ᑐᓂᓪᓗᒍ, ᐅᖃᕐᐳᖅ, “ᐅᓇ ᑕᕝᕙ ᑎᒥᒐ ᑐᓂᔭᐅᔪᖅ ᐃᓕᑦᓯᓐᓄᑦ. ᑍᒤᓕᐅᖃᑦᑕᕆᑦᓯ ᐃᖅᑲᐅᒪᑦᔪᑎᒋᓗᒍ ᐅᕙᓐᓂᒃ.” 20#ᔨᕆᒤᐊ 31:31-34.ᑍᒫᒃᑕᐅᖅ ᐃᒥᐅᑎ ᑎᒍᕚ ᓂᕆᔭᕇᕋᒥ, ᐅᖃᕐᓗᓂ, “ᐅᓇ ᐃᒥᐅᑎ ᑯᕕᔭᐅᔪᖅ ᐃᓕᑦᓯ ᐱᓪᓗᓯ ᐊᖏᖃᑎᒌᒍᑎ ᓄᑖᖅ ᐊᐅᓐᓂᒃ ᓇᓗᓁᒃᑯᑕᓕᒃ.
21 #
ᐃᓐᖏᕈᑦ 41:9. “ᑕᑯᒋᑦᓯ ᐅᕙᓐᓂᒃ ᐱᔭᐅᑎᑦᓯᔪᖅ ᐅᕙᓃᑉᐳᖅ ᓂᕆᖃᑎᒋᔭᕋ ᓂᕐᕆᕕᖕᒥ. 22ᐃᓅᑉ ᐃᕐᓂᖓ ᑐᖁᑕᐅᓂᐊᕐᐳᖅ ᑍᒫᒃ ᐋᖅᑭᒃᑕᐅᓯᒪᖕᒪᑦ; ᑲᑉᐱᐊᓐᓇᒦᒡᓕ ᐊᖑᑦ ᑖᓐᓇ ᐱᔭᐅᑎᑦᓯᔪᖅ ᑖᑦᓱᒥᖓ!”
23ᑖᒃᑯᐊ ᐃᒻᒥᖕᓄᑦ ᐊᐱᕐᓱᖃᑦᑕᐅᑎᓕᕐᐳᑦ, ᓇᓪᓕᐊᑦ ᑍᒫᒃ ᐱᔭᐅᑎᑦᓯᓂᐊᕐᒪᖔᑦ.
ᐊᖏᓂᕐᓴᐅᔪᒪᓂᕐᒧᑦ ᐂᕙᐅᑎᓂᖅ
24 #
ᒫᑎᐅᓯ 18:1; ᒫᑯᓯ 9:34; ᓘᑲᓯ 9:46. ᐃᓕᓐᓂᐊᕐᑎᓪᓕ ᐃᒻᒥᖕᓄᑦ ᐂᕙᖃᑎᒌᓕᕐᐳᑦ, ᓇᓪᓕᐊᑦ ᐊᖏᓂᕐᓴᒥᒃ ᐃᓱᒪᒋᔭᐅᔪᒃᓴᐅᖕᒪᖔᑦ. 25ᔩᓱᓯᐅᑉ ᐅᖃᐅᑎᕔᑦ, “ᔫᑎᐅᖏᑦᑐᑦ ᐊᖓᔪᖅᑳᕐᔪᐊᖏᑦ ᐱᔪᓐᓇᕐᓂᖃᕐᒪᑕ ᐃᓄᖁᑎᒥᖕᓄᑦ; ᐊᐅᓚᑦᓯᔩᓪᓗ ᑍᔭᐅᔪᒪᕙᒃᐳᑦ ᐃᓄᖕᓄᑦ ᓯᕗᓕᕐᑎᑦᓂᒃ. 26#ᒫᑎᐅᓯ 23:11; ᒫᑯᓯ 9:35.#ᒫᑎᐅᓯ 20:25-27; ᒫᑯᓯ 10:42-44.ᐃᓕᑦᓯᓕ ᑍᒤᑦᑕᕆᐊᖃᓐᖏᓚᓯ; ᓇᓕᕐᓯᓕ ᐊᖏᓂᕐᐹᖑᔪᖅ ᐃᓕᑦᓯᓐᓂᑦ ᐃᓅᓱᖕᓂᕐᐹᑎᑐᑦ ᑍᒤᑦᑕᕆᐊᖃᕐᐳᖅ, ᓯᕗᓕᕐᑎᐅᔪᕐᓗ ᐱᔨᒋᔭᐅᔪᑐᑦ ᑍᒤᑦᑕᕆᐊᖃᕐᐳᖅ. 27#ᔪᐊᓇᓯ 13:12-15.ᓇᓪᓕᐊᒃ ᐊᖏᓂᕐᓴᐅᕚ, ᓂᕆᕕᖕᒥ ᐃᒃᓯᕙᔪᖅ ᐅᕝᕙᓗ ᓂᕆᓂᐊᕐᑕᖏᓐᓂᒃ ᕾᑦᓯᔪᖅ? ᐃᓛᒃ ᑖᓐᓇᐅᕗᖅ ᐃᒃᓯᕚᕐᑐᖅ ᓂᕆᓂᐊᕐᓗᓂ ᑖᓐᓇ ᐊᖏᓂᕐᓴᐅᕗᖅ; ᐅᕙᖓᓕ ᐃᓕᑦᓯᓐᓂᒃ ᓂᕆᑎᑦᓯᔪᖅ ᐊᑦᔨᒋᕙᕋ.
28“ᐃᓕᑦᓯ ᐃᓚᒌᓐᓇᓚᐅᕐᐸᑦᓯᓐᖓ ᐅᖁᒤᑦᑐᒃᑰᕐᑎᓪᓗᖓ; 29ᐊᑖᑕᒪ ᑐᓂᓯᕕᒋᓚᐅᕐᒪᖓ ᐊᐅᓚᑦᓯᔪᓐᓇᕐᓂᕐᒥᒃ, ᑍᒫᒃᑕᐅᖅ ᑐᓂᓯᕕᒋᔪᒪᕙᑦᓯ ᐊᐅᓪᓚᑦᓯᔪᓐᓇᕐᓂᕐᒥᒃ ᐊᑕᓂᐅᕕᖕᒥ, 30#ᒫᑎᐅᓯ 19:28.ᓂᕆᖃᑎᒋᔪᒫᕋᑦᓯ ᐃᒥᖃᑎᒋᓗᓯᓗ ᐊᑕᓂᐅᕕᖕᒪ ᓂᕆᕕᐊᓂ, ᐃᒃᓯᕙᔪᒫᕐᐳᓯᓗ ᐃᒃᓯᕙᐅᑕᕐᔪᐊᓂ ᐊᖓᔪᖅᑳᖑᓗᓯ ᐃᓴᕆᐊᓕᒥᐅᑉ ᑭᖑᕚᖏᓐᓄᑦ 12ᓄᑦ.”
ᔩᓱᓯᐅᑉ ᐱᔪᖃᕐᓂᐊᕐᑐᒥᒃ ᐅᖃᐅᑦᔨᓂᖓ ᐲᑦᑐᕉᓯᒥᒃ
ᒫᑎᐅᓯ 26:31-35; ᒫᑯᓯ 14:27-31; ᔪᐊᓇᓯ 13:36-38
31“ᓮᒨᓃ, ᓮᒨᓃ, ᓈᓚᒋᑦ! ᓵᑖᓇᓯ ᐱᔪᒪᒐᓗᐊᕐᐳᖅ ᐊᑕᖏᕐᓗᓯ ᓴᓃᔭᕈᒪᓪᓗᓯ ᐱᕈᕐᓰᕕᓕᕆᔨᐅᑉ ᓂᐊᖂᔭᒃᓴᓂᒃ ᓴᓃᔧᓂᖓᑐᑦ, 32ᑐᒃᓯᐊᓚᐅᕐᐳᖓᓕ ᐅᒃᐱᕐᓃᑦ ᓵᓚᐅᖁᓇᒍ; ᐅᑎᕈᕕᑦ ᐅᕙᓐᓄᑦ, ᐃᓅᖃᑎᕕᑦ ᐅᒃᐱᕐᓂᕐᖏᑦ ᒪᑭᑎᒃᑲᓐᓂᕆᐊᖃᓛᕐᐸᑎᑦ.”
33ᐲᑦᑐᕉᓯᐅᑉ ᑭᐅᕚ, “ᐊᑕᓃᖅ, ᐅᐸᓗᖕᒊᕐᓯᒪᕗᖓ ᑎᒍᔭᐅᖃᑎᒋᔪᒪᓪᓗᑎᑦ ᑐᖁᖃᑎᒋᔪᒪᓪᓗᑎᓪᓗ.”
34ᔩᓱᓯᐅᑉ ᐅᖃᐅᑎᕚ, “ᐲᑦᑐᕉᓰ ᐅᖃᐅᑎᕙᒋᑦ, ᐊᖑᑎᕕᐊᖅ ᐅᓐᓄᒃ ᓂᓪᓕᕐᓂᐊᕐᐳᖅ ᐱᖓᓱᐃᕐᓱᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᓯᒪᓕᕐᑎᓪᓗᑎᑦ.”
ᑮᓇᐅᔭᒃᑯᕕᒃ, ᐃᒃᐱᐊᕐᔪᒃ, ᓴᕕᒡᔪᐊᕐᓗ
35 #
ᒫᑎᐅᓯ 10:9,10; ᒫᑯᓯ 6:8,9; ᓘᑲᓯ 9:3; 10:4. ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᑍᑦᓱᒪᓂ ᑎᓕᓚᐅᕋᑦᓯ ᑮᓇᐅᔭᒃᑯᕕᓕᔭᖁᓇᓯ ᐃᒃᐱᐊᕐᔪᓕᔭᖁᓇᓯᓗ ᐃᑎᒐᒍᑎᓕᔭᕋᓯᓘᓐᓃᑦ, ᓱᓇᑐᐃᓐᓇᕐᒥᒃ ᑭᓐᖒᒪᔭᖃᓚᐅᕐᐱᓰ?”
ᑖᒃᑯᐊ ᑭᐅᕚᑦ, “ᓱᓇᒥᒡᓘᓐᓃᑦ ᑭᓐᖒᒪᔭᖃᓚᐅᓐᖏᓚᒍᑦ.”
36ᔩᓱᓯᐅᑉ ᐅᖃᐅᑎᕔᑦ, “ᒫᓐᓇᓕ, ᓇᓕᕐᓯ ᑮᓇᐅᔭᒃᑯᕕᖃᕈᓂ ᐃᒃᐱᐊᕐᔪᖃᕈᓂᓘᓐᓃᑦ ᓇᒃᓴᕆᐊᖃᓕᕐᐳᖅ. ᓇᓕᕐᓯ ᓴᕕᒡᔪᐊᖃᖏᒃᑯᓂ ᐅᓕᒡᔪᐊᓂ ᓂᐅᕐᕈᑎᒋᔭᒃᓴᕆᕚ ᓴᕕᒡᔪᐊᕐᑖᕈᑎᒋᓗᒍ. 37#ᐂᓮᐊᓯ 53:12.ᑕᒪᒃᑯᓂᖓ ᐅᖃᐅᑎᕙᑦᓯ; ᐊᒡᓔᑦ ᓈᓚᐅᑦᓯᖁᓪᓗᒋᑦ ᐅᕙᓐᓂᒃ ᐅᖃᐅᓯᖃᕐᓯᒪᔪᑦ, ‘ᐱᐅᖏᑦᑐᓕᔪᕐᔪᐊᓄᑦ ᐃᓚᓕᐅᑦᔭᐅᕗᖅ,’ ᑖᒃᑯᐊ ᐅᕙᓐᓂᒃ ᐅᖃᐅᓯᖃᕐᓯᒪᔪᑦ ᓇᓚᐅᑦᓯᓂᐊᕐᒪᑕ.”
38ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᐊᑕᓃᖅ ᑕᑯᒋᑦ, ᐅᕝᕙ ᓴᕕᒡᔪᐊᒃ ᒪᕐᕉᒃ.”
ᑭᐅᕔᑦ, “ᑖᒃᑯᐊᒃ ᓈᒻᒪᒃᐴᒃ.”
ᔩᓱᓯᐅᑉ ᑐᒃᓯᐊᕐᓂᖓ ᖃᖅᑲᒥ ᓇᐹᕐᑐᓕᖕᒥ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᓂᒃ
ᒫᑎᐅᓯ 26:36-46; ᒫᑯᓯ 14:32-42
39ᔩᓱᓯ ᐊᓂᒐᒥ, ᐂᓕᕐᐳᖅ ᐱᐅᓯᕆᕙᒃᑕᒥᑐᑦ, ᖃᖅᑲᒧᑦ ᓇᐹᕐᑐᓕᖕᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᖓᖃᓲᒧᑦ; ᐃᓕᓐᓂᐊᕐᑎᖏᑕ ᒪᓕᒃᐹᑦ. 40ᐅᐸᒃᑕᒥᓄᑦ ᑎᑭᓐᓇᒥ ᐅᖃᐅᑎᕔᑦ, “ᑐᒃᓯᐊᕆᑦᓯ ᐱᐅᓐᖏᑐᒥᒃ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ.”
41ᕿᒪᒃᐰᑦ ᒥᓘᑎᒧᑦ ᑎᑭᑕᒃᓴᐅᔪᒧᑦ, ᓰᖅᑯᕐᓗᓂ ᑐᒃᓯᐊᕐᐳᖅ, 42ᐅᖃᕐᓗᓂ, “ᐊᑖᑖᒃ, ᐱᔪᒪᒍᕕᑦ, ᐃᒥᐅᑦ ᐅᓇ ᐲᕐᑎᓚᐅᕈᒃ ᐅᕙᓐᓂᑦ; ᐱᔪᒪᔭᕋᐅᖏᑦᑐᕐᓕ, ᐱᔪᒪᔧᓪᓕ ᐱᓕ.” 43ᐂᖏᓕᒧᑦ ᕿᓚᖕᒥᑦ ᐅᐸᒃᑕᐅᕗᖅ ᓲᖑᓯᑎᑕᐅᓪᓗᓂᓗ. 44ᐅᖁᒤᒃᓴᓗᐊᓕᕋᒥ ᐊᒃᓱᕈᕐᓂᕐᓴᐅᓪᓗᓂ ᑐᒃᓯᐊᓕᕐᐳᖅ, ᐊᐅᒃᑲᕐᓂᖓᓕᕐᓗᓂ ᐊᐅᒃᑎᑐᑦ ᑯᑐᒃᑐᓂᒃ ᓄᓇᒧᑦ.
45ᑐᒃᓯᐊᕐᓂᕐᒥᓂᑦ ᒪᑭᓐᓇᒥ, ᐃᓕᓐᓂᐊᕐᑎᒥᓄᑦ ᐅᑎᕐᐳᖅ ᓯᓂᒃᑐᑦ ᐅᐸᒃᐰᑦ ᕿᒃᓵᓗᐊᕐᓂᕐᒧᑦ ᓯᓂᒍᒪᑐᐃᓐᓇᓕᕐᑐᑦ. 46ᐅᖃᐅᑎᓪᓗᒋᑦ, “ᓱᖕᒪᑦ ᓯᓂᒃᐱᓰ? ᒪᑭᒋᑦᓯ ᑐᒃᓯᐊᕐᓗᓯ ᐱᐅᓐᖏᑐᒧᑦ ᐱᔪᒥᓵᕐᑕᐅᓂᕐᒧᑦ ᑎᑭᖁᓇᓯ.”
ᔩᓱᓯᐅᑉ ᑎᒍᔭᐅᓂᖓ
ᒫᑎᐅᓯ 26:47-56; ᒫᑯᓯ 14:43-50; ᔪᐊᓇᓯ 18:3-11
47ᔩᓱᓯᓕ ᓱᓕ ᐅᖃᓪᓚᒃᑎᓪᓗᒍ, ᐃᓄᒋᐊᒃᑐᑦ ᑎᑭᑉᐳᑦ, ᔫᑕᓯᐅᑉ ᐃᓕᓐᓂᐊᕐᑏᑦ 12 ᐃᓚᖓᑦᑕ ᑕᕝᕗᓐᖓᐅᑎᔭᖏᑦ. ᔩᓱᓯ ᐅᐸᒃᑲᒥᐅᒃ ᑯᓂᒃᐹ; 48ᔩᓱᓯᐅᑉ ᐅᖃᐅᑎᕚ, “ᔫᑕᓰ, ᐃᓅᑉ ᐃᕐᓂᖓ ᑯᓂᒃᓗᒍ ᐱᔭᐅᒃᑲᕐᐱᐅᒃ?”
49ᐃᓕᓐᓂᐊᕐᑎᖏᑦ ᖃᐅᔨᒐᒥᒃ ᖃᓄᐃᓕᐅᕐᑐᖃᓕᕐᒪᖔᑦ, ᔩᓱᓯ ᐊᐱᕆᕚᑦ, “ᐊᑕᓃᖅ, ᓴᕕᒡᔪᐊᒥᒃ ᐊᑐᑐᐃᓐᓇᕆᐊᖃᓕᕐᐱᑖ?” 50ᐃᓚᖓᑦᑕᓕ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᑲᑖᖓ ᓴᕕᒡᔪᐊᒥᓄᑦ ᓯᐅᑎᖓᑕ ᑕᓕᕐᐱᐊ ᓇᑲᑉᐹ.
51ᔩᓱᓯ ᐅᖃᕐᐳᖅ, “ᑍᒤᓕᐅᕈᓐᓃᕆᑦᓯ!” ᐊᖑᑎᐅᑉ ᓯᐅᑎᖓ ᐊᒃᑐᕐᓗᒍ ᐋᖅᑭᒃᐹ.
52ᔩᓱᓯ ᐅᖃᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᑐᒃᓯᐊᕐᕕᒡᔪᐊᓪᓗ ᐊᖓᔪᖅᑳᖏᓐᓄᑦ ᐃᓄᐃᓪᓗ ᐊᖓᔪᖅᑲᖏᓐᓄᑦ, ᑕᕝᕗᓐᖓᕐᓯᒪᔪᑦ ᑎᒍᓯᔭᕐᑐᕐᓗᑎᒃ ᑖᑦᓱᒥᖓ, “ᕾᕕᓰ ᓴᕕᒡᔪᐊᓕᔭᕐᓗᓯ ᐊᓇᐅᑕᓕᔭᕐᓗᓯᓗ ᐱᕋᔭᒃᓯᒪᔪᒥᒃ ᑎᒍᓯᔭᕐᑐᕐᑐᑎᑐᑦ? 53#ᓘᑲᓯ 19:47; 21:37.ᖃᐅᑕᒫᑦ ᐃᓚᒋᖃᑦᑕᓚᐅᕐᐸᑦᓯ ᑐᒃᓯᐊᕐᕕᒡᔪᐊᕐᒥ, ᑎᒍᓚᐅᓐᖏᓚᑦᓯᓐᖓ. ᒫᓐᓇᓕ ᐃᑲᕐᕋᓯ ᓇᓪᓕᐅᑎᕗᖅ, ᑖᕐᑑᓪᓗ ᐱᔪᓐᓇᕐᓂᖓ ᐊᐅᓚᑦᓯᓕᕐᐳᖅ.”
ᐲᑦᑐᕉᓯᐅᑉ ᖃᐅᔨᒪᖏᓐᓂᕋᕐᓂᖓ ᔩᓱᓯᒥᒃ
ᒫᑎᐅᓯ 26:57-58,69-75; ᒫᑯᓯ 14:53-54,66-72; ᔪᐊᓇᓯ 18:12-18,25-27
54ᑕᕝᕙ ᔩᓱᓯ ᑎᒍᕚᑦ ᐊᐅᓪᓚᕈᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᓅᕈᑎᕚᑦ; ᐲᑦᑐᕉᓯ ᐅᖓᓯᒋᔮᓂ ᒪᓕᒃᐳᖅ; 55ᐃᑯᐊᓚᑎᑦᓯᔪᖃᕐᐳᖅ ᐃᒡᓘᑉ ᓯᓚᑖᓂ ᐃᒃᓯᕙᓪᓗᑎᒃ ᐊᕙᑖᓂ, ᐲᑦᑐᕉᓯᐅᓪᓗ ᐃᒃᓯᕙᖃᑎᒋᕔᑦ. 56ᐊᕐᓇᐅᑉ ᐱᔨᐅᑉ, ᑕᑯᒐᒥᐅᒃ ᐃᑯᒪᒧᑦ ᖃᐅᒻᒥᑕᐅᓯᒪᔪᖅ, ᑕᑯᓐᓈᕐᓗᓂᐅᒃ ᐅᖃᕐᐳᖅ, “ᐆᒪ ᐊᖑᑎᐅᑉ ᔩᓱᓯ ᐃᓚᒋᕚ.”
57ᐲᑦᑐᕉᓯ ᖃᐅᔨᒪᖏᓐᓂᕋᕐᓗᓂ ᐅᖃᕐᐳᖅ, “ᐊᕐᓈᖅ, ᖃᐅᔨᒪᓐᖏᓚᕋ.” 58ᐊᑯᓂᐅᓗᐊᕐᑎᓐᓇᒍ ᐊᓯᐊᑕ ᑕᑯᒋᕚ ᐅᖃᕐᓗᓂ, “ᐃᕝᕕᑦᑕᐅᖅ ᑍᒃᑯᐊ ᐃᓚᒋᕚᑎᑦ.”
ᐲᑦᑐᕉᓯ ᐅᖃᕐᐳᖅ, “ᑍᒃᑯᓄᖓ ᐃᓚᒋᔭᐅᓐᖏᓚᖓ.”
59ᐃᑲᕐᕋᖅ ᐊᓂᒍᕐᓯᒪᓕᕐᑎᓪᓗᒍ ᓱᓕ ᐊᓯᐊ ᐅᖃᓕᕆᕗᖅ, “ᐆᒪ ᐃᓛᒃ ᖁᓚᕐᓇᖏᑦᑐᒥᒃ ᔩᓱᓯ ᐃᓚᒋᕚ; ᒐᓕᓕᐊᒥᐅᖑᖕᒪᑦ.”
60ᐲᑦᑐᕉᓯ ᐅᖃᕐᐳᖅ, “ᐅᖃᐅᓯᕆᔭᑎᓪᓘᓐᓃᑦ ᖃᐅᔨᒪᓐᖏᓚᒃᑲ” ᓱᓕᓕ ᐅᖃᓪᓚᒃᑎᓪᓗᒍ, ᑕᕝᕔᓐᓇᖅ ᐊᖑᑎᕕᐊᖅ ᓂᓪᓕᕐᐳᖅ. 61ᐊᑕᓂᐅᓪᓗ ᕿᕕᐊᕐᓗᓂᐅᒃ ᐲᑦᑐᕉᓯ ᑕᑯᓴᕐᐹ. ᐲᑦᑐᕉᓯ ᐃᖅᑬᓕᕐᐳᖅ ᐊᑕᓂᐅᑉ ᐅᖃᐅᓯᖏᓐᓂᒃ, ᐅᖃᐅᑎᖅᑲᐅᖕᒪᒍ, “ᐊᖑᑎᕕᐊᖅ ᓂᓪᓕᖅᑳᕐᑎᓐᓇᒍ, ᐅᓪᓗᒥ ᐱᖓᓱᐃᕐᓱᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᓂᐊᕐᐳᑎᑦ.” 62ᐲᑦᑐᕉᓯ ᐊᓂᕗᖅ ᐊᒃᓱᐊᓗᒃ ᕿᐊᓪᓗᓂ.
ᔩᓱᓯᐅᑉ ᒥᑕᐅᑎᒋᔭᐅᓂᖓ ᐋᓐᓂᕐᓯᕐᑕᐅᓂᖓᓗ
ᒫᑎᐅᓯ 26:67-68; ᒫᑯᓯ 14:65
63ᔩᓱᓯᒥᒃ ᑎᒍᓯᓯᒪᔪᑦ ᑖᑦᓱᒥᖓ ᒥᑕᐅᑎᖃᕐᐳᑦ ᐊᓇᐅᓕᕐᓗᒍᓗ. 64ᐃᔨᖏᒃ ᒪᑐᐊᕐᓗᒋᒃ ᐊᐱᕆᖃᑦᑕᓕᕐᐹᑦ, “ᓇᓚᐅᑦᑍᓚᐅᕆᑦ! ᑭᐊ ᑎᒡᓗᒃᐹᑏᑦ?” 65ᐊᓯᖏᓐᓂᒡᓗ ᐊᒥᓱᓂᒃ ᐅᖃᐅᓯᖃᕐᐳᑦ ᐅᖃᕐᓂᕐᓗᒡᓗᑎᒃ ᐊᑭᕋᕐᑐᕐᓗᒍ.
ᔩᓱᓯᐅᑉ ᐃᖅᑲᕐᑐᐃᔨᕐᔪᐊᓃᑎᑕᐅᓂᖓ
ᒫᑎᐅᓯ 26:59-66; ᒫᑯᓯ 14:55-64; ᔪᐊᓇᓯ 18:19-24
66ᐅᓪᓛᓐᖑᕐᑎᓪᓗᒍ ᖃᐅᒪᓕᕐᒪᑦ, ᑐᒃᓯᐊᕐᕕᒡᔪᐊᑉ ᐊᖓᔪᖅᑳᖏᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ ᑲᑎᕗᑦ; ᔩᓱᓯ ᑲᑎᒪᔪᑦ ᓵᖓᓐᓄᐊᕐᑎᑉᐹᑦ, ᐅᖃᕐᓗᑎᒃ, 67“᙭ᔅᑑᓯᐅᖕᒪᖔᕐᐱᑦ ᐅᖃᐅᑎᓚᐅᕐᑎᒍᑦ.”
ᔩᓱᓯᐅᑉ ᐅᖃᐅᑎᕔᑦ, “ᐅᖃᐅᑎᒍᑦᓯ ᐅᒃᐱᕆᓂᐊᓐᖏᓚᑦᓯᓐᖓ; 68ᐊᐱᕆᒍᑦᓯᓘᓐᓃᑦ ᑭᐅᔪᓐᓇᕐᓂᐊᓐᖏᓚᓯ. 69ᒫᓐᓇᒥᑦ ᐱᒋᐊᕐᓗᒍ ᐃᓅᑉ ᐃᕐᓂᖓ ᐃᒃᓯᕙᔪᒫᓕᕐᐳᖅ ᒎᑎᐅᑉ ᐊᔪᒐᖃᖏᑦᑑᑉ ᑕᓕᕐᐱᐊᓂ.”
70ᑖᒃᑯᐊᓕᒫᑦ ᐊᐱᕆᕚᑦ, “ᑕᕝᕚ ᒎᑎᐅᑉ ᐃᕐᓂᕆᕚᑏᑦ?”
ᔩᓱᓯᐅᑉ ᑭᐅᕔᑦ, “ᑕᕝᕙ ᐅᖃᕇᕋᑦᓯ ᑖᓐᓇᐅᕗᖓ.”
71ᑖᒃᑯᐊ ᐅᖃᕐᐳᑦ, “ᐊᓯᐊᓂᒃ ᖃᐅᔨᓯᒪᔪᒃᓴᒥᒃ ᕿᓂᕆᐊᖃᕈᓐᓃᕐᐳᒍᑦ, ᓇᖕᒥᓂᖅ ᐅᖃᕐᑎᓪᓗᒍ ᑐᓴᕋᑦᑕ.”
Eastern Arctic Inuktitut Bible © Canadian Bible Society, 2012, 2021-2023.