ᓘᑲᓯᐅᑉ ᐊᒡᓚᖏᑦ 20
20
ᔩᓱᓯ ᓇᑭᑦ ᐱᔪᓐᓇᕐᓂᖃᕐᒪᖔᑦ ᐊᐱᖅᑯᓯᐅᓂᖓ
ᒫᑎᐅᓯ 21:23-27; ᒫᑯᓯ 11:27-33
1ᐅᓪᓗᐃᑦ ᐃᓚᖓᓐᓂ ᔩᓱᓯ ᑐᒃᓯᐊᕐᕕᒡᔪᐊᕐᒥ ᐃᓄᖕᓂᒃ ᐃᓕᓮᑎᓪᓗᒍ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᓱᐃᑦᔪᑎᖃᕐᓗᓂ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ, ᔫᑎᓪᓗ ᐊᖓᔪᖅᑳᖏᑦ ᐃᓚᒋᓪᓗᒋᑦ ᑕᕝᕗᓐᖓᕐᐳᑦ. 2ᐅᖃᐅᑎᓪᓗᒍ, “ᐅᖃᐅᑎᓚᐅᕐᑎᒍᑦ ᓇᑭᑦ ᐱᔪᓐᓇᐅᑎᖃᕐᓗᑎᑦ ᑍᒤᓕᐅᕈᓐᓇᖃᑦᑕᕐᐱᑦ? ᑭᓇᒃᑯᓐᓄᓪᓗ ᐱᔪᓐᓇᐅᑎᑖᑎᑕᐅᓯᒪᒐᕕᑦ?”
3ᔩᓱᓯᐅᑉ ᑭᐅᕔᑦ, “ᐅᕙᖓᑦᑕᐅᖅ ᐊᐱᕆᔪᒪᒋᕙᑦᓯ; ᐅᖃᐅᑎᓚᐅᕐᓯᓐᖓ; 4ᔪᐊᓇᓯᐅᑉ ᐹᑉᑎᑦᓯᔪᓐᓇᕐᓂᖓ ᒎᑎᒥᑦ ᐱᓚᐅᕐᐹ ᐅᕝᕙᓗ ᐃᓄᖕᓂᑦ?”
5ᑖᒃᑯᐊ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ᐅᖃᕐᓗᑎᒃ, “ᒎᑎᒥᑦ ᐱᓚᐅᕐᓂᕋᕈᑦᑎᒍ, ᑕᕝᕙ ᐅᖃᐅᑎᓂᐊᕐᐹᑎᒍᑦ, ‘ᓱᖕᒪᓪᓕ ᐅᒃᐱᕆᓚᐅᖏᑉᐱᓯᐅᒃ?’ 6ᐅᕝᕙᓗ ᐃᓄᖕᓂᑦ ᐱᓚᐅᕐᓂᕋᕐᓗᒍ ᐅᖃᕈᑦᑕ, ᐃᓄᓕᒫᓂᑦ ᒥᓪᓗᕐᑕᐅᓂᐊᕐᐳᒍᑦ; ᔪᐊᓇᓯ ᓇᓚᐅᑦᑍᔫᓇᓱᒋᔭᐅᖕᒪᑦ.” 7ᑕᕝᕙ ᑭᐅᕚᑦ, “ᓇᑭᑦ ᐱᔪᓐᓇᕐᑎᑕᐅᖕᒪᖔᑦ ᖃᐅᔨᒪᓐᖏᓚᒍᑦ.”
8ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᑦᑕᐅᖅ ᐅᖃᐅᑎᓂᐊᖏᓐᓂᕙᑦᓯ, ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᑍᒤᓕᐅᕈᓐᓇᕐᒪᖔᕐᒪ.”
ᐸᐅᕐᖓᓂᒃ ᐅᐂᓂᒃᓴᐅᓕᕈᒫᕐᑐᓂᒃ ᐱᕈᕐᓰᕕᖕᒥᒃ ᑲᒪᔨᐅᔪᑦ ᐊᑦᔨᐅᑎᑕᐅᓂᖏᑦ
ᒫᑎᐅᓯ 21:33-46; ᒫᑯᓯ 12:1-12
9 #
ᐂᓮᐊᓯ 5:1. ᐃᓄᐃᑦ ᐊᑦᔨᐅᔪᒥᒃ ᐃᒤᑦᑐᒥᒃ ᐅᖃᕐᕕᒋᕔᑦ: “ᐊᖑᑎᑕᖃᓚᐅᕐᐳᖅ ᐸᐅᕐᖓᓕᒃᓴᓂᒃ ᑲᓐᖓᕐᓱᐃᔪᒥᒃ ᐱᕈᕐᓰᕕᖕᒥ, ᑮᓇᐅᔭᓕᐅᕈᑎᒋᔪᒪᓪᓗᒍ ᐊᑐᕐᑕᐅᑎᑉᐹ ᑲᒪᔨᓄᑦ, ᓄᓇᐅᑉ ᐊᓯᐊᓄᑦ ᐊᐅᓪᓚᕐᐳᖅ ᐊᑯᓂ ᐊᐅᓚᕐᓯᒪᔭᕐᑐᕐᓗᓂ. 10ᐸᐅᕐᒊᑦ ᑲᑎᑕᐅᕕᒃᓴᖓᑦ ᓇᓪᓕᐅᑎᖕᒪᑦ, ᐱᔨᒥᓂᒃ ᑎᓕᓯᕗᖅ ᐸᐅᕐᖓᓂᒃ ᐱᑖᕆᔭᕆᐊᖃᕐᑕᒥᓂᒃ ᑎᒍᓯᖁᓪᓗᒍ ᐱᕈᕐᓰᕕᖕᒥᓂᑦ; ᑖᒃᑯᐊᓕ ᑲᒪᔨᐅᑎᑕᖏᑕ ᐱᔨ ᐋᓐᓂᕐᓯᕐᐹᑦ, ᓇᒃᓴᕐᑎᓐᓇᒍ ᐅᑎᕐᑎᑉᐹᑦ. 11ᐊᖑᑦ ᐱᔨᒥᓂᒃ ᐊᓯᐊᓂᒃ ᑎᓕᓯᒋᕗᖅ; ᑖᓐᓇᑦᑕᐅᖅ ᐋᓐᓂᕐᓯᕆᕚᑦ ᐃᓖᔭᕆᓪᓗᒍᓗ, ᓇᒃᓴᕐᑎᓐᓇᒍ ᐅᑎᕐᑎᑉᐹᑦ. 12ᐊᖑᑦ ᐱᔨᒥᓂᒃ ᐱᖓᔪᐊᓐᓂᒃ ᑎᓕᓯᒋᕗᖅ; ᑖᓐᓇ ᑲᒪᔨᓂᑦ ᐃᑭᓕᕐᑕᐅᕗᖅ ᐋᓐᓂᕐᓯᕐᑕᐅᓪᓗᓂ ᐊᐅᓚᕐᑎᑉᐹᑦ. 13ᐱᕈᕐᓯᕕᐅᑉ ᐃᓄᐊ ᐅᖃᕐᐳᖅ, ‘ᖃᓄᕐᓕ ᐱᓂᐊᓕᕐᑐᖓ? ᐃᕐᓂᕋ ᓇᒡᓕᒋᔭᕋ ᑎᓕᔪᒪᓕᕐᐸᕋ; ᑖᓐᓇ ᐱᑦᑎᐊᕐᑕᐅᓂᐊᕐᑐᒃᓴᐅᕗᖅ!’ 14ᑲᒪᔨᐅᔪᑦ ᑖᓐᓇ ᑕᑯᒐᒥᑦᔪᒃ, ᐃᒻᒥᖕᓄᑦ ᐅᖃᓕᕐᐳᑦ, ‘ᐅᓇ ᑕᕝᕙ ᐱᕈᕐᓰᕕᖕᒥᒃ ᐱᖁᑎᓕᐅᑉ ᐃᕐᓂᖓ ᑭᖑᕐᖑᑦᔨᔪᒃᓴᖅ; ᑐᖁᓚᐅᕐᓚᕗᑦ, ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍ!’ 15ᐱᕈᕐᓰᕕᖕᒥᑦ ᐊᓂᑎᑉᐹᑦ ᑐᖁᓪᖢᒍ.
“ᖃᓄᕐᓕ ᑍᒪ ᐱᕈᕐᓰᕕᖃᕐᑑᑉ ᐱᓚᓕᕐᐰᑦ ᑖᒃᑯᐊ ᑐᖁᑦᓯᔪᑦ ᐃᕐᓂᖓᓂᒃ? 16ᓇᖕᒥᓂᖃᕐᑐᖅ ᐱᕈᕐᓰᕕᖕᒥᒃ ᑎᑭᒃᑯᓂ ᑖᒃᑯᐊ ᑲᒪᔩᑦ ᑐᖁᓐᓂᐊᕐᐰᑦ, ᐊᓯᖏᓐᓄᑦ ᑲᒪᒋᔭᐅᑎᓕᕐᓗᒍ.”
ᐃᓄᐃᑦ ᑕᒪᑐᒥᖓ ᑐᓴᕋᒥᒃ ᐅᖃᕐᐳᑦ, “ᑍᒤᑦᑐᖃᕐᓂᐊᓐᖏᓚᖅ!”
17 #
ᐃᓐᖏᕈᑦ 118:22. ᔩᓱᓯᐅᑉ ᐃᓄᐃᑦ ᑕᑯᓴᕐᓗᒋᑦ, ᐅᖃᐅᑎᕔᑦ, “ᐅᖃᐅᓰᑦ ᐃᒤᓕᔪᑦ ᖃᓄᖅ ᑐᑭᖃᕐᐹᑦ?
‘ᐅᔭᕋᒃ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ ᐊᑐᖏᓐᓂᕋᕐᑕᐅᓪᓗᓂ
ᑖᓐᓇ ᐊᑐᕆᐊᖃᕐᓂᕐᐹᖑᓕᕐᐳᖅ ᑎᕆᖅᑰᓕᕐᓗᓂ.’
18“ᑕᕝᕗᖓ ᐅᔭᕋᖕᒧᑦ ᑲᑕᒃᑐᓕᒫᑦ ᓯᖁᒥᓐᓂᐊᕐᐳᑦ; ᐅᔭᕋᒡᓗ ᓇᓪᓕᐊᓐᓄᑦ ᑲᑕᒃᑯᓂ ᑲᑕᒡᕕᒋᔭᒥᓂᒃ ᓯᖃᓪᓕᓯᓂᐊᕐᐳᖅ.”
ᒐᕙᒪᒃᑯᓐᓄᑦ ᑖᒃᓰᔭᕆᐊᖃᕐᓂᐅᑉ ᒥᒃᓵᓄᑦ ᐊᐱᖅᑯᓯᖅ
ᒫᑎᐅᓯ 22:15-22; ᒫᑯᓯ 12:13-17
19ᐱᖁᔭᓂᒃ ᐃᓕᓮᔩᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᑕ ᔩᓱᓯ ᑎᒍᓇᓱᒃᑲᓗᐊᕐᐹᑦ ᑕᕝᕙᓃᑎᓪᓗᒍ, ᐃᓄᓂᒡᓕ ᓯᕘᕋᒐᒥᒃ ᑎᒍᓐᖏᓛᑦ; ᖃᐅᔨᒐᒥᒃ ᐊᑦᔨᐅᔪᑎᒍᑦ ᑖᒃᑯᑎᒎᓇ ᐅᖃᐅᓯᕆᔭᐅᓂᕐᒥᖕᓂᒃ. 20ᑕᕝᕙ ᐱᕕᒃᓴᕐᓯᐅᓕᕐᐳᑦ, ᐊᖑᑎᓂᒃ ᐊᑭᓖᕕᖃᕐᓗᑎᒃ ᑎᓕᓯᕗᑦ ᓱᓕᔪᕐᓇᑦᑎᐊᕋᓱᐊᕐᑐᓂᒃ, ᔩᓱᓯ ᐊᐱᕐᓱᕐᓗᒍ ᑭᐅᑦᔪᑎᒃᓮᕈᑦᔨᓇᓱᐊᕐᓂᐊᕐᑐᓂᒃ, ᐱᕖᕈᑦᔨᒍᑎᒃ ᕉᒪᒥᐅᑦ ᐊᐅᓚᑦᑎᔨᖏᓐᓄᑦ ᐱᔭᐅᑎᑦᑐᒪᓪᓗᒍ. 21ᑖᒃᑯᐊ ᖃᐅᔨᓴᕐᑎᑕᐅᔪᑦ ᔩᓱᓯᒧᑦ ᐊᐱᕆᕗᑦ, “ᐊᔪᕆᕐᑐᐃᔩ, ᖃᐅᔨᒪᕗᒍᑦ ᐅᖃᐅᑦᔨᑦᓯᐊᕐᐸᒃᑲᕕᑦ ᐊᔪᕆᕐᑐᐃᑦᓯᐊᕐᐸᒡᓗᑎᓪᓗ ᐊᑲᐅᔪᓂᒃ, ᐃᓄᖕᓂᒃ ᐊᑦᔨᒌᒃᑎᑦᓯᒐᕕᑦ, ᓱᓕᑦᓯᐊᕐᑐᒥᒡᓗ ᒎᑎᐅᑉ ᐊᑐᕐᑕᐅᖁᔭᖓᓂᒃ ᐊᔪᕆᕐᑐᐃᖃᑦᑕᕋᕕᑦ. 22ᐅᖃᐅᑎᓚᐅᕐᑎᒍᑦ ᐱᖁᔭᕗᑦ ᑖᒃᓯᔭᖁᔨᕚᑦ ᓰᓴᕆᒧᑦ? ᑐᓂᓯᖁᔨᓐᖏᓚᓪᓘᓐᓃᑦ?”
23ᔩᓱᓯᐅᑉ ᓯᓔᕐᕆᒃᓯᓇᓱᖕᓂᖏᑦ ᖃᐅᔨᒐᒥᒋᑦ, ᐅᖃᐅᑎᕔᑦ, 24“ᑮᓇᐅᔭᖅ ᑕᑯᓚᒍ. ᑭᓇᒥᒃ ᐊᑦᔨᓐᖑᐊᕐᑕᖃᕐᐸ? ᑭᓇᐅᓪᓗ ᐊᑎᖓᓂᒃ ᐊᑎᓕᐅᓯᒪᕙ?”
ᑖᒃᑯᐊ ᑭᐅᕗᑦ, “ᓰᓴᕆᒥᒃ.”
25ᑕᕝᕙ ᐅᖃᐅᑎᕔᑦ, “ᑍᒤᒻᒪᑦ ᑐᓂᓯᐅᒃ ᓰᓴᕆᒧᑦ, ᓰᓴᕆᐅᑉ ᐱᒋᖕᒪᒋᑦ, ᒎᑎᒧᓪᓗ ᑐᓂᓗᒋᑦ ᒎᑎᐅᑉ ᐱᖏᑦ.”
26ᑎᓕᔭᐅᓯᒪᔪᑦ ᐃᓄᐃᑦ ᑕᒃᑯᐊᓂ ᐸᓯᒃᓯᕈᑎᓴᕐᑖᕈᓐᓇᖏᓚᑦ ᔩᓱᓯᐅᑉ ᐅᖃᐅᓯᖏᓐᓂᑦ; ᑲᒪᓂᐊᕈᑎᖃᓚᐅᕐᐳᓪᓕ ᑭᒡᒍᓯᖓᓂᒃ ᐅᖃᐅᓯᒃᓮᕈᑦᔭᐅᒐᒥᒃ.
ᑐᖁᖓᔪᓂᑦ ᒪᑭᑦᓱᒫᕐᓂᐅᑉ ᐊᐱᖅᑯᓯᐅᓂᖓ
ᒫᑎᐅᓯ 22:23-33; ᒫᑯᓯ 12:18-27
27 #
ᐋᐴᓯᑕᓖᑦ 23:8. ᓵᑦᔪᓰᑦ ᐃᓚᖏᑦ ᔩᓱᓯᒧᐊᕐᐳᑦ, ᑖᒃᑯᐊ ᐅᒃᐱᕈᓱᖏᑦᑐᑦ ᑐᖁᖓᔪᑦ ᒪᑭᑦᓱᒫᕐᓂᖏᓐᓂᒃ, 28#ᒨᓯᓯ ᑕᓪᓕᒪᖏᑦ 25:5.ᐊᐱᕆᕚᑦ ᐅᖃᕐᓗᑎᒃ, “ᐊᔪᕆᕐᑐᐃᔩ, ᒨᓯᓯ ᐱᖁᔭᓂᒃ ᑎᑎᕋᕐᓯᒪᖕᒪᑦ: ‘ᐊᖑᑦ ᓄᓕᐊᓕᒃ ᑐᖁᒃᐸᑦ, ᕿᑐᕐᖓᕐᑖᓚᐅᕋᑎᒃ, ᓄᓕᐊᕕᓂᖓ ᐊᖑᑎᐅᑉ ᓄᑲᖓᑕ ᓄᓕᐊᕐᑖᕆᔭᒃᓴᕆᕚ ᕿᑐᕐᖓᕐᑖᖁᓪᓗᒋᒃ, ᑭᖑᕚᖏᓐᓂᒃ ᐊᖓᔪᐊᑕ ᕿᑐᕐᖓᖏᓐᓂᒃ ᑍᔭᐅᔪᒃᓴᐅᖁᓪᓗᒋᑦ.’ 29ᑍᒪᓕ ᖃᑕᓐᖑᑎᒌᒃᑕᖃᓚᐅᕐᐳᖅ ᐊᖑᑎᓂᒃ 7ᓂᒃ; ᐊᖓᔪᒃᖠᕐᐹᖅ ᓄᓕᐊᓂᓚᐅᕐᐳᖅ, ᕿᑐᕐᖓᕐᑖᓚᐅᕋᓂ ᑐᖁᕗᖅ. 30ᓄᑲᖓᑕ ᐊᕐᓇᖅ ᓄᓕᐊᕐᑖᕆᕚ, ᕿᑐᕐᖓᕐᑖᓚᐅᕋᓂ ᑐᖁᒋᕗᖅ, 31ᐊᒻᒪ ᓄᑲᖓᑕ ᐱᖓᔪᐊᑦᑕ ᓄᓕᐊᕐᑖᕆᒋᕚ, ᑐᖁᒋᕗᖅ, ᑭᖑᓂᖓᒍᑦ ᑖᒃᑯᐊ ᓄᑲᕇᓕᒫᑦ 7 ᐊᕐᓇᒥᒃ ᑖᑦᓱᒥᖓ ᓄᓕᐊᖃᓚᐅᕐᐳᑦ, ᑐᖁᓪᓗᑎᒃ ᕿᑐᕐᖓᕐᑖᕐᑐᖃᓚᐅᕋᑎᒃ. 32ᑭᖑᓪᓕᕐᐹᓐᖑᓪᓗᓂᓕ ᐊᕐᓇᖅ ᑐᖁᓚᐅᕆᕗᖅ. 33ᑐᖁᖓᔪᑦ ᒪᑭᕝᕕᖓᓐᓂ, ᓇᓪᓕᐊᑦᑕᓕ ᑍᒪ ᐊᕐᓇᖅ ᓄᓕᐊᕆᓛᕐᐸᐅᒃ? ᑍᒃᑯᐊ ᖃᑕᓐᖑᑎᒌᓕᒫᑦ 7 ᐊᕐᓇᒥᒃ ᑖᑦᓱᒥᖓᑦᓮᓐᓇᖅ ᓄᓕᐊᖃᓚᐅᕐᒪᑕ.”
34ᔩᓱᓯᐅᑉ ᐅᖃᐅᑎᕔᑦ, “ᒫᓂ ᐃᓅᔪᑦ ᐊᖑᑎᑦ ᓄᓕᐊᓂᓲᖑᕗᑦ, ᐊᕐᓁᓪᓗ ᐅᐃᑖᕐᐸᒃᓗᑎᒃ; 35ᐊᖑᑏᓪᓕ ᐊᕐᓁᓪᓗ ᑐᖁᖓᔪᓂᑦ ᒪᑭᑦᓱᒫᕐᑐᑦ ᓯᕗᓂᒃᓴᑦᑎᓐᓂ ᓄᓕᐊᓂᒋᐊᖃᕈᒫᓐᖏᓚᑦ ᐅᐃᓂᒋᐊᖃᕈᒫᕋᑎᒡᓗ. 36ᒎᑎᐅᑉ ᕿᑐᕐᖓᕆᖕᒪᒋᑦ, ᑐᖁᒥᑦ ᒪᑭᓯᒪᓂᕐᒥᖕᓄᑦ ᐂᖏᓖᑎᑐᑦ ᑍᒤᑦᓱᒫᕐᒪᑕ ᑐᖁᔪᓐᓇᕈᓐᓃᕐᓗᑎᒡᓗ. 37#ᒨᓯᓯ ᐂᑉᐸᖏᑦ 3:6.ᒨᓯᓯ ᓇᓗᓇᖏᑦᓯᐊᕐᑐᒥᒃ ᖃᐅᔨᑎᑦᓯᓚᐅᕐᐳᖅ ᑐᖁᖓᔪᑦ ᒪᑭᑦᓱᒫᕐᓂᖏᓐᓂᒃ, ᐅᓂᒃᑳᖑᓯᒪᔪᒥ ᐅᒃᐱᒐᕐᓂ ᐃᑯᐊᓚᔪᒥ, ᐊᑕᓂᕐᒥᒃ ᐅᖃᐅᓯᖃᕐᒪᑦ, ‘ᐂᑉᕋᕼᐋᒻ ᒎᑎᖓ, ᐂᓴᑭᐅᓪᓗ ᒎᑎᖓ, ᔧᑰᓪᓗ ᒎᑎᖓ.’ 38ᒎᑎ ᐃᓅᔪᓄᑦ ᒎᑎᐅᕗᖅ ᑐᖁᖓᔪᓪᓕ ᒎᑎᒋᓐᖏᓛᑦ; ᐃᓅᔪᓕᒫᑦ ᑖᑦᓱᒧᖓ ᐃᓅᒪᑕ.”
39ᐱᖁᔭᓂᒃ ᐃᓕᓮᔩᑦ ᐃᓚᖓᑦ ᐅᖃᕐᐳᖅ, “ᑭᐅᑦᓯᐊᕐᐳᑎᑦ ᐊᔪᕆᕐᑐᐃᔩ.” 40ᑭᖑᓂᖓᒍᓪᓗ ᐊᐱᕆᒃᑲᓐᓂᕈᒪᔪᓐᓃᕐᐹᑦ.
ᒥᓮᐊᓯᒥᒃ ᐊᐱᖅᑯᓯᖃᕐᓂᖓᑦ
ᒫᑎᐅᓯ 22:41-46; ᒫᑯᓯ 12:35-37
41ᔩᓱᓯᐅᑉ ᐅᖃᐅᑎᕔᑦ, “ᖃᓄᕐᓕ ᙭ᔅᑑᓯ ᑍᕕᑎᒧᑦ ᑭᖑᕚᕆᔭᐅᓂᕋᕐᑕᐅᔪᓐᓇᕐᐹ? 42#ᐃᓐᖏᕈᑦ 110:1.ᑍᕕᑎ ᓇᖕᒥᓂᖅ ᐅᖃᕐᓯᒪᖕᒪᑦ ᐃᓐᖏᕈᑎᓂ:
‘ᐊᑕᓂᖅ ᐊᑕᓂᓐᓄᑦ ᐅᖃᕐᐳᖅ, “ᐅᕙᓂ ᑕᓕᕐᐱᓐᓂ ᐃᒃᓯᕙᒋᑦ, 43ᐊᑭᕋᕐᑐᕐᑎᖕᓂᒃ ᐃᑎᒐᖕᓄᑦ ᐃᑯᕐᕋᓕᐅᑦᔨᖅᑳᕐᑎᓐᓇᖓ.”’
44ᑍᕕᑎᐅᑉ ᐊᑕᓂᕐᒥᒃ ᑍᒐᒥᐅᒃ; ᖃᓄᕐᓕ ᑕᕝᕙ ᙭ᔅᑑᓯ ᑭᖑᕚᕆᔪᓐᓇᕐᐸᐅᒃ?”
ᔩᓱᓯᐅᑉ ᐃᓕᒪᓱᖁᔨᓂᖓ ᐱᖁᔭᓂᒃ ᐃᓕᓮᔨᓂᒃ
ᒫᑎᐅᓯ 23:1-36; ᒫᑯᓯ 12:38-40
45ᐃᓄᓕᒫᑦ ᑐᓵᑎᓪᓗᒋᑦ ᔩᓱᓯᐅᑉ ᐃᓕᓐᓂᐊᕐᑎᓂ ᐅᖃᐅᑎᕔᑦ, 46“ᐃᓕᒪᓱᒋᑦᓯ ᐱᖁᔭᓂᒃ ᐃᓕᓮᔨᓂᒃ, ᑖᒃᑯᐊ ᐱᓱᒃᑲᑕᒍᒪᕙᖕᒪᑕ ᑕᑭᔪᓂᒃ ᐊᓐᓄᕌᕐᓯᒪᓗᑎᒃ, ᓂᓪᓕᐅᑦᔭᐅᑦᓯᐊᕈᒪᕙᒡᓗᑎᒃ ᓂᐅᕕᕐᕕᖕᓂ ᔫᑎᓪᓗ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᐱᐅᓂᕐᐹᓂ ᐃᒃᓯᕙᔪᒪᕙᒡᓗᑎᒃ; ᓂᕆᕕᒡᔪᐊᕆᐊᕐᑐᕐᑐᓂᑦ ᐅᐱᒋᔭᐅᔪᑦ ᐃᓂᖏᓐᓂ ᐃᓂᖃᕈᒪᕙᒃᓗᑎᒃ. 47ᓯᓔᕐᕆᒃᓯᕙᒃᓗᑎᒃ ᐅᐃᒡᒐᕐᓂᕐᓂᒃ ᑎᒡᓕᒐᕐᕕᒋᔪᒪᓪᓗᒋᑦ ᐊᖏᕐᕋᖏᓐᓂᑦ, ᑕᑯᓐᓇᕐᑕᐅᓇᓱᐊᕐᓗᑎᒡᓗ ᑐᒃᓯᐅᑦᔨᓕᕐᐸᒃᓗᑎᒃ ᑕᑭᔪᐊᓗᖕᓂᒃ. ᑖᒃᑯᐊ ᓱᒋᐊᕐᑕᐅᓂᖏᑦ ᐱᐅᖏᓐᓂᕐᓴᓪᓚᕆᐊᓘᔪᒫᕐᐳᑦ.”
Eastern Arctic Inuktitut Bible © Canadian Bible Society, 2012, 2021-2023.