Yanisa Mishiracho 7
7
Yesussay daase ba7alles Yerusalame bides.
1Hesafe guye Yesussay galila garssan yuyettdees, gido attin Yuhudan yuyanas kooybeeyna, gasooykka Ayhudat iza wodhana kooyza gishshasiko. 2He wode Ayhudata dase Ba77eley matti uttdes. 3Hesa gish Yesussa ishshati izakoo shiqqidi hizzigida. “nena kallizayt ne ooththiza oosoza beyana mala ne heyssafe denddada Yuhuda dere ba. 4Gasooykka qooccen erristana koyzadey ba ooso geeman oothena, neka heytantta wursa ooththashe nena allamen qoonccsana koshshes.” 5Istt hessa gida gasooy iza ishshataka gidin izan ammanonttayta gidida gishshasiko. 6Yesussayka isttas hizzigides. “ta wodey buroo gakiibeyna, inte wodey gidiko wuriso wode intes gigako. 7Deerey intena ixxana danddaena, tana gidikoo ixxes, gasooyka ta allame oosoy iita gididdaysa izas markkattza gishshasiko. 8Hai inte gede ba77elezaso bite, tass wodey gakontta gish hayssa ha Ba77elezaso bikke.” 9Hesa gidii Yesussay Galilan attdess.
Yesussay dase Ba77eleson beetidees.
10Gido attin iza ishshat Ba77elezaso bidappe guye Yesussay qonccera gidontta qotara ba77elezaso bidees. 11Ayhudat iza “awan diize?” gishe Ba77elezason koydda. 12Deereyka Iza gish garisara sasuqi hasaettdes. issi issi asat “izi loo7o asakoo” gishin bagay qase “loo7o gidena izi dere baleththes” gides. 13Gido attin Ayhudata dannatas babiza gish oonnika iza gish qoonccen hasaibeyna. 14Ba77elezii wurana baaga gakishin Yesussay xoossa keeth bidi tammariso oykkdees. 15Ayhudat “haysii addezi tammarontta dishshe hayssa wursi woostti erride” gidi malaletidda. 16Hessa gish Yesussay hizzgdes. “ta tammarithiza timmiritey tana kittda ta Aawape immetides attin tape gidenna. 17Tana kittdaysa sheene ooththana koyzadeey dikko haysii ha timmiritey Xoossafe beetdaysa woykko ta tape hasaidaysa gidikkoka errana. 18Bepe hasaizadeey ba boncho koyyes, kittidade boncho koyzadeey gidiko izi tummancha, wordooy iza bolla denna. 19Mussey intes woga immidess gideene? gidikkoka inte garisan wog nagii poliidadey oonka deena, inte azass tana wodhana koyeti?” 20Deereyka iza “ne bolla dayydanthth dees! ne wodhana kooyzay oonne?” gidees. 21Yesussayka isttas hizzgi zarides “ta issi ooso ooththadiss inte wurikka hano ha oosoy malaleteista. 22Musseey intes qaxxara woga immidees, he wogayyka immeetiday kase aawatape beetidees attin Mussepe gidena. histtin hekko intekka sambbatta gaalasiika asse qaxxarista. 23Histtiko Musse wogay sharetontta mala assi smbbata gaalas qaxaretiysa gidiko histtin ta sambbata gaalas asas kummetha asateth paththiin azzas ta bolla hanqqetet? 24Suurre pirda pirdite attin asa ayfeso xeelidi maadoo pirda pirdofite.”
kirisitosa gish denddida pallam
25Yerusalame asape issi issi asat hizzgda “istt woodhana koyza addezii hayssa gideene?” 26heko izi qoonccen hasaees shin istt iza aykooka gibeytena, haysii xoossay kittidade giddidaysa dannat tummu eerizoshsha? 27Histtin haysii addeezi awa asakone nu erroos, xoossay kitiddadey yishshin qaasse izi awapekone errizadey oonnika deena, 28Hesa gish Yesussay xoossa keeththan tammarththishe ba qaala dhoqu histtdi “inte tana tummu errata, ta awape yidakone inte errata, gido attin tan ta sheenen yabeykke, tana kittdaysi izi tummancha, gidoshin inte qasse iza errekkista. 29Ta gidikoo iza achchafe yida gishshine izi tana kittda gish ta iza errays” gidees. 30Hesa woode iza oykanass koydaa, gido attin buroo wodey gakibeyna gish oonnika oykkbeyna. 31Gido attin derezape darooy izan ammanides, asay hizgidees “xoossay kittiddadey yizza wode haysi addezi ooso malatape bollaara hara ootthhane?”
Yesussa oykkana wootadaret kittetda.
32Assay Yesussa gish garssara sasuketi hasaishshin Parssawet siyda, hessa gish qeessista halaqatne parssawet yesussa oykkanas Xoossa keethth pengge naggizayta yediida. 33He wode Yesussay “ta intenara guuththa wode dashshana, hessafe guye tana kittidaysako simma bana. 34Inte tana koyana shin demekkista, inte ta dizzaso yanas danddaekeista.” 35Hesa gish Ayhudata dannat ba garssan issay issara, “haysi addezii nu demmontta mala awa baneshsha? oonne errizzay Girikista giddo laleti diza Ayhuddatakoo bidi Girikista tammarisanesha? 36Izi <inte tana koyana shin demekkista, ta dizasoo inte yanas danddaekista gishin hes ay gusee?>” gida.
Deyoo hathth
37Ba77eleeza wurithetha gita gaalas Yesussay dendidii eqqidne ba qaala dhoqu histtdii “hethth sammottda urray dikoo ha taakko yidi uuyoo. 38Maxxafay gida mala tana ammanizadefe deyoo haththa pullitooy pullitana.” gidees. 39Izi hessa gidaay izan ammanizayt buropee ekkana xiilo ayana gishshasiko, gasooyka yesussay boonchetza wodey buroo gakontta gish xiilo ayanay buroo qoonccoontta immetibeyna.
Deereza garssan shakketethi medhettdes.
40Hessa gish derezape issi issi asat he qaala siydii “yana giza nabey tummape hayssakoo” gida. 41“Harati haysii xoossay kittiddadeko” gida. baggayyt qasse “xoossay kittiddadey Gliilape waan yane? 42xoossay kittiddadey Dawitte zeereththape yeletanaysane dawitte katamma Bettelemepe yanaysii kase geshsha maxxafan xaafetibeyne?” gida. 43Hessa gish iza gaason derey ba gidoon shaaketi wodhides. 44Isttafe issi issi asat iza oykkana koyda, gido attin oonikka oykibbeyna.
ayhudata dannat ammanibeytena
45Hessafe guye xoossa keeth naggizayt qeessata hallaqatakone Parisawettako simmid bida, izetika “aazas iza ekontta yidet?” gida. 46Wootadaretika zaridi “ha addezi hasaizaysa mala ay assika hasai errena” gida. 47parssaweti istta “intekka baletidet?” gida. 48dannatape woykoo parssawistape iza ammanidayt dizosha? 49Haysii mussee woga errontta derey tummape qanggetdaysa. 50Haysafe kasse Yesussako bida Parssawistape isa gidida niqoodimoosay isttas 51“Nu wogan issi mottetizadey ba mottos malththe immin siyonttane izi ay ooththidakone erretontta dishshin pirday pirdeet errize?” gides. 52Isttika “neka galila asse? galilape nabey denddontaysa qoorerethada gakka erraa” gida. 53hessafe guye isay isay beso bides.
Gamo Geesha Maxxafa New Testament © The Word for the World Ethiopia, 2017.