زبُور 1
1
فصلِ اوّل
بَخشِ اوّل
نیک دَ بَختِ کسای که از خُدا مِیتَرسه
1نیک دَ بَختِ کسی که دَ مُطابِقِ مشوَرِه شرِیرو قَدم نَمِیزَنه
و دَ راهِ گُناهکارا پای خُو ره نَمیله#۱:۱ دَ جای «پای خُو ره نَمیله» دَ زِبونِ عِبرانی «ایسته نَمُوشه» نوِشته یَه.
و دَ مجلِسِ آدمای رِیشخَندگر نَمِیشِینه،
2بَلکِه خوشی ازُو دَ شریعتِ خُداوند اَسته
و دَ بارِه شریعتِ ازُو شاو و روز فِکر مُونه.
3اُو رقمِ دِرختی اَسته که دَ بغلِ جوی های آو شَنده شُده
و میوه خُو ره دَ فصل شی مِیدیه
و بَلگای شی پژمُرده نَمُوشه؛
اُو هر کار ره که انجام مِیدیه، کامیاب مُوشه.
4لیکِن شرِیرو اِی رقم نِییه،
بَلکِه رقمِ کاه اَلّی اَسته که باد دَ دَم خُو مُوبره.
5امزی خاطر نَه شرِیرو دَ روزِ قضاوَت ایسته شُده مِیتَنه
و نَه ام گُناهکارا دَ جماعتِ مردُمای عادِل،
6چراکه نظرِ لُطفِ خُداوند دَ بَلِه راهِ آدمای عادِل اَسته،
ولے راهِ شرِیرو سُون نابُودی موره.
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.