مَرقُس 9
9
1عیسی هَمیش وِتیَ مردِم ئو شاگردَلی: «حخیختاً، موشِمَ بینتو، بِری هوسیانَس اَر ایرَه، گه تا پاتِشائی خدا گه وَه قدِرتَ مای، نوئینِن طُم مرگ نِمَچَشِن.»
عوض بیئِن نوم‌رُی عیسی
2دُما شَش روژ، عیسی پطرس ئو یعقوب ئو یوحنا هیزداتی ئو تَنیا وَه‌گَرد ووژ بِردِنی اَرِه سر کوی بِلِنگی تاگَه خلوت کَن. اَر اورَه، اَرتَک اونَل، نوم‌رُی عوض بیتی. 3جِنِکی بِریقَه داتی ئو اَخِنکَ اِسبیا بی، گه اِنوم دنیا هُیچی نِمَتونی هُنَ، جِنِکی اِسبیا کِ. 4اَسَه، ایلیا پِخَمَر ئو موسی پِخَمَر اَر وَر چیَمَلو ظاهر بین ئو وَه‌گَرد عیسی گَپونَ ما. 5پطرس وِتیَ عیسی: «استاد، خوءَ گه ایمَه هایم اَر ایرَه. اِسَه بیلا سه کولا باوژیم، یَکی اَرِه تو، یَکی اَرِه موسی ئو یَکی‌شی اَرِه ایلیا.» 6پطرس نِمَذِناسدی چَه بوشی، اَرِیَگه زِلَ‌تِراقا بوئین. 7اَسَه اُری اونَل گِرتیِ وَر ئو دَنگی اژ اُرِهَه رَسی گه، «یَسَ کُر عزیزگرامیم، گوش بِگِرِنیَ بی.» 8هِرازِه، ایلا ئو اَلائو سِیل کِرد، بِخِر اژ عیسی هُیچ کَسونی اَرتَک ووژو نِئی، فَخَد عیسی بی ئو بس.
9وخدی اژ کویَ ماهاتِنَ هُار، عیسی قِدَخَن کِردِنی گه اَ چیئَه گه دیونَ اَرِه کس نوشِن تا وخدی گه کُر اِنسو اژ مِردیَل زِنیا بو. 10اونَ ایی اتفاقونَ هُیشت اِنوم ووژو، مِنتائای اژ یَکتِریونَ مَپِرسیا گه ’زِنیابیئِن اژ مِردیَل‘ یانی چَه. 11اَسَه اژ عیسی‌ئو پِرسی: «اَرِه چَه مَلِمَل توراتَ موشِن اول باس ایلیا بای؟» 12عیسی جوواو دای: «اَلوَت گه اول ایلیا مای تاگَه کُل چیئَل راسِ‌ریس کِ. مِنتائای اَرِه‌چَه اِبارَه کُر اِنسو اِ نُسَخ مقدّس نُیسیاءَ گه باس عذاو فِرِه‌ی بِکیشی ئو خوار بو؟ 13مِنتائای موشِمَ بینتو گه ایلیا، هَرهُنَ گه اِبارَه او نُیسیاءَ، هات ئو اونَل هر کارونی هِست وَه سرو آوِرد.»
شِفا کُری گه روحِ گَن داشدی
14وخدی رَسین اَرِه تک شاگردَلی‌تِر، دییو جیَمیَت فِرِه‌ی دورو گِرتِنَ ئو مَلِمَل تورات‌یش وَه‌گَردو دَمَرَگَ مَهَن. 15مردِم کُل تا عیسی‌ئو دی، بِلُجوئیو هات ئو نائونِ دو هاتِن، سِلامو کِردَ بی. 16عیسی اَژینو پِرسیتی: «اِبارَه چَه وَه‌گَرد شاگردَل دَمَرَگَ مِهِینو؟» 17پیای اِنوم جیَمیَت جوواو داتی: «استاد، کُرِم آوِردِمَس اَرِه تَکِت. او کَتیَسِ گیر روحِ گَنی گه دَم بَسدیَ ئو نِمِیلی قصَه بِهِه. 18وخدی مَگِرِتی، مَکوئیتی اَر دل زَمی، هُنَ گه کف اژ دَمَ مِهِیتیَ دِریر ئو ماءِ دِنوریچَه ئو لَشَ ماوتیَ چو. اژ شاگردَلِت هِستِم اَ روحَ بِهَنَ دِریر، مِنتائای نتونستو.» 19عیسی جوواو داتی: «اِاِ نسِل بی‌ایمو، تاگَه کِ وَه‌گَردتو بوئم ئو تیَمِلتو کَم؟ بارِنی اَرِه تَکِم.» 20کُرِهِئو آوِرد اَرِه تک. روحِ گَن وخدی عیسی دیتی، هِرازِه کُرِهَه آوشدیِ رِکَه هُنَ گه کَت اَر دل زَمی ئو هَرهُنَ گه کف اژ دَم دائیَ دِریر، پِلکیاءَ خاکا. 21عیسی اژ باوَه کُر پِرسیتی: «چَنی کَ کَتیَسِ ایی حالِ‌روژَ؟» جوواو داتی: «هَر اژ آویلی. 22ایی روحَ ویشتِر وَخدَل او آوشدیَس اِنوم آو ئو آگِر تاگَه نابود کِیتی. اَرّ مَتونین ریَم کَ اَر ایمَه ئو یاریمو دَ.» 23عیسی وِتی: «اَرّ مَتونین؟ اَرِه کسی گه ایمو دیری کُل چیَ ماو.» 24باوَه اَ کُرَ هِرازِه وَه دَنگ کَلِنگ وِتی: «ایمو دیرِم؛ یاریِم دَ تاگَه بَن ایی بی‌ایمونیم اِرَبام!» 25وخدی عیسی دیتی گه بِری وَه دوءَ مان ئو جیَمَ موئن، تُنا بی اَر روحِ گَن، ئو وِتی: «اِاِ روحِ کر ئو لال، فِربونَ میَمَ بینِت، اَژی باینیَ دِریر ئو دیَر هرگِس اِ دَرین نَچینی!» 26روحَ نَرَه کیشیتی ئو کُرِهَه آوشدیِ رِکَه، اَژی چِتیَ دِریر. کُرِهَه اِجور لَشی کَت، هُنَ گه بِری وِتو: «مِردیَ.» 27مِنتائای عیسی دس کُرِهَه گِرتی، هیزداتی، ئو کُرِهَه هوسیا اَر سر پا. 28وخدی عیسی چی اَرِه مال، شاگردَلی اِ خلوت اَژینو پِرسی: «اَرِه‌چَه ایمَه نتونستمو اَ روحَ بِهِیمَ دِریر؟» 29عیسی جوواو داتی: «ایی جنس روحَ فَخَد وَه دوعا مَچوءَ دِریر.»
30اونَل اژ اورَه چِن ئو اِنوم هیال جلیل رد بین. عیسی نِمِئستی کسی بِذانی او هار کو، 31اَرِیَگه وَه شاگردَلی تیَلیمَ ماتی ئو وَه‌گَردو قصَه مَهَردی گه: «کُر اِنسونَ ماوژِنِ گیر مردِم ئو مَکُشِنی. مِنتائای سه روژ دُما کُشتِنی، زِنیا ماو.» 32مِنتائای شاگردَل میَنا قصَه‌ل اوُ نَفیَمی ئو زِلِئونَ مَچیا اَژینی چیئی بِپِرسِن.
کی اژ کُل کس کَلِنگتِرَ؟
33اونَ هاتِن اِنوم شیَر کَفَرناحوم. وخدی گه اِنوم مال بین، عیسی اژ شاگردَلی پِرسیتی: «اَرنوم رئی اَر سر چَه دَمَرَگَتونَ مَهَرد؟» 34اونَ هُیچ دَنگو نَهَرد، اَرِیَگه اَرنوم رئی اَر سر یَه دَمَرَگَئونَ مَهَرد گه کُمی کَلِنگتِرَ. 35عیسی نیشت ئو هِنا کِردی اَر اَ دوازَه نفرَ ئو وِتی: «هر کی مِیتی اول بو، باس آخِرین نفر ئو خادم کُل کس بو.» 36اَسَه دس آویلی گِرتی نا اَر نومجا اونَ ئو گِرتِ باووش، وِتیَ بینو: 37«هر کی وَه نُم مِه بِچوءِ گِرد هُنَ آویلی، چیَسِ گِرد مِه؛ ئو هر کی بِچوءِ گِرد مِه، نه مِه بلکِم چیَسِ گِرد کِل‌کَر مِه.»
هر کی اَرضد ایمَه نیَ، ها گَردمو
38یوحنا وِتی: «استاد، یَکمونی دی وَه نُم تو مِلاکَتِلَ مَهَردیَ دِریر، اَرِیَگه اژ ایمَه نوئی، نوامو گِرت.» 39عیسی وِتی: «نوا نَگِرِنی، اَرِیَگه کسی نِمَتونی وَه نُم مِه مُجِزَه بِهِه ئو گِری‌تِر، اژ گَنی مِه بوشی. 40اَرِیَگه هر کی اَرضد ایمَه نیَ، ها گَردمو. 41حخیختاً، موشِمَ بینتو، هر کی اَرِیَگه هِن مسیحینو جُ‌جُ جُمی آو وَه نُم مِه بیَ بینتو، چِرچِ دل نیَرِن گه بی‌اَجِر نِمَمینی.
وسوسَه گنا
42«هر کی باعث بو یَکی اژ ایی گُجِرِلَ گه وَه مِه ایمو دیرِن گنا بِهِه، اَرِنی بیتِرَ گه بَرد کَلِنگ اَسیوی باوژِنیِ مِل ئو باوژِنیِ دریا! 43اَرّ دسِت، تونَ ماوژیِ گنا، دس ووژت اِرباوژ. اَرِیَگه اَرِنِت بیتِرَ گه علیل بِچین اِنوم ژییاین ابدی تا یَگه وَه دو دَسا بِچین اِنوم جیَنِم، ئو نوم آگِری گه هرگِس کورا نِماو. 44[جای گه نه کرم اِنومَ مَمِرِتی ئو نه آگِر کورا ماوتی.] 45ئو اَرّ پات تونَ ماوژیِ گنا، پات اِرباوژ. اَرِنِت بیتِرَ گه شَل بِچین اِنوم ژییاین ابدی، تا یَگه وَه دو پاآ باوژِنت اِنوم جیَنِم. 46[جای گه نه کرم اِنومَ مَمِرِتی ئو نه آگِر کورا ماوتی.] 47ئو اَرّ چیَمِت تونَ ماوژیِ گنا، بارتیَ دِریر، اَرِنِت بیتِرَ گه وَه یِه چیَم بِچین اِنوم پاتِشائی خدا، تا یَگه وَه دو چیَما باوژِنت اِنوم جیَنِم، 48جای گه
«”نه کرم اِنومَ مَمِرِتی
ئو نه آگِر کورا ماوتی.“
49«اَرِیَگه کُل کس وَه آگِرا طُم خواءَ مِ. 50خوا خوءَ مِنتائای اَرّ شوری ووژ اژ دس بِ، چطورَ مَتونینو اِدوارَه شور کِینونی؟ هُمِه‌یش اژ ووژتو خواتو داشدوئی ئو وَه‌گَرد یَکتِری اِ صُئل ئو صفا زِنِه‌ی بِهَن.»
@ 2024 Korpu Company