مَرقُس 11
11
عیسی اِجور پاتِشائی ما اَرِه اورشلیم
1وخدی رَسین اَر آبادیَل بِیت‌فاجی ئو بِیت‌عَنْیا گه هِناس شیَر اورشلیم اِ پایِمو کوی زِتو بی، عیسی دو نفر اژ شاگردَلی کِل‌کِردی 2وِتیَ بینو: «بِچِن اِنوم آبادی‌ای گه، ها ویرَرویرتو. ئو هَر یَگه رَسینون اَر اورَه، کرَه‌الُاخی موئینینو گه بوئنیاسا ئو تا اِسگَه کس سُوار کول نوئیَسی. واز کَنی ئو بارنی اَرِه ایرَه. 3اَرّ کسی اژ هُمَه پِرسیتی ”اَرِه‌چَه ایی کارَ مِهِینو؟“ بوشِن: ”خداون وَه بی نیاز دیرِتی ئو هِرازِه کِلَ‌مِهِیتیِ دُما.“» 4اَ دوءَ چِن ئو اِدَر، اِنوم یَکی اژ کویچَه‌ل اَ کرَه‌اُلاخونَ کِردَ دی گه اَرنوا دِراخِلی بوئنیائیا. اَسَه وازو کِرد. 5بِری اژ کسَلی گه اَر اورَه هوسیائین پِرسیو: «اَرّا کرَه‌اُلاخَ وازَ مِهِینو؟» 6اَ دوءَ هَرهُنَ گه عیسی وَه بی وِتوئینی جوواوُ دا؛ اَسَه هُیشتو بِچِن. 7اَسَه کرَه‌اُلاخِهِئو آوِرد اَرِه تک عیسی، چوخائَل ووژو آوشدون اَر کول کرَه‌اُلاخ، ئو عیسی سُوار بیتی. 8بِری اژ مردِم‌یش چوخائَل ووژو ئو بِریشی پَلَلی گه اِنوم کِشت ئو کارَل بِروئی، وِلائون اِراکِرد اَرنوم رئی. 9کسَلی گه نواتِر اژ اوءَ مَچیان ئو اونَلی گه وَه دُم سِرا ماهاتِنی، مَقارونو ئو موئِتو:
«نجاد بِ!»
«بِمارِکَ اَوَه گه وَه نُم خداونَ مای!»
10«بِمارِکَ پاتِشائی باوَه ایمَه داوود،
گه دیری مای!»
«نجاد بِ وَه عرشِ فِلک!»
11اَسَه عیسی هات اَرِه شیَر اورشلیم ئو چیِ نوم معبد. اَر اورَه سِیل کِردی اَر کُل چیئَلی گه اَر ایلا ئو اَلا بینی، مِنتائای اَرِیَگه دیر وخد بی وَه‌گَرد اَ دوازَه نفرَ چی اَرِه آبادی بِیت‌عَنْیا.
عیسی نُئِرَ مِهِه اَر دار انجیر
12وَه صوایکا، وخدی اژ بِیت‌عَنْیا چیَ دِریر، عیسی وِرسِنی بیتی. 13اژ دویر دار انجیری دیتی گه وَلگ داشدی؛ اَسَه چیِ نوا تاگَه بوئینی مَتونی اِ قِ اَ دارَ میوَه بِهِئَه دی. وخدی چیِ نزیک دار، بِخِر اژ وَلگ چیئی اِ قِ‌آ نَهَردیَ دی، اَرِیَگه هَنی فصِل انجیر نوئی. 14اَسَه وَه اَ دارَ وِتی: «هرگِس نِماو کسی اژ تو میوَه بیری!» شاگردَلی یِئونَ شنَفت.
عیسی معبد تَمیسَ مِهِه
15وخدی رَسین اَر شیَر اورشلیم، عیسی چیِ نوم معبد ئو بِنیا نا اَر تار کِردِن کسَلی گه اَر اورَه مامِلِئونَ مَهَرد. او تختَل صرافَل ئو بَنِ‌بِساط کموترفِروشَل چاوارشا کِردی 16ئو صِلا ناتی کسی اَرِه جاواز کِردِن چیئی اِنوم قِلا معبد رد بو. 17اَسَه تیَلیم دانی ئو وِتی: «مَر اِ نُسَخ مقدّس نَنُیسیاءَ گه،
«”وَه مال مِنَ موشِن مال دوعا،
اَرِه کُل قومَل“
مِنتائای هُمَه اَوتونَ کِردیَسَ ’لونَه دُزَل‘.»
18رِئیسَل کاهنَل ئو مَلِمَل تورات وخدی یِئونَ شنَفت، وَه دُم رئی‌ایکا بین تاگَه اژ بِن بیَرنی، اَرِیَگه زِلِئون اَژینَ مَچیاتی، اَرِیَگه کُل جیَمیَت اژ تیَلیم دائِنی بِلُجوئیو هاتوئی. 19وخدی بیَ ایوارَه، عیسی ئو شاگردَل اژ شیَر چِنَ دِریر.
حُشگا بیئِن دار انجیر
20صوشفق، اَرنوم رئی، دارَ انجیرِهِئو دی گه اژ ریشی حُشگا بوئی. 21پطرس یَه آوِردیَ ویر ئو وِتیَ عیسی: «استاد سِیل کَ! دار انجیری گه نُئِرِت کِردَ بی، حُشگا بیَ.» 22عیسی جوواو داتی: «وَه خدا ایمونتو داشدوئی. 23حخیختاً، موشِمَ بینتو، اَرّ کسی وَه ایی کویَ بوشی، ”اِ جا بوریَ دِریر، ئو بِکُوءِ اِنوم دریا،“ ئو چِرچ اَر دل نیَری بلکِم ایمو داشدوئیتی گه اَ چیئَه گه موشی ماو اَرِه او اَنجومَ ماو. 24اِسَه موشِمَ بینتو، هر چَتونی گه اِ دوعا بِ، ایمونتو داشدوئی گه اَوتونَ گِرتیَ ئو ماوَ هِن هُمَه.
25«اِسَه هر وخد دوعا مِهِینو، اَرّ اژ کسی چیئی ها دلتون‌اِر، او بوئَشخِنِن تاگَه باوَه هُمِه‌یش گه ها آسمون‌اِر، تصقیرَلتو بوئَشخِنی. 26[مِنتائای اَرّ هُمَه نوئَشخینو، باوَه هُمِه‌یش گه ها آسمون‌اِر، تصقیرَلتو نِموئَشخِنی.]»
سؤال اِبارَه قدِرت‌واختیار عیسی
27اونَ یِگِلی‌تِر هاتِن اَرِه اورشلیم. وخدی گه عیسی اِنوم معبدَ مَچیاءَ رئیا، رِئیسَل کاهنَل ئو مَلِمَل تورات ئو شیخَل هاتِنی اَرِه تک، 28پِرسیو: «وَه چه حَخی ایی کارِلَ مِهِین؟ کی حخ اَنجوم دائِن ایی کارِلَ داسیَ بینِت؟» 29عیسی جوواو داتی: «مِن‌یش اژ هُمَه یِه چیئَه مَپِرسِم. جوواوما دَن تاگَه بوشمَ بینتو گه وَه چه حَخی ایی کارِلَ مَهَم. 30خُسِل تیَمید یحیی اژ جونِم خدا بی یاگَه اژ جونِم اِنسو؟ جوواو بیَن.» 31اونَل اِ بِن ووژو شورو کِرد، وِتو: «اَرّ بوشیم، ”اژ جونِم خدا بی“، موشی، ”اَنی اَرِه‌چَه ایمونتو ناوِردَ بی؟“ 32اَرّ بوشیم، ”اِ اِنسو بی“…» -اونَ اژ مردِم زِلِئونَ مَچیا، اَرِیَگه کُل مردِم یحیی‌ئونَ پِخَمَرَ مَذِناسد. 33اَسَه جوواوُ داءَ عیسی: «نِمَذانیم.» عیسی وِتی: «مِن‌یش نِموشِمَ بینتو گه وَه چه حَخی ایی کارِلَ مَهَم.»
@ 2024 Korpu Company