यहून्ना 7
7
ईसु और बाके भईया
1इन बातौं के बाद ईसु गलील मै घूमतो फिरतो रैहओ। बौ यहूदिया मै ना जानो चाँहै हो, कैसेकै बहाँ के यहूदी नेता बाकै मार डान्नै के ताँई ढूंड़ रए हे। 2#7:2 इस तौहार मै यहूदी लोग तम्बूऔ मै रैहकै अपने पूरबजौं कै रेगिस्तान मै 40 साल तक भटकते रैहनै की याद मै मनाबै हे। यहूदिऔं को झौपड़िऔ को तौहार आनैई बारो हो। 3इसताँई ईसु के भईयौ नै बासै कैई, “इस जघै कै छोड़कै तेकै यहूदिया चले जानो चँईऐ। ताकि तेरे चेला बी उन कामौ कै देख सकै जिनकै तू करै है। 4जो आदमी दूसरौं की नजरौ मै इज्जत बनानो चाँहबै है बौ अपने कामौ कै चोरी-छिपे ना करै है। अगर तू चमत्कार के कामौ कै करै है तौ अपने आपकै दुनिया के सामने दिखा।” 5कैसेकै बाके भईयौ नै बी बाके ऊपर बिसवास ना करो हो। 6तब ईसु नै उनसै कैई, “मेरो टैम अबी ना आओ है, पर तुमरे ताँई हर टैम ठीक है। 7दुनिया तुमसै दुसमनी ना कर सकै है पर मैंसै करै है, कैसेकै मैं जा बात की गभाई देवौ हौं, कै उनके काम बुरे हैं। 8इस तौहार मै तुम जाऔ मैं ना जा रओ हौं कैसेकै मेरे ताँई अबी सई टैम ना आओ है।” 9ऐंसो कैनै के बाद ईसु गलील मै रुक गओ।
झौपड़िऔ के तौहार मै ईसु को उपदेस
10जब बाके भईया तौहार मै चले गए, तौ बौ बी गओ। पर बौ खुले तौर सै ना, छिपे तौर सै गओ हो। 11यहूदी नेता बाकै तौहार मै जौ कैते भए ढूंड़ रए हे, “बौ आदमी कहाँ है?”
12आदमिऔ मै ईसु के बारे मै चोरी-छिपे तरै-तरै की बात चल रई हीं। कुछ आदमी कैबै हे, “बौ भलो आदमी है।” कुछ कैबै हैं, “ना, बौ आदमिऔ कै बैहकाबै है।” 13कोई बी बाके बारे मै खुल कै बात ना कर पा रओ हो, कैसेकै बे आदमी यहूदी नेताऔं सै डरै हे।
14जब तौहार को आधो टैम बीत गओ, तौ ईसु मन्दर मै गओ और उपदेस देल लगो। 15यहूदी नेताऔं नै अचम्बो करते भए कैई, “जा आदमी कै हमरे सास्तरौं को गियान कहाँ सै आ गओ जबकि जानै हमरे सास्तरौं कै ना पढ़ो?” 16तब ईसु नै जबाब देते भए कैई, “मेरो उपदेस मेरो ना, पर बाको है जिसनै मैं भेजो हौं। 17अगर आदमी बौ कन्नो चाँहै, जो परमेसर की इच्छा है तौ बौ जौ जान जागो कै जो उपदेस मैं देवौ हौं बौ परमेसर को है, या मैं अपनी ओर सै देरओ हौं। 18जो अपनी ओर सै बोलै है बौ अपनी बड़ाई चाँहबै है, पर जो अपने भेजनै बारे की बड़ाई चाँहबै है बौई सच्चो है, और बामै कोई खोट ना है। 19का मूसा नै तुमकै नियम ना दए? पर फिर बी तुम्मै सै किसी नै बी नियम को पालन ना करो। तुम मैंकै मार डान्नै के ताँई काए ढूंड़ रए हौ?”
20आदमिऔ नै जबाब दओ, “तैमै दुसट आत्मा है, कौन तेकै मार डान्नो चाँहबै है?”
21ईसु नै जबाब देते भए उनसै कैई, “मैंनै एक काम करो और तुम सब अचम्बो करौ हौ। 22मूसा नै तुमकै खतना को नियम दओ हो। (जौ नियम मूसा को ना हो बलकन तुमरे बापदादौं सै चलतो आ रओ है), और तुम आराम कन्नै बारे दिन बालकौ को खतना करौ हौ। 23#यहून 5:9अगर आराम कन्नै बारे दिन किसी को खतना इसताँई करो जावै है कै मूसा को नियम ना टूटै तौ तुम मेरे ऊपर घुस्सा काए करौ हौ कै मैंनै आराम कन्नै बारे दिन एक आदमी कै पूरी तरै सै ठीक कर दओ हो? 24मौह देक्कै नियाय मत करौ, पर सच्चाई सै नियाय करौ।”
का ईसुई मसी है
25फिर ऐरूसलेम मै रैहनै बारे आदमिऔ मै सै कुछ नै कैई, “का जौई बौ आदमी ना है जिसकै बे मार डान्नो चाँहबै हैं? 26मगर देखौ बौ सब आदमिऔ के बीच मै बोल रओ है और बे कुछ बी ना बोल पा रए हैं। कहीं ऐंसो तौ ना है कै यहूदी नेता सच्ची मैई जान गए कै जौई मसी है? 27कुछ बी हो, हम जानै हैं कै जौ आदमी कहाँ को है, पर जब मसी आगो, तौ कोई बी ना जानैगो कै बौ कहाँ सै आओ है।”
28तब ईसु नै मन्दर मै सिक्छा देते भए जोर सै कैई, “तुम मैंकै जानौ हौ, और जौ बी जानौ हौ कै मैं कहाँ सै आओ हौं। मैं अपने आप सै ना आओ, पर बौ जिसनै मैं भेजो हौं बौ सच्चो है, जिसकै तुम ना जानौ हौ 29पर मैं बाकै जानौ हौं कैसेकै मैं बाई की ओर सै हौं और बाई नै मैंकै भेजो है।”
30फिर बे बाकै पकड़नै की कोसिस कन्नै लगे, मगर किसी नै बी उसके ऊपर हात ना लगाओ, कैसेकै बाको टैम अब तक ना आओ हो। 31पर भीड़ मै सै भौत से आदमिऔ नै बाके ऊपर बिसवास करो और कैललगे, “जब मसी आगो तौ का बौ इस्सै और जादा चिन्न दिखागो?”
ईसु कै पकड़नै की कोसिस
32फरीसिऔं नै भीड़ कै ईसु के बारे मै इस बात की काना फूसी करते सुनो, और मुक्ख पुजारिऔं और फरीसिऔं नै बाकै पकड़नै के ताँई मन्दर के चौकीदार भेजे। 33तब ईसु नै कैई, “मैं थोड़ी देर तक और तुमरे संग हौं, तब मैं बाके धौंरे चलो जांगो जिसनै मैंकै भेजो। 34तुम मैंकै ढूंड़ौगे, पर मैं ना मिलंगो, और जहाँ मैं हौं, बहाँ तुम ना आ सकौगे।”
35तब यहूदिऔं नै आपस मै कैई, “जौ आदमी कहाँ जानो चाँहै है कै हम बाकै ना ढूंड़ सकैं? का बौ उन यहूदी लोगौ के धौंरे जागो, जो यूनानी लोगौ के बीच मै इतै-उतै होकै बसे पड़े हैं, और का बौ यूनानी लोगौ कै बी सिक्छा देगो? 36जौ कैसी बात है, जो बानै कैई कै, ‘तुम मैंकै ढूंड़ौगे पर मैं ना मिलंगो, और जहाँ मैं हौं बहाँ तुम ना आ सकौगे’?”
जिन्दगी जल की नदियाँ
37तौहार के आखरी और खास दिन मै, ईसु खड़ो भओ, और जोर सै कैललगो, “अगर कोई पियासो है तौ मेरे धौंरे आय और पिऐ। 38जो मैं मै बिसवास करै है, जैसो पबित्तर सास्तर मै कैई गई है, ‘बाके दिल मै सै जिन्दगी के जल की नदियाँ बैह लिकरंगी।’” 39उसनै जौ बचन बा आत्मा के बारे मै कैई, जिसकै बाके ऊपर बिसवास कन्नै बारे पानै मै हे। आत्मा अबी तक ना उतरो हो, कैसेकै ईसु अब तक महिमा मै ना पौंचो हो।
ईसु के बारे मै आदमिऔ के बीच मै फूट
40तब भीड़ मै सै कुछ आदमिऔ नै जब इन बचनौ कै सुनो तौ कैई, “जौ तौ सच्ची मैई बौई नबी है।” 41कुछ आदमी कैरए हे, “जौई आदमी मसी है।” कुछ और आदमी कैरए हे, “का मसी गलील सै आ सकै है? 42का पबित्तर सास्तर मै जौ ना कैओ गओ हो कै मसी दाऊद के बंस सै और बैतलहम गाम सै आगो, जहाँ दाऊद रैहबै हो?” 43उसके कारन आदमिऔ मै फूट पड़ गई। 44कुछ बाकै पकड़नो चाँहै हे पर किसी नै बी बाके ऊपर हात बी ना लगाओ। 45तब मन्दर के चौकीदारौं के बापस लौहटने मै मुक्ख पुजारिऔं और फरीसिऔं नै उनसै पूँछी, “तुम बाकै काए ना लाए?” 46चौकीदारौं नै जबाब दओ, “आज तक किसी नै कबी ऐंसी बात ना कैई जैसी बौ कैबै है।” 47तब फरीसिऔं नै उनकै जबाब दओ, “कहीं तुम बी तौ ना बैहकाए गए हौ? 48का यहूदी नेताऔं या फरीसिऔं मै सै बाके ऊपर किसी नै बिसवास करो है? 49पर जौ बेबकूफ भीड़ जो हमरे नियम ना जानै है, सरापित है।” 50#यहून 3:1,2नीकुदेमुस नै जो पैले ईसु के धौंरे आओ हो और फरीसिऔं मै सै एक हो बानै कैई, 51“हमरो नियम किसी आदमी कै, जब तक पैले बाकी सुन ना ले और जौ ना जान ले कै बौ का करै है, दोसी ना ठैराबै है।” 52उनौनै बाकै जबाब देते भए कैई, “कहीं तू बी तौ गलील को ना है? सास्तरौं कै पढ़ौ तौ तुमकै पतो लगैगो कै गलील सै कोई नबी ना आनै को।” 53#7:53 यूनानी भासा के सबसै पुराने लेखौं मै अध्याय 7 के आयत 53 से, 8 अध्याय के 11 आयत तक ना मिलै है। फिर बे सब बहाँ सै अपने अपने घर चले गए।
New Life Compute Institute [NLCI] - CC BY-NC-ND 4.0