YOHANI 5
5
Ukubumbulusigwa pakisiba
1Panyuma pali sisisi, kilinkuyapo iKyaka kya baYuda, yope Yesu alinkufyuka ukubuka mu Yerusalemu. 2Mulamula mu Yerusalemu, pakipata kya ng'osi, kilipo ikisiba iki nkiHiburi bikuti Betisaida, kili namatembe mahano. 3Mo bagonangamo ababine ba bingi, nabafwamaso, naba bikukwema, naba balalile umbili.#5.3 Amasimbo gamo gikongelelako amavesi 3b-4: Aba bagulilaga ukusukanika kwa misi. Namanga ugwandumi gwa Ntwa asulukaga nkisiba ntubalilo ntubalilo, alinkugayugania amisi; lelo uyu linga atalilepo ukwingila mmisi bo gafumile pakuyuganika, abumbulukaga ububine bosa ubu linga ali nayo. 5Lelo alipo umundu yumo papo, uyu agonile nububine bwake ifyinja amalongo matatu na fihano na fitatu (38). 6Umwene Yesu bo ambwene alambalele, kangi bo amenye ukuti agonile papo akabalilo akatali, alinkundalusya alinkuti, “Bule gwiganile ukubumbulusigwa?” 7Popapo umbine yula alinkumwamula alinkuti, “Malafyale, une ngaya numundu ugwa kumbika nkisiba bo amisi gikusukamka; apa linga nikuti mbuke une, uyungi ikundalilapo ukusuluka.” 8Popapo Yesu alinkumbula alinkuti, “Sumuka, pimbaga ubulili bwako gwendege.” 9Nakalinga itolo umundu yula alinkubumbuluka, alinkupimba ubulili bwake, alinkubuka.
10 #
Nehe 13.19; Yere 17.21 Isiku lilyo pali po paSabati. Popapo lelo abaYuda balinkumbula uyu abumbulusigwe balinkuti, “Po paSabati, sitikwitikisigwa ukuti upimbege ubulili bwako.” 11Umwene alinkubabula alinkuti, “Uyu ambumbulusyaga yo ambulile ukuti, ‘Pimbaga ubulili bwako, gwendege.’ ” 12Abene balinkundalusya balinkuti, “Ywani, umundu uyu akubulile atile, ‘Pimba ubululi bwako gwendege?’” 13Loli umundu uyu abumbulusigwe akalimmenye umundu uyu alimbumbulwisye, papo ikilundilo kya bandu kyalipo papo. 14Panyumba pali sisisi, Yesu alinkumwaga umundu yula Nnyumba ya Kyala, alinkumbula alinkuti, “Keta, ubumbulwike lilino, ungatulaga inongwa kangi ukuti singisa kukwisilaga imbibipo ukukinda.” 15Popapo umundu yula alinkubuka, alinkwakubabula abaYuda alinkuti, “Yo Yesu uyu alimbumbulwisye.” 16Panongwa iyi, abaYuda balinkumfwima Yesu, papo asibombile sisisi pisiku lya Sabati. 17Umwene Yesu alinkubamula alinkuti, “Tata ikubomba ukufika kulilino kuno, nanine nikubomba.” 18Panongwa iyi, abaYuda balinkongelapo ukulonda ukuti bangoge, papo yikali yene yinongwa ya komola Sabati, loli papo kangi atigi Kyala yo Tata; ipelaga mwene ukuya bo yu Kyala.
Amaka ga Mwana
19Popapo Yesu alinkubamula alinkuti, “Naloli nikubabula une nikuti, uMwana akamanya ukubomba kamo mwene itolo, loli kene kako ikumbona uGwise ikubomba; buno kosa aka uGwise ikubomba, ko aka yope uMwana ikubomba. 20Namanga uGwise anganile uMwana, ikunnangisya syosa isi ikubomba yuyo; kangi isakunnangisyaga imbombo ingulumba ukukindapo pali sisisi, ukuti umwe muswigege. 21Buno bo apa uGwise ikubasyusya abafwe nukubapa ubumi, mo mumo yope uMwana ikubapela ubumi aba iganile ukubapa. 22Buno uGwise atikundonga yumo, loli ubulongi bosa ampele uMwana; 23ukuti bosa bamwimikege uMwana, bo mumo bikumwimikila uGwise. Uyu linga atikumwimika uMwana, yo atikumwimika na yu Gwise uyu antumile.
24“Naloli nikubabula une nikuti, Uyu linga ikupilika ilisyu lyangu, nukumwitika uyu andumile une, yo ali nabo ubumi bwa bwila; yo atikwisapo pabulongelo, yo alobwike ukufuma mbufwe abukile mbumi. 25Naloli nikubabule une nikuti, kikwisaga akabalilo, nalilino kalipo, apa abafwe bisakulipilikaga ilisyu lya Mwana gwa Kyala, abene aba bapilike bisakuyaga bumi. 26Namanga bo apa uGwise ali nabo ubumi mmyake yuyo, bunobuno ampele yope nuMwana ukuya nubumi mmyake. 27Kangi ampele amaka aga kulongela, papo yo Nnyamundu yuyo. 28Syo munganyomokaga sisisi, buno kikwisaga akabalilo, apa bosa aba bali mmapumba bisakulipilikaga ilisyu lyake, po bende nukusoka; 29#Dan 12.2aba babombaga munu bisakusyukilaga kubumi, naba babombaga imbibi bisakusyukilaga kukulongigwa.”
Ukunsisimikisya Yesu
30“Une ngamanya ukubomba kamo nimwene, muno nikupilikila mo mumo nikulongela; nubulongi bwangu bugolofu itolo, papo ndikubulonda ubwigane bwangu nimwene, loli ubwa uyu andumile. 31Linga nikwisisimikisya nimwene, ulusisimikisyo lwangu lukaya lwa naloli. 32Aliko uyungi uyu ikusisimikisya une, kangi menye ukuti ulusisimikisyo lwake, ulu ikusisimikisya une lwa naloli. 33#Yoh 1.19-27; 3.27-30Umwe mwatumile indumi kwa Yohani, umwene alinkusisisimikisya isya naloli. 34Ulusisimikisyo lwangu lutikufuma kumundu, loli nikubabula umwe sisisi ukuti mupokigwege. 35Umwene yo ali bo inyale iyi yikwaka nukumulika; loli umwe mwaliganile ukusekelapo panandi itolo ndumuli lwake. 36Loli ulusisimikisyo ulu ndinalo une, lo lukulumba ukulukindapo ulwa Yohani. Namanga nikubomba une imbombo isi ambele Tata, ukuti nsimalisyege, syo sikusisimikisya une ukuti Tata andumile. 37#Mat 3.17; Mar 1.11; Luk 3.22Kangi na yu Tata uyu alindumile, yope asisimikisye une. Umwe mukapilikamo siku ilisyu lyake, nukumbonamo kope mukambonamo siku; 38lyope nisyu lyake likayamo mmyinu, papo uyu alintumile mutikumwitika. 39Mukulonda mmasimbo papo mukuti mo tukubwagaga ubumi bwa bwila; kabuno go gago gikusisimikisya une. 40Pope umwe mukusita ukwisa kumyangu, ukuti muyege nubumi.
41“Une ndikululonda ulwimiko lwa bandu, 42loli mbamenye umwe ukuti mukaya nalo ulugano lwa Kyala nkati mmyinu. 43Une nisile mmaka ga Tata, loli umwe mutikunyambilila; linga uyungi ikwisila mmaka gake yuyo, yo mwisakumwambililaga. 44Po mubagile bulebule ukwitika, mwe mukupana ulwimiko mwe babo batupu, loli ulwimiko ulu lukufuma kwa Kyala, uyu ali yumoywene, lo mutikululonda? 45Munginogonaga ukuti une nisakubapaga inongwa kwa Tata, mma, uyu ikubapa inongwa umwe yo Mose, uyu mukunsubila umwe. 46Linga mwamwitikaga Mose, angali mukunyitika nanine, buno umwene asimbile isi sikunjoba une. 47Loli linga mutikusitika isi asimbile, po mwisakugitikaga bulebule amasyu gangu?”
BAIBULO INONGWA INUNU © Bible Society of Malawi, 2017.