YOHANI 3
3
Yesu na Nikodemu
1Lelo alipo yumo umundu umFarisai, uyu ingamu yake ali yo Nikodemu, unkulumba mbaYuda. 2Yo alinkwisa kwa Yesu pakilo, alinkumbula alinkuti, “Rabi, tumenye ukuti uli mmanyisi, ufumile kwa Kyala, namanga nayumo akamanya ukupela ifika ifi kupela ugwe, pene papo linga Kyala ali nagwe.”
3Umwene Yesu alinkumwamula alinkuti, “Naloli nikukubula une nikuti, umundu akabagila ukububona ubutwa bwa Kyala, loli pene apa linga ikupapigwa kangi.”
4Popapo Nikodemu alinkuyoba nagwe alinkuti, “Abagile bulebule umundu ukupapigwa bo nkangale? Kali abagile ukwingila munna munda ulwa bubili ukuti apapigwege?”
5Umwene Yesu alinkwamula alinkuti, “Naloli nikukubula une nikuti, umundu akabagila ukwingila mbutwa bwa Kyala, loli pene apa linga apapigwe kumisi na kwa Mbepo. 6Kosa aka kapapigwe kumbili go mbili, naka kapapigwe kwa Mbepo yo mbepo. 7Ungaswigaga apa ngubulile ukuti, fikuti mupapigwege kangi. 8Umbelo gukukulila kuno gwiganile, akogo kake ko kukapilika, loli utikugumanya kuno gukufuma, nakuno gukubuka; bo ali bunobuno gwesa uyu linga apapigwe kwa Mbepo.”
9Popapo Nikodemu alinkundalusya alinkuti, “Syo sipelege bulebule sisisi?”
10Umwene Yesu alinkumwamula alinkuti, “Ugwe uli mmanyisi mbanya Israeli, syope na sisisi ukasimanya? 11Naloli nikukubula une nikuti, uswe tukuyoba sisyo tusimenye, tukusisimikisya sisyo tusibwene; loli ulusisimikisyo lwitu mutikulwambilila. 12Linga nikubabula umwe isya nkisu, loli mutikwitika, po mwisakwitika bulebule linga nikubabula isya kumwanya? 13Nayumo akafyukako kumwanya, loli mwene uyu asulwike ukufuma kumwanya, yo yu Nnyamundu, uyu ali kumwanya.
14 #
Kuba 21.9
“Bo papo Mose inulaga injoka mmatengele, bo fikuti yope na Nnyamundu inuligwege, 15ukuti gwesa uyu ikumwitika, ayege nubumi bwa bwila. 16Namanga bo akiganile bunobuno Kyala ikisu, ko kwenda nukukipa uMwanake yumoywene ntiga, bosa aba bikumwitika ukuti bangapyutigwaga, loli babwage ubumi bwa bwila. 17Namanga Kyala akalintumile uMwanake nkisu ukuti akilonge ikisu, loli ukuti ikisu kipokeligwege mmyake. 18Uyu linga ikumwitika yo atikulongigwaga; loli uyu linga atikwitika yo alongeligwe ngani, papo akayitika ingamu ya Mwana gwa Kyala yumoywene ntiga.
19“Ubu bo bulongi ubwa kuti, ulumuli lwisile nkisu, loli abandu bayiganile ingisi ukukinda ulumuli, papo imbombo syabo syali mbibi. 20Buno gwesa uyu linga ikubomba imbibi, yo ikulubenga ulumuli, kangi atikwisa kulumuli, ukuti imbombo syake singisakuyaga pabwelu. 21Loli uyu ikubomba isya naloli, yo ikwisa kulumuli, ukuti isi ikubomba sibonekege itolo pabwelu ukuti sibombeligwe mwa Kyala.”
Yesu na Yohani
22Panyuma pali sisisi, po Yesu nabafundigwa bake balinkubuka nkisu kya Yudai; alinkuya mumo pamopene nabo, alinkosya. 23Loli yope Yohani osyaga pa nyibuko sya misi ga Enoni pabupipi nikisu kya Salimu, namanga po amisi galipo mingi, popapo abandu balinkwisa balinkosigwa. 24#Mat 14.3; Mar 6.17; Luk 3.19-20Namanga Yohani akali ukwigaliligwa nnyumba ya bannyololo. 25Popapo lulinkutupuka ulukani pakati pabafundigwa ba Yohani nunYuda yumo panongwa ya lwiho lwa kwelusya. 26Abene balinkwisa kwa Yohani balinkumbula balinkuti, “Rabi, uyu ali nanugwe isilya lila lya Yordani, uyu unsisimikisyege, keta yope ikosya, abandu bosa bikunkulukila!” 27Umwene Yohani alinkwamula alinkuti, “Umundu akabagila ukuya nafyo fimo, pene papo linga apegigwe ukufuma kumwanya. 28#Yoh 1.20Yuyumwe mukusisimikisya une ukuti nayobile natile, ‘Une ngaya ne Kristi, loli ndumigwe itolo nkyeni mmyake.’ 29Uyu ali nunkikulu uyu ikwegigwa yo mwegankikulu, loli ummanyani gwa mwegankikulu, uyu ikwima nukumpilikisya, yo ikulisekelela fiyo ilisyu lya mwegankikulu. Popapo lelo ulusekelo lwangu ulu lufikilepo. 30Umwene fikuti afyukege, une loli ndogotelege.”
Uyu ikufuma kumwanya
31Uyu afumile kumwanya, yo ali pamwanya pali bosa; uyu afumile nkisu yo gwa nkisu, kangi ikuyoba isya nkisu. Umwene uyu afumile kumwanya, yo ali pamwanya pali bosa. 32Isi asibwene na isi asipilike syo ikusisisimikisya, loli nayumo atikulwambilila ulusisimikisyo lwake. 33Umwene uyu alwambilile ulusisimikisyo lwake, yo ikusisimikisya ukuti Kyala yo gwa naloli. 34Namanga uyu Kyala antumile, yo ikugayoba amasyu ga Kyala; buno Kyala ikumpa Mbepo gwake uyu akelilwile itolo. 35#Mat 11.27; Luk 10.22UGwise anganile uMwana, kangi ampele fyosa nkiboko kyake. 36Uyu ikumwitika uMwana, yo ali nabo ubumi bwa bwila; loli uyu ikumfuya uMwana yo atisakububonaga ubumi, yo ingalalisi sya Kyala sikuyaga pamyake.
BAIBULO INONGWA INUNU © Bible Society of Malawi, 2017.