Matius 9
9
Ma pomambuh dulun co lumpuh, Yesus mombukti arop-Eh bokuasa mampun dosa
9:1-8
(Mrk. 2:1-12; Luk. 5:17-26)
1Paluh, Yesus hintang kawan murid-Eh cakat ponah jukung holuh mitah hopuli danau Galilea yoh. Opaiyoh, Are dapot hia kota-Eh leh.#9:1 Maksud eh, kota Kapernaum, ika Yesus nukui. 2Songola, pira-pira dulun dombut mehen ico dulun lumpuh co kaling nyan tungkui ihap. Kotika Yesus noto iman doh bahai, Yesus mantun ma dulun lumpuh cioh, “Anaku-Kuh, Aroh takut. Dosammu ocop tomampun.”
3Oko pira-pira guru agama Yahudi ngoneh iyoh. Iroh molai bopikir ponah atoi, “Dulun cotuh mohina Mohotara!”
4Yesus monau pikiran doh, jadi, Are mantun, “Kura pikiran me kojahat onon? 5Comoh co meleh sutir, mantun: Dosammu ocop tomampun, atawa mantun: Kokatbat hintang nyalanbat? 6Jadi, ina ikan monau bahawa Anak Kolunon co bokuasa mampun dosa nyan dunia tuh!”
Paluh Yesus mantun ma dulun co lumpuh yoh, “Tonjokbat, mangkat ika poniruimu, hintang bulibat mahah lopomu!” 7Jion dulun cioh kokat paluh buli. 8Waktu kawan dulun kito iyoh, iroh takut ma kuasa-Eh. Iroh potara Mohotara co mihi kuasa isan iyoh hia kolunon.
Yesus hojolahan ma kawan dulun co bodosa
9:9-13
(Mrk. 2:13-17; Luk. 5:27-32)
9Opah iyoh, Yesus tulak ingkan intin. Are kito oko ico dulun Yahudi tukang nakih pajak indan pomorintahan Romawi. Araieh Matius, dahat tuot nyan lopo ika ngumpur pajak. Yesus mantun ma Matius, “Umba Akuhbat!” Matius tonjok, paluh umba Yesus.
10Opaiyoh, Yesus hintang kawan murid-Eh kuman nyan lopo Matius. Oko orong tukang nakih pajak hintang kawan dulun co bodosa dombut umba kuman homboh-homboh ma iroh. 11Nyan waktu kawan pomimpin agama Yahudi ingkan kolompok Parisi kito aang cioh, iroh kolomumut hia kawan murid Yesus. Hien doh, “Kura guru me kuman homboh-homboh ma kawan tukang nakih pajak hintang kawan dulun co bodosa?”#9:11 Kawan pomimpin agama Yahudi hapo sotilah cotuh ika porandah kawan dulun co tomangap aroh pantas. Takih pajak korinah tongodolee dulun Yahudi bokon tului iroh bogawi indan pomorintahan Romawi. Iroh mahi ngumpur meleh orong pajak hangki co tonantu pomorintah.
12Tapi Yesus ngoneh antun doh yoh. Jadi Are mantun, “Kawan dulun co sehat aroh porulu dokter. Tapi kawan dulun co hotoro mositi nongkomo porulu dokter. 13Jadi, tulak hintang polajari maksut antun Mohotara tuh: ‘Hangki mihi kurban komolum indang-Kuh, Akuh meleh nyau ina ikan kopomasi me ma dongam.’#9:13 Ingkan buku Hosea 6:6. Awi Akuh aroh dombut ika makat iroh co mangap arop eh bujur. Tapi, Akuh dombut ika makat kawan dulun co bodosa ina iroh naat kawan dosan doh.”
Yesus monjelas alasan kawan murid-Eh aroh puasa
9:14-17
(Mrk. 2:18-22; Luk. 5:33-39)
14Opah iyoh, kawan murid Yohanes Pombaptis dombut. Iroh mantun ma Yesus, “Kaih hintang kawan dulun Parisi derek puasa. Kura kawan murid-Mu aroh?”
15 Hien Yesus museh hapo tindung cotuh, hiah ponganten bakah incah oko hokohalo ma kawan jolahaieh mositi kawan jolahaieh yoh aroh puasa. Tapi waktueh angar dapot, ponganten bakah tomonu ingkan iroh. Nyan waktu iyoh, iroh angar puasa.
16 Paluh Yesus majar kole ma tindung co bokon, “Arelu oko dulun co numpang tirat lembon tomuun ma kerep benang co incah puga. Awi amun sanioh, benang co incah puga angar ngorisut paluh nirat lembon cioh. Sohinga tirat nyan lembon cioh angar jarin meleh koduhui. 17Ma cuntu bokon, arelu oko dulun co miing angur puga ponah kantong upak komolum co tomuun. Dulun aroh umpi iyoh awi kotika angur puga momaus lanoh, kantung eh bolontup. Jadi kantung eh hancur paluh angur eh tumbak. Angur co puga sobulih tomiing ponah kantung co puga ka. Jadi, duo-duoeh topika pio.”#9:17 Benang puga hintang angu puga molambang porubahan co tomoroncana Mohotara sorinai Are moncipta dunia. Porubahan cioh tojadi hiah kotika Mohotara nyuhu Laca Co Tomonjanji-Eh hia dunia tuh. Ma tindung cotuh, Yesus monjelas dulun sobulih tohoku arop bahawa pikiran hintang atoi doh sobulih tongombaa-Eh. Baya dulun co porocaya bahawa Yesus iyohco Laca Co Tomojanji Mohotara boraoi tongombaa.
Yesus ngopolum hopuli ico daja hintang Yesus pomambuh ico beti bawe
9:18-26
(Mrk. 5:21-43; Luk. 8:40-56)
18Lambak Yesus hopander ma kawan murid Yohanes Pombaptis yoh, oko ico kopala lopo ika sombayang dombut hia-Eh. Are nukup ngelop kalop nyan muka Yesus. Hie eh, “Anak kuh co bawe punai leh diuh. Tapi dombutboh. Ngoncamak are, maka are angar bolum hopuli.” 19Jadi, Yesus tonjok. Are hintang kawan murid-Eh tulak ngonulu kopala lopo ika sombayang cioh.
20-21 Ponah solana hia idi, oko ico bawe co hotoro ngonaha. Ocop duo balas toun kotahieh are buah toro cioh. Are mantun ponah atoieh, “Asar leh akuh ngoncimai jubah Yesus, mositi akuh angar mambuh!” Jadi, are ngoroni Yesus ingkan uwoi likut#9:20-21 Mungkin bawe cioh takut awi ocop sadar Yesus bokuasa. Monurut kawan hukum agama Yahudi, are tomangap aroh borasih tului ngonaha. Jadi, mungkin ka are takut tonopoh atawa tomohukum. paluh ngoncimai rumbai jubah-Eh. 22Tapi Yesus molingo hintang noto bawe cioh. Hie-Eh, “Konduang-Kuh, Aroh takut. Iko tonyolamat awi iko ocop porocaya ma-Akuh.” Ingkan hiah iyoh ka, bawe cioh mambuh.
23Opaiyoh, iroh dapot nyan lopo kopala lopo ika sombayang yoh. Yesus muntam paluh noto kawan tukang nyulim usik lio. Oko ka orong dulun boho-boho. 24Maka Are mantun ma iroh, “Pusitbat, awi daja cotuh aroh matoi. Are baya tirui.” Tapi, iroh ngotao Are. 25Opah kawan dulun taiyoh pusit, Yesus muntam hia ponah bukung daja cioh. Hayak Yesus nantot siluieh, daja cioh bolum hopuli paluh tonjok. 26Paluh borita tintun onon tosebar hia ngolauh derah cioh.
Yesus pomambuh duo dulun bobuto
9:27-31
27Opah Yesus tulak ingkan intin, oko duo dulun bobuto pokonulu-Eh. Iroh mantun muhat, “Yesus, Laca ingkan koturunan Daud!#9:27 Laca ingkan koturunan Daud iyohco tisi bokon indan Kristus, ‘Laca Co Tomonjanji Mohotara’. Masi kaih!” 28Kotika Yesus muntam hia ponah lopo, duo dulun bobuto yoh dombut hia-Eh. Yesus ngisok hia iroh, “Main ikan porocaya bahawa Akuh lian pomambuh ikan?”
Iroh museh, “Iyoh, Tuhan, kaih porocaya.”
29Jadi Yesus ngoncamak matan doh samir mantun, “Awi ikan porocaya, mambuhbat.” 30Maka iroh lian noto hopuli. Paluh, Yesus tegas lau ngosiit iroh. Hie-Eh, “Aroh ngesah tintun otuh hia ome bewe!” 31Tapi iroh tulak ngesah tintun Yesus nyan ngolauh derah cioh.
Yesus pomambuh dulun uong
9:32-34
32Lambak dulun duo iyoh pusit ingkan lopo, oko ico dulun uong tomehen hia Yesus. Dulun uong cioh tomorasuk roh jahat. 33Opah Yesus ngomuho roh jahat cioh, dulun uong cioh lian hopander bat. Dulun orong kagum. Hien doh, “Poristiwa isan otuh arinai piji tojadi nyan Israel!” 34Tapi kawan pomimpin agama Yahudi ingkan kolompok Parisi mantun, “Are ngomuho kawan roh jahat hapo kuasan Lacan Setan!”
Yesus nongkomo masi ma dulun orong
9:35-38
35Yesus koliling hia kokon kota hintang desa. Are majar ponah kawan lopo ika sombayang dulun Yahudi. Are momborita Tarung Pio tintun Korojaan Sorga. Are mahi pomambuh kawan dulun ingkan kokon toro hintang kosasi. 36Waktu Are kito dulun orong yoh, Are nongkomo masi ma iroh awi iroh ponah kosusah hintang korinah morulu pondohop, samah isan kawan domba co aroh empun gombala. 37Jadi, Are mantun ma kawan murid-Eh, “Hasir co porulu tomutoi cukup orong, tapi ponggawi ika mutoieh baya isut. 38Jadi, nyawotleh ma Tempun umo ina Are nyoruhan meleh orong ponggawi ika mutoi hasir imbun-Eh.”#9:37-38 Kiasan cotuh maksud eh, oko cukup orong dulun co nyau porocaya ma Yesus, tapi baya isut dulun ika momborita tintun Are. Jadi bodoa ma Mohotara ina Are pokatu meleh orong dulun ika momberita tintun Yesus.
