San Juan 10
10
Tuꞌun ndíchi xaꞌa corra nuu ñúꞌu kiti levo Saa ndi̱kaꞌan Jesús, káchi ra saa:
1―Ya ndaa káꞌan i xiꞌin ndo, iin taa, ra köo kíꞌvi chí yeꞌe nuu ñúꞌu levo, ra kuakiꞌvi inka ñaꞌñu ta süvi ra vaꞌa ku ra, ra kuiꞌna ku ra. 2Sundi ra kuakiꞌvi chí yeꞌe, ta ra ñaa ku paxto ra ndáa ri. 3Nda mií ra ndáa corra ikán ta xíni ra unku ra ndáa ri. Ta xúna ra yeꞌe ya kiꞌvi ri. Nda ni mií kiti levo ikán ta xa xíni ri tachi ra ndáa ri. Saa kána ra kivi iin iin ri, ta kána koo ri ini corra ikán. 4Tá sindiꞌi táva ra ri ini corra ikán ta ndíkunuu ra nuu ri, kuaꞌan ra, ta saa ndíkundikun ri sata ra kuaꞌan ri, chi xíni ri tachi ra. 5Sundi tá tu süvi ra ndáa ri ku ra, ta köo ndíkun ñaꞌa ri, xínu ri kuꞌan ri chi köo xíni ri tachi ra ―káchi Jesús.
6Ya yóꞌó ku iin tuꞌun ndíchi ndi̱kaꞌan Jesús ya sínaꞌa ra na ya kundaa ini na unkua kúni kachi ya, sundi köo ndi̱kundaa ini na.
Jesús ku paxto ra vaꞌa ni
7Saa ndi̱kaꞌan tuku Jesús xiꞌin na, káchi ra saa:
―Ya ndaa káꞌan i xiꞌin ndo: Yeꞌe ku yéꞌé nuu kuakee kiti levo. 8Ndiꞌi nda ki̱xi yachi tá täꞌan kixi yeꞌe, ta nda ikán ta süvi nda vaꞌa ku nda, nda kuiꞌna ku nda, yakan köo ndi̱xini soꞌo levo ya ndi̱kaꞌan nda. 9Táꞌan yéꞌé ikán ku yeꞌe, ta ndiꞌi na vaxi nuu i ta sikaku i na. Koo na tá kuꞌva íyo levo, kuakiꞌvi ri tin kána koo ri ini corra ikán, ta níꞌi ri ita xíxi ri.
10’Ta na kuiꞌna ta vaxi na kúni na sikuiꞌna na ri kaꞌni na ri tin sindiꞌi xaꞌa na ri. Sundi yeꞌe ta vaxi i ya taxi i kutaku na ndíkun yeꞌe, ta yáꞌa ni vaꞌa kundoo ndiꞌi na. 11Ta yeꞌe ku paxto ra vaꞌa ni. Chi paxto ra vaꞌa ni ta nda ndítaxi ra mií ra xaꞌa kiti levo sana ra. 12Ta iin ra kíꞌin yaꞌvi xaꞌa ya ndáa ra ri, ta süvi sana ra ku ri. Yakan tá xíni ra vaxi kiti ndivaꞌi ta síndoo ndaꞌa ndiꞌi ra ri, saa xínu ra kuaꞌan ra. Ta kiti ndivaꞌi íkan ri ya kúni mií ri xiꞌin levo ikán, saa iin xáta yava taꞌan ndiꞌi ri. 13Saa íkan ra chi süvi sana ra ku ri, ra kíꞌin yaꞌvi va ku ra yakan köo xáꞌni ra mií ra xíni ra ri.
14’Sundi yeꞌe ta ra paxto vaꞌa ni ku i. Xíni vaꞌa i levo sana i, ta saa tu mií va ri xíni vaꞌa ri yeꞌe. 15Tá kuꞌva xíni Iva i yeꞌe, saa xíni vaꞌa tu mií va i ra ta íyo tuꞌva i kuvi i xaꞌa levo sana i. 16Ta íyo ka inka ri ta süvi taꞌan ri ndóꞌni corra yóꞌó ku ri, ta xíniñuꞌu i kuꞌun i ndikuiso i ri kixi ri xiꞌin i. Chi ri ikán tá ná kana i ri ta kuni soꞌo ri tachi i, ta kixi ri xiꞌin i. Saa ndikitaꞌan ri kuñuꞌu ndiꞌi ri ini corra ta iin koo ndiꞌi ri, saa iin koo ra ndáa ri.
17’Xaꞌa ya ikán kua kúꞌvi ni ini Iva i xíni ra yeꞌe, chi ndítaxi i mií i ya kuvi i xaꞌa levo sana i, ta sindiꞌi saa nditaku i. 18Nda iin naꞌa küchiñu kindaa ya táku i ndaꞌa i, chi kúu mií i ichí ya taxi i kutaku i. Chi yeꞌe ta íyo ndee ndaꞌa i ya taxi i mií i kuvi i, ta íyo tu ndee ndaꞌa i ya sitaku i mií va i. Ta ichí yóꞌó kua ta̱xi Iva i ndaꞌa i ―káchi Jesús xiꞌin na.
19Tá xi̱ni soꞌo nda naꞌnu nuu na judío tuꞌun ya ndi̱kaꞌan Jesús ta iin ndi̱saka soꞌva tuku ini nda. 20Kuaꞌa ni na káꞌan, káchi na saa:
―Küni soꞌo ndo ya káꞌan ra, tachi nduvaꞌa kúu mií ra yakan ndu̱kiꞌvi ra ―káchi na.
21Saa xa̱á káꞌan sava na, káchi na saa:
―Nda iin na kúu mií tachi nduvaꞌa ta küvi kaꞌan na saa. Tá kúu iin na kúu mií tachi nduvaꞌa, ta küvi sindaꞌa na iin na kuáa̱ ―káchi na.
Kúndasi nuu nda naꞌnu nuu na judío xíni nda Jesús
22Saa ti̱ndaa yoo vixin ni, ta tiempo ikán kua ndítava na judío viko ñuu na Jerusalén, nuu ndíkaꞌán ini na kivi si̱xinu xii na veꞌe ñuꞌu ta ndi̱taxi na ya ndaꞌa Ndioxi. 23Ta xíka Jesús veꞌe ñuꞌu chí ñaꞌñu nuu káꞌan na xiꞌin corredor ra Salomón. 24Saa ndi̱kava nduu nda naꞌnu nuu na judío sata ra, ta ndi̱kaꞌan nda xiꞌin ra, káchi nda saa:
―¿Nda maa vi kua kundaa teꞌe ini nde, tá tu yóꞌo̱ ku Cristo? ta iin teteꞌe kaꞌan un xiꞌin nde ―káchi nda xiꞌin ra.
25Saa ndi̱kuiin ra káꞌan ra xiꞌin nda, káchi ra saa:
―Xa ndi̱kaꞌan i xiꞌin ndo ta köo ndi̱xiin ndo kandixa ndo yeꞌe. Ndiꞌi seña ya íkan i nuu ndo ya ñaa kua ndíkuiin xaꞌa i ya kúu mií i ichí Iva i Ndioxi yakan vaꞌa íkan i ya. 26Sundi ndóꞌo̱ ta köo xíin ndo kandixa ndo yeꞌe, chi süvi levo sana i ku ndóꞌo̱, tá íyo ya xa ndi̱kaꞌan i xiꞌin ndo. 27Chi levo sana i ta ndíkuni ri tachi i, yakan vaꞌa ndíkundikun ri yeꞌe, ta saa tu yeꞌe va xíni ndiꞌi i ri ikán. 28Ta yeꞌe taxi i kutaku ri ndiꞌi saa tiempo, nda iin ichí ndïꞌi xaꞌa ri, ta ni naꞌa ta nda iin na küchiñu kindaa ri ndaꞌa i. 29Chi Iva i Ndioxi ku ra ta̱xi ri ndaꞌa i. Ta chee ni ra ikán nuu ndiꞌi na, ta nda iin na küchiñu kindaa ri ndaꞌa Iva i. 30Yeꞌe xiꞌin Iva i Ndioxi ta iin ku nde ―káchi Jesús xiꞌin na.
31Saa ti̱in tuku nda judío yu̱ú ya kani nda sata ra kuvi ra. 32Saa ndi̱kaꞌan Jesús xiꞌin nda, káchi ra saa:
―Kuaꞌa ni ya vaꞌa íkan i nuu ndo xiꞌin ndee Iva i Ndioxi. ¿Ta unku ndiꞌi ya ikán kúni ndo kaꞌni ndo yeꞌe xaꞌa? ―káchi ra xiꞌin nda.
33Saa ndi̱kuiin nda káꞌan nda:
―Süvi xaꞌa nda iin ya vaꞌa íkan un kua kúni kaꞌni nde yóꞌo̱. Xaꞌa ya ndi̱kaꞌan un kúu un Ndioxi kua kaꞌni nde yóꞌo̱. Chi ra ivi yóꞌó ku un, ta káꞌan un kúu un Ndioxi ―káchi nda xiꞌin ra.
34Saa ndi̱kuiin Jesús káꞌan ra:
―Iin ñaꞌñu nuu ley ya íyo ndaꞌa ndo káchi ya: “Yeꞌe káꞌan ndioxi vali ku ndo”, káchi Ndioxi xiꞌin xii yo xinaꞌa. 35Ta xíni yo tuꞌun Ndioxi ta küvi ndikuaa yo ya káꞌan ya. Mií Ndioxi ku ra ndi̱kaꞌan xaꞌa nda ndi̱kaꞌan ndoso tuꞌun yuꞌu ra, ya kúu nda ndioxi vali. 36Ta mií ra ku ra nda̱sa i̱í yeꞌe ta ti̱ꞌvi ra yeꞌe vaxi i ñuu ivi yóꞌó. Ta ¿ndachu káꞌan ndo xaꞌa i ya kánaꞌa i xaꞌa Ndioxi chi ndi̱kaꞌan i kúu i Seꞌe Ndioxi? 37Tá tu süvi chiñu Ndioxi ku ya íkan i, ta vaꞌa kändixa ndo yeꞌe. 38Tá tu xáa súvi i chiñu Iva i, ta vaꞌa kandixa ndo ya ikán, vani ná kändixa ndo yeꞌe. Tá tu kándixa ndo ya íkan i, ta saa kundaa ini ndo ya íyo Iva i xiꞌin i, ta yeꞌe íyo i xiꞌin ra ―káchi Jesús xiꞌin nda.
39Saa ku̱ni tuku nda tiin nda ra, ta köo ndi̱kuchiñu nda tiin nda ra, ndi̱saña ra ndaꞌa nda kuaꞌan ra.
40Saa ndi̱kiꞌin tuku Jesús kuaꞌan ra inka ñaꞌñu yuꞌu ita Jordán. Ikán ndi̱ndoo ra nuu ndi̱xiyo ra Juan si̱kuchi ra naꞌa yachi. 41Ta kuaꞌa ni naꞌa kuaꞌan nuu ra, ta káꞌan xiꞌin taꞌan na, káchi na saa:
―Ya ndixa kua ra Juan, ta nda iin yatuꞌun Ndioxi köo ndi̱kan ra, sundi ndiꞌi ya ndi̱kaꞌan ra xaꞌa ra yóꞌó, ta ya ndaa kua ―káchi na.
42Ta kuaꞌa ni na ndi̱xaa nuu Jesús yuꞌu ita Jordán ikán ka̱ndixa ñaꞌa na.
Active: ©Wycliffe Bible Translators, Inc. All rights reserved.