Jọn 2
2
Ọha Ne A Rhiere Vbe Kana
1A ghi tie ẹre nẹghẹdia nọ, iran keghi ru irhiọha vbe Kana ne Galili. Iye Jesu keghi rre evba. 2Iran keghi vbe tie Jesu kevbe avbe erhuanegbe ẹre ye nene irhiọha. 3Iran ghi da ayọn ne ọ rrọọ hia fo nẹ, iye Jesu keghi do tama rẹn wẹẹ, “Iran i ghi mwẹ ayọn!”
4Jesu wanniẹn wẹẹ, “Okhuo, ghẹ tama mwẹ emwi ne I gha ru. Ẹghẹ mwẹ ma he sẹ.”
5Iye Jesu keghi tama avbe eguọmwadia wẹẹ, “Emwi ne ọ rhirhi wẹ ne uwa ru, wa ru ẹe.”
6Avbe Ju ru emwi ọkpa, iran mwẹ vbene iran lele ọba kpe emwi hia hẹ. Iran keghi rhunmwuda ọnii viọ akhe amẹ ne a ya okuta ma ye evba, ọkpọkpa vbọ gha sẹtin gua egalọn ugie ya sẹ ọgban. 7Jesu keghi tama avbe eguọmwadia wẹẹ, “Wa sa amẹ vuọn avbe akhe na,” iran keghi sa amẹ vuọn ehia sẹ unu. 8Iyeke ọnii, ọ tama iran wẹẹ, “Wa sa vbe amẹ nii mu gie ọwaemwi.” Iran keghi gele sa mu bu ẹre. 9Rẹn keghi danmwẹ amẹ ne ọ khian ayọn ni, ọ ma rẹn ehe ne ọ ke rre, (sokpan avbe. eguọmwadia ni sa amẹ nii rẹnrẹn); rhunmwuda ọnii, rẹn keghi tie ọdafẹn ọha. 10Ọ tama rẹn wẹẹ, “Ayọn ne ọ maa sẹ ọre emwa nia ka mu rre ne a gha da, emwa ne a tiere ghẹ ghi da nẹ ẹsẹse, ọ ke do mu ayọn kẹkan ye otọ. Sokpan wẹ keghi ya mu ayọn ne ọ maa na hinrre usin.”
11Jesu keghi winna iwinna ọyunnuan ne okaro na vbe uwu avbe iwinna ọyunnuan nekhua hia ne ọ winnaẹn, vbe Kana ne Galili, rẹn keghi rhie uyi ẹre maa vbe evba, avbe erhuanegbe ẹre keghi yae yi.
12Vbe iyeke emwi na, Jesu kevbe iye ẹe, kevbe etiọnrẹn ne ikpia kevbe avbe erhuanegbe ẹre kegha rrie Kapaniọn, iran keghi ya gbe ikpẹdẹ eso vbe evba.
Jesu Yo Ọgua Osa
(Matiu 21:12-13; Mak 11:15-17; Luk 19:45-46)
13Emwiukpo avbe Ju ne iran tie ẹre Alagberra ghi bu otọ, Jesu kegha rrie Jerusalẹm. 14Rẹn ghi sẹ uwu Ọgua Osa ọ keghi do vba iran ni khiẹn emwi irri, avbe ohuan, kevbe elikhukhu deba iran ni rọ igho, iran tota ke eteburu iran. 15Rẹn keghi rhie irri ne a bare ya ru asan, ọ keghi khulo avbe aranmwẹ nii hin uwu Ọgua Osa rre, avbe ohuan kevbe emwi irri nii, ọ keghi ya eteburu iran ni rọ igho uhunmwu rhu, ọ na zagha igho ni rrọọ kua. 16Ọ keghi tama iran ni khiẹn elikhukhu wẹẹ, “Wa viọ iran hin emwa rre, wa ghẹ ya owa Erha mwẹ khian ẹki.” 17Avbe erhuanegbe ẹre keghi do yerre ighe ebe tae nẹ wẹẹ, “Ẹmwẹ owa ruẹ gha fian mwẹ re Osanobua, ọ ghi ye vbe erhẹn vbe uwu imẹ.”
18Avbe Ju keghi bu ẹre gha dee, iran nọ rẹn wẹẹ, “De iwinna ọyunnuan ne u gha sẹtin winna ya rhie ma ima ighe u mwẹ asẹ ne a ya ru emwi na?” 19Jesu wanniẹn, “Wa dunmwu owa Osanobua na uan, I gha dọlọ ẹe bọọ vbe ikpẹdẹ eha.”
20Iran wanniẹn wẹẹ, “Ikpẹdẹ eha ọre u wẹ u gha ya dọlọ ẹe bọ? Ukpo enẹirrọ vbe ekigbe siyeha, ọre a ya bọ Ọgua Osa na.”
21Sokpan Ọgua Osa ọghe ikinegbe irẹn tobọ irẹn Jesu gha kha. 22Ugbẹn vbe a ghi huẹn ọnrẹn kpaegbe nẹ vbe orinmwi, avbe erhuanegbe ẹre keghi do yerre ighe ọ ta ẹmwẹ na, iran keghi do ya ẹmwẹ ebe kevbe ẹmwẹ ne Jesu guanrẹn yi.
Jesu Rẹn Emwa Hia
23Ẹghẹ ne Jesu na gha rre Jerusalẹm vbe ẹghẹ Emwiukpo Alagberra, emwa ni bun keghi wa ya ẹe yi vbe iran miẹn iwinna ọyunnuan ni bun ne ọ winnaẹn. 24Sokpan Jesu ma ye egbe yan iran rhunmwuda ọ rẹn emwa hia ẹsẹse. 25Ẹ i re ne ọmwa vbe gha ta otọ vbene emwa ye hẹ ma rẹn rhunmwuda, rẹn rẹn emwi ne ọ rre dọmwadẹ ọghọe ekhọe ẹsẹse.
@ The Bible Society of Nigeria, 1996