Gẹnẹsis 12
12
Osanobua Tie Ebram
1E Nọyaẹnmwa keghi tama Ebram wẹẹ, “Kpao vbe ẹvbo ruẹ rre, sẹ avbe etuẹn rae kevbe owa erha a, ne u gha rrie ẹvbo ne I gha rhie ma ruẹn. 2I gha viọ uniẹn nibun nuẹn, ni gha do khian avbe okpẹvbo. I gha fiangbuẹ, I ghi do ya eni ruẹn khian ne ọ hin usi sẹrriọ wẹ a ghi gha yae na erhunmwu ne ọmwa.
3“I gha fiangbe iran ni fiangbuẹ
Sokpan I ghi tie ihẹn ne ne ọ tie ihẹn nuẹn
Vbe ekpa ruẹ, ọre I gha na fiangbe uhunmwu otọ agbọn hia.”
4Ebram ghi rre ukpo isẹn-irrọvbe iyenẹ, ọ keghi si kpao hin Haran rre zẹ vbe ne Nọyaẹnmwa wẹ ne ọ ru, e Lọt kevbe lelẹe gha khian. 5Ebram keghi rhie Sera ne amwẹ ọnrẹn, e Lọt ne ovbi ọtiọnrẹn, ẹfe ne irẹn mwẹ hia, ne iran khuan ẹn vbe Haran, kevbe eviẹn ọnrẹn hia iran keghi si okhian gha rrie Kenan. 6Ebram kegha lele otọe nii khian rhinrin ọ te do sẹ erhan iruemwi ọghe Morẹ vbe ẹvbo nọhuanrẹn ọghe Siẹkẹm (vbe ẹghẹ ne a kha na, te ivbi e Kenan he ye rre otọe nii).
7E Nọyaẹnmwa keghi rhie egbe ma Ebram, ọ na tama rẹn wẹẹ, “Ẹvbo ne I khian mu ne uniẹn ruẹn ọre ọna khin.” Ebram keghi bọ aka ye evba ne Nọyaẹnmwa ne ọ rhie egbe ma rẹn. 8Vbe iyeke ọnii, ọ keghi la ghe odẹ ekẹn ọghe oke ne ọ rre odẹ ahọ ọghe Bẹtẹl, ọ na bu agọ ye ẹkpo Bẹtẹl vbe orrie kevbe Ai vbe ahọ. Ọ kevbe bọ aka ye evba, ọ na ya uhunmwu rhanmwẹ otọ ne Nọyaẹnmwa. 9Ebram keghi laghe odẹ ekẹn, ọ keghi khian ke agọ ọkpa dinna ọvbehe vbe odẹ ne ọ laghe otọe Kenan.
Ebram Vbe Igipt
10Sokpan ukhunmwu kegha fi vbe Kenan, ọ keghi tua sẹrriọ wẹ, Ebram keghi ye khian sikẹ odẹ okuọ, yasẹ Igipt ne ọ ya yin evba vbe omwa ẹghẹ eso. 11Ugbẹn vbe ọ ghi khian fian uwu gberra la Igipt, ọ keghi tama Sera ne amwẹ ọnrẹn wẹẹ, “Danmwehọ, okhuo nọ mose ọ re u khin. 12Avbe emwa Igipt gha miọn, iran gha kha wẹẹ, ‘Ọvbokhan mwẹ ọre u khin rhunmwuda ọnii,’ iran ghi gbe mwẹ uan, iran ghi sẹ uwẹ rae ye agbọn. 13Tama iran ighẹ ọtẹn mwẹ nokhuo ọre u khin, ẹghẹ nii, iran ghi rhunmwuda ruẹ sẹ mwẹ rae ye agbọn, iran ghi gha ya obọ esi mu mwẹ.”
14Ugbẹn vbe ọ ghi fian uwu rra la Igipt, avbe emwa Igipt, keghi miẹn wẹ amwẹ ọnrẹn wa mose. 15Avbe ewọe eso keghi ya tama ọba vbene ọ mose hẹ. Iran keghi rhie ẹre gha rrie ẹguae. 16Ọba keghi rhunmwuda ẹre gha ya obọ esi mu Ebram, ọ keghi viọ oghẹn ohuan kevbe ọghe ẹwe naẹn kevbe avbe ẹmila kevbe ẹsin kevbe eviẹn kevbe ekẹtẹkẹtẹ. 17Sokpan, rhunmwuda ighẹ Fero rhie Sera, Nọyaẹnmwa keghi gie avbe emianmwẹ dan bu ẹre kevbe emwa ẹguae ẹre hia.
18Ẹghẹ nii, ọba keghi gie ne a tie Ebram, ọ nọ rẹn wẹẹ, “U miẹn emwi ne u si yọ mwẹ egbe, vbọzẹ ne u ma na tama mwẹ wẹ amwọn nọ? 19Vbọzẹ ne u na kha wẹ ọtuẹn nokhuo nọ ne u na gunmwẹ rhie ẹre zẹ vbe ọvbokhan mwẹ? Ghe amwọn vba, rhie ẹre ne u ladian.” 20Ọba Fero keghi tama avbe emwa rẹn, iran na mu Ebram, iran keghi rhie ẹre hin ẹvbo rre kẹe kevbe amwẹ ọnrẹn kevbe emwi ne ọ mwẹ hia.
@ The Bible Society of Nigeria, 1996