Mateo 6
6
Katar e esmola
1“Na cheren o lachipe angla e manusa samo te sai dikken pe tumende; soke te cherena gia, tumaro Dad kai si ando miloso ni ka del tumen te dobin niso.
2“Goleke kana ka pomozi e chorren, na ppenle saurrenge gia sar cherenle e llene kai si kojamne kai cheren gala ezgode ande kkanllira e judionenge ta pe droma te sai den orba lache lendar e llene; chachimaia ppenau tumenge kai gole ezgodaia kai cheren ia si len so te dobin. 3Goleke tu kana ka pomozi e chorren, na ppenle nikake, 4cherle po chorial, ta cho Dad kai dikkel so chere po chorial, ka del tut so te dobi angla e llene.
O molipe
(Lk 11.2-4)
5“Kana ka moli tut, na cher tut sargo e llene kojamne, soke lenge si drago te molinpe pe porrne ande kkanllira e judionenge ta i pe droma te sai dikken len e llene; chachimaia ppenau tumenge kai gole ezgodaia kai cheren ia si len so te dobin.#Mt 23.5; Lk 18.10-14. 6A tu kana ka moli tut, de andre ande chi soba, ppande o udar ta molisao che Dadeke po chorial, ta cho Dad kai dikkel so chere po chorial, ka del tut so te dobi angla e llene.
7“Ta kana ka moli tut, na ppen isto gola alava suako drom gia sar cherenle gola kai inai judiura, kai mislinpe kai pala pe but alava o Del ka asunel len. 8Na cheren tumen sargo von, soke tumaro Dad llanel save ezgode trubul tumen mai anglal te mangen len. 9Tumen ka molintumen gia:#cf. Lk 11.2-4.
‘Amaro Dad#Is 63.16; 64.8. kai san ando miloso,
blagosime te avel cho anau.
10Te avel chi charoina,
te cherdol chi volia pe ppuv
gia sar cherdol ando miloso.
11De amen allive o marrno kai trubul amen.
12Ta prostisar o bilachipe kai chera,
gia sar prostisara i amen e llenen
kai cherde amenge o bilachipe.
13Na ttou amen ando zumadipe,#cf. Mt 26.41; 1 Ko 10.13; Stg 1.12-14.
mai lache braduisar amen katar o bilachipe.’
(Soke chiri si e charoina
e zor ta o baripe sa e bursenchar.
Gia te avelpe.)
14“Goleke, te prostina o bilachipe kai cheren tumenge e manusa, tumaro Dad kai si ando miloso ka prostil i tumaro bilachipe;#Mt 18.35; Mk 11.25; Efs 4.32. 15a tumen te na prostina o bilachipe kai cheren tumenge e manusa, ni tumaro Dad ni ka prostil tumaro bilachipe.
O Jesus del orba katar o alluno
(Lk 6.27-28,32-36)
16“Kana tumen ka allunin#2 Krn 20.3; Jl 2.12-15. na ttoven iek mui zalbako sargo e llene kojamne kai triston pe muia te sai sikaven e manusenge kai von allunin; chachimaia ppenau tumenge kai len ia si len so te dobin. 17Goleke tu kana ka alluni, chingar che bal ta jalau cho mui, 18te na sikave e manusenge kai alluni, samo cho Dad ka llanel le, ta cho Dad kai dikkel so chere po chorial ka del tut so si te dobi.
O barvalipe ando miloso
(Lk 12.33-34)
19“Na cheren tumenge barvalipe pe ppuv, kate kai e papuruga ta e pauzina zatrin ta kai e chor den ta vazden; 20mai lache si te cheren tumenge barvalipe ando miloso, kote kai ni e papuruga ni e pauzina ni zatrin, ta kote kai e chor ni den te choren. 21Soke kote kai si cho barvalipe, i kote ka avel cho lio.
O villelo e esnagako
(Lk 11.34-36)
22“E akka si o villelo e esnagako; goleke che akka te si lache, sa chi esnaga ka avel la villelo 23A te si che akka bilache, sa chi esnaga ka avel ando truñariko. Goleke, o villelo kai si ande tute te si truñariko, ¿sar avela isto o truñariko?
O Del ta o barvalipe
(Lk 16.13)
24“Niko nasti radil duie gazdenge, soke ka murzil pe iek ta ka volil ogole; o ka kandel iekke a ogoleke ni ka ttovel sama. Nasti radilpe e Devleke ta i e barvalimake.
E vera ando Del
(Lk 12.22-31)
25“Goleke me ppenau tumenge: Na brigin tumen pala so ka jan te zivin ni pala e patave soia ka premenin tumen; ¿Ni mol o zivoto mai but neko o jape ta e esnaga mai mol neko e patave? 26Dikken pe chiriklia kai furian, ni ttoven e simiche ande ppuv ta ni chiden len ande sobe ta isto gia tumaro Dad kai si ando miloso del len te jan. ¿Ni mol tumen mai but neko e chiriklia? 27A vareko i mai te brigilpe, ¿sar ka cherel te zivil iek saiato mai but?
28“Ta katar e patave, ¿soke triston tumen? Ttoven sama sar barion e lulunlla katar o vos kai ni radin ta ni cheren peke patave; 29a ppenau tumenge kai ni o charo o Salomon sa pe barimaia#1 R 10.4-7,23. ni furiadilo sargo iek lulunllin. 30A o Del te furiavel gia o zelelenipe kai allive si ando vos ta ttiara ppabardol ande furnava, ¿ni ka furiavel mai but tumen, manusalen kai inai tumen pachape? 31Goleke na triston tumen, ta na ppenen: “¿So ka ja, o so ka pia, o so ka ttova pe amende?” 32Sa gala si e ezgode kai brigin e llenen kai ni pachan ando Del, a tumen si tumen iek Dad ando miloso kai llanel sa so trubul tumen. 33Goleke, roden mai anglal e charoina e Devleki ta leko chachipe, ta i sa gala ezgode ka aven tumenge dine. 34Goleke na triston tumen katar o llive kai si te avel, soke o llive kai si te avel ka anel e brige. Dosta suako lliveseke leko bilachipe.
Nuevo Testamento en Romané © Sociedad Bíblica Chilena, 2007.