Mateo 4
4
O Jesus zumado
(Mk 1.12-13; Lk 4.1-13)
1Ondaka o Duo e Devleko inllarda e Jesuse po pusto te sai zumavel le o llavolo.
2Kote achilo saranda llive ta saranda racha, ta bokkailo.#Dt 8.2-4. 3Ondaka o llavolo avilo pasa le, ta ppenda leke:
—Te san chachimaia o Chavo e Devleko, ppen gale barrenge te cherdon marrno.
4A o Jesus ppenda leke:
—Ando Pisipe ppenel gia: ‘Na samo e marnetar ka zivil o manus, o manus zivil i katar suako alau kai likel katar e Devleko mui.’#Dt 8.3.
5Ondaka o llavolo inllarda le ando santo foro katar o Jerusalem ta ttoda le upral po ttan mai vazdino katar o cher e Devleko, 6ta ppenda leke:
—Te san chachimaia o Chavo e Devleko, chude tut tele, soke ando Pisipe ppenel gia:
‘O Del ka bichalel pe suechonen te arakken tut,
ta ka vazden tut pe vastenchar
te na eskombal cho porrno pe ni iek barr.’#Sal 91.11-12.
7A o Jesus ppenda leke:
—Ta i ando Pisipe ppenel gia: ‘Na ttou ando zumadipe e Gazda kai si cho Del.’#Dt 6.16.
8Mapalal o llavolo inllarda le pe iek burdo but baro, ta sikada leke sa e ppuvia e suetoke ta lengo baripe, 9ta ppenda leke:
—Me ka dau tut sa gala ezgode, te dea changa ta te blagosia man.
10A o Jesus ppenda leke:
—Llatar llavolo, soke ando Pisipe ppenel gia: ‘Blagosisar e Gazda kai si cho Del, ta radisar samo leke.’#Dt 6.13.
11Ondaka o llavolo mukla le, ta avile e suechura te pomozin le.
E Jesuseko rado llal angle
(Mk 1.14-15; Lk 4.14-15)
12Kana o Jesus asunda kai ppangle e Juane,#14.3-4; Mk 6.17-18; Lk 3.19-20. irisailo ande Galilea. 13Ta ni achilo ando Nazaret, vou llelo ando Kafernaum, kote beslo ande iek foro kai saia pasa e mora; ande ppuv katar o Zabulon ta katar o Neftali. 14Gala ezgode nakkle te sai cherdol so ppendaia o porauko o Isaias kana ppenda:
15“E ppuv katar o Zabulon, ta e ppuv katar o Neftali;
o drom kai llal kai e mora
pe o goia rig katar o Jordan
ande Galilea, kote kai zivin e llene kai inai judiura.#Is 9.1-2.
16O foro kai besela ando truñariko,
dikkla iek baro villelo;
gola kai besena ando truñariko merimako,
o villelo sikadilo lenge.”
17Sar kotar o Jesus ttoda te ppenel: “Irin tumen katar tumare bilache droma, soke e charoina e Devleki si pase.”#Mt 3.2; 10.7.
O Jesus ikkarel staren macharia
(Mk 1.16-20; Lk 5.1-11)
18O Jesus ppirela pasa e mora e Galileaki ta dikkla duie pplalen; e Simono, kai ikkarena le Pedro ta e Andrese. Von sea macharia ta chudena e mreza ande mora. 19Ta o Jesus ppenda lenge:
—Aven pala ma ta ka cherau tumen macharia manusenge.
20Ondaka von mukle isto kote pe mreze, ta lleletar lea.
21O Jesus llelo mai angle ta dikkla duie pplalen ios: E Santiago ta e Juane chave e Zebedeoke, von sea pe dadea ande iek llimia ta lacharena pe mreze ta o Jesus ikkarda i len, 22Ta isto kote kana ikkarda len, mukle e llimia ta i pe dade ta lleletar lea.
O Jesus sikavel e sueto
(Lk 6.17-19)
23O Jesus llala ande sa e ppuv katar e Galilea, ta sikavela ande kkanllira e judionenge, ta dela orba katar e lachi viasta, katar e charoina, ta i sastarela e manusen katar sa lengo nasualipe ta i katar sa lenge dukka kai saia len ando foro.#Mt 9.35; Mk 1.39. 24Ta lleli leki viasta ande sa e ppuv katar e Siria, ta anena lete sa golen kai sea nasuale o kai dukkala len vareso, ta i golen kai sea e llavolura ande lende, ta i gola kai perena bengendar, ta i golen kai nasti ppirena, ta o Jesus sastarela len.
25Pala le llala but sueto katar e Galilea, katar e Dekapolis, katar o Jerusalem, katar e Judea, ta i katar o goia rig katar o Jordan.#Mk 3.7-8.
Nuevo Testamento en Romané © Sociedad Bíblica Chilena, 2007.