Nai Vakatekivu 24
24
Sa tala e dua ko Eparaama me qara e dua me wati i Aisake, 1-11. Sa masu na tamata me yaco na nona talai, 12-14. A sa yaco, 15-60. Sa lako kei na tamata ka Repeka, a sa yaco me wati i Aisake, 61-67.
1A SA qase mai ko Eparaama, sa vuqa na nona yabaki: a sa dauvakalougatataki Eparaama oti ko Jiova e na ka kecega. 2A sa kaya ko Eparaama vua na nona tamata sa qase e nona vale, o koya ka lewa na nona ka kecega, Mo daramaka mada na ligamu ki ruku ni sagaqu; 3ia kaʼu na cakavi iko mo vosavavakini vei Jiova, o koya na Kalou kei lomalagi, kei na Kalou kei vuravura, ka mo kakua kina ni kauta e dua me watina na luvequ maivei ira na gonealewa ni Kenani, ko ira kaʼu tiko e na kedra maliwa: 4ia mo lako ki na noqu vanua, ia vei ira na wekaqu, ka kauta maikina e dua me watina na luvequ ko Aisake.
5A sa kaya vua na tamata ko ya, Kevaka sa na sega ni via muri au mai ki na vanua o qo na alewa: meʼu kauta tale vakaidina beka na luvemu ki na vanua ko a lako maikina?
6A sa kaya vua ko Eparaama, Mo qarauni iko mo kakua ni kauta tale kikea na luvequ. 7O Jiova, o koya na Kalou kei lomalagi, o koya ka kauti au tani mai na vale i tamaqu, kei na nodra vanua na wekaqu, ia ko koya ka vosa vei au, ka vavakini vei au, ka kaya, Au na solia na vanua o qo vei ira na nomu kawa; o koya ena talaka na nona agilose me liu-taki iko; ia ko na kauta maikina e dua me watina na luvequ. 8Ia kevaka sa na tawa via muri iko mai na alewa, ko na tawa cala ga e na vuku ni noqu vosa vavakini o qo: ia mo kakua ga ni kauta tale kikea na luvequ. 9A sa daramaka na ligana na tamata ki ruku ni saga i Eparaama na nona turaga, a sa vosavavakini vua e na vuku ni ka ko ya.
10Ia na tamata ko ya ka kauta e tini na kameli vei ira na kameli ni nona turaga, a sa lako; (ni sa veitaliataka ko koya na yau kecega ni nona turaga;) a sa ia, ka lako ki Mesopotemia, ki na koro i Neori. 11A sa cakava na nona kameli me ra tekiduru sobu e nai bili ni koro, mai na dua nai keli ni wai, e na gau ni siga ni sa yakavi mai, io e na gau ni siga era sa daulako yani kina na alewa me taki.
12A sa kaya, I Jiova, na Kalou i Eparaama na noqu turaga, au masuti iko, mo vakayacora vei au e na siga o qo, ka caka loloma vei Eparaama na noqu turaga: 13raica, au sa wavu tu mai nai keli ni wai; a ra na lako mai na nodra gonealewa na lewe ni koro me taki wai: 14ia me yaco, na gonealewa kaʼu na kaya vua, Me tauca sobu mada na nomu saqa, meʼu gunu; a sa kaya ko koya, Mo gunu, kaʼu na vagunuvi ira talega na nomu kameli: me sai koya mada ko sa lesia me nona na nomu tamata ko Aisake; ia kaʼu na kila kina ni ko sa caka loloma vua na noqu turaga.
15A sa yaco, ni sa tawa vosa oti ko koya, raica, sa lako mai, a sa colata tu na nona saqa, ko Repeka, o koya sa sucu vei Pecueli, na luve i Milika, na wati i Neori, na tuaka i Eparaama. 16A sa matavinaka sara na gonealewa ko ya, a gonealewa dina, ni sa sega na tagane erau veikilaki kaya; a sa lako sobu ki nai keli-wai, ka vakasinaita na nona saqa, ka lako cake mai. 17A sa cici na tamata me laʼki tavaki koya, a sa kaya, Mo vagunuvi au mada vakalailai e na wai mai na nomu saqa. 18A sa kaya ko koya, Mo gunu ga, noqu turaga: a sa kusarawa, ka tukuca sobu ki na ligana na nona saqa, ka vagunuvi koya. 19Ia ni sa vagunuvi koya oti, sa kaya, Au na taki vei ira talega na nomu kameli, ka me ra mamau mada. 20A sa kusarawa ko koya, ka sova na nona saqa ki loma ni gunugunu ni manumanu, ka cici tale ki nai keli-wai me taki, a sa taki vei ira kecega na nona kameli. 21A sa kidacalataki koya na tamata, ka tiko lo, ka me kila se sa vakayacora na nona talai ko Jiova, se segai.
22Ia ni ra sa gunu oti na kameli, sa taura na tamata e dua na sau koula, na kena bibi e dua na wase ni sikeli ni sa wase rua, ka rua na qato ki na ligana, e tini na sikeli koula na kedrau bibi; 23a sa kaya, A luve i cei ko iko? mo tukuna mada mai vei au; e dua beka na tikina e na vale i tamamu me keitou moce kina, se segai? 24A sa kaya vua, Oi au na luve i Pecueli, o koya na luvena ka vakasucuma ko Milika vei Neori. 25Sa kaya talega vua, Sa levu vei keitou na co ni sila, kei na kedra na manumanu, kei na tikina me moce kina. 26A sa cuva na tamata, ka soro vei Jiova: 27a sa kaya, Me vakavinavinakataki ko Jiova na Kalou ni noqu turaga ko Eparaama, o koya sa sega ni biuta tani na nona loloma kei na nona vosa dina vua na noqu turaga: koi au, niʼu a lako voli e na sala, sa tuberi au ko Jiova ki na nodra vale na weka ni noqu turaga.
28A sa cici ko koya na gonealewa, ka tukuna vei ira na lewe-ni-vale i tinana na ka o qori. 29A sa dua na gane i Repeka, na yacana ko Lepani: a sa cici ki nai bili vua na tamata ko Lepani, ki nai keli-wai. 30Ia ni sa kunea na sau, kei na qato e na liga i ganena, ka rogoca na vosa i Repeka na ganena, ni sa kaya, Sa vosa vakaoqo vei au na tamata; sa qai lako ko koya vua na tamata; ka raica, sa tu vata kei na kameli mai nai keli-wai. 31A sa kaya ko koya, Mo curu mai, o iko sa kalougata vei Jiova; a cava ko sa tu kina etautuba? niʼu sa vakarautaka oti na vale, kei na tikina me nodra na kameli. 32A sa laʼki curu ki vale na tamata: a sa mai sereki nai vau ni vodovodo ni kameli, a sa soli na co ni sila kei na kedra vei ira na kameli, kei na wai me vui kina na yavana, kei na yavadratou na tamata eratou tiko kaya. 33A sa tauci na kakana e matana: ka sa kaya ko koya, Au na sega mada ni kana, au na tukuna oti mada na noqui tukutuku. A sa kaya ko Lepani, Mo tukuna mada.
34A sa kaya ko koya, Koi au na tamata i Eparaama: 35a sa vakalougatataka vakalevu na noqu turaga ko Jiova, a sa tubu me tamata levu; a sa solia vua e so na sipi, kei na karavau, kei na siliva, kei na koula, kei nai talatala, kei na vada, kei na kameli, kei na asa: 36ia ko Sera, na watina na noqu turaga, sa vakasucuma vua na noqu turaga e dua na luvena tagane ni sa qase mai: a sa solia vua na nona ka kecega. 37A sa kitaki au na noqu turaga meʼu vosavavakini, a sa kaya, Mo kakua ni kauta vua na luvequ e dua me watina maivei ira na gonealewa ni kai Kenani, a nodra vanua kaʼu sa tiko lako kina: 38ia mo lako ga ki na vale i tamaqu, vei ira na noqu mataqali, ka kauta mai e dua me watina na luvequ. 39Kaʼu a mani vaka vua na noqu turaga, De tawa via muri au na alewa. 40A sa kaya vei au ko koya, O Jiova, o koya kaʼu sa daulako voli e matana, ena tala na nona agilose kei iko, ka vakayacora na nomu talai; ia ko na kauta mai e dua me watina na luvequ, mai na noqu mataqali, kei na vale i tamaqu: 41ia ko na qai tawa cala e na vuku ni noqu vosa vavakini, ni ko sa yaco vei ira na noqu mataqali; ia kevaka era sa sega ni solia e dua vei iko, ko na qai tawa cala e na noqu vosa vavakini. 42Ia kaʼu a lako mai edaidai ki nai keli-wai, kaʼu a qai kaya, I Jiova, na Kalou ni noqu turaga ko Eparaama, kevaka ko sa vakayacora na noqu talai kaʼu sa lako mai kina: 43raica, au sa wavu tu mai nai keli ni wai; ia me yaco, na gonealewa sa lako mai me taki, kaʼu sa kaya talega vua, Mo vagunuvi au mada vakalailai e na wai mai na nomu saqa; 44a sa kaya vei au ko koya, Mo gunu mada ko iko, kaʼu na taki talega vei ira na nomu kameli; me sai koya mada na alewa sa lesia ko Jiova vua na luve ni noqu turaga. 45Niʼu sa sega ni vosa oti e lomaqu, raica, sa lako mai ko Repeka, ka colata tu na nona saqa; a sa lako sobu ki nai keli-wai, ka taki mai: kaʼu a qai kaya vua, Mo vagunuvi au mada. 46A sa kusarawa ko koya, ka tauca sobu na nona saqa mai na domona, a sa kaya, Mo gunu; kaʼu na vagunuvi ira talega na nomu kameli. Au a qai gunu, a sa vagunuvi ira talega na kameli ko koya. 47Au a qai taroga, ka vaka, A luve i cei ko iko? A sa kaya, Na luve i Pecueli, na luve i Neori, o koya ka vakasucuma vua ko Milika: au a qai daramaka na sau ki na ucuna, kei na qato ki na ligana. 48Au a qai cuva, ka soro vei Jiova, ka vakavina-vinaka vei Jiova, na Kalou i Eparaama na noqu turaga, o koya ka tuberi au e na sala dodonu, me kauta na luvena alewa na wekana na noqu turaga me wati ni luvena. 49Ia o qo, kevaka dou sa via caka vaka-yalololoma ka dina vua na noqu turaga, dou tukuna vei au: ia kevaka e segai, dou tukuna vei au; ka meʼu gole kina ki nai matau, se ki nai mawi.
50Erau a qai vosa ko Lepani kei Pecueli, ka kaya, A ka o qo sa vakayacora ko Jiova; e dredre ni keitou vosataka vei iko na ka ca se na ka vinaka: 51raica, sa tu e matamu ko Repeka; mo kauta, ka lako, me watina na luve ni nomu turaga, me vaka ka sa vosa ko Jiova. 52Ia ni sa rogoca na nodrau vosa na tamata i Eparaama, sa cuva ki na qele vei Jiova. 53Ia na tamata ko ya sa tara mai na ka sa caka e na siliva, kei na ka sa caka e na koula, kei nai sulu, ka solia kivei Repeka: sa solia talega na ka talei vua na ganena kei na tinana.
54A ratou a kana ka gunu, ko koya kei na tamata eratou tiko kaya, ka moce: a ratou sa tu cake e na sabogibogi, a sa kaya ko koya, Mo dou talai au mada vua na noqu turaga. 55A rau sa kaya ko ganena kei tinana, Me tiko mada vei keitou na gonealewa e na siga e so, se tini beka; me na qai lako ko koya. 56A sa kaya ko koya vei iratou, Dou kakua ni tarovi au, ni sa vakayacora na noqu talai ko Jiova; dou talai au mada meʼu lako vua na noqu turaga. 57A ratou sa kaya, Keitou na kacivi koya mada na gonealewa, ka tarogi koya. 58A ratou a kacivi Repeka, ka kaya vua, Ko na lako kei na tamata o qo, se segai? A sa kaya ko koya, Au na lako. 59A ratou sa qai talai Repeka na wekadratou, kei na nona vada, kei koya na tamata i Eparaama, kei iratou na nona tamata. 60A ratou a vosavakalougatataki Repeka, ka kaya vua, O iko sa weka i keitou, mo na oba vakau-dolu mada, ia me ra rawa na matamata-ni-koro ni nodra meca ko ira na nomu kawa.
61A sa tu cake ko Repeka, kei iratou na nona gonealewa, a ratou sa vodo lako e na kameli, ka muria na tamata: a sa kauti Repeka na tamata, ka lako yani. 62Ia ko Aisake sa lako mai na sala sa lako ki nai keli-wai ko Leai-roi; ni sa tiko mai na vanua ceva. 63A sa lako yani ko Aisake ki na veiwere e na yakavi me vakanana-nu: a sa ta cake e na matana, ka rai yani, ka, raica, sa lako mai na kameli. 64A sa ta cake e na matana ko Repeka, a sa kunei Aisake, a sa qai sobu mai na kameli. 65Ni sa kaya oti eliu ko koya vua na tamata, O cei na tamata o qo sa lako mai e na veiwere me mai tavaki kedatou? A sa kaya na tamata, Ko ya na noqu turaga: a sa qai taura ko koya nai sala ni mata, ka puloutaki koya. 66A sa tukuna vei Aisake na tamata na ka kecega ka cakava ko koya. 67A sa kauti Repeka ko Aisake ki na vale gatu i Sera na tinana, a sa vakabauta me watina; a sa lomani koya: a sa vakalecataki ko Aisake ni sa mate oti ko tinana.
First full Bible in the Fijian language © British and Foreign Bible Society, 1864.