Š. Matéu 2
2
Krie II.
1Ljêr prana Džesúi Betlêm te Juδês nder ditet rregjit Eroδit, njô Mádžerat ka delj díeli érθetin Džerusalêm,
2Tue θẽn: Ku ešt i ljeri rregje i Juδivet? pse pâm ilin e tîje tek delj díeli, e érθetim te aδorarmi.
3Gjegjur prana rregje Eroδi, u‐trubulúa, e gjiθ Džerusalemi me até.
4E mbiéδur gjiθ krerat e príftravet, e skribrat e gjíndies, sakerδíreje ka atá ku Krišti kiš te ljeχej.
5Atá prana i θân: Betlêm te Juδês: pse keštú kje škrúar ka profeti:
6E ti Betlém δeu i Juδes, nẽng jê mé e vógelja nder krerat e Juδes: pse ka ti delj nje krie, tše kat rúanje gjíndien time Israélin.
7Aχíera Eroδi, θerritur fšéχura Mádžerat, me kuidéš skaliói ka atá motin e ilit dâlje:
8E dergúar atá Betlêm, θa: Vatur, píeni mîr mîr per diáljin: e pra tšé e gjéteši, bẽni te dî, se eδé ú te vĩ̂nje te aδorárenje.
9Atá prana gjegjur rregjin u‐nísetin. E njô ili, tše pân ka delj díeli, i vêje perpara, njera tše tue arδur kjindrói siper, ku iš diálji.
10Pâr prana ilin χezúan me nje χarê te maδe šûm.
11E χíjetur te špia, gjétetin diáljin me Maríen jemen e tîje, e uljur pergjunja e aδorartin: e χapur terzoret e tire i ndéitin rrigalje, âr, ljiván, e mîrr.
12E porsitur tše kjên nd’ ẽnderr te mos priršin tek Eroδi, per njater ûδ u‐mbióθtin te δeu tire.
13Mbiéδur prana tše kjên atá, njô ẽ́ngjeli Tinzoti i buθtonet nd’ ẽnderr Sepes, tue θẽn: Ngréitur, mirr diáljin, e te jémen e tîje, e ike nd’ Edžitet, e rri atié njera kûr te te θom. Pse Eroδi kat vê tue kerkúar diáljin te vrâs.
14Aí prana ngréitur múar diáljin, e t’ jemen e tîje naten, e u‐mbióθ nd’ Edžitet.
15E iš atié njera kûr vedikje Eroδi: se t’ iš e bẽn e θẽna ka Inzót per profeten tše θot: Ka Edžiti θerrita birin tim.
16Aχíera Eroδi pâr se kiš kjen i kjeltur δûn ka Mádžerat, u‐θimós kekj, e dergúar vrau gjiθ diáljerat, tše išen Betlêm, e nder gjiθ jirat e sâje di viétše e mê t’ vígjelje, si moti tše kiš dzẽn ka Mádžerat.
17Aχíera u‐bê tše u‐θa ka Džeremía profeti tše θot:
18Nje vûdže u‐gjekje Rrâm, te kjâr e θírrema e rekime šûm: Rrakélia tue kjâr biljt e sai, e ẽng diš te gjégjeneje pušîm, pse nẽng jân.
19Vdekur prana Eroδi, njô ẽ́ngjeli Tinzoti nd’ ẽnderr i buθtonet Sepes nd’ Edžitet,
20Tue θẽn: Sgjúar, mirr diáljin, e te jemen e tîje, e ets te δeu Israélit: pse vdíkjetin atá, tše kerkojen gjelen e diáljit.
21Aí prana sgjúar, múar diáljin, e te jemen e tîje, e erθ te δeu Israélit.
22Gjegjur prana se Arkeláu ešt rregje nde Juδêt per Eroδin te jatin e tîje, u‐trẽmb te vêje atié: e i porsitur n’ ẽnderr, u‐mbióθ nd’ anat Galilês.
23E arδur mbet te χora tše θeχet Nádzaret: se t’ iš e bẽn tše u‐θa ka profetrat: Se Nadzaréu kat jêt i θerritur.
Përktheu nga greqishtja 1869.